E Mea Ora te Tuatua a Iehova

Au Manako Maata mei te Au Reta ki to Korinetia

TE MANAKO oonu tikai ra te apotetoro ko Paulo i te oraanga pae vaerua o te putuputuanga i Korinetia. Kua akarongo ana aia e te tupu ra te au ke anga i rotopu i te au taeake i reira. Te arikiia ra te tu akono tau kore. Kua tata katoa te putuputuanga kia Paulo, i te uiui no runga i tetai au mea. No reira mei te mataiti 55 T.N., iaia i Ephesia i te tuatau o te toru o tona tere mitinari, i tata ai a Paulo i tana reta mua o tana nga reta e rua ki to Korinetia.

Ko te rua o te reta, tei tataia no tetai nga mea marama ua i muri ua ake i te reta mua, e turu ia i te reta mua. No te mea e te aiteite ra te au turanga e manganui i roto e i vao i te putuputuanga o Korinetia i te anere mataiti mua ki to tatou i teia tuatau nei, e puapinga maata tikai te karere a nga reta a Paulo ki to Korinetia no tatou.​—Ebe. 4:12.

‘KIA MATAKITE; KIA MOU PIRI TIKAI; E AKAMAROIROI’

(1 Kori. 1:1–​16:24)

“Ei tuatua okotai ta kotou ravarai,” i ako atu ei a Paulo. (1 Kori. 1:10) ‘Kare atu oki e pange ke koia oki te Mesia ra ko Iesu,’ i te akamou i te au tu Kerititiano. (1 Kori. 3:11-13) No runga i te tangata moeaana i roto i te putuputuanga, te karanga ra a Paulo e: “E akataka ke atu kotou i taua tangata tuatua kino i roto ia kotou na.” (1 Kori. 5:13) “Kare te kopapa e no te moeaana,” i karanga ai aia, “no te Atu” ra.​—1 Kori. 6:13, NW.

I te pau i te “au tuatua ta kotou i tata mai,” kua oronga mai a Paulo i te akoanga puapinga no runga i te akaipoipoanga e te noo akaipoipo kore ua. (1 Kori. 7:1) I muri ake i te tuatuaanga no te taoonga upoko Kerititiano, no te tu mako i roto i te au uipaanga Kerititiano, e no runga i te papuanga o te tuakaouanga, kua oronga a Paulo i te akamaroiroi anga e: “Kia matakite; kia mou piri tikai te akarongo; e akatangata pakari kotou; e akamaroiroi.”​—1 Kori. 16:13.

Pauia te Au Uianga Tuatua Tapu:

1:21​—Te taangaanga tikai ra ainei a Iehova i te “neneva” ei akaora i te aronga e akarongo ra? Kare, kare aia e akapera. Inara, no te mea “kare akera to te ao i kite i te Atua i to ratou uaorai pakari,” ko tana ka taangaanga ei akaora i te tangata, te akaraanga neneva ra ki te ao.​—Ioa. 17:25.

5:5​—Eaa te aiteanga e ‘ka tuku atu kia Satani taua tangata kino ra, kia mate te kopapa, kia ora te vaerua’? Me akaateaia tetai tangata tataraara kore e rave ua atura i te ara kino ki vao ake i te putuputuanga, kua riro akaou mai aia ei tuanga no te ao kino o Satani. (1 Ioa.  5:19) No reira, ka tuatuaia aia e kua tukuia atu kia Satani. Ko te akaateaanga i te tangata ki vao te akatupu ra i te takoreanga, me kore i te akaateaanga, i te akakeuanga kino mei te putuputuanga e i te akonoanga i te vaerua, me kore te tu aroa maata.​—2 Timo. 4:22.

7:33, 34​—Eaa te aiteanga o “te au mea o teianei ao” ta te tane akaipoipo me kore ta te vaine akaipoipo ka apiapi? Te taiku ra a Paulo ki te au apinga noa ua nei o te oraanga ta te au Kerititiano akaipoipo ka anoanoia kia manako atu. Te o maira te kai, te kakau, e te are, kare ra oki i te au apinga kino o teia ao, ta te au Kerititiano e kopae ra.​—1 Ioa. 2:15-17.

11:26, NW​—Eaa te “putuputu” i te akamaaraanga i te mate o Iesu, e “tae ua atu” ki teea taime? Kare a Paulo e karanga ra e kia akamaara putuputu i te mate o Iesu. Te tuatua Ereni tei taangaangaia e “me putuputu” ko te aiteanga “aea ua atu” me kore “i te au taime ravarai.” No reira, te karanga ra a Paulo e i te au taime ravarai me kai te au Kerititiano akatainuia i te au oroa Akamaaraanga, e okotai taime i te mataiti, ia Nisana 14, e “akakitekite i te matenga o te Atu.” Ka rave ratou i teia “e tae ua atu ki tona taenga mai,” tera ra oki e, me apai aia ia ratou ki runga i te rangi na te tuakaouanga.​—1 Tesa. 4:14-17.

