Kia Maroiroi Noatu te Au Tu Paruparu

KA AKAAPIAPI toou au tu paruparu ia koe. Ka pipiri mai te reira ki runga ia koe mei te au toke akangote toto rai. Penei te manako ra koe e kare rava e rauka ia koe i te kopae i te reira, me kore te manako ra koe e kare koe e tau ana, i te akaaite anga ia koe uaorai ki tetai ke e te iki anga e e meitaki atu tetai ke ia koe. I tetai tua, penei te akakoromaki ra koe i tetai maki kino roa atu te akaparuparu ra i toou maroiroi e te mataora no te oraanga. Noatu e eaa te tumu, i toou akaraanga kare aau ravenga ke atu. Penei te manako ra koe mei ia Iobu rai, tei tuatua ki te Atua e: “Naringa koe e akapipini iaku ki te vaarua e, angairi koe e uuna iaku, e kia riro ke toou riri, angairi koe e akataka i te taime noku, ka maara mai ei iaku nei!”​—Iobu 14:13.

Akapeea e rauka ai ia koe i te akaatea mai mei taua tu taitaia ra? Noatu e mea ngata tikai, te anoanoia ra koe kia kore koe e manako atu i toou au manamanata no tetai tuatau. Ei akaraanga, penei ka akamanako koe i ta Iehova au uianga akauruia ki tona tavini akarongo mou ko Iobu e: “Iea koe iaku i akatumu i te enua nei? ka akakite mai na, peneiake te kite na koe. Naai i tuku i te au ariteanga? kua kite oki koe na! e naai i akatika i te taura na rungao?” (Iobu 38:4, 5) Ia tatou e akamanako ra i te puapinga o taua au uianga ra, penei ka akakeuia tatou kia ariki i te pakari e te mana teitei o Iehova. E tumu anga meitaki tetai i akatika ua ai aia i teia turanga o te ao kia vai ua rai.

E ‘Tara i Roto i te Kopapa’

Kua pati tetai tavini akarongo mou kia Iehova e kia akaatea i te ‘tara i roto i te kopapa,’ e manamanata tei tupu putuputu mai. E toru taime te pati akatenga anga te apotetoro ko Paulo ki te Atua kia akaatea i teia timataanga mei iaia. Noatu e eaa te reira, mei tetai tara tamanamanata ra, kua akakore te reira i to Paulo mataora i te tavini  anga ia Iehova. Kua akaaite a Paulo i te reira ki te papa putuputuia anga. Kua pau maira a Iehova e: “Toku nei aroa ua, oti ra ua ïa taau: ei te apikepike e taka meitaki ravaʼi toku maroiroi.” Kare a Iehova i akaatea ana i taua tara i roto i te kopapa. Kia akakoromaki ua a Paulo i te reira, inara kua tuatua mai aia e: “Kia paruparu oki au ra, te maroiroi ra au i reira.” (2 Kori. 12:7-10) Eaa te aiteanga o tana tuatua?

Kare to Paulo manamanata i ngaro viviki ana. Noatu rai, kare te reira i arai ana iaia i te akatupu anga i te au mea umere i te tavini anga ia Iehova. Kua irinaki a Paulo ia Iehova no te turu anga e te pati putuputu anga i tana tauturu. (Phili. 4:6, 7) I te vaitata anga te openga o tona oraanga i runga i te enua nei, kua rauka ia Paulo i te karanga e: “I kukumi ana au i te kukumianga meitaki, kua oti toku oro anga, i mou marie na au i te akarongo.”​—2 Timo. 4:7.

Kua taangaanga a Iehova i te au tangata apa kia akatupu i tona anoano noatu to ratou au tarevake e te au manamanata, e te aere tika ra te ngateitei kiaia. Ka rauka iaia i te oronga kia ratou i te arataki anga e te pakari kia akakoromaki ua i to ratou au turanga ngata e kia akono tamou i to ratou rekareka i te tavini anga iaia. Ae, ka rauka iaia i te taangaanga i te au tangata apa kia rave i te au angaanga maata noatu to ratou au tu paruparu.

