Tamou Marie i te Tu Tiratiratu ma te Ngakau Tavaitai

“Kia aere au i taau ra tuatua-mou; kia tavaitai toku ngakau i te mataku anga i to ingoa.”​—SALA. 86:11.

1, 2. (a) Kia tau ki te Salamo 86:2, 11, eaa te ka tauturu ia tatou kia vai akarongo mou ua kia Iehova me rokoia e te au timataanga? (e) Aea e tau ei i te akatupu i te tu tiratiratu ma te ngakau tae tikai?

EAA ra tetai au Kerititiano tei vai akarongo mou ana no te au mataiti noatu te tapekaanga me kore te takinga kinoanga, i tuku ua atu ei i muri mai ki te anoano maata o te au mea o te kopapa? Ko te pauanga, ka o mai to tatou ngakau​—to tatou tu tikai i roto. Te akapiri atura te Salamo 86 i te tu tiratiratu ki te ngakau tavaitai; koia oki, ki te ngakau katoa, tetai kare e pae ke ana. “E tiaki koe i toku vaerua, [“no te mea e tiratiratu,” NW] oki au,” i pure ei te tata taramo ko Davida. “Kia ora, e taku Atua, to tavini i irinaki ia koe nei.” Kua pure katoa a Davida e: “E apii mai koe, e Iehova, i toou ra arataa, kia aere au i taau ra tuatua-mou; kia tavaitai toku ngakau i te mataku anga i to ingoa.”​—Sala. 86:2, 11.

² Me kare tatou e irinaki ia Iehova ma to tatou ngakau katoa, ka riro tetai au mea e te au pirianga ke atu ei akaparuparu i to tatou tu tiratiratu ki te Atua mou. Ko te au anoano noinoi, mei te au maina enua rai tei uunaia ki roto i te mataara e aere ra tatou na runga. Noatu e kua vai akarongo mou ua ana tatou kia Iehova i roto i tetai au turanga ngata, ka takinoia rai tatou e te au ereere a satani. E mea puapinga tikai i reira, kia akatupu tatou i te tu tiratiratu ma te ngakau tae tikai kia Iehova i teianei, i mua ake ka rokoia ai tatou e te au timataanga! “I te au mea katoa taau ka tapapa ra,” e karanga ra te Pipiria, “kia maata taau tapapa  anga i to ngakau.” (Mase. 4:23) Ka rauka ia tatou tetai au apiianga puapinga i roto i teia tu, mei tei tupu ki te peroveta no Iuda mai ta Iehova i tono ki te Ariki ko Ieroboama o Iseraela.

“E Tutaki Atu oki Au ia Koe”

3. Mei teaa ra to Ieroboama tu ki te karere akavaanga tei akakiteia atu e te peroveta o te Atua?

³ E akamanako ua ana i taua mea ra. Koi akakite ua akera te tangata o te Atua i tetai karere pakari ki te Ariki ko Ieroboama, tei akanoo i te akamorianga i te punua puakatoro i roto i te patireia tino ngauru o Iseraela i te tua tokerau. Kua riri kino akera te ariki. Kua akaue atura aia i tona au tangata kia opu i te karere o te Atua. Inara ei vaitata uao a Iehova i tona tavini. I reira rai na roto i te tu temeio, maro atura te rima i akatikaia atu e te ariki ma te riri, e kua ngaa iora te atarau tei taangaangaia no te akamorianga pikikaa. E mea viviki rava te taui anga te tu o Ieroboama. Kua pati akatenga atu aia ki te tangata o te Atua e: “E tautopa atu koe ki to Atua ra kia Iehova, e pure koe iaku, kia akaoraia rai toku rima nei.” Kua pure atura te peroveta, e kua akaoraia akera te rima o te ariki.​—1 Ari. 13:1-6.

4. (a) Eaa ra te apinga aroa a te ariki i riro ei ei timataanga tikai i te tu tiratiratu o te peroveta? (e) Eaa ra te pauanga a te peroveta?

