Na te ‘Atua i Akatupu’!

“E teianei, kare a te tanu, kare oki a te tamauu ki te vai; ko te Atua ra ko tei akatupu.”​—1 KORI. 3:7.

1. Na roto i teea tu i manakoia ai tatou e ‘e oa rave angaanga oki no te Atua’?

‘E OA rave angaanga oki no te Atua.’ Ko te akataka angaia ta te apotetoro ko Paulo i akakite mai no runga i te angaanga puapinga te ka rauka ia tatou katoatoa i te rave. (E tatau ia 1 Korinetia 3:5-9.) Te angaanga ta Paulo e taiku maira ko te angaanga no runga i te akariro anga i te tangata ei pipi. Kua akaaite aia i te reira ki te ruru anga e te tamauu anga i te ua. Me ka puapingaia tatou i roto i taua angaanga puapinga maata, ko ta Iehova tauturu ta tatou e anoano ra. Te akamaara maira a Paulo kia tatou e na te ‘Atua i akatupu.’

2. No te mea e ‘na te Atua i akatupu’ akapeea te reira tikaanga i te tauturu anga ia tatou kia rauka tetai manako tau no ta tatou angaanga orometua?

² Te tauturu maira taua tikaanga akaaka ra kia rauka ia tatou tetai manako tau no ta tatou angaanga orometua. Penei te angaanga pakari ra tatou i roto i ta tatou angaanga tutuanga e te apiianga, inara tei maata atu te aere pouroa ra te akapaapaa anga kia Iehova me riro mai tetai tangata ei pipi. No teaa ra? Noatu ta tatou tauta anga pakari, kare tetai ia tatou e marama tikai ana e akapeea tetai tangata i riro mai ei ei pipi, no reira i te akara anga kare e rauka ia tatou katoa i te akatere i te reira. Kua akakite meitaki mai te Ariki ko Solomona i taua turanga i tona tataanga e: “Kare katoa koe i kite i ta te Atua ra angaanga, tana ravenga i te au mea katoa nei.”​—Kohe. 11:5.

3. Eaa te au tu aiteite tei tupu ana i rotopu i te angaanga no te ruru anga i te ua tikai e te akariro anga i te tangata ei pipi?

³ Te riro ra ainei to tatou tu kite kore kia marama i te tupu anga o tetai tangata ei pipi, ei tamanamanata anga i ta tatou angaanga? Kare. Kareka ra, te riro ra te reira ei mea oraora e te umere. Kua tuatua te Ariki ko Solomona e: “Ei te popongi ka ruru ei i taau ua, e ei te aiai auraka e tāpu ua i to rima: kare oki koe i kite i te ka tupu, me ko teia, me ko tera, peneiake ko te meitaki kapipiti katoa ra.” (Kohe. 11:6) E tika rai, i roto i te turanga no te tanu anga i te ua tikai, kare tatou i kite e kiea e me ka tupu rai te reira. E manganui te au tumu kare e rauka ia tatou i te akatere. Te aite katoa ra te reira ki te angaanga akariro anga i te tangata ei pipi. Kua akakite mai a Iesu i teia tikaanga i roto i nga akatutuanga e rua tei tataia no tatou i roto i te pene 4 o te Evangeria a Mareko. Ka akara ana tatou e eaa ta tatou ka kite mai no roto i teia nga akatutuanga e rua.

Au One Tukeke

4, 5. E akakite poto ua mai i te akatutuanga a Iesu no te tangata ruru ua tei ruru aere i te ua.

⁴ Mei tei tataia i roto ia Mareko 4:1-9, kua akataka mai a Iesu i tetai tangata ruru ua tei pepei, me kore tei ruru aere i te ua te ka topa atu ki runga i te au ngai tukeke. “Ka akarongo mai ana; I na, aere atura te ruru ua e ruru i te ua. E tei te ruru anga ra, topa iora tetai pae i te pae arataa, e kua aere maira te manu o te reva, kua kai iora. Topa iora tetai pae i te ngai paikea, kare i rai te one i reira, tutupu vave ua atura, no te mea kua papaku ua te one: E rāia iora, vera atura; e no te kore e aka, mae rava atura ïa. Topa iora tetai pae ki roto i te ngangaere, tupu akera te ngangaere, e pokia iora, kare akera i ua mai. Topa iora tetai pae ki te ngai one meitaki, tupu akera, uua iora, taki toru ngauru, taki ono ngauru, taki tai anere, i te ua okotai.”