Kua akakite mai a Paulo e eaa te Atua i kore ei i akaatea i tona tara i roto i te kopapa: “Kia kore au e teitei maata roa.” (2 Kori. 12:7) E akamaara ua ana to Paulo “tara” kiaia i tona au tu kotingaia e kua tauturu iaia kia akono tamou i tetai manako akaaka no runga iaia uaorai. Te rotai ra te reira ki ta Iesu i apii ana e: “Te akateitei iaia uaorai, e akamoraroia ïa; e te akamoraro iaia uaorai, e akateiteiia ïa.” (Mata. 23:12) Ka rauka i te au timataanga i te apii i te au tavini o te Atua kia akaaka e te tauturu ia ratou i te ariki e kia tamou marie ua rai ma te akarongo mou te anoanoia ra kia irinaki ratou ia Iehova. No reira, mei te apotetoro rai, e “akatietie” ratou ia Iehova.​—1 Kori. 1:31.

Au Tu Paruparu Kitea Koreia

Penei e au tu paruparu to tetai kare ratou e kite ana me kore kare ratou e inangaro ana i te akakite mai. Ei akaraanga, penei te akaparau ra tetai tangata, i te irinaki anga ki runga iaia uaorai. (1 Kori. 10:12) Ko tetai tu paruparu ta te au tangata apa i matau koia oki te anoano i te turanga teitei.

Ko Ioaba, tei riro mai ei rangatira vaeau no te Ariki ko Davida, e tangata mataku kore, papu tikai, e te akatikatika i te au manamanata. Inara, kua apa a Ioaba no te ravenga kino pakari tikai te akakite maira i tetai tu ngakau parau, e te noinoi. E rua ana nga rangatira vaeau i tamate kino pakari tikai. Te mea mua kua rave aia i te tamate atu ia Abenera. I muri mai, i te aravei pikikaa anga i tona katini ko Amasa, kua rave maira a Ioaba i te kumikumi o Amasa ma tona rima katau mei te mea rai e te ongi ra iaia e kua koputa atura iaia ki te koke ma tona rima kaui. (2 Samu. 17:25; 20:8-10) Kua monoia a Ioaba e Amasa ei rangatira vaeau e kua taangaanga aia i teia atianga nei i te akaatea atu i tona enemi akarere, penei i te irinaki anga e ka akataoonga akaouia aia ei rangatira. Te kite ra koe e kare a Ioaba i akatere ana i tona au manako, kapiti maira tona au anoano karapii. Kua rave aia i te kino e kare i tataraapa ana. Te vaitata anga te Ariki ko Davida ki te openga o tona oraanga, kua akaue aia i tana tamaiti ia Solomona kia akapapu e kua akautungaia a Ioaba no tona tu kino.​—1 Ari. 2:5, 6, 29-35.

Auraka rava tikai tatou e tuku ua ki to tatou au anoano tarevake; ka rauka ia tatou i te akatere i to tatou tu paruparu. Te mea mua kia kite e kia ariki tatou i te reira. E oti e tauta tatou i te rave i te akakore atu i te reira. E pure putuputu tatou kia Iehova, i te pati anga i tana tauturu kia rauka i te akaaere i taua au tu paruparu, e kia apii maroiroi i tana Tuatua, i te kimi anga i te au mataara kia akatereia taua au manako. (Ebe. 4:12) Penei te anoanoia ra tatou kia akatikatika ua rai i to tatou au apa e auraka e taitaia. Penei ka roa ua atu te manamanata no te mea e aronga apa ua tatou. Kua akakite mai a Paulo i teia i roto i tona uaorai turanga, i te tataanga e: “Ko taku e anoano ra, kare au e rave; ko taku ra mea makitakita ra, ko taku ïa e rave nei.” Inara, mei taau e kite ra, kare a Paulo i tuku ua ki teia, mei te mea rai e kare e rauka iaia i te akatere i tona au manako. Ei tukeanga, kua tauta pakari aia i te patoi atu i tona tu paruparu, i te irinaki anga ki runga i ta te Atua tauturu na roto ia Iesu Karaiti. (Roma 7:15-25) I tetai au ngai ke atu, kua tuatua a Paulo e: “Te  moto nei ra au i taku kopapa kia vi: ko te riro ua aea oki au, ko tei ako ia etai ke ra, ei tangata kite koreia mai.”​—1 Kori. 9:27.

