Angaanga Orometua mei Tera Are ki Tera Are​—Eaa i Puapinga ai i Teianei?

“E kare e rā i tukua ia ratou, i te apii anga atu e te tuatua anga atu ia Iesu Mesia, ki roto i te iero ra, e i tera are i tera are.”​—ANGA. 5:42.

1, 2. (a) Eaa te ravenga no te tutu aere anga tei matauia e te Au Kite o Iehova? (e) Eaa ta tatou ka akamanako i roto i teia atikara?

E KITE matauia ana te reira vaitata rai e i te pa enua katoa i runga i te enua nei. E rua nga tangata, mako to raua kakau, te aere ra ki tetai are e te tauta ra i te oronga ki te tangata ngutuare i tetai karere poto ua no roto mai i te Pipiria no runga i te Patireia o te Atua. Me ariki mai aia i te karere, penei ka oronga atu raua i tetai puka tei akatumuia ki runga i te Pipiria e tetai apii Pipiria oronga ua i te kainga. Me oti te reira ka aere atu raua ki tetai are ke. Me kua piri ana koe ki roto i teia angaanga, penei te kite ra koe e te kite putuputu maira te au tangata e ko koe tetai o te Au Kite o Iehova i mua ake ka akamata ai koe i te tuatua. E tika rai, kua riro te angaanga orometua mei tera are ki tera are ei akairo no tatou.

² E tukeke te au ravenga e taangaanga ana tatou i te rave i te akauenga ta Iesu i oronga mai kia tutu aere e kia akariro i te tangata ei pipi. (Mata. 28:19, 20) E akakite aere ana tatou i roto i te au makete, i runga i te mataara, e i tetai atu au ngai tangata. (Anga. 17:17) E tuatua ana tatou ki te manganui na runga i te terepaoni e na roto i te reta. E oronga ana tatou i te tuatua mou Pipiria ki te aronga ta tatou e aravei ana i te tuatau e rave ra tatou i ta tatou angaanga i te au ra ravarai. E Web site akamana katoaia ta tatou, te oronga maira i te akakiteanga tei akatumuia ki runga i te Pipiria na roto i te au reo tere atu i te 300. * Te akatupu maira teia au ravenga katoatoa i te au tupuanga meitaki. Inara, te maataanga o te au ngai, te ravenga maata e akakitekite aere ana tatou i te tuatua meitaki koia oki na te tutu aere anga mei tera are ki tera are. Eaa te tumuanga no teia ravenga no te tutu anga? Akapeea teia ravenga i te riro anga kia taangaanga maataia e te au tangata o te Atua i teia tuatau? E eaa ra i puapinga ai i teianei?

Te Ravenga a te Au Apotetoro

3. Eaa te au ikuikuanga no runga i te tutu aere anga ta Iesu i oronga ki te au apotetoro, e eaa ta teia e akakite maira e akapeea ratou i te tutu aere anga?

³ Kua akatumuia te ravenga no te tutu aere anga mei tera are ki tera are i roto i te au Tuatua Tapu. Te tono anga a Iesu i te au apotetoro kia aere kia tutu aere, kua ikuiku atu aia ia ratou e: “E te oire e te vila ta kotou e tomo, e ui atu i to reira tangata e tau.” Akapeea ratou i te kimi anga i te aronga tei tau? Kua akakite a Iesu kia ratou e kia aere ratou ki te au are o te tangata, i te na ko anga e: “E kia tomo atu kotou ki roto i te are, ka akaora atu i to reira. E te tau ra taua ngutuare ra, e vai rai ta kotou au i reira.” Ka tiaki ua ainei ratou kia patiia mai ratou kia atoro atu i te au tangata? E akara katoa ana i te au tuatua a Iesu e: “E te kore e kite mai ia kotou, e kare oki e akono i ta kotou tuatua; kia aere atu kotou ki vao i taua are ra, e taua oire ra, ka ruru atu i te repo i to kotou vaevae.” (Mata. 10:11-14) Te akataka meitaki maira teia au ikuikuanga e kua “aere atura [te au apotetoro] na roto i te au vila, i te tutu aere anga i te tuatua meitaki,” e ko ratou te ka atoro mua atu i te au tangata i to ratou au kainga.​—Luka 9:6.

