Kare Matou i Mataku Ana​—Tei ia Matou a Iehova

Akakiteia e Egyptia Petridou

I te mataiti 1972, kua uipa te Au Kite i roto katoatoa ia Kupero ki Nicosia i te akarongo i tetai tuatuaanga takake na Nathan H. Knorr, tei riro ana ei arataki i te angaanga orometua a te Au Kite o Iehova no tetai tuatau roa. Kua kite viviki mai aia iaku, e i mua ake ka rauka ai iaku i te akaaravei atu iaia, kua ui mai aia e: “E nuti taau no Aiphiti mai?” Kua aravei au i te Taeake ko Knorr e 20 mataiti i mua atu ana i roto i toku oire anau ko Alexandria, i Aiphiti.

KUA anau ia au ki Alexandria i te ra 23 o Tianuare, mataiti 1914, te mataiapo o tetai au tamariki e a. Kua tupu mai matou kare i mamao mei te pae tai. E oire maatamaata e te manea a Alexandria i taua tuatau ra, e e rongo meitaki no tona au parani akatu apinga e te tuatua enua. No te mea te kapiti atura te iti tangata Europa ki te iti tangata Arapia, kua kite matou te au tamariki i te tuatua i te au reo Arapia, Papaa, Varani, e te Itaria, pera katoa to matou reo tupuna, reo Ereni.

I muri ake i toku karatuati anga mai no te apii, kua rauka mai taku ngai angaanga i roto i tetai are vaito kakau Varani, te ngai e ngakau parau ana au i te vaito e te tui i te au pona manea aere no te au vaine turanga teitei te oraanga. E maroiroi tikai au i roto i taku akonoanga e e mea inangaro naku i te tatau i te Pipiria, noatu e e meangiti ua taku e marama ra i taku i tatau.

I taua taime rai​—rotopu i te au mataiti 1930—kua aravei au i tetai mapu tane meitaki, e tangata tumu no Kupero. E tangata karape a Theodotos Petrides i te kukumi, inara kua apii katoa aia i te angaanga tunu kai venevene e e angaanga ana aia ki roto i tetai toa oko kai venevene kite meitakiia. Kua inangaro ia au e Theodotos, e vaine poto manea ua rouru kerekere. E putuputu ana aia i te imene mai kiaku i te au imene akainangaro Ereni, i raro ake i toku maramarama. Kua akaipoipo maua i te ra 30 o Tiunu, mataiti 1940. E au ra mataora tikai te reira. E noo ana maua ki roto i tetai apatimani i raro ua ake i to taku mama. Kua anau ta maua tamaiti mua ko John, i te mataiti 1941.

Apii i te Au Tuatua Mou Pipiria

No tetai au taime, kare a Theodotos e mareka ana i ta matou akonoanga, e te ui ra aia i te au uianga no runga i te Pipiria. Ma toku kite kore, kua akamata takere te Au Kite o Iehova i te apii i te Pipiria kiaia. I tetai ra, iaku i te kainga e ta maua pepe, kua topapa mai tetai vaine i to matou ngutupa e kua oake mai i tetai kati e karere Pipiria to runga. I roto i tetai tu tau, kua tapu au e kua tatau i te reira. E oti kua oronga mai aia i tetai au puka Pipiria. Ae, ko taua au puka tikai ra ta Theodotos i apai mai ki te kainga!

 “Ae, e au puka taku mei teia,” i tuatua atu ei au. “Aere mai ki roto nei, ine.” I tera taime rai, kua pepei au i te au uianga ki teia Kite, ko Eleni Nicolaou. Ma te tu akakoromaki, kua taangaanga aia i te Pipiria i te pau mai iaku. Rekaia tikai au i tera. I te tu poitirere, kua akamata au i te marama i te karere a te Pipiria. I tetai tapuanga ta maua pukapukaanga, kua kite mai a Eleni i te tutu o taku tane. “Kua kite au i tera tangata!” i tuatua poitirere ei aia. Kua kitea te apinga muna a Theodotos. Poitirere tikai au. Te aere nei a Theo ki te au uipaanga Kerititiano, kare au​—e kare rava aia i akakite mai ana kiaku! I te okianga mai a Theodotos ki te kainga i taua ra ra, kua karanga atu au kiaia e: “Tera ngai aau i aere ana i tera ake Tapati​—i teia epetoma ka aru atu au ia koe!”

