Te Au Tu kia Aruaru Tatou

“E aruaru atu i te tuatua-tika, i te akono i te Atua, i te akarongo, i te anoano, i te akakoromaki, e te maru.”​—1 TIMO. 6:11.

1. E akatutu mai e eaa te aiteanga o te tuatua “aruaru.”

EAA taau e manako ra me akarongo koe i te tuatua “aruaru”? Penei te manako ra koe i to Mose tuatau te “aruaru maira” to Aiphiti vaeau ia Iseraela, i tupu ei te tumatetenga kia ratou i roto i te Tai Muramura. (Exo. 14:23) Me kore te maara nei paa ia koe te kino tei tupu ki tetai ta tangata i Iseraela i taito kare i akakoro ana i te ta. Te umuumuia ra kia tae viviki aia ki tetai o te au oire e ono tei akanooia ei akapuanga. “Ko te aruaru mai aea te akamoupuku i taua ta tangata ra, i te otooto anga o te riri o tona ngakau . . . rokoia iora aia, ta atura iaia.”​—Deu. 19:6.

2. (a) Eaa te tutaki ta te Atua i pati atu ki etai au Kerititiano kia aruaru? (e) Eaa te manakonakoanga ta Iehova i oronga ki te maataanga o te au Kerititiano i teia tuatau?

² Ei tuke anga ki te au akaraanga Pipiria i runga akenei, e akamanako ana i te tu papu tikai tei rauka i te apotetoro ko Paulo e: “Te aruaru atu nei au na te akairo, kia rauka iaku te tutaki i ta te Atua ra kapiki anga no runga maira i te Mesia nei ia Iesu.” (Phili. 3:14) Te akaari maira te Pipiria e ko te katoaanga o te 144,000 Kerititiano akatainuia, kapitiia mai a Paulo, kua rauka taua tutaki anga no te oraanga i te rangi. Ka tutara ratou ko Iesu Karaiti i roto i tona Tutaraanga Tauatini Mataiti ki rungao i te enua. E akakoroanga umere tikai no taua aronga tei patiia mai e te Atua kia aruaru! Inara, te maataanga o te au Kerititiano mou i teia tuatau, e manakonakoanga ke atu, me kore e akakoroanga ke atu to ratou. Te oronga aroa maira a Iehova kia ratou i te mea tei ngaro ia Adamu raua ko Eva, koia oki, te manakonakoanga no te oraanga mutu kore ma te kopapa apa kore i runga i te enua parataito.​—Apo. 7:4, 9; 21:1-4.

3. Akapeea tatou i te akaari anga e te ariki rekareka ra tatou i te takinga meitaki o te Atua?

 ³ Kare e rauka i te au tangata ara te ora mutu kore na roto i ta ratou au tauta anga apa ua kia rave i te mea tika. (Isa. 64:6) Ka rauka mai te ora mutu kore na te irinaki anake ua anga ki ta te Atua apinga aroa no te ora na roto ia Iesu Karaiti. Akapeea tatou i te akaari anga e te ariki rekareka ra tatou i taua takinga meitaki o te Atua ra? Ko tetai tumu, kia akarongo tatou ki teia akauenga e: “E aruaru atu i te tuatua-tika, i te akono i te Atua, i te akarongo, i te anoano, i te akakoromaki, e te maru.” (1 Timo. 6:11) Na te akamanako anga i teia au tu, penei na teia e tauturu ia tatou tataki tai kia tauta ua atu i te aruaru “kia maata atu rai” te reira.​—1 Tesa. 4:1.

“Aruaru Atu i te Tuatua-Tika”

4. Akapeea e papu ei ia tatou e e puapinga te aruaru anga i te “tuatua-tika,” e eaa te au takainga mua ta tetai tangata ka rave?

⁴ I roto i tana nga reta kia Timoteo, kua akanoo te apotetoro ko Paulo i te au tu te ka aruaruia, e i te au taime ravarai, kua taiku mai aia i te “tuatua-tika” na mua. (1 Timo. 6:11; 2 Timo. 2:22) Pera katoa, i roto i tetai au irava te akamaroiroi putuputu maira te Pipiria ia tatou kia aruaru i te tuatua tika. (Mase. 15:9; 21:21; Isa. 51:1) Ko tetai mataara i te akamata i te rave i te reira koia oki na “te kite . . . i te Atua mou ra, e ia Iesu i te Mesia, i [tana] i tono maira.” (Ioa. 17:3) Ka akakeu te aruaru anga i te tuatua tika i tetai tangata​—kia tataraara i te au ara tei raveia i mua ana e kia “ariu mai” kia raveia te anoano o te Atua.​—Anga. 3:19.