4. I roto i teea ngai o te Pipiria te taiku taka meitakiia maira te tutu aere anga mei tera are ki tera are?

⁴ Te taiku taka meitaki maira te Pipiria e kua tutu aere te au apotetoro mei tera are ki tera are. Ei akaraanga, te karanga maira a Angaanga 5:42 no runga ia ratou e: “E kare e rā i tukua ia ratou, i  te apii anga atu e te tuatua anga atu ia Iesu Mesia, ki roto i te iero ra, e i tera are i tera are.” I etai 20 mataiti i muri mai, kua akamaara atu te apotetoro ko Paulo ki te aronga pakari o te putuputuanga i Ephesia e: “E kare rava akenei e mea e meitaki ei kotou na i vaioia e au, kare akenei au i tivata i te ako atu ia kotou e te apii ia kotou i te ngai tangata, e i tera are i tera are.” Kua atoro ana ainei a Paulo i taua aronga pakari i mua ake ka riro mai ei ratou ei aronga irinaki? I te akaraanga kua atoro atu aia ia ratou, no te mea nana i apii ia ratou, i roto i tetai au mea, “i te tataraara i te Atua, e te akarongo i to tatou Atu ia Iesu Mesia.” (Anga. 20:20, 21) I te tuatua anga no runga ia Angaanga 20:20, te karanga ra te Word Pictures in the New Testament a Robertson e: “E mea puapinga i te akamanako e kua tutu aere ana teia au tangata tutu maata rava atu mei tera are ki tera are.”

E Nuku Tapaki i Teia Tuatau

5. Akapeea te angaanga tutu aere i te akatutuia mai anga i roto i te totou a Ioela?

⁵ Te akakitekite aere tei raveia i te anere mataiti mua e akara anga momua ia no tetai angaanga maata atu te ka raveia i to tatou tuatau. Kua akaaite te peroveta ko Ioela i te angaanga tutu anga a te au Kerititiano akatainuia ki tetai mate kino pakari ta te au manumanu i rave, te kapitiia maira te au tapaki. (Ioela 1:4) Te neke ra mei tetai nuku rai, te takore ra te au tapaki i te au araianga, te tomo atura ki roto i te au are, e te akapou ra i te au mea ravarai i mua ia ratou. (E tatau ia Ioela 2:2, 7-9.) E akatutu anga taka meitaki tikai ia no te akakoromaki anga e te akono tau anga te au tangata o te Atua i te rave anga i te angaanga akakitekite aere i teia tuatau! Te au ravenga puapinga maata rava atu e taangaangaia ra e te au Kerititiano akatainuia e to ratou au oa te “mamoe ke atu” i te akatupu anga i teia akatutu anga no te totou, koia oki, ko te angaanga orometua mei tera are ki tera are. (Ioa. 10:16) Ei Au Kite no Iehova, akapeea tatou i te ariki anga i taua ravenga ra a te au apotetoro no te tutu aere anga?

6. I te mataiti 1922, eaa te akamaroiroi anga tei orongaia kia akakite aere mei tera are ki tera are, inara akapeea tetai pae i te ariu mai anga?

⁶ Mei te mataiti 1919 e aere ua mai, kua akaketaketa akaouia mai te apainga a te au Kerititiano tataki tai kia o atu ki roto i te akakitekite aere anga. Ei akaraanga, te akamaara maira tetai atikara tei tapaia e e “Service Essential” i roto i te Watch Tower o Aukute 15, 1922, ki te au Kerititiano akatainuia i te puapinga no te “apai maroiroi anga i te au karere neneiia ki te au tangata e te  tuatua atu anga kia ratou i ko i to ratou ngutupa, i te oronga anga i te akakite anga e te vaitata maira te patireia o te rangi.” Kua orongaia mai te au tuatua akataka meitakiia i roto i te Bulletin (Ta Tatou Angaanga Patireia i teianei). Inara, e meangiti ua te numero o te aronga tei tutu aere mei tera are ki tera are i te akamata anga. Kua tapupu rai tetai pae. E tuketuke te au patoi anga ta ratou i akatupu mai, inara ko te mea manamanata tikai koia oki te manako ra etai pae e e tu akaakaia no ratou i te tutu aere mei tera are ki tera are. Te akaketaketa maataia anga te angaanga tavini anga, e manganui te aronga tei akaatea mai kia kore e taokotai atu ki ta Iehova akaaerenga.