I taku uipaanga mua i aere atu ei, te uriuri ra tetai pupu e taingauru paa au tangata i te puka Pipiria o Mika. Kua akarongo meitaki au ki te au apinga katoatoa! Mei reira mai, i te au aiai Varaire ravarai e aere mai ana a George e Katerini Petraki i te apii i te Pipiria kia maua. Kua patoi toku papa e taku ai tungane i ta maua apii ki te Au Kite, inara kare toku teina i manata ana, noatu e kare rava aia i riro mai ana ei Kite. A Mama ra, kua ariki i te tuatua mou Pipiria. I te mataiti 1942, kua papetitoia a Mama, a Theodotos, e au i roto i te tai i Alexandria ei akaari i to matou akatapuia anga kia Iehova.

Tamanataia to Matou Oraanga

I te mataiti 1939, kua akamata te Tamaki II o te Ao, e kare i roa ana kua maata atu te reira. I te pae mua o te au mataiti 1940, kua tae te Tianara Tiamani ko Erwin Rommel e tona nuku vaeau tangika tamaki ki roto ia El Alamein, i te pae ua mai e kua ki a Alexandria i te au tangata o te vaeau Peritane. Kua akaputu matou i te au kai maro. I reira kua patiia mai a Theodotos kia tiaki i te toa kai venevene ou o tona pu i Port Taufiq, vaitata atu ki Suez, no reira kua neke matou ki reira. Kua kimiia matou e tetai nga Kite tuatua Ereni. Noatu e kare raua i kite i to matou ngai nooanga, kua tutu aere raua mei tera are ki tera are e kitea ua ia atu matou.

Ia matou i Port Taufiq, e apii ana matou i te Pipiria e Stavros raua ko Giula Kypraios e ta raua nga tamariki, ko Totos e Georgia, e kua riro mai ratou ei oa piri mou no matou. No te mataora maata o Stavros i te apii Pipiria, e akaoki ana aia i te au ora katoatoa i roto i tona are ki muri e tai ora, kia kore e rokoia e matou te rerue openga ki te kainga e ka noo matou kia roa atu. E taea ana ta matou au uriurianga ki te turuaipo.

Kua noo matou ki Port Taufiq no tetai 18 marama, e i muri mai kua oki atu matou ki Alexandria i te makiia anga toku mama. Kua mate tiratiratu aia kia Iehova, i te mataiti 1947. Ei tupuanga akaou, kua kite matou i te akamaroiroi a Iehova ia matou na roto i te pirianga ketaketa ki te au oa Kerititiano mou. Kua rauka katoa ia matou i te akono manuiri atu i te au mitinari e teretere ra ki ta ratou au tukuanga angaanga i te  ngai mamao me noo poto mai to ratou au pai i Alexandria.

Tu Mataora e te Tu Manamanata

I te mataiti 1952, kua anau au i te rua o ta maua tamaiti, ko James. Ei nga metua, kua kite maua i te puapinga i te utuutu i ta maua nga tamariki i roto i tetai turanga meitaki i te pae vaerua, no reira kua akariro maua i to matou kainga ei ngai no te au akanoonoo anga apii Pipiria putuputu e e ariki manuiri putuputu ana i te au orometua tamou. No reira ta maua mataiapo, a John, i tamou marie ei i te inangaro no te tuatua mou Pipiria, e iaia e mapu tamariki ra rai, kua akamata aia i te painia. I taua taime rai te aere ra aia ki te apii po i te akaoti i tana apii.

Kare i roa i muri mai, kua kitea mai te maki pukuatu pakari o Theodotos e kua akakiteia e kia akaoti aia i te rave i tana tu angaanga. E a rai mataiti o ta maua tamaiti, ko James. Eaa ta matou ka rave? Kare ainei a Iehova i taputou mai e: “Auraka e mataku, te vaitata katoao au ia koe”? (Isa. 41:10) E akamanako ana i to matou poitirere e te mataora i te mataiti 1956 i te patiia anga mai matou kia tavini ei au painia i Ismailia, vaitata atu ki te Suez Canal! Kua riro te au mataiti tei aru mai ei tuatau taitaia i roto ia Aiphiti, e kua anoanoia te akamaroiroi anga i te au taeake Kerititiano.

I te mataiti 1960 kua anoanoia matou kia akaruke ia Aiphiti okotai kiri kakau tataki tai. Kua aere atu matou ki Kupero, te enua anau o taku tane. I teia taime, e maki maata tikai a Theodotos e kare e meitaki i te angaanga. Inara, kua oronga mai tetai taeake Kerititiano e tana vaine i tetai ngai nooanga no raua rai kia matou. Te mea akaaroa ra, e rua mataiti i muri mai kua mate taku tane, e kua vai anake ua au e James, te ou ra rai. A John, tei aere katoa mai ki Kupero, kua akaipoipo e te akono ra rai i tona uaorai pamiri.