5. Eaa ta tatou ka rave kia rauka e kia akono tamou i tetai turanga tika ma te Atua?

⁵ E mirioni ua atu te aronga tei aruaru tikai i te tuatua tika kua akatapu i to ratou oraanga kia Iehova e kua akatutu mai i taua akatapuanga ra na te papetito anga ki roto i te vai. Me e Kerititiano koe kua papetitoia i teianei, i manako ana ainei koe e te aerenga o toou oraanga, e te tau ra te reira, te akaari maira e te aruaru ua ra rai koe i te tuatua tika? Ko tetai mataara e rauka ai ia koe i te rave i teia, koia oki, na te akara anga i roto i te Pipiria e eaa te mea “meitaki e te kino” me rave koe i te au ikianga puapinga i roto i te oraanga. (E tatau ia Ebera 5:14.) Ei akaraanga, me e Kerititiano koe kare i akaipoipo ake e ka tau koe i te akaipoipo i teianei, kua iki pakari ainei koe i te kopae atu i te akatupu i tetai pirianga akainangaro ki tetai tangata kare i papetitoia ei Kerititiano? Ka rauka ia koe me te aruaru ra koe i te tuatua tika.​—1 Kori. 7:39.

6. Te aruaru tikai anga i te tuatua tika te o maira teaa?

⁶ Te tu tika e tuke ia mei te akatietie me kore “e maata ua i te ketaketa kia tika.” (Kohe. 7:16) Kua akamatakite mai a Iesu i te akaari anga i taua tu tika i te akara anga e e meitaki atu te reira i tetai ke. (Mata. 6:1) Te aruaru tikai anga i te tuatua tika te o maira te ngakau​—te akatanotano anga i te au manako tarevake, te au tu, te au akakoroanga, e te au anoano. Me angaanga tamou pakari tatou i te rave i teia, i te akara anga kare tatou e rave i te au ara kino. (E tatau ia Maseli 4:23; e akaaite ia Iakobo 1:14, 15.) Pera katoa, ka akameitaki a Iehova ia tatou e ka tauturu ia tatou i roto i ta tatou aruaru anga i tetai au tu puapinga ei Kerititiano.

“Aruaru Atu . . . i te Akono i te Atua”

7. Eaa ra te “akono i te Atua”?

⁷ Te kapitiia maira ki te tu akono te akatapu  anga tikai e te tiratiratu. Te akakite maira tetai tikitinari Pipiria e ko te tuatua Ereni tei uriia “akono i te Atua” te akataka maira “i te tu meitaki kia matakite e auraka tetai apinga e akaparuparu i te mataku i te Atua.” E maata te taime kare te au Iseraela i akaari ana i taua tu akono ra, tei kiteaia mai na roto i ta ratou au angaanga akarongo kore noatu e kua akarangatira te Atua ia ratou mei Aiphiti.

8. (a) No ta Adamu ara eaa te uianga tei uiia? (e) Akapeea te pauanga ki teia “tuatua ngaro” i te akaariia anga mai?

⁸ E tauatini ua atu mataiti i muri ake te ara anga te tangata apa kore ko Adamu, penei ka uiia te uianga e, “Ka rauka ainei i tetai ua atu tangata i te akaari i te tu akono apa kore i te Atua ra?” Kua tere atu te au anere mataiti, kare e rauka i tetai tangata ara i te akono i tetai tu oraanga akono apa kore i te Atua. Inara i roto i tona uaorai tuatau tau, kua akaari mai a Iehova i te pauanga ki teia “tuatua ngaro.” Kua taui aia i te oraanga o tana Tamaiti anau tai mei te rangi ki roto i te vairanga tamariki o Maria kia anauia mai ei tangata apa kore. I roto i tona oraanga i runga i te enua e kapitiia mai tona mate taakamaia, kua akaari mai a Iesu i te aiteanga e kia akatapu tikaiia e kia tiratiratu pu tikai ki te Atua mou. Kua akaari mai tana au pure i tona tu ngateitei no tona Metua aroa i te rangi. (Mata. 11:25; Ioa. 12:27, 28) No reira, kua akauru a Iehova ia Paulo kia tuatua no runga “i te akono i te Atua” i te akataka anga mai i to Iesu oraanga meitaki.​—E tatau ia 1 Timoteo 3:16.

