Akatupu i te Au Tapapaanga Tu Tau, e kia Rekareka

“KUA puapinga kore akaou au!” Eia oou taime i te tuatua akapera anga no te mea ua e kare i rauka ia koe i te akatupu i taau i akakoro? Penei ka akakite mai tetai metua vaine mapu Kerititiano i te reira tu taitaia no te roiroi maata i te au maroanga putuputu a tana pepe anau ou iaia, e kua taitaia e kare e rauka ana iaia i te akamou i tona manako ki runga i tona inangaro pae vaerua. E penei ka manako meangiti mai tetai Kerititiano iaia no tona turanga i ngakiia mai ei, e ka manako e kare tikai e rava ana tana e rave ra i roto i te putuputuanga. E ka maromaroa tetai Kite ruaine e kare e rauka ra iaia i te piri maata atu ki roto i te au angaanga Kerititiano mei tana e mataora ana i te tuatau e maroiroi ra aia e te meitaki ra i te oriori aere. Te arairaiia ra a Christiane e tona turanga pamiri mei te rave maata atu i tana e inangaro ra i te rave i roto i ta Iehova angaanga, e kua karanga e, “e aue ana au me rongo ua atu au i tetai tuatua akamaroiroi no te tavinianga ei painia.”

Akapeea tatou me akono atu i taua au tu manako ra? Akapeea tetai au Kerititiano i te akatupu anga i te manako tika tikai no to ratou au turanga? Eaa ua ai te puapinga no te akamanakoanga tau ua i te au tapapaanga?

Kia Manako Tu Tau

Te oronga maira te apotetoro ko Paulo i te taviri kia akamou i to tatou tu rekareka i te karanga anga e: “E rekareka i te Atu ra, aua e tivata, e te tuatua akaou atu nei au, Kia rekareka rai kotou. Kia kitea meitakiia oki to kotou [“tu tau,” NW] i te tangata katoa.” (Phili. 4:4,5) E kite mai ei i te tu rekareka e te tu merengoanga i roto i ta tatou tavinianga i te Atua, ka anoanoia tatou kia akatupu i te au tapapaanga tu tau i te akamanako anga i to tatou uaorai tu maroiroi e te au turanga. Me ka aruaru tatou i te au akakoroanga tau kore noatu eaa te tu ngata, te akairi maira tatou i te au taitaia anoano koreia ki rungao ia tatou uaorai. Tetai tua ra, kia matakite, kia kore tatou uaorai e manako kope na te maani kotoeanga i to tatou turanga kotingaia ei akamarie rava atu anga ia tatou i tei tau kia rave tatou i roto i te angaanga orometua Kerititiano.

Noatu e eaa to tatou au turanga, te umuumu maira a Iehova e kia oronga tatou i ta tatou mea meitaki rava atu kiaia​—i ta tatou tavinianga ngakau katoa e te ngakau tae tikai. (Kolo. 3:23, 24) Me kare tatou e oronga ngakau tae katoa kia Iehova, kare tatou e aru ana i ta tatou akatapuanga kiaia. (Roma 12:1) Kapiti mai, te akangere ra tatou ia tatou uaorai i te tu merengoanga oonu, te rekarekaanga mou, e tetai atu au akameitakianga nunui te ka rauka mai mei te tavini ngakau katoaanga iaia.​—Mase. 10:22.

Ko te tuatua i roto i te Pipiria tei uriia e e “tu tau,” te oronga maira i te tu akamanako anga meitaki. Tona aiteanga tikai e “tuku maru ua.” (Iako. 3:17, NW) Te akakite katoa mai nei teia tuatua e kia kore e maro maata ia tatou. No reira, me e manako tu tau to tatou, ka rauka ia tatou i te akara tau meitaki i to tatou au turanga. E ngata ainei i te rave i te reira? E ngata i tetai pae, noatu e kua akamanako meitaki ana ratou i tetai ke. Mei teia te tu, me kite atu tatou i tetai oa piri mou e akaraanga roiroi ra no te maata o tana angaanga e rave ra,  kare ainei tatou e tauta i te tauturu iaia kia kite mai i te pakari kia rave i tetai au akatanotano anga i roto i tona oraanga? Pera katoa, kia kite mai tatou i te au akairo penei te akakite maira kia tatou e e maata rava ta tatou e rave ra.​—Mase. 11:17.

E akaaoanga pakari atu i te akamanako anga tu tau ua i ta tatou ka rauka i te rave, me i ngaki ia mai ana tatou e tetai nga metua ma te au tu maro maata. Kua manako tetai pae i to ratou tamariki anga, kia maata ua atu ta ratou ka rave me kore kia meitaki rava atu, e kia rauka te akaperepereanga a to ratou metua. Me ko to tatou tu manakoia, penei ka manako tarevake tatou i to Iehova manako ia tatou. Te aroa nei a Iehova ia tatou no ta tatou tavini ngakau tae katoa anga iaia. Te akapapu maira te Tuatua a te Atua ia Iehova kia tatou e e “kua kite oki aia i to tatou tu; te manako ra aia e, e one tatou nei.” (Sala. 103:14) Kua kite aia i to tatou turanga kotingaia e te inangaro nei aia ia tatou me tavini maroiroi tatou iaia noatu te reira tu. Me maara ia tatou e kare to tatou Atua i te pu maro pakari, ka tauturuia tatou kia mako ua ta tatou uaorai umuumuanga i te kiteanga i to tatou turanga kotingaia.​—Mika 6:8.