13:13​—I roto i teea tu te aroa i maata rava atu ei i te akarongo e te manakonakoanga? Me riro mai te “au mea tei manakonakoia” ei mea tika tikai e “te tumu tikai ïa i te au mea i tatariia nei” ei tupuanga kiteaia, ka ope rai i reira te au tuanga o te akarongo e te manakonakoanga. (Ebe. 11:1) E maata rava atu te aroa i te akarongo e te manakonakoanga no te mea ka vai rai te reira e mutu kore ua atu.

15:29​—Eaa te aiteanga e kia “bapetizoiaʼi ei tuā i te aronga i mate ra”? Kare a Paulo e tuatua ana e kia papetitoia te aronga e ora ra no te aronga tei mate kare i papetitoia. Te tuatua nei a Paulo i konei no tetai mataara te o ra te au Kerititiano akatainuia e te vaerua, ki roto i tetai oraanga te ka anoanoia ratou kia akono i to ratou tu tiratiratu e tae rava atu ki to ratou mateanga e kia aruia mai e te tuakaouanga ki te oraanga vaerua.

Au Apiianga no Tatou:

1:26-31; 3:3-9; 4:7. Ko te akapaapaa akaaka anga ia Iehova, kare ia tatou uaorai, te akakeu ra i te tu taokotaianga i roto i te putuputuanga.

2:3-5. Iaia e tutu aere ra i Korinetia, e ngai apiianga kite karape e te apii Ereni, penei te manako ra a Paulo e me ka rauka iaia i te akaariu mai i te aronga e akarongo maira kiaia. Inara, kare aia i akatika ana i tona tu paruparu e te mataku kia tamanata mai i tana apainga kia rave i tana angaanga orometua tei orongaia mai e te Atua. Mei te reira rai, kare tatou e akatika i te au turanga ngata kia tapupu ia tatou i te akakite atu i te tuatua meitaki o te Patireia o te Atua. Ka akara papu meitaki tatou kia Iehova no te tauturu mei a Paulo tikai.

2:16. Kia rauka “te ngakau o te Mesia” ka rauka te kite i tona ara manako, te manako anga mei iaia rai, te marama pu tikai anga i tona tu, e te aru anga i tona akaraanga. (1 Pete. 2:21; 4:1) Mei teaa atura te puapinga i te apii meitaki anga i te oraanga o Iesu e tana angaanga orometua!

3:10-15; 4:17. Kia akara matatio e kia akameitaki atu tatou i to tatou tu i te apii e te akariro anga i te tangata ei au pipi. (Mata. 28:19, 20) Me kare tatou e apii meitaki, penei kare ta tatou aronga apii e autu i te au timataanga no te akarongo, e penei ka tupu te kino mei te mamae rai e kua akaoraia tatou mei te mea ra e “i na roto i te ai.”

6:18, NW. Ko te “rere ke atu i te moeaana” koia oki ko te kopae kare anake ua i te au angaanga por·neiʹa inara pera katoa te ravenga ainga tau kore, te tu akono viivii, te tamanako ainga tau kore, te akameamea tau kore i te tane e te vaine​—tetai ua atu apinga te taki atura ki te moeaana.​—Mata. 5:28; Iako. 3:17.

7:29. Ka tau te nga tangata akaipoipo kia matakite e auraka e akapou i te akamanako ua ia raua uaorai e kia riro te au manako Patireia ei tuanga rua i roto i to raua oraanga.

10:8-11. Kua riri atura a Iehova i te ngati Iseraela i te urutoe anga ia Mose raua ko Aarona. E tu pakari to tatou me paruru atu i te akatupu anga i te au manako urutoe.

16:2. Ka rave putuputuia ta tatou oronga anga moni no te turuanga i te au angaanga  Patireia me parani meitakiia i mua roa ake e me raveia na tetai papaanga meitaki tikai.

‘KIA TAMOU KIA AKATIKATIKAIA’

(2 Kori. 1:1–​13:14)

Te akakite ra a Paulo ki to Korinetia e kia ‘akakore atu ratou i tana ara, e e akapumaana atu’ i te tangata rave ara tei tataraara e tei tukuia atu no te mate. Noatu e kua akamaromaroa tana reta mua ia ratou, kua akakite a Paulo i te tu mataora no te mea ‘i aue ratou ma te tataraara.’​—2 Kori. 2:6, 7; 7:8, 9.

