Au Uianga a te Aronga Tatau

Kua akakite te apotetoro ko Paulo e ka ‘ora katoatoa a Iseraela.’ (Roma 11:26) Te karanga ra ainei aia e, a tetai atianga ka taui te au ngati Iuda katoatoa ei Kerititiano?

Kare, kare a Paulo e tuatua akapera ra. Ei iti tangata, kua kopae te uanga tikai o Aberahama ia Iesu ei Mesia. E i te au mataiti i muri mai i to Iesu mateanga, kua papu e kare te au ngati Iuda katoatoa e taui ei Kerititiano. Inara, kua tika rai ta Paulo akakiteanga e ka ‘ora katoatoa a Iseraela.’ I teea tu ra?

Kua akakite a Iesu ki te au arataki akonoanga ngati Iuda i tona tuatau e: “E apai keia te basileia o te Atua nei ia kotou, e tukuia atu ki te aronga e akaua mai i te ua ra.” (Mata. 21:43) No te mea e kua kopae te katoaanga o te iti tangata Iseraela ia Iesu, i reira kua tanga a Iehova ki tetai iti tangata ou, e iti tangata vaerua. Kua kapiki a Paulo i teia iti tangata e ko “te Iseraela o te Atua.”​—Gala. 6:16.

Kua akapapu mai tetai atu au ngai i roto i te au Tuatua Tapu Ereni Kerititiano e ko “te Iseraela o te Atua” e 144,000 au Kerititiano akatainuia ratou e te vaerua. (Roma 8:15-17; Apo. 7:4) E kua akapapu mai a Apokalupo 5:9, 10, e kua kapitiia mai te aronga kare i te ngati Iuda ki teia pupu, tei akaari mai e ko te au Kerititiano akatainuia no “roto i te au kopu ravarai, e te au reo katoa, e te au iti-tangata katoa, e te pa enua katoa.” Kua iki tikaiia te au mema Iseraela vaerua ‘ei ui ariki e ei kau taunga e e riro ia ratou te au i teianei ao.’ Noatu e kua kopae a Iehova ia Iseraela ei iti tangata ikiia, ka rauka ra i te au tangata tataki tai i te akapiri atu kiaia. Ko tera tei tupu ki te au apotetoro e tetai au Kerititiano mua e manganui. E tika rai, mei teia au ngati Iuda e te au tangata ravarai, ka anoanoia kia okoia e te toto o Iesu Karaiti.​—1 Timo. 2:5, 6; Ebe. 2:9; 1 Pete. 1:17-19.

Noatu e kua ngere te manganui o te ngati Iuda kopapa i te anere mataiti mua i te tikaanga kia riro ei aronga tutara ma Iesu, kare ra te akakoroanga o te Atua i kore. Kare rava e rauka kia takoreia te reira, no te mea kua akakite a Iehova na roto i tana peroveta e: “Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”​—Isa. 55:11.

Ko te tika rai ia i te akakoroanga o te Atua, kia akatinamouia e 144,000 aronga tutara i te pae i tana Tamaiti i runga i te rangi. Kua akataka papu mai te Pipiria e ka akatainu te Atua i te numero katoa e 144,000 o te reira aronga. Kare okotai o ratou e ngaro!​—Apo. 14:1-5.

No reira, i te tataanga a Paulo e ka ‘ora katoatoa a Iseraela,’ kare aia e totou ra e ka taui te katoatoa o te ngati Iuda ei Kerititiano. Inara, te akakite ra aia e ka akatupuia te akakoroanga o te Atua kia tutara kapiti e 144,000 o te Iseraela vaerua e Tana Tamaiti ko Iesu Karaiti i runga i te rangi. Me tae te tuatau i akakoro ei a Iehova, ko te numero katoa​—te ‘katoatoa o Iseraela’​—tei roto i tetai turanga akaoraia, taopenga mai te tutaraanga ei ui ariki e ei kau taunga i roto i te Patireia o te Mesia.​—Ephe. 2:8.

[Au Tutu i te kapi 28]

Te aere maira te aronga akatainuia no “roto i te au kopu ravarai, e te au reo katoa, e te au iti-tangata katoa, e te pa enua katoa.”