⁴ I reira kua tuatua atura a Ieroboama ki te tangata o te Atua mou e: “Aere katoa taua, ki te are akera, e kaikai, e tutaki atu oki au ia koe.” (1 Ari. 13:7) Eaa ra ta te peroveta ka rave i teianei? Ka ariki ainei aia i te takinga meitaki a te ariki i muri ake i te akakite anga i tetai karere akaapaanga iaia? (Sala. 119:113) Me ka patoi ainei aia i te takinga meitaki o te ariki, noatu i te akaraanga e kua akava ngakau te ariki? E tangata apinga nui a Ieroboama e ka rauka ua iaia i te oronga i te au apinga aroa oko maata na tona au oa. Mei te mea e kua akatupu muna ua atu te peroveta o te Atua i te anoano no te au mea o te kopapa, kare e kore e ka riro te apinga aroa a te ariki ei aka timataanga tikai. Inara, kua ikuiku a Iehova ki te peroveta e: “Auraka e kaikai, auraka e inu i te vai, auraka e oki na te arataa e aereia e koe ra.” I reira kua pau atu te peroveta ma te papu tikai e te taka meitaki e: “Oronga ua mai koe i tetai pae i te are noou, kare au e kaikai, kare e inu i te vai i teianei ngai.” E kua akaruke atura te peroveta ia Betela na tetai ara ke. (1 Ari. 13:8-10) Eaa te apiianga ta te tukuanga tika a te peroveta e apii maira ia tatou no runga i te tu tiratiratu ma te ngakau tae tikai?​—Roma 15:4.

“Kia Mareka” Ua

5. Akapeea te anoano maata i te au mea o te kopapa i te timataanga i to tatou tu tiratiratu?

⁵ I te akaraanga penei kare te anoano maata i te au mea o te kopapa e riro ei timataanga no te tu tiratiratu, kareka ra ko te reira tikai te tupu nei. Te irinaki ra ainei tatou i ta Iehova taputou kia oronga mai i ta tatou tikai e anoano nei? (Mata. 6:33; Ebe. 13:5) I to te tauta atu rai kia rauka mai tetai au apinga “meitaki atu” i roto i te oraanga noatu eaa te tu e kare e peke ia tatou i te oko, ka anoanoia ainei tikai te reira? (E tatau ia Philipi 4:11-13.) Te timataia ra ainei tatou kia akaatinga i te taime no te au angaanga a te Atua kia rauka ta tatou e inangaro ra i teianei? E ngai mua ainei to te tavini tiratiratu anga ia Iehova i roto i to tatou oraanga? Ta tatou au pauanga tei runga te maataanga i te tu e tavini ra tatou i te Atua, me e ngakau katoa e me kare. Kua tata te apotetoro ko Paulo e: “Kareka te akono i te Atua e te mareka ua ra, ko te apinga maata ïa. Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei. E teianei, e kai ta tatou, e te kakau, kia mareka tatou i te reira.”​—1 Timo. 6:6-8.

6. Eaa ra te ‘au tutaki’ penei te ka orongaia mai kia tatou, e eaa te ka tauturu ia tatou kia iki e me ka ariki rai tatou i te reira?

⁶ Ei akaraanga, penei ka oronga mai to tatou pu i tetai ngai angaanga moni meitaki atu na tatou e tetai atu au puapinga ke. Me kore penei kua kitea mai ia tatou e e maata atu te au puapinga o te pae moni ka rauka ia tatou me neke tatou ki tetai enua me kore ki tetai ngai ke i te kimi ngai angaanga. Te akamataanga, penei i te akaraanga e akameitakianga tikai taua turanga ra no ko mai ia Iehova. Inara i mua ake ka ariki ei tatou i te reira, kare ainei i te mea tau kia akara tatou e eaa tikai to tatou au akakoroanga? Te uianga maata ka tau tatou kia akamanako koia oki, “Akapeea ra taku tukuanga tika i te akatuke anga i toku pirianga kia Iehova?”

7. Eaa ra i puapinga ai kia takore takiri atu i te au anoano noinoi o te kopapa?

⁷ Kare te akatereanga o Satani e akamutu ana i te akamaroiroi i te anoano maata i te au mea o te kopapa. (E tatau ia 1 Ioane 2:15, 16.) To te Tiaporo  akakoroanga koia oki kia takino i to tatou ngakau. No reira, ka anoanoia tatou kia akataka meitaki e kia takore takiri atu i te au anoano noinoi o te kopapa i roto i to tatou ngakau. (Apo. 3:15-17) Kare i ngata ana ia Iesu i te patoi anga i te au patireia katoatoa rava o te ao ta Satani i oronga mai kiaia. (Mata. 4:8-10) Kua akamatakite mai aia e: “E akono meitaki e e matakite ia kotou i te morimori apinga: e maata ua oki to te tangata nei apinga, kare oki tei taua apinga nona ra tona ora.” (Luka 12:15) Ka tauturu te tu tiratiratu ia tatou kia irinaki ki runga ia Iehova eiaa ia tatou uaorai.