No te mea ‘te maata ra te au mea katoa nei ia ratou,’ te akamaroiroi ra a Paulo i to Korinetia “kia maata katoa teianei mea aroa.” I muri ake i te pauanga i te aronga e patoi maira, kua oronga aia i te akoanga openga ki te katoatoa rava e: “Kia tamou i te rekareka, kia akatikatikaia, kia akapumaanaia, kia taokotai te manako, kia noo au ua.”​—2 Kori. 8:7; 13:11, NW.

Pauia te Au Uianga Tuatua Tapu:

2:15, 16​—Akapeea tatou i riro mai ei “ei aunga kakara no te Mesia”? Teia te tumu no te mea e aru ana tatou i te Pipiria e e akakite aere ana i te karere a tei reira. Noatu e e mea viivii taua “kakara” ra ki te aronga tuatua tika kore, e aunga kakara ra kia Iehova e te aronga ngakau tika.

5:16​—Akapeea te au Kerititiano akatainuia i te kore anga e “akono ua atu i te tangata i te akonoanga o te kopapa nei”? Kare ratou e akara ana i te tangata i te tu kopapa, mei tera rai e, ka akaari i te tu mareka tei akatumuia ki runga i te apinga nui, te iti tangata, me kore te tu eteniki me kore te kapuaanga pa enua. Ko te mea puapinga kia ratou koia oki ko te pirianga pae vaerua ki to ratou au taeake irinaki.

11:1, 16; 12:11​—Kua riro ainei a Paulo ei akatietie neneva ki to Korinetia? Kare, kare ravaia. Inara, penei i te akaraanga ki tetai pae mei te mea rai e te akapaapaa ra e e akatietie neneva no te mea kua maroia aia kia tuatua i te paruru anga i tona taoonga apotetoro.

12:1-4​—Koai tei “apai naia . . . ki runga i paradaiso”? No tei kore te Pipiria i tuatua mai no tetai ua atu tangata tei kite ana i taua orama ra e te aru ra te tataanga i ta Paulo paruru anga i tona taoonga apotetoro, penei te akakite ua maira aia i tei tupu kiaia. Penei te akamanako atura te apotetoro i te parataito vaerua ta te putuputuanga Kerititiano e mataora ra i roto i “te tuatau openga ra.”​—Dani. 12:4.

Au Apiianga no Tatou:

3:5​. Ei kaveinga, te akakite mai nei teia irava kia tatou e te akono tau nei a Iehova i te au Kerititiano no te angaanga orometua no tana Tuatua, tona vaerua tapu, e te tuanga i te enua nei o tana akaaerenga. (Ioa. 16:7; 2 Timo. 3:16, 17) Ka tau meitaki tatou kia apii i te Pipiria e te au puka tei akatumuia ki runga i te Pipiria ma te mako tikai, ma te pure putuputu no te vaerua tapu, e te tae putuputu atu ma te paupau i roto i te au uipaanga Kerititiano.​—Sala. 1:1-3; Luka 11:10-13; Ebe. 10:24, 25.

4:16. No te mea “te akaouia nei te tangata i roto, i tera rā i tera rā,” e Iehova, ka anoanoia kia ariki putuputu tatou i te au tauturu a Iehova, auraka rava e akatika e okotai ra kia ngere i te akamanakoanga i te au apinga pae vaerua.

4:17, 18. Te maaraanga e te “mate mea ngiti poto māmā i teianei” ka tauturuia tatou kia tamou i te tu akarongo kia Iehova i te tuatau ngata.

5:1-5. Mei teaa atura te manea i te akakiteanga a Paulo i te au manako o te au Kerititiano akatainuia ki to ratou manakonakoanga i te oraanga i runga i te rangi!

10:13. Ei ture matauia, me kare e au akanoonoo anga taka meitaki i maaniia no tatou kia tauturu i te au ngai te anoano maata ia ra te tauturu, ka tau tatou kia angaanga i te ngai anake ua tei akanooia mai e ta tatou putuputuanga.

13:5. I te ‘kimi matatio ia tatou uaorai i to tatou akarongo,’ ka anoanoia tatou kia akaaite i to tatou tu mei ta tatou e apii ra mei te Pipiria. I te ‘akara matariki ia tatou uaorai,’ ka anoanoia tatou kia akara meitaki i to tatou turanga i te pae vaerua, te kapitiia maira te tu karape o to tatou “kite ngakau” e te maata i ta tatou au angaanga no te akarongo. (Ebe. 5:14, NW; Iako. 1:22-25) Na te taangaanga anga i te akoanga meitaki a Paulo, ka rauka ia tatou i te aaere ua atu rai na te ara o te tuatua mou.

[Tutu i te kapi 26, 27]

Eaa te aiteanga o te au tuatua e kia “putuputu ta kotou kai anga i teia varaoa e te inu i teia kapu”?​—1 Kori. 11:26, NW