9. Akapeea tatou me aruaru i te akono i te Atua?

⁹ I roto i to tatou turanga ara, kare e rauka ia tatou i te akaari i te tu akono apa kore i te Atua. Inara ka rauka ia tatou i te aruaru i te reira. Te umuumu maira teia e kia aru vaitata tatou i te akaraanga o Karaiti. (1 Pete. 2:21) No reira, kare tatou e aite ki te aronga pikikaa “e tutu akono i te Atua to ratou, kareka te mana ra, kua akakore ratou i te reira.” (2 Timo. 3:5) Kare te aiteanga o teia e kare a te tu akono mou i te Atua ravenga ki te au tu o vao. Te o katoa maira te reira. Ei akatauanga, me te iki ra tatou i tetai kakau akaipoipo me kore te iki ra e eaa te kakau ka aao i te aere anga ki te toa, kia rotai ua rai to tatou tu ki ta tatou tuatua kia “mou i te akono i te Atua.” (1 Timo. 2:9, 10) Ae, te aruaru anga i te akono i te Atua te umuumuia maira kia akamanako tatou i te au turanga tika a te Atua i roto i to tatou oraanga i te au ra ravarai.

“Aruaru Atu . . . i te Akarongo”

10. Eaa ta tatou ka rave kia vai ketaketa ua to tatou akarongo?

¹⁰ E tatau ia Roma 10:17. * Kia akatupu e kia akono tamou i te akarongo ketaketa, e mea tau kia akamanako tetai Kerititiano i te au tuatua mou akaperepereia tei kiteaia i roto i te Tuatua a te Atua. Kua oronga mai “te tavini akono meitaki e te pakari” i te au puka memeitaki e manganui. E toru puka meitaki rava atu ko Te Tangata Maata Rava Atu Tei Ora Ana, Learn From the Great Teacher, e te “Come Be My Follower,” e nga voriumu tei akapapaia ei tauturu ia tatou kia kite meitaki i te Karaiti e kia rauka i reira i te aru iaia. (Mata. 24:45-47) Kua akapapa katoa te pupu tavini i te au uipaanga, te au akaputuputuanga, e te au uruoaanga, te maataanga te akakite maira “i te tuatua no runga i te Karaiti.” E au mataara ke atu ainei taau e kite ra ka rauka ia koe i te akono maata atu i teia au mea ia koe e ‘akamaata tikai ra i te akarongo’ i ta te Atua i oronga mai?​—Ebe. 2:1.

11. Eaa te nga tuanga ta te pure e ta te akono anga e akatupu ra i roto i ta tatou aruaru anga i te akarongo?

 ¹¹ Ko te pure tetai tauturu te ka akatupu i te akarongo ketaketa. Kua pati akatenga te au pipi a Iesu kiaia e: “E akamaata mai i to matou akarongo.” Ka rauka ia tatou i te pati akatenga ma te akaaka ki te Atua kia rave katoa i te reira. (Luka 17:5) Kia akamaata mai i te akarongo, e pure tatou i te tauturu a te vaerua tapu o te Atua; ko te akarongo tetai tuanga o te “ua o te vaerua.” (Gala. 5:22, NW) Pera katoa, na te akono anga i te au akauenga a te Atua ka akaketaketaia to tatou akarongo. Ei akatauanga, penei ka akamaata mai tatou i ta tatou tuanga i roto i te angaanga tutu anga. Penei na te reira e akatupu mai i te mataora maata i roto ia tatou. E ia tatou e akamanako ra i te au akameitakianga te aere maira no te ‘kimi anga i te basileia o te Atua, e te tuatua-tika ra,’ ka ketaketa maata atu to tatou akarongo.​—Mata. 6:33.

“Aruaru Atu . . . i te Anoano”

12, 13. (a) Eaa ta Iesu akauenga ou? (e) Na roto i teea au mataara puapinga ka aruaru ei tatou i te aroa mei to Karaiti rai?