‘Kua Pikikaaia Aia’ e Tetai Peroveta Taito

8. Akapeea ra te tu tiratiratu o te peroveta o te Atua i te timataia anga?

⁸ Ka meitaki ua te au mea ravarai naringa te peroveta o te Atua i aere ua atu rai ki te kainga. Inara, vaitata rai e i taua taime rai, kua aro akaou atu aia i tetai timataanga ke. “Te noo ra tetai peroveta taito i Betela,” e akakite ra te Pipiria, “e kua aere maira te au tamariki nana, kua akakite maira” i te au angaanga pouroa tei raveia i muao i taua ra ra. I te rongo anga i taua tuatua ra, kua pati taua tangata ruaine ra ia ratou kia tuku i te nooanga ki runga i te atini kia rokoia atu iaia te peroveta o te Atua. Kare i roa i muri mai, kua kite atu aia i te peroveta e akangaroi ra i raro i tetai tumu rakau maata e kua karanga atura e: “E aere taua ki te ngutuare e kaikai.” I te kopae atu anga te tangata o te Atua mou i te patianga, kua pau maira taua tangata ruaine ra e: “E peroveta katoa oki au mei ia koe katoa na, e kua tuatuaia mai au e tetai angela i akaueia e Iehova, na ko maira, E akaoki mai iaia ki roto i to are, kia kai aia i te kai, e kia inu aia i te vai.” Inara te karanga ra te au Tuatua Tapu e: “Kua pikikaa aia iaia.”​—1 Ari. 13:11-18.

9. Eaa ta te au Tuatua Tapu e karanga maira no runga i te aronga pikipikikaa, e koai ta ratou e takino ana?

⁹ Noatu kare tatou i kite e eaa to te peroveta taito akakoroanga inara, kua pikikaa aia. Penei e kua riro ana rai taua tangata ruaine ra ei peroveta akarongo mou no Iehova i tetai tuatau. Kareka ra i teia taime, te akavare pikikaa ua ra aia. Te akaapa pakari ra te au Tuatua Tapu i taua tu ra. (E tatau ia Maseli 3:32.) Kare anake ua taua aronga pikipikikaa ra e takino ra i to ratou uaorai pirianga kia Iehova, te takino putuputu katoa ra ratou i to etai ke atu pirianga.

‘Kua Oki Atura Raua’ ko te Tangata Ruaine

10. Akapeea te peroveta o te Atua i te ariu anga atu ki te patianga a te tangata ruaine, e eaa tei tupu?

¹⁰ Tika anga ka nakiro ua i te peroveta no Iuda mai te ravenga karaperape a te peroveta taito. Ka rauka ua iaia kia ui ki iaia uaorai e, ‘Eaa ra a Iehova ka tono mai ei i te angera ki tetai tangata ke kia apai mai te au ikuikuanga ou naku?’ Ka rauka ua i te peroveta kia pati kia Iehova kia akataka meitaki mai i taua tuatua ra, inara kare te au Tuatua Tapu i akakite mai ana e kua akapera aia. Mari ra, “kua oki atura aia raua katoa [ko te tangata ruaine], e kua kaikai aia i roto i tona are, e kua inu oki i te vai.” Kare a Iehova i mareka ana. I te aerenga atu te peroveta i pikikaaia ki Iuda, kua  kite iora tetai riona iaia e kua tamate atura iaia. E openga taitaia tikai ki tona taoonga peroveta!​—1 Ari. 13:19-25. *

11. Eaa te akaraanga meitaki ta Ahia i akanoo?

¹¹ Kareka i tetai tua, ko te peroveta ko Ahia, tei tonoia kia akatainu ia Ieroboama ei ariki, kua vai tiratiratu ua aia e ruaine ua atu. I te ruaineanga o Ahia e kua matapoia aia, kua tono a Ieroboama i tana vaine kia ui kia Ahia no runga i te turanga o ta raua tamaiti maki. Kua totou iora a Ahia ma te mataku kore e ka mate te tamaiti a Ieroboama. (1 Ari. 14:1-18) I roto i te au akameitakianga e manganui tei rauka ia Ahia koia oki, ko te tikaanga kia tauturu i te tata anga i te Tuatua akauruia a te Atua. Akapeea ra? Kua taangaanga te taunga ko Ezera i tana au tataanga i muri mai, ei akakiteanga tuatua.​—2 Para. 9:29.