E kotoe ua anga ta te au tangata na ratou uaorai. Ka rauka ia tatou i te patoi atu i te reira na te tatanu anga i to Iehova manako, i te rave anga i ta Paulo i ako atu ki te au Kerititiano e: “Kia rikarika i te kino; kia kapiti atu ki te meitaki.” (Roma 12:9) I roto i ta tatou tamaki anga kia autu i to tatou au tu paruparu, te anoano ra tatou i te tuatua tika, te akakoromaki, e te apii ia tatou uaorai. Kua pati a Davida kia Iehova e: “E akamakitoro marie mai koe i toku manako e toku ngakau.” (Sala. 26:2) Kua kite aia e ka rauka i te Atua i te akara meitaki mai i to tatou au manako oonu rava e te oronga mai anga i te tauturu kia tatou me te anoano ra tatou i te reira. Me aru tatou i te aratakianga ta Iehova i oronga mai na roto i tana Tuatua e tona vaerua tapu, ka tere meitaki tatou ki mua i te autu anga i to tatou au tarevake.

Penei te manata ra etai no te au manamanata ta ratou e manako ra e kare e rauka ia ratou uaorai i te akono. Ka rauka i te aronga pakari o te putuputuanga tikai i te oronga mai i te tauturu aroa e te akamaroiroianga. (Isa. 32:1, 2) Inara e meitaki i te akono i te au tapapaanga tau tikai. Ko tetai au manamanata, kare a teia akatereanga o te au mea nei pauanga. Noatu rai, e manganui tei akakoromaki ua, e na te reira i tauturu ia ratou kia akono i tetai oraanga puapinga tikai.

Akapapu Anga i ta Iehova Turuanga

Noatu e eaa te au manamanata ta tatou ka aro atu i roto i teia au tuatau ngata, papu ia tatou e na Iehova e arataki e e akaora ia tatou. Te raurau maira te Pipiria ia tatou e: “E tenana, ka akamoraro ia kotou uaorai i raro ake i te rima mana o te Atua, kia akateitei aia ia kotou i te tuatau tikai. E uri i to kotou tumatetenga katoa ki runga iaia; koia oki te tiaki mai ia kotou.”​—1 Pete. 5:6, 7.

I te kite anga a Kathy, tei tavini ana i Betela i te au mataiti e manganui, e kua tuia tana tane e te maki Alzheimer, kare aia i manako ana e ka rauka iaia i te akakoromaki marie i roto i te au turanga ngata ta teia maki ka akatupu mai. Kua riro te pureanga kia Iehova no te pakari e te akamaroiroi i te pae manako ngakau ei umuumu anga i te au ra ravarai. Te kino ua atu anga te turanga o tana tane, kua tauta te au taeake aroa i te apii ia ratou uaorai e akapeea i te akono anga i teia tu maki e kua oronga mai te au tuaine i te turu anga i te pae manako ngakau. Kua riro teia au Kerititiano ei  tuanga no te turu akaketaketa anga ta Iehova i oronga mai, e kua rauka ia Kathy i te akono i tana tane e tae ua atu ki tona mate e 11 mataiti i muri mai. Kua karanga aia e: “Te akameitaki nei au ia Iehova ma te roimata e te ngakau tae no tana tauturu katoatoa; kua akakoromaki ua atu rai au. Kare au i kite e ka rauka iaku i te rave ua atu i tei umuumuia maira kia rave au no te roiroi kino!”