¹² E tatau ia 1 Timoteo 5:1, 2. Kua oronga mai a Paulo i te akoanga tau e akapeea te au Kerititiano i te akaari anga i te aroa ki tetai e tetai. E mea tau kia kapiti mai to tatou tu akono i te Atua kia akono tatou i ta Iesu akauenga ou kia ‘aroa tatou tetai i tetai’ mei iaia i aroa mai ia tatou. (Ioa. 13:34, NW) Kua tou mai te apotetoro ko Ioane i teia e: “Te tangata ra tei iaia te apinga o teianei ao, e kite atura aia i tona taeake i te ngere anga, e karapii atura tona ngakau iaia, teiea te anoano i te Atua i te noo anga i roto iaia?” (1 Ioa. 3:17) Ka rauka ainei ia koe i te akamanako atu i te au atianga kua akaari ana koe i te aroa na roto i tetai tu tau?

¹³ Ko tetai mataara ka aruaru tatou i te aroa koia oki na te akakore anga i te ara, kare e akamoupuku ki to tatou au taeake. (E tatau ia 1 Ioane 4:20.) Kareka ra, te inangaro ra tatou i te aru i teia akoanga akauruia mai e: “E tamou rai i te akakoromaki anga tetai e tetai e te akakore ua anga i te ara tetai e tetai me e tumu ta tetai no te tapepeanga ki tetai. Mei ia Iehova i akakore ua maira i ta kotou ara, kia pera katoa oki kotou.” (Kolo. 3:13, NW) E tangata ainei tetai i roto i te putuputuanga ka rauka ia koe i te akono i teia akoanga? Ka akakore ainei koe i tana ara?

“Aruaru Atu . . . i te Akakoromaki”

14. Eaa ta tatou ka kite mai mei te putuputuanga i Philadelaphia?

¹⁴ E apinga ke rai te akamaroiroi anga ia tatou uaorai no tetai akakoroanga poto ua te tuatau, inara e mea ke atu rai me e ngata i te i tae i te akakoroanga me kore e mamao ke atu te reira i ta tatou i tapapa atu. Te taka meitaki ra e, te aruaru anga i te akakoroanga no te ora mutu kore te umuumuia ra te akakoromaki. “No te mea kua mou marie koe i te tuatua akakoromaki naku ra, e mou katoa au ia koe kia ora i taua tuatau timataanga ra,” ta te Atu ko Iesu i akakite ki te putuputuanga i Philadelaphia. (Apo. 3:10) E tika rai, kua apii a Iesu i te anoano no te akakoromaki​—e tu te tauturu ra ia tatou kia kore e tuku ua me aro atu i te au manamanata e te au timataanga. E mea tau e kua kite te au taeake i roto i te putuputuanga o Philadelaphia i te anere mataiti mua i te akakoromakianga meitaki rava i roto i te au timataanga e manganui no te akarongo. No reira, kua akapapu atu a Iesu kia ratou i tetai tauturu i te tuatau o tetai timataanga maata atu te ka aere mai.​—Luka 16:10.

15. Eaa ta Iesu i apii mai no runga i te akakoromaki?

¹⁵ Kua kite a Iesu e ka aro atu tana au pipi i te makitakita no ko mai i te au kopu tangata irinaki kore e te ao katoa, no reira i roto i nga atianga e rua, kua akamaroiroi aia ia ratou na roto i teia mataara e: “Kareka te tāpu tikai e tae ua atu ki te openga ra, ka ora ïa.” (Mata. 10:22; 24:13) Kua akaari katoa mai a Iesu e akapeea e rauka ai i tana au pipi i taua tuatau rai te maroiroi kia akakoromaki  ua. I roto i tetai akatutuanga, kua akaaite aia i te one tokatoka ki te tangata tataki tai tei “āriki i te tuatua [a te Atua] ma te rekareka” inara kua takake atu i te aro atu anga i te au timataanga no te akarongo. Inara, kua akaaite aia i tana au pipi akarongo mou ki te one meitaki no te mea kua “tāpu piri tikai” ratou i te tuatua a te Atua e “e tika i te uua anga i te ua [“ma te akakoromaki,” NW].”​—Luka 8:13, 15.