12-14. (a) Eaa te apiianga ka rauka mai ia tatou mei te tupuanga tei o mai te peroveta mapu? (e) Akatutu mai i te anoano kia akamanako meitaki ma te pure i te akoanga tei akatumuia ki runga i te Pipiria tei orongaia mai e te aronga pakari.

¹² Kare te Pipiria i akakite mai e eaa te peroveta mapu i kore ei i ui atu kia Iehova i mua ake ka aere ke atu ei ma te tangata ruaine i te kaikai e te inu vai. Ka tano ainei e kua akakite te tangata ruaine kiaia i tana uaorai e inangaro kia rongo? Eaa ra te apiianga no tatou? Ka anoanoia kia papu meitaki ia tatou te tu tika tikai o ta Iehova au umuumuanga. E kia akamanako meitaki tikai tatou e kia aru i te reira, noatu eaa te tu.

¹³ No runga i teia mea e ako, tetai aronga ka akarongo ua ratou i ta ratou uaorai e inangaro ra i te akarongo. Ei akaraanga, penei ka orongaia mai tetai ngai angaanga na tetai papuritia te ka riro ei akaiti mai i te taime tana ka akapou no tona ngutuare tangata e te au angaanga a te Atua. Penei ka pati aia i tetai aratakianga mei tetai tangata pakari. Penei ka akakite te tangata pakari na mua ake e kare ona tikaanga kia akakite ki te taeake e akapeea me akono i tona ngutuare tangata. I reira penei ka uriuri te tangata pakari ki te taeake i te au kino pae vaerua e o maira me ariki aia i te ngai angaanga tei orongaia mai kiaia. Ka akamaara ua ainei te taeake i te au tuatua mua a te tangata pakari, me ka akamanako oonu tikai aia i te au tuatua tei aru mai? Te taka ua ra e ka anoanoia te taeake kia akamanako meitaki e eaa te mea meitaki roa atu nona i te pae vaerua.

¹⁴ E akamanako ana i tetai turanga ke mai. Penei ka ui tetai tuaine ki tetai tangata pakari e me ka tau rai aia kia akatakake mai mei tana tane kare i roto i te akarongo. Kare e ekoko e ka akamarama te tangata pakari e nana rai na te vaine e rave i te tukuanga tika kia akatakake mai e me  kare. Penei ka uriuri aia i reira i te akoanga a te Pipiria no runga i taua tumu manako ra. (1 Kori. 7:10-16) Ka akamanako ainei te tuaine i ta te tangata pakari e tuatua maira? Me kua kimi takere ana aia i tona manako kia akaruke i tana tane? I te rave anga i tana tukuanga tika, e mea tau nona kia akamanako meitaki ma te pure i te akoanga tei akatumuia ki runga i te Pipiria.

Kia Akaaka

15. Eaa ta tatou i kite mai mei te tarevake o te peroveta o te Atua?

¹⁵ Eaa atu tetai mea ke ta tatou ka kite mai mei te tarevake o te peroveta no Iuda mai? Te akakite ra te Maseli 3:5 e: “E irinaki kia Iehova ma to ngakau katoa ra; auraka ra e irinaki ki toou uaorai kite.” Kare i irinaki atu rai ki runga ia Iehova mei tana i rave mai ana i te au tuatau i topa, i teia atianga ra kua irinaki te peroveta no Iuda mai ki runga i tana uaorai i manako. Kua riro tona tarevake ei mate nona e ei akakino i tona ingoa meitaki i te Atua. Te akakite pakari ua maira tei tupu kiaia i te puapinga maata o te tavini anga ia Iehova ma te akaaka e te tiratiratu!

16, 17. Eaa te ka tauturu ia tatou kia vai tiratiratu ua kia Iehova?