Akonoia i te Au Tuatau Ngata

I reira kua oronga mai a Stavros e Dora Kairis kia noo maua ki roto i to raua are. Kua tuturi au e kua akameitakiia Iehova no tei akono akaou mai i to matou au anoano. (Sala. 145:16) I te ikianga a Stavros e Dora i te oko i to raua kainga e kia akatu i te mea ou kapitiia mai tetai Are Uipaanga Patireia i te taua i raro, kua akatu aroa raua i tetai ngai e rua pia meangiti i te pae mai, no maua ko James.

I te openga, kua akaipoipo a James, e kua tavini raua ko tana vaine ei nga painia e tae rava atu ki te anauanga te mataiapo o ta raua au  tamariki e a. I te mataiti 1974, e rua mataiti i muri ake i te atoroanga puapinga o te Taeake ko Knorr, kua tupu te pekapeka poritiki i roto ia Kupero. * Manganui te au tangata, kapitiia mai te Au Kite, tei akaruke i to ratou au kainga e kua akamata akaou mai i tetai oraanga ou. Ko taku tamaiti ko John, tetai i roto ia ratou. Kua aere atu aia ki Kanata e tana vaine e te au tamariki e toru. I te reira rai taime, kua mataora matou i te kite anga i te maata o te numero o te au papuritia Patireia i roto ia Kupero.

I toku akamataanga i te koi i taku moni pakari, kua rauka iaku i te tutu anga pu tikai i roto i te angaanga orometua. Inara i tetai au mataiti ua akenei, kua akaparuparu tetai tuanga iaku e kua aere atu au ki ko i taku tamaiti ko James e tona pamiri, noo ei. I muri mai, i te kino atu anga toku maki, kua apaiia atu au ki te are maki noo ei no tetai au epetoma e oti kua nekeia atu ki tetai kainga akonokono. Noatu te mamae putuputu, e akakitekite ana au ki te au neti, te aronga maki, e te aronga atoro mai. E akapou katoa ana au i te au ora e manganui i te apii ko au anake ua, e ma te tauturu aroa a toku au taeake pae vaerua, e rauka ana iaku kia tae atu ki te Apii Puka a te Putuputuanga i te pae ua mai.

Pumaana i Toku Ruaine Anga

E pumaana ana au me akarongo au i te nuti o te aronga ta maua ko Theodotos i akameitakiia kia tauturu. Manganui ta ratou au tamariki e te au mokopuna e tavini ra i roto i te angaanga orometua tamou​—tetai pae te tavini ra i Autireria, i Kanata, i Engarani, i Ereni, e i Tuiterani. I teia ra, taku tamaiti ko John e tana vaine e noo ana raua e ta raua tamaiti ki Kanata. Ta raua tamaine pakari ake e tana tane e nga painia raua. Ta raua tamaine openga e tana tane, ko Linda e Joshua Snape, kua patiia kia tae atu ki te pupu 124 o te Apii Gileada.

Te noo ra i teianei taku tamaiti ko James e tana vaine ki Tiamani. Te tavini ra ta raua nga tamaroa e rua ki Betela​—okotai i Atene, i Ereni, e tetai i Selters, i Tiamani. Ta raua tamaiti openga, ta raua tamaine, e tana tane e au painia, e tavini ra i Tiamani.

Mei teaa atura ta matou au tua ka tua ki toku mama e taku akaperepere ko Theodotos me oki mai raua i roto i te tuakaouanga! Ka mataora raua i te kite i te tuanga meitaki ta raua i akaruke mai no to raua pamiri. *

[Au Tataanga Rikiriki i Raro]

[Tataanga i te kapi 24]

Ei tupuanga akaou, kua kite matou i te akamaroiroi a Iehova i roto i te pirianga ketaketa ki te au oa Kerititiano mou

[Mapu i te kapi 24]

(No runga i teia, akara i te puka)

KUPERO

NICOSIA

TAI METITERENIA

AIPHITI

CAIRO

El Alamein

Alexandria

Ismailia

Suez

Port Taufiq

Suez Canal

[Akameitakianga]

Based on NASA/Visible Earth imagery

[Tutu i te kapi 23]

Maua ko Theodotos i te mataiti 1938

[Tutu i te kapi 25]

Taku tamaiti ko James e tana vaine

[Tutu i te kapi 25]

Taku tamaiti ko John e tana vaine