Tetai Ravenga Karape

KUA inangaro e toru mapu tane i Aperika Rotopu i te aere ki te uruoaanga tapere i to ratou ngai, mamao atu i vao. Akapeea ratou me tae ki reira? Vaitata rai te 90 kiro mita te mamao o te ara, ka na runga i te au mataara kino e te pueu, e kare o ratou apinga akaoro. Kua manako ratou i te pati atu e toru patikara takatakai, kare ra i kitea ana tetai mea tau meitaki.

Kua kite mai tetai tangata pakari i roto i te putuputuanga o reira i to ratou manamanata e kua oronga mai i tona patikara takatakai​—mea taito inara te angaanga ra rai. Kua akamarama aia e akapeea aia e tetai atu i te akanooanga ia ratou uaorai i te tuatau i topa, kia tae ki te uruoaanga. Kua akamaroiroi te tangata pakari e kia tuku taime ratou i te akaoro i te patikara. E ravenga mama ua inara e maata te akaaoanga. Akapeea teia e tupu ei?

Kia kore e pakapakaia e te ra, kua aravei te au mapu taeake i te popongi maiata e kua akauta i to ratou kiri kakau ki runga i te patikara. Kua akaoro atu te tangata mua i te patikara na mua ake, e kua aere viviki atu nga taeake na muri. I muri ake mei tetai 500 mita, kua tapu te tangata mua e kua akaurunga i te patikara ma te apinga i runga, ki te pae i te pu rakau. Kua matakite aia i te tuku anga i te patikara kia kite ua mai te nga taeake e kia kore e keiaia. E kua aere ua atu te tangata akaoro mua na te ara.

Me tae te nga taeake ki ko i te patikara, e akaoro atu ei tetai e ko tetai kua aere ua atu no tetai 500 mita akaou me kore mamao atu i mua ake i tona taime. No reira na te parani meitakianga e te aruaru tikai, kua rauka i te au taeake i te akaiti i to ratou aaere anga mei te 90 kiro mita ki tetai 60 kiro mita. Kua puapinga tikai teia tautaanga. Kua aravei ratou i to ratou au taeake e te au tuaine Kerititiano i te uruoaanga e kua mataora tikai i te kaikai vaerua. (Deu. 31:12) Teia mataiti, ka rave ainei koe ma toou maroiroi katoa kia tae ki te uruoaanga tapere i toou uaorai ngai?