Noatu rai, e rauka ngata ana i tetai pae i te akatupu i te reira tu manako tau ua. Me ko toou tuia, kore koe e kimi tauturu atu i ko i tetai Kerititiano kite pakari tei kite meitaki ia koe? (Mase. 27:9) Ei akaraanga, te inangaro ra koe i te tavini ei painia tamou? E akakoroanga meitaki tikai te reira! Te rauka ngata ra ia koe i te itae i te reira? Penei ka inangaro tauturu koe kia akamama mai i toou oraanga. Me kore ka uriuri manako atu toou oa Kerititiano irinakiia kia koe, me e akakoroanga tau noou i teia taime kia painia tamou, no taau au apainga maata i toou pamiri. Ka rauka iaia te tauturu ia koe kia kite mai e me ka rauka rai ia koe i te rave i te au angaanga ke atu me kore eaa te akatanotano anga ka rauka ia koe kia maata atu taau ka rave. E turanga meitaki katoa to tetai tane i te tauturu i tana vaine i te rave i tana ka rauka kia tau ki tona turanga. Mei teia te tu, kia oronga atu aia i te manako ki tana vaine kia akangaroi ua, i mua ake ka akamata ei aia i te akamaata atu i tana angaanga no te marama ou. Penei ka akamaata mai teia i tona maroiroi e ka tauturu iaia kia akamou i tona mataora i roto i te angaanga orometua.

Akara i te Au Mea ka Rauka ia Koe i te Rave

Ka akakotinga te ruaine anga e te kopapa apikepike i ta tatou ka rauka i te rave i te tavinianga ia Iehova. Me e metua koe, penei te manako ra koe e e manga ua te puapinga taau e rauka mai ana mei taau uaorai apiianga me kore mei te au uipaanga Kerititiano no te mea te maata anga o toou taime e te maroiroi te pou ua ra ki runga i te tamariki rikiriki. Inara, ko te tumu ainei e te maata ra taau akamanako anga i toou turanga kotingaia, e kare koe e kite ana e te vai ra tetai au mea ka rauka rai ia koe i te rave?

I te au tauatini mataiti i topa, kua akakite tetai tangata Levi i tona inangaro kare i rauka ana iaia i te akamerengo. E tikaanga ngateitei tona i te tavinianga e rua epetoma i te au mataiti ravarai i ko i te iero. Inara, kua akakite aia i te inangaro maata i te noo tinamou i te pae i te atarau. (Sala. 84:1-3) Eaa tei tauturu i teia tangata kia mareka ua? Kua  kite mai aia e noatu e okotai ua rai ra i te noo i te au paepae o te iero, e tikaanga ngateitei takake rava te reira. (Sala. 84:4, 5, 10) Pera katoa rai tatou, auraka e akamou i te manako ki runga i to tatou turanga kotingaia, mari ra kia manako atu e kia ariki rekareka i te au angaanga ka rauka ia tatou i te rave.

Ei akaraanga, e akamanako ana i tetai tuaine ko Nerlande i Kanata. E noo ua ana aia ki runga i te pereoo oparapara e kua manako kotinga pakari i tana ka rauka i te rave i roto i te angaanga orometua. Inara, kua taui tona turanga manako i te kite mai anga aia i tetai au ngai okooko i te pae mai ei ngai tutuanga nana. Kua akamarama mai aia e: “E noo ua ana au ki runga i toku pereoo oparapara i te pae i te paata i roto i te ngai okooko. E rekareka ana au i te tutu anga atu ki te au tangata ka aere mai e ka noo ki raro i te akangaroi poto ua.” Na te piri atu anga ki roto i teia tuanga o te angaanga orometua te oronga ra i te tu merengoanga maata kia Nerlande.

Rave i te Akatanotano Anga me ka Anoanoia

Te tere viviki ua ra tetai poti tuteretere ma te matangi e pupui ra ki runga i tona kie. Inara, me tano atu te mataro e akatere ra i te poti ki tetai uriia kino pakari ka tauta aia kia akatanotano i te au kie. Kare e rauka iaia i te akatere i te uriia, inara na te rave anga i tetai akatanotano anga, penei ka rauka iaia i te akatere ua atu i tona poti. Mei te reira katoa rai, kare e rauka ia tatou i te akatere i te au turanga manamanata mei te uriia rai e tano atura tatou i roto i te oraanga. Inara ka rauka ia tatou i te akatere i to tatou oraanga i te ngai ka rauka, na te akatanotano anga i te tu e taangaanga ana tatou i to tatou maroiroi i te pae kopapa, pae manako e te au manako ngakau. Me akamanako meitaki tatou i to tatou au turanga ou, ka tauturuia tatou i te akamou i to tatou tu merengoanga e te rekareka i roto i te angaanga a te Atua.​—Mase. 11:2.