7. I te akamata anga o te mataiti 1950, eaa te anoano tei kiteaia mai?

⁷ I te au ngauru mataiti tei aru mai, kua tupu maata tikai te angaanga tutu anga. Inara, i te akara anga, te anoanoia ra tetai tereni anga i roto i te angaanga orometua mei tera are ki tera are. Ei akaraanga, e akamanako ana i te turanga i Marike. Te akamata anga o te mataiti 1950, e 28 patene o te Au Kite i roto i taua enua kua rave kotinga ua i ta ratou angaanga tutu anga na te tua anga i te aenga pepa me kore i te tu aere anga i runga i te mataara ma ta ratou au makatini. Kua tere atu ki te 40 patene kare e aere putuputu ana i te rave i te angaanga tutu anga, i te tuku anga i te au marama kare i rave ana i tetai akakitekite anga. Eaa te ka raveia i te tauturu atu i te au Kerititiano katoatoa tei akatapuia kia tutu aere mei tera are ki tera are?

8, 9. Eaa te porokaramu tereni anga tei akamataia i te mataiti 1953, e eaa te au tupuanga?

⁸ Kua orongaia te manako maata ki te angaanga orometua mei tera are ki tera are i ko i te uruoaanga pa enua tei raveia i New York City i te mataiti 1953. Kua akakite te Taeake ko Nathan H. Knorr e ko te angaanga maata a te au akaaere Kerititiano ravarai koia oki kia tauturu atu i te Au Kite ravarai kia riro mai ei orometua tamou mei tera are ki tera are. “Ka rauka i te katoatoa” i nana ai, “kia tutu aere i te tuatua meitaki mei tera are ki tera are.” Kua akamataia tetai porokaramu tereni anga i te ao katoa kia akatupuia teia akakoroanga. Te aronga kare i tutu aere ake mei tera are ki tera are kua orongaia te tereni anga kia aravei atu i te au tangata i ko i to ratou au ngutupa, i te uriuri manako anga kia ratou mei roto mai i te Pipiria, e te pau anga i ta ratou au uianga.

⁹ E meitaki tikai te au tupuanga no teia porokaramu tereni anga. I roto i te ngauru mataiti, kua kake maata mai te numero o te au papuritia i te ao katoa ki te 100 patene, te numero o te atoro akaou anga e 126 patene, e te numero no te au apii Pipiria e 150 patene. I teia tuatau, vaitata atu ki te itu mirioni te au papuritia Patireia te tutu aere ra i te tuatua meitaki i te ao katoa. E akapapu anga tikai teia i te tupuanga meitaki no ta Iehova akameitakianga no te au tauta anga a tona au tangata i roto i te angaanga orometua mei tera are ki tera are.​—Isa. 60:22.

Akairo Anga i te Au Tangata no te Ora

10, 11. (a) Eaa te orama tei orongaia kia Ezekiela, tei tataia i roto ia Ezekiela pene 9? (e) Akapeea taua orama i te akatupu angaia i to tatou tuatau?

¹⁰ Te kiteaia ra te puapinga no te angaanga orometua mei tera are ki tera are i roto i tetai orama tei orongaia ki te peroveta ko Ezekiela. I roto i taua orama, kua kite atura a Ezekiela i nga tangata toko ono ma te taoonga ta tangata i roto i to ratou rima pera katoa te itu o te tangata i kakau ki te oronga ma te ariki inika a te tata tuatua i tona kaokao. Kua akakiteia atu ki te itu o te tangata e “ka aere na rotopu i te oire” e “ka tuku ei i te akairo ki runga i te rae o te au tangata i aue ua, e kua kapiki ua, i te au mea viivii katoa i raveia i roto ra.” Aru mai i te angaanga akairo anga, kua akaueia te puke tangata toko ono ma te au taoonga ta tangata kia tamateia te au tangata ravarai kare o ratou akairo.​—E tatau ia Ezekiela 9:1-6.

