Te Karanga ra Ainei a Iesu e e Ai Tamamae Anga te Era?

KO TETAI aronga e irinaki ra i te apiianga o te ai tamamae anga i era te tou atura ki te au tuatua a Iesu tei rekotiia e Mareko 9:48 (me kore irava 44, 46). Kua taiku aia i te tunga (me kore i te iroiro) kare e mate ana e te ai kare e tamateia ana. Me ui atu tetai tangata kia koe i te aiteanga o taua au tuatua ra, akapeea koe me pau?

Tei runga ua tei reira i taau Pipiria e taangaanga ra, penei ka tatau te tangata i te au irava 44, 46, me kore 48 no te mea e aiteite te tatau anga i teia au irava i roto i tetai au tataanga. * Te tatau ra te New World Translation e: “Me te akaturori ra to mata ia koe, e titiri ke i te reira; e meitaki ake noou i te tomo atu ki roto i te patireia o te Atua e okotai mata i te tomo atu e rua mata kia tiria atu ki roto ia Keena, te ngai kare e mate ana te iroiro e kare e tamateia ana te ai.”​—Mare. 9:47, 48, NW.

Noatu rai ra, te karanga ra tetai aronga e te turu ra te akakiteanga a Iesu e i muri i te mateanga te tamamaeia ra te meta o te tangata kino e mutu kore ua atu. Ei akatauanga, tetai tataanga i roto i te Sagrada Biblia Paniora a te Apii Teitei o Navarre te karanga ra e: “Te taangaanga ra to tatou Atu i [teia au tuatua] i te taiku i te au tamamae anga o era. Te akamarama putuputuia maira ‘te tunga kare e mate’ ei tu tataraara openga kore no te aronga i roto ia era; e ‘te ai kare e tamateia’ ei mamaeanga no te kopapa.”

Inara, e akaaite atu i te au tuatua a Iesu ki te irava openga i te totou a Isaia. * Kare ainei e taka meitaki ra e te taiku ra a Iesu ki te tataanga i roto ia Isaia pene 66? Te taiku taka ua ra te peroveta i reira ki te aere anga ki vao “ia Ierusalema ki te o e takapini akera o Hinoma (ko Keena), te ngai i akaatingaia ai te tangata (Iere 7:31) e kua riro mai ei ngai titiri anga teita na te oire.” (The Jerome Biblical Commentary) Te taka meitaki ra e kare te akairoanga i roto ia Isaia 66:24 e ko te au tangata e tamamaeia ra; te tuatua ra tei reira i te au ivi o te tangata. Ko tei taikuia e kare e mate koia oki ko te tunga​—kare i te au tangata ora me kore au meta mate kore. Eaa i reira, te aiteanga i te au tuatua a Iesu?

E akamanako ana i te tuatua no runga ia Mareko 9:48 i roto i te tataanga Katorika El evangelio de Marcos. Análisis lingüístico y comentario exegético, Voriumu II: “Kua raveia mai [te] tuatua mei roto ia Isaia (66,24). Te akaari maira te peroveta i nga ravenga e rua no te akakore i te kopapa tangata mate: na te ta pe anga e na te tutungi anga ki te ai . . . Te taangaanga anga i nga kupu ko te tunga e te ai i te pae i tetai e tetai te akaketaketa ra i te manako akakore takiri. . . . Ko nga tumu ririnui no te akakoreanga e rua te akamaramaia ra e ka vai tamou ua rai (‘kare e pangia, kare e mate’): kare rava e mataara i te kopae atu ia raua. I roto i teia akatutuanga, te nga mea ua ka ora mai koia oki ko te tunga e te ai​—kare i te tangata​—e ka takore raua roa ai i tetai ua atu apinga ka riro ki raro i to raua mana. No reira, kare teia i te akamaramaanga no te tamamaeanga mutu kore, inara e akakoreanga takiri rava mei te tu rai e, te arai ra kia kore te tuakaou anga e tupu, te aiteite atura ki te mate mutu kore. Ko te [ai] i reira, e akairo no te takore takiri anga.”

Ko tetai ua atu tangata tei kite e e aroa e te tu tau tikai to te Atua mou ka rauka ua kia marama e akapeea i te marama atu i te au tuatua a Iesu i roto i tera turanga. Kare aia i karanga ana e ka kite te aronga kino i te tupuanga o te tamamae anga mutu kore. Mari ra, te aro atura ratou i te akakoreanga takiri rava te ka arai kia kore te tuakaou anga e tupu.

[Au Tataanga Rikiriki i Raro]