⁵ I roto i te au tuatau Pipiria, e raveia ana te ruru anga i te ua na te pepei aere anga i te reira. E apai ana te tangata ruru i te ua i roto i tona kakau aatuia me kore i roto i tetai vairanga apinga e ka ruru tarere aere ei i te reira. No reira  i roto i teia akatutuanga, kare te tangata ruru ua e ruru tikai ra i te ua ki runga i te one tukeke. Mari ra, ka topa aere te ua i ruruia ki te au ngai tukeke.

6. Akapeea a Iesu i te akamarama mai anga i te akatutuanga no te tangata ruru ua?

⁶ Kare e anoanoia kia tamanako ua tatou e eaa ra te aiteanga o teia akatutuanga. Kua akamarama mai a Iesu i te reira, mei tei tataia i roto ia Mareko 4:14-20 e: “Te ruru ua ra, koia te ruru i te tuatua. Te pae arataa ra i topaia e tetai pae ua ra; koia te aronga i te akarongo anga i te tuatua, kua aere mairā Satani, e kua rave atura i te tuatua i ruruia i roto i to ratou ngakau ra. Te ngai paikea ra i topa katoaia e tetai pae ua; koia te aronga i āriki i te tuatua ma te rekareka i te akarongo anga ra; Kare ra i akaia i roto ia ratou, tāpu anga poto ua ta ratou: kia rokoia e te tumatetenga, e kia takinga-kinoia, i taua tuatua ra, maitu atura ïa ratou i reira. Te ngai ngangaere i topa katoaia e tetai pae ua; koia te aronga e akarongo i te tuatua; E ii atura i te akono anga i te peu o teianei ao, i te pikikaa o te apinga, e te anoano maata i tetai au mea ke ra, pokia atura te tuatua, kare atura i ua mai. Te ngai one meitaki ra i topaia e tetai pae ua ra; koia te aronga i akarongo i te tuatua, tāpu piri iora, e ua akera, taki toru ngauru, taki ono ngauru, taki tai anere, i te ua okotai.”

7. Te akatutu maira te ua e te one tukeke i teaa?

⁷ E akara ana e kare a Iesu e karanga ra e e tukeke te au ua i ruruia. Kareka ra, te tuatua ra aia no runga i te tu o te ua okotai tei topa ki runga i te au one tukeke, e tupu anga tukeke ta te one tukeke ka akatupu mai. E marokiakia te one mua; papaku ua te rua; e ngai ngangaere tataramoa te toru; e te a, e one meitaki te ka akatupu mai i te ua. (Luka 8:8) Eaa ra te ua? Ko te karere o te Patireia tei kiteaia i roto i te Tuatua a te Atua. (Mata. 13:19) Te akatutu maira te one tukeke i teaa? I te au tangata ma te au turanga ngakau tukeke.​—E tatau ia Luka 8:12, 15.

8. (a) Koai ta te ruru ua e akatutu maira? (e) Eaa ra i tukeke ei te ariu anga mai a te tangata ki te angaanga tutu anga i te Patireia?

⁸ Koai ta te ruru ua e akatutu maira? Te akatutu maira aia i te au oa angaanga o te Atua, te aronga te akakite aere ra i te tuatua meitaki o te Patireia. Mei ia Paulo rai raua ko Apolo, na raua i tanu e i tamauu. Noatu e kua angaanga pakari ana raua, tukeke te au tupu anga. No teaa ra? No te mea e tukeke te au turanga o te ngakau o te aronga tei akarongo mai ki te karere. I roto i te akatutuanga, kare e rauka i te tangata ruru ua i te akatere i teia au tupu anga. Mei teaa atura te pumaana anga o teia, ki to tatou au taeake e te au tuaine akarongo mou tikai tei angaanga pakari ana i te au mataiti e manganui, i roto i tetai au turanga no te au ngauru mataiti, noatu i te akara anga kare e maata ana te tupu anga! * No teaa ra?