¹¹ Kua marama tatou e i te akatupu anga i teia totou, te akatutu maira te tangata “i kakauia ki te orongā” i te toenga o te au Kerititiano tei akatainuia e te vaerua. Na roto i te angaanga tutu anga e te akariro anga i te tangata ei pipi, te tuku ra te pupu akatainuia i tetai akairo akatutuia ki runga i te aronga tei riro mai ei tuanga no te “mamoe ke atu” a  Karaiti. (Ioa. 10:16) Eaa te akairo? E akapapu anga te reira, mei te mea e kua akaariia mai i runga i to ratou rae akairo koreia, e e au mamoe akatapuia e kua papetitoia ei au pipi na Iesu Karaiti e kua akakakauia ratou ma te tu tangata ou mei to Karaiti rai. (Ephe. 4:20-24) Kua riro maira teia au aronga mei te mamoe rai ei anana okotai ma te au Kerititiano akatainuia e kua tauturu atu ia ratou i roto i ta ratou angaanga puapinga no te akairo anga i tetai aronga.​—Apo. 22:17.

12. Akapeea te orama a Ezekiela no te akairo anga i te au rae i te akaketaketa anga mai i te puapinga kia kimi ua atu rai tatou i te aronga mei te mamoe rai?

¹² Te akaketaketa maira te orama a Ezekiela i te tumu okotai i riro ei ei mea rapurapu na tatou i te kimi ua rai i te au tangata i “aue ua, e kua kapiki ua.” Te o maira te oraanga o te au tangata. Kare e roa atu, ka takore te au nuku akavaanga a Iehova i te rangi ra, tei akatutuia mai e te nga tangata toko ono ma te au taoonga ta tangata, i te aronga kare o ratou akairo akatutu anga. No runga i taua akavaanga te aere maira, kua tata te apotetoro ko Paulo e ka apai mai te Atu ko Iesu, ma “tana au angela mana katoa,” i te “mate [k]i te aronga kare i kite i te Atua, e tei kore i akarongo i te evangelia o to tatou Atu o Iesu Mesia.” (2 Tesa. 1:7, 8) E akara ana e ka akavaia te au tangata no runga i to ratou ariu mai anga ki te tuatua meitaki. No reira, e mea tau kia raveia te akakiteanga i te karere a te Atua ma te tapupu kore e tae rava atu ki te openga. (Apo. 14:6, 7) Te tuku ra teia i tetai apainga teiaa ki runga i te au tavini katoatoa o Iehova tei akatapuia.​—E tatau ia Ezekiela 3:17-19.

13. (a) Eaa te apainga ta te apotetoro ko Paulo i manako ana, e no teaa ra? (e) Eaa te apainga taau e manako ra no te au tangata i roto i te ngai e tutu aere ra koe?

¹³ Kua kite te apotetoro ko Paulo e tei runga iaia uaorai te apainga kia oronga i te tuatua meitaki ki tetai ke. Kua tata aia e: “E kai ou oki au na te Eleni, e na te tangata ke ke; na te aronga pakari, e na te kite kore. E teianei, kua tika roa iaku i te akakite atu i te evangelia ia kotou katoa i Roma na, e pou ua ake toku nei maroiroi.” (Roma 1:14, 15) No te tu akaaroa tei akaariia kiaia, kua akakeuia a Paulo kia tauturu atu i tetai ke kia puapingaia mei te takinga meitaki o te Atua mei iaia rai i te puapingaia anga e te reira. (1 Timo. 1:12-16) Mei te mea rai e e kaiou tana ki tetai tangata tana i aravei atu, e kaiou ia te ka rauka i te tutaki anakeia na te oronga anga i te tuatua meitaki ki taua tangata. Te kite ra ainei koe e e kaiou taau ki te au tangata i roto i te ngai e tutu aere ra koe?​—E tatau ia Angaanga 20:26, 27.

14. Eaa ta tatou tumu anga maata rava atu no te tutu aere anga i te ngai tangata e mei tera are ki tera are?

¹⁴ Noatu e e puapinga maata te akaora anga i te oraanga o te tangata, e tumu anga maata atu tetai no te tutu aere anga mei tera are ki tera are. I roto i te totou tei tataia i roto ia Malaki 1:11, kua akakite a Iehova e: “E maata oki toku nei ingoa i rotopu i te ou enua ra, mei te itinga mai o te rā e tae rava atu ki tona opunga; e e apaiia mai . . . ki toku nei ingoa i te au ngai katoa, e te atinga viivii kore ra; ka maata oki toku nei ingoa i rotopu i te au enua ra.” I te akatupu anga i teia totou, te akapaapaa aere ra te au tavini akatapuia o Iehova i te ngai tangata, i tona ingoa i roto i te au enua katoa ia ratou e rave akaaka ra i ta ratou angaanga orometua. (Sala. 109:30; Mata. 24:14) I te oronga anga “i te atinga akapaapaa” kia Iehova ko ta tatou tumu anga maata ravaia no te tutu aere anga i te ngai tangata e mei tera are ki tera are.​—Ebe. 13:15, NW.