16. Eaa te apinga aroa tei tauturu i te au tangata e mirioni ua atu kia akakoromaki ua?

¹⁶ Te kite ra ainei koe i te ravenga no te akakoromakianga? E mea tau kia “tāpu piri tikai” tatou i te tuatua a te Atua, na te akaoraora anga i te reira i roto i to tatou ngakau e te manako. I te uriia anga te New World Translation of the Holy Scriptures​—e urianga tika, mama ua i te tatau i te Pipiria​—ki roto i te au reo e manganui e mea tau tikai e ka rauka te reira i te raveia. Ia tatou e akamanako oonu ra i tetai tuanga o te Tuatua a te Atua i te au ra ravarai ka tauturuia tatou kia kite mai i te maroiroi kia uua atu rai i te ua “ma te akakoromaki.”​—Sala. 1:1, 2.

“Aruaru Atu i te . . . Maru” e te Au

17. (a) Eaa ra i puapinga maata ai te “maru”? (e) Akapeea a Iesu i te akaari anga e e maru aia?

¹⁷ Kare tetai e reka ana me akaapaia mai aia no tetai apinga kare aia i tuatua ana me kore i rave ana. E mea matauia no te au tangata i te pau atu i te au akaapa anga kare e tika ana na roto i te riri. E meitaki rava atu i te akaari i te “maru”! (E tatau ia Maseli 15:1.) Te umuumuia ra te maroiroi maata kia pau maru atu i te akaapa anga kare e tika ana. Kua akanoo a Iesu Karaiti i tetai akaraanga apa kore i roto i teia tu. “Ko tei kore i akakino atu, kia akakinoia mai aia ra; e kia mate aia ra, kare aia i tuatua tutaki atu; kua tuku ra iaia uaorai kiaia nona te manako tika ra.” (1 Pete. 2:23) Kare e rauka ia tatou i te tapapa atu e ka meitaki tatou mei ia Iesu rai i roto i teia tu, inara ka rauka ainei ia tatou i te akameitaki mai i te tu e akaari tikai ra tatou i te maru?

18. (a) Eaa te meitaki ta te maru ka akatupu? (e) Eaa tetai atu tu te raurauia maira kia aruaru tatou?

¹⁸ I te aruanga ia Iesu, “kia tika ua rai ia [tatou] kia akakite atu” i to tatou irinaki, “ma te maru e te kauraro marie atu.” (1 Pete. 3:15) Ae, no to tatou tu maru ka rauka i te arai i te au manako tukeke kia kore e tupu viviki mai te au pekapeka riririri, ki te au tangata ta tatou ka aravei atu i roto i ta tatou angaanga orometua e te au taeake irinaki. (2 Timo. 2:24, 25) Te tauturu maira te maru ia tatou kia rauka te au. No reira rai a Paulo i akanoo ei i te “au” i rotopu i te au tu kia aruaruia, i roto i te rua o tana reta kia Timoteo. (2 Timo. 2:22; e akaaite ia 1 Timoteo 6:11.) Ae, ko te “au” tetai tu ta te au Tuatua Tapu e akamaroiroi maira kia aruaru tatou.​—Sala. 34:14; Ebe. 12:14.

19. I muri ake i te akamanako anga i te au tu Kerititiano e itu, eaa taau ka tauta i te aruaru, e no teaa ra?

¹⁹ E itu a tatou tu Kerititiano i akamanako ana tei akamaroiroiia mai kia aruaru tatou​—te tuatua tika, te akono i te Atua, te akarongo, te anoano, te akakoromaki, te maru, e te au. E akameitakianga tikai teia i roto i te au putuputuanga ravarai me tauta pakari te au taeake e te au tuaine i te akaari pu tikai i teia au tu akaperepereia! Ka akangateitei teia ia Iehova e ka tuku iaia kia akakeu ia tatou tataki tai no tona akapaapaaia anga.

[Tataanga Rikiriki i Raro]

Akamanakoanga i te Au Manako

• Eaa te o maira i te aruaru anga i te tuatua tika e te akono i te Atua?

• Eaa te ka tauturu ia tatou kia aruaru i te akarongo e te akakoromaki?

• Akapeea te aroa i te akakeu anga i to tatou tu e akono ra tatou i tetai e tetai?

• Eaa ra i anoanoia ai kia aruaru tatou i te maru e te au?

[Au Uianga Apii]

[Tutu i te kapi 12]

Kua akamatakite mai a Iesu i te akaari anga i te tuatua tika ei akamareka ua i te tangata

[Tutu i te kapi 13]

Ka rauka ia tatou i te aruaru i te akarongo na te akamanako oonu anga i te au tuatua mou o te Tuatua a te Atua

[Tutu i te kapi 15]

Ka rauka ia tatou i te aruaru i te aroa e te maru