9. Eaa te tuatua mou pumaana ta te apotetoro ko Paulo raua ko Iesu i akaketaketa mai?

 ⁹ Kare i vaitoia te tu akarongo mou ki te tuanga a te tangata ruru ua ki te au tupu anga o tana angaanga. Te taiku maira a Paulo ki te reira i tona tataanga e: “E rave tetai e tetai i tana uaorai tutaki e tau i tana uaorai angaanga.” (1 Kori. 3:8) Te tutaki kia tau ki te angaanga, kare e kia tau ki te au tupu anga no taua angaanga ra. Kua akaketaketa katoa mai a Iesu i teia tumu manako te oki mai anga tana au pipi mei tetai tere tutu anga. Kua rekareka ratou no te mea kua taakaakaia te au temoni ki raro ake ia ratou i te tuatuaia anga te ingoa o Iesu. E rekareka maata tikai te reira, kua tuatua ra a Iesu kia ratou e: “Auraka ra kotou e rekareka i te mea i vi te au vaerua kino ia kotou: e rekareka ra i to kotou ingoa i tataia ki runga i te ao ra.” (Luka 10:17-20) Noatu e kare te tangata ruru ua e kite i te maata mai anga o te au pipi ou, kare te aiteanga e kare aia i angaanga pakari ana me kore e iti mai tona akarongo i to etai ke. Tei maata atu, tei runga te au tupu anga i te turanga o te ngakau o te tangata e akarongo maira. Inara i te openga ra, na te Atua e akatupu mai i te reira!

Te Apainga a te Aronga Tei Akarongo i te Tuatua

10. Eaa te akataka maira e kua aite tetai tangata tei akarongo i te tuatua ki te one meitaki e me kare?

¹⁰ Akapeea ra te aronga tei akarongo mai ki te tuatua? Kua akataka takereia ainei kia akarongo mai ratou? Kare. Me te aite ra rai ratou ki te one meitaki e me kare, tei runga rai te reira ikianga ia ratou. E tika rai, te tu ngakau o te tangata ra ka rauka i te taui ki te tu meitaki me kore ki te tu kino. (Roma 6:17) I roto i tana akatutuanga, kua karanga a Iesu e “i te akarongo anga” mai etai pae i te tuatua, kua aere mai a Satani e kua rave atura i te reira. Inara auraka e tuku kia tupu mai teia. I roto ia Iakobo 4:7, kua akamaroiroiia te au Kerititiano kia “patoi atu i te diabolo,” e ka rere ke atu aia mei ia ratou. Kua akataka mai a Iesu i tetai pae i te ariki anga mai i te tuatua ma te rekareka i te akamata anga, inara kua akaturori keia no te mea “kare ra i akaia i roto ia ratou.” Inara kua akoia mai te au tavini o te Atua ‘kia akaia, e kia akatumuia’ kia kite meitaki tikai ratou “i te tipoto, e te tiroa, e te oonu, e te teitei, Kia kite [ratou] i te aroa o te Mesia, ko te kore e taea e te kite tangata nei.”​—Ephe. 3:17-19; Kolo. 2:6, 7.

11. Akapeea tetai tangata i te kopae anga kia kore te au tu apiapi e te au apinga e pokia i te tuatua?

¹¹ Ko tetai aronga tei akarongo mai i te tuatua kua akatakaia mai e te akatika ra “i te akono anga i te peu o teianei ao, i te pikikaa o te apinga” kia ii ia e kia pokia te tuatua. (1 Timo. 6:9, 10) Akapeea e rauka ai ia ratou i te kopae i teia? Te pau maira te apotetoro ko Paulo e: “Ei noo anga noinoi kore i te apinga to kotou; kia mareka i ta kotou i rauka ra: ko te Atua oki tei tuatua mai e, ‘Kare rava au e akaruke atu ia koe, kare oki au e taka ke ia koe, kare, kare rava atu.’”​—Ebe. 13:5.