Au Tupuanga Puapinga i Mua

15. (a) Akapeea te ngati Iseraela i te akamaata anga i ta ratou angaanga ia ratou e akapini ra ia Ieriko i te ra itu? (e) Eaa ta teia e akakite maira no runga i te angaanga tutu anga?

¹⁵ Eaa te au tupuanga te ka akatupuia no te angaanga tutu anga? Te oronga maira te akapiniia anga o Ieriko i tetai akatutuanga, tei tataia i roto i  te puka o Iosua. Kia maara ra e i mua ua ake ka akapou ei te Atua ia Ieriko, kua ikuikuia ki te ngati Iseraela kia akapini tu tai ia te oire e ono ra. Inara, i te itu o te ra, e maata te mea te ka tupu mai i roto i ta ratou angaanga. Kua akakite a Iehova kia Iosua e: “Kia itu ïa akapini anga i taua oire ra, ka akatangi ei te kau taunga i taua au pu ra. E kia akaroa ratou i te tangi i taua pu iubile ra, . . . ei reira te tangata ravarai ka maevaʼi ei maeva maata; ei reira te patu o te oire e topa pu uaʼi ki raro.” (Iosu. 6:2-5) E tika rai e e akatotoa anga aiteite tetai no ta tatou angaanga tutu anga. Kare e ekoko e, i te tae anga ki te tuatau o te akapouanga i teia akatereanga o te au mea nei, ka kite mai tatou i te akakitekite anga maata rava atu i te ingoa o te Atua e te Patireia i roto i te tuatua enua o teianei ao.

16, 17. (a) Eaa te ka akatupuia i mua ake ka akamutu ei te “mate maata”? (e) Eaa ta tatou ka akamanako i roto i te atikara e aru maira?

¹⁶ Ka tae mai rai te tuatau me riro te karere ta tatou e akakite aere ra mei te “maeva maata” rai. I roto i te puka o Apokalupo, kua akatutuia mai te au karere akavaanga ririnui ki tetai “ua toka maata . . . e tau te toka okotai i te taleni i te teiaa.” * E te akakite maira a Apokalupo 16:21 e: “E mate maata rava oki te reira.” Kare tatou i kite e eaa te tuanga a te angaanga orometua mei tera are ki tera are ka rave i te akakite aere anga i taua au karere akavaanga openga. Inara papu ia tatou e i mua ake ka akamutu ei te “mate maata,” ka akakite aereia te ingoa o Iehova i tetai tu kare rava i akakiteia ana i mua ana i roto i te tuatua enua o te tangata.​—Apo. 7:14; Eze. 38:23.

¹⁷ Ia tatou e tapapa ra i te au tupuanga puapinga e vai maira i mua, kia maroiroi ua atu rai tatou i te akakite aere anga i te tuatua meitaki o te Patireia. I te rave anga i taua tukuanga angaanga ra, eaa te au akaaoanga ta tatou ka aro atu i roto i te angaanga orometua mei tera are ki tera are, e akapeea tatou i te autu anga i taua au akaaoanga ra? Ka akamanakoia teia au uianga i roto i te atikara e aru maira.

[Au Tataanga Rikiriki i Raro]

Akapeea Koe me Pau?

• Eaa te tumu anga Tuatua Tapu no te tutu aere anga mei tera are ki tera are?

• Akapeea te angaanga orometua mei tera are ki tera are i te akaketaketaia anga i teia tuatau?

• Eaa ra te au tavini akatapuia o Iehova i manako ei e tei runga ia ratou te apainga kia tutu aere?

• Eaa te au tupuanga puapinga e vai maira i mua?

[Au Uianga Apii]

[Au Tutu i te kapi 4]

Mei te apotetoro ko Paulo, te manako ra ainei koe e tei runga ia koe te apainga kia tutu aere ki tetai ke?

[Tutu i te kapi 5]

Te Taeake Knorr, i te 1953