E akamanako i tetai au akaraanga. Me e manga maroiroi ua to tatou, penei e mea tau kia kopae tatou i te au angaanga i te popongi te ka akatupu i te roiroi e kia rauka ia tatou i te aere atu ki te uipaanga Kerititiano i te aiai. Ka tauturu teia ia tatou kia taokotai meitaki atu ki to tatou au taeake Kerititiano. Me kore penei e kare tetai metua vaine e rauka i te piri atu ki te angaanga orometua mei tera are ki tera are no te makimaki o tana tamaiti, e mea tau i reira nona i te pati atu i tetai tuaine Kerititiano ki tona kainga kia piri mai ki roto i te tutu anga i runga i te terepaoni i tana tamaiti e moe ra.

Akapeea me kare toou turanga e akatika ia koe i te rave i taau au apii katoatoa i mua ake ka akamanakoia ai te reira i te uipaanga putuputuanga? Ka rauka ia koe i te akamanako meitaki e eaa te maata i taau ka rauka i te akapapa e te rave meitaki anga i te reira. Na te akatanotano anga i ta  tatou au akakoroanga i teianei, ka vai maroiroi ua tatou e te mataora.

Ka umuumuia te tu aruaruanga papu e te tautaanga i te akatanotano i to tatou au akakoroanga. Kua rave a Serge raua ko Agnès, tetai nga tokorua i Varani i tetai tauianga maata i roto i ta raua au parani. Kua karanga aia e, “I te kite anga maua e kua nui a Agnès, kua ngaro rava ta maua moemoea anga kia riro mai ei nga mitinari.” I teianei e metua tane aia no e rua nga tamaine maroiroi, kua akamarama mai a Serge e akapeea raua i te akanoo anga i tetai akakoroanga ou na raua ei nga tokorua. Kua akakite a Serge e: “Noatu kare i rauka ia maua i te tavini atu i tetai enua ke, inara kua iki maua kia riro mai ei nga ‘mitinari’ i to maua rai enua. E kua piri atu maua ki roto i tetai pupu reo ke.” Kua puapingaia ainei raua mei te akanooanga i teia akakoroanga ou? Kua akakite a Serge e: “Kua kite mai maua e te taangaanga puapingaia nei maua i roto i te putuputuanga.”

Ko Odile tetai tuaine Kerititiano i Varani e 70 tuma ona mataiti, e mamae maata ana aia mei tona nga turi rumatiki kino, e kare e rauka iaia i te tu ua kia roa. Kua akamaromaroa teia iaia no te arairai nei teia kino o tona kopapa iaia mei te piri atu anga ki roto i te angaanga orometua mei tera are ki tera are. Inara, kare aia i tuku i te au. Kua akatanotano aia i tana au angaanga na te piri atu anga ki roto i te tutuanga i runga i te terepaoni. Kua akakite aia e: “E mama atu e te mataora atu i taku i akamanako atu ei!” Kua akatupu teia ravenga i te akaora akaou i tona inangaro no te angaanga orometua.

Ka Apai mai te Au Tapapaanga Tu Tau i te Au Akameitakianga

I te akatupuanga i te manako tau ua no ta tatou ka rauka i te rave, ka kopae atu tatou i te au manako taitaia. Na te akanoo anga i te au akakoroanga tau ua, ka tupu mai te manako autuanga noatu to tatou turanga kotingaia. Ka rekareka i reira tatou i ta tatou i rauka i te rave, noatu te tu meangiti ua.​—Gala. 6:4.

Ia tatou e akatupu ra i te manako tau ua no ta tatou e umuumu ra no tatou uaorai, ka maata atu ta tatou akamanakoanga atu i te au taeake Kerititiano. I te kite anga i to ratou au turanga kotingaia, ka ariki rekareka ua atu rai tatou i ta ratou e rave ra no tatou. Na te akaari anga i te tu akameitaki no tetai ua atu tauturu ka orongaia mai, te oronga ra tatou i te vaerua taokotai e te marama akaau anga. (1 Pete. 3:8) Kia maara e, ei Metua aroa, kare rava a Iehova e pati mai kia maata atu i ta tatou ka rauka i te oronga atu. E me e au tapapaanga tau ua to tatou e te au akakoroanga akamouia te ka rauka i te itae, ka maata rava atu to tatou tu merengoanga e te rekareka i roto i ta tatou au angaanga pae vaerua.

[Tataanga i te kapi 29]

E kite mai ei i te tu rekareka e te tu merengoanga i roto i ta tatou tavinianga i te Atua, ka anoanoia tatou kia akatupu i te au tapapaanga anga tu tau i te akamanako anga i to tatou uaorai tu maroiroi e te au turanga

[Tutu i te kapi 30]

Kua kite mai a Nerlande i te tu rekareka i roto i tana i rauka i te rave i roto i te angaanga orometua

[Tutu i te kapi 31]

Kia kite i te “akatanotano i te au kie”

[Akameitakianga]

© Wave Royalty Free/​age fotostock

[Tutu i te kapi 32]

Kua puapingaia a Serge raua ko Agnès mei te akanooanga i te au akakoroanga ou