¹⁶ Ka ngoie ua te aerenga manako tau kore o to tatou ngakau i te akavare ia tatou. “E pikikaa maata to te ngakau i te au mea katoa nei, e kua kino takiri.” (Iere. 17:9) Kia vai tiratiratu ua rai kia Iehova, ka tauta pakari atu rai tatou i te kopae i te tu tangata taito e tona tu ngakau parau e te irinaki ki runga ia tatou uaorai. E kia akatangata ou ia tatou, “ko tei angaia kia tau i te Atua ra, i te tuatua-tika e te [“tiratiratu, NW].”​—E tatau ia Ephesia 4:22-24.

¹⁷ “Tei te aronga akaaka ra te pakari,” e akakite ra a Maseli 11:2. Na te irinaki akaaka ua anga ki runga ia Iehova e tauturu ia tatou kia kopae i te au tarevake kino. Ei akaraanga, ka viviki ua te tu maroiroi kore i te taruri ke i to tatou manako. (Mase. 24:10) Penei ka roiroi tatou i te rave i tetai tuanga o ta tatou angaanga tapu e ka akamata i te manako e kua rava ua ta tatou i rave ana i te au mataiti, i te manako anga e penei kua tau te taime no etai ke kia apai i te taoonga. Me kore ra penei ka inangaro tatou i tetai oraanga “tau ua nei.” Inara, na te ‘uapou ua atu anga ia tatou’ e te ‘maata ua atu te rave anga i te angaanga a te Atu’ e paruru i to tatou ngakau.​—Luka 13:24; 1 Kori. 15:58.

18. Eaa ta tatou ka rave me kare tatou i kite e eaa ta tatou tukuanga tika ka rave?

¹⁸ Tetai au taime, penei ka anoanoia tatou kia rave i tetai au tukuanga tika ngata, e penei kare e papu meitaki ana e eaa tikai te mataara tano kia aru. Ka timataia ainei tatou kia rave i ta tatou uaorai i manako e kua tau no to tatou manamanata? E ua ake ka kite tatou ia tatou uaorai i roto i taua au turanga ra, e tu pakari tikai kia pati kia Iehova kia tauturu mai ia tatou. “Kia ngere ra tetai tangata i te pakari ra,” e karanga ra a Iakobo 1:5, “ka pati aia ki te Atua ra, ko tei oronga ua mai i ta te tangata ravarai.” Ka oronga mai to tatou Metua i te rangi i te vaerua tapu ta tatou e anoano ra kia rauka ia tatou te au tukuanga tika meitaki.​—E tatau ia Luka 11:9, 13.

E Akamanako Meitaki Tikai e kia Vai Tiratiratu Ua

19, 20. Eaa ta tatou ka akamanako meitaki tikai i te rave?

¹⁹ I te au mataiti manamanata tei aru mai i te ariu ke anga o Solomona mei te akamorianga mou, kua timata pakariia te tu tiratiratu o te au tavini o te Atua. E tika e e manganui tei akaoko ia ratou na roto i tetai au tu me kore au mataara. Noatu ra, kua vai tiratiratu rai tetai aronga kia Iehova.

²⁰ I te au ra ravarai, e aro atu ana tatou i te au ikianga e te au tukuanga tika te ka timata i to tatou tu tiratiratu. Ka rauka katoa ia tatou kia akapapu i to tatou uaorai tu akarongo mou. Kia vai tiratiratu ua atu rai tatou kia Iehova ia tatou e tavaitai ra i to tatou ngakau, ma te irinaki pu tikai e ka akameitaki ua atu rai aia i tona aronga tiratiratu.​—2 Samu. 22:26.

[Tataanga Rikiriki i Raro]

Akapeea Koe me Pau?

• Eaa tatou ka tauta ai te takore takiri atu i te au anoano maata o te kopapa i roto i to tatou ngakau?

• Eaa te ka tauturu ia tatou kia vai tiratiratu ua kia Iehova?

• Akapeea te tu akaaka i te tauturu anga ia tatou kia vai tiratiratu ua ki te Atua?

[Au Uianga Apii]

[Au Tutu i te kapi 9]

E ngata ana ainei ia koe i te patoi atu i te au timataanga?

[Au Tutu i te kapi