Tauturu kia Autu i te Au Tu Paruparu Kitea Koreia

Me e manako puapinga kore to etai aronga, penei te manako ra ratou e kare a Iehova e akarongo mai ana ki ta ratou kapiki anga no te tauturu i roto i to ratou tuatau tumatetenga. E mea meitaki tikai i reira i te akamanako i ta Davida i tuatua i te tataraara anga aia no runga i tana ara kino kia Bate-seba e: “Ko te ngakau paruparu, e te aue ra, kare ua te Atua e akavaavaa i te reira.” (Sala. 51:17) Kua tataraara tikai a Davida, e kua kite aia e ka rauka iaia i te akavaitata atu ki te Atua e te irinaki ki runga i tona tu akaaroa. Kua akaata mai a Iesu i to Iehova manako ngakau. Kua taangaanga te tangata tata Evangeria ko Mataio i te au tuatua a Isaia kia Iesu e: “Te kakao paruparu ra, kare aia e aati, e te lamepa matemate ra, kare aia e tinai.” (Mata. 12:20; Isa. 42:3) Iaia i runga i te enua nei, kua akaari a Iesu i te tangi aroa ki te aronga akaaka e te aronga tei tamamaeia. Kare aia e tinai i te mura toe o te oraanga o tetai tangata tei aite mei te viki o tetai ramepa inu te vaitata atura i te mate. Kareka ra, kua tereni maru ua aia i te aronga tei tamamaeia kia akaoki akaou mai ki roto ia ratou i te mura ai o te ora. Ko tona tu ia, iaia i runga i te enua nei. Kare ainei koe e irinaki ana e te pera ua nei rai a Iesu e te aroa maira aia i toou au tu paruparu? E akamanako ana e te akakite maira a Ebera 4:15 e koia Tei rauka i te ‘aroa mai i to tatou au paruparu nei.’

I te tataanga no runga i tona ‘tara i roto i te kopapa,’ kua akara atura a Paulo e te ‘vai marie ra te maroiroi o te Mesia i runga iaia [“mei tetai puakapa rai,” NW].’ (2 Kori. 12:7-9) Kua kite aia i ta te Atua paruru anga na roto ia Karaiti, mei tetai tangata tei paruruia i roto i tetai puakapa mei te au turanga kinokino o te reva. Mei ia Paulo rai, kare tatou e tuku ua atu ki to tatou au tu paruparu e te au manamanata. Kia vai maroiroi ua i te pae vaerua, ka rauka ia tatou i te taangaanga i te au mea ravarai ta Iehova e oronga maira kia tatou na roto i tana putuputuanga i runga i te enua nei. Ka rauka ia tatou i te rave i te au mea ravarai te ka rauka i te au tangata e oti kia akara atu kia Iehova ma te irinaki pu tikai e nana e arataki i to tatou au takainga. I te kite anga e akapeea to Iehova maroiroi i te tauturu anga mai i to tatou au tu paruparu, ka rauka ia tatou i te tuatua mei ia Paulo rai e: “Kia paruparu oki au ra, te maroiroi ra au i reira.”​—2 Kori. 12:10.

[Tutu i te kapi 3]

Kua pure putuputu a Paulo kia Iehova kia arataki iaia i te akatupu anga i tana angaanga orometua

[Tutu i te kapi 5]

Kua oronga te Ariki ko Davida i te pupu vaeau kia Ioaba

[Tutu i te kapi 5]

Kua rave a Ioaba i te tamate atu i tetai enemi akarere, ko Amasa

[Tutu i te kapi 6]

Te oronga maira te aronga pakari i te aratakianga aroa mei roto mai i te Tuatua Tapu ei tauturu ia tatou kia akakoromaki ua i to tatou au manamanata