12. No teaa ra te aronga tei akatutuia mai e te one meitaki i uua tukeke mai ei?

¹² I te openga ra, te karanga ra a Iesu e ko te aronga tei ruruia ki runga i te one meitaki “e ua akera, taki toru ngauru, taki ono ngauru, taki tai anere, i te ua okotai.” Noatu e te akarongo maira etai pae i te tuatua ma te turanga ngakau meitaki e te ua maira i te ua, ko tei rauka ia ratou i te rave i te akakite aere anga i te tuatua meitaki e tukeke kia tau ki to ratou au turanga. Ei akaraanga, penei no te ruaine anga me kore no te au maki akaparuparu i te kopapa e kotinga ra i etai kia kore e o atu ki roto i te angaanga tutu anga. (E akaaite ia Mareko 12:43, 44.) Penei e meangiti ua ta ratou akatere anga me kore kare e rauka i te tangata ruru ua i te akatere i te reira, inara te rekareka ra aia i tona kite anga e na Iehova i akatupu i te reira.​—E tatau ia Salamo 126:5, 6.

Te Moe ua ra te Tangata Ruru Ua

13, 14. (a) E akakite poto ua mai i ta Iesu akatutuanga no te tangata tei ruru aere i te ua. (e) Koai te akatutu maira i te tangata ruru ua, e eaa ra te ua?

¹³ I roto ia Mareko 4:26-29, te kite ra tatou i tetai akatutuanga ke no runga i te tangata ruru ua: “E tau te basileia o te Atua i te ua i ruruia e tetai tangata ki roto i te kainga; E te moe ua ra aia i te po, e te ara ua ra i te ao, te kao ra e te tupu ua ra taua ua ra, kare aia i kite i te tupu anga. Na te one uaorai oki i akatupu ake; ko te  kao anga tei mua, ei reira te kaui anga, e muri ake ko te sitona pakari i roto i te kaui. E kia pakari te sitona ra, kua rave aia i te kokoti i reira ra, no te mea, kua tae ki te kokoti anga ra.”

¹⁴ Koai teia tangata ruru ua? Te irinaki ra etai pae i roto ia Kerititome e te taikuia ra teia kia Iesu uaorai. Inara akapeea roa ai i karangaia ai e te moe ra a Iesu e kare i kite e akapeea te ua i te tupu anga? Papu tikai e kua kite a Iesu i te ravenga akatupu anga! Kareka ra, te akatutu maira teia tangata ruru ua, mei tei taikuia mai i mua akenei i te aronga tataki tai te akakitekite aere ra i te Patireia, te aronga tei ruru i te ua o te Patireia na roto i ta ratou angaanga tutu anga maroiroi. Te ua tei ruruia ki runga i te one ko te tuatua ia ta ratou e tutu aere ra. *

15, 16. Eaa te tuatua mou no runga i te tupu tikai anga e te tupu anga i te pae vaerua ta Iesu e akakite maira i roto i tana akatutuanga no te tangata ruru ua?

¹⁵ Te akakite maira a Iesu “e te moe ua ra [te tangata ruru ua] i te po, e te ara ua ra i te ao.” Kare teia i te tu ngere ua i te tuanga a te tangata ruru ua. Te akatutu maira te reira i te oraanga noa ua e aruia nei e te maataanga o te tangata. Te akakite maira te tuatua tei tataia i roto i teia irava i tetai ravenga tamou no te angaanga anga i te ao e te moe anga i te po no tetai au tuatau. Kua akakite mai a Iesu e eaa te ka tupu mai i taua tuatau ra. “Te kao ra e te tupu ua ra taua ua ra,” i karanga ai aia. E oti kua tuatua katoa mai a Iesu e: “Kare aia i kite i te tupu anga.” Tei runga te akaketaketa anga e ko te tikaanga ra na te one uaorai oki i akatupu mai.

¹⁶ Eaa te tumu manako ta Iesu e akakite maira i konei? E akara ana e tei runga te akaketaketa anga i te tupu anga e te tupu marie mai anga te reira. “Na te one uaorai oki i akatupu ake; ko te kao anga tei mua, ei reira te kaui anga, e muri ake ko te sitona pakari i roto i te kaui.” (Mare. 4:28) E marie ua teia tupu anga e kua na roto i te au tuanga. Kare te reira e maroia me kore e akavivikiia. E tika katoa te reira ki te tupu anga i te pae vaerua. Te tupu ra teia na roto i te au tuanga me akatika a Iehova i te tuatua mou kia tupu mai i roto i te ngakau o tetai tangata i akonoia.​—Anga. 13:48; Ebe. 6:1.

17. Koai ma tei o atu ki roto i te rekareka anga i te uua anga mai te ua o te tuatua mou?

¹⁷ Akapeea ra te tangata ruru ua i te o atu anga ki roto i te kokoti anga “kia pakari te sitona ra”? I te akatupu anga a Iehova i te tuatua mou o te Patireia kia tupu ki roto i te ngakau o te au pipi ou, kua tae mai ratou ki te tuatau i akakeuia ai ratou e to ratou inangaro i te Atua kia akatapu i  to ratou oraanga kiaia. Te akatutu maira ratou i ta ratou akatapuanga na roto i te papetitoanga i roto i te vai. Ka rauka i te au taeake te tere marie ua atura ki te pakarianga i te apai i te apainga maata i roto i te putuputuanga. Na te tangata ruru ua mua i ruru aere i te ua o te Patireia pera katoa e tetai aronga akakitekite aere i te Patireia noatu e kare ratou i kapiti mai ana tikai ki roto i te ruru aere anga i te ua tei akatupu mai i taua pipi tikai ra. (E tatau ia Ioane 4:36-38.) E tika rai, kua ‘rekareka kapipiti te ruru e te kokoti.’

Au Apiianga no Tatou i Teia Tuatau

18, 19. (a) Akapeea teia akara akaou anga i ta Iesu au akatutuanga i te akamaroiroi anga ia koe uaorai? (e) Eaa te ka uriuriia i roto i te atikara e aru maira?

¹⁸ Eaa ta tatou i kite mai i to tatou akara akaou anga i teia nga akatutuanga e rua tei tataia i roto ia Mataio pene 4? Te kite meitaki tikai ra tatou e e angaanga ta tatou ka rave​—ko te ruru anga. Auraka rava tatou e tuku i te au kotoeanga e te au manamanata e te au turanga ngata kia tapu ia tatou i te rave anga i teia angaanga. (Kohe. 11:4) Inara, i taua taime rai, te kite ra tatou i ta tatou akameitakianga tau kia manakoia mai ei au oa rave angaanga ma te Atua. Na Iehova i akatupu mai i te reira i te pae vaerua, i te akameitakianga mai i ta tatou au tauta anga e te au tauta anga a te aronga tei ariki mai i te karere. Te kite ra tatou e kare tatou e maro atu i tetai ke kia riro mai ei pipi. Auraka katoa tatou e taitaia me kore e maromaroa me marie ua te tupu anga. E pumaana tikai i te kite e kua vaitoia to tatou puapinga e to tatou tu akarongo mou kia Iehova e ki te akameitakianga tana i oronga mai kia tatou kia tutu aere i te “evangelia o te basileia . . . ei kite no te pa enua ravarai.”​—Mata. 24:14.

¹⁹ Eaa ua atu tetai apinga ta Iesu i apii mai kia tatou no runga i te tupuanga o te au pipi ou e te angaanga Patireia? Ka kiteaia te pauanga ki taua uianga i roto i tetai au akatutuanga ke mai tei tataia i roto i te au papaanga Evangeria. Ka akara meitaki tatou i etai o teia au akatutuanga i roto i te atikara e aru maira.

[Au Tataanga Rikiriki i Raro]

Maara Ainei ia Koe?

• Eaa etai au tu aiteite i rotopu i te ruru tikai anga i te ua e te tutu aere anga i te karere o te Patireia?

• Akapeea a Iehova i te vaito anga i te tu akarongo mou o te tangata tutu aere i te Patireia?

• Eaa te tu aiteite i rotopu i te tupu anga tikai e te tupu anga i te pae vaerua ta Iesu i akaketaketa mai?

• Akapeea ‘te ruru e te kokoti i rekareka kapipiti ei’?

[Au Uianga Apii]

[Au Tutu i te kapi 13]

Eaa ra a Iesu i akaaite ei i tetai tangata tutu aere i te Patireia o te Atua ki tetai tangata ruru ua?

[Au Tutu i te kapi 15]

Te aronga tei akatutuia mai e te one meitaki te piri maroiroi ra ki roto i te tutu aere anga i te Patireia tei tau ki to ratou au turanga

[Au Tutu i te kapi 16]

Na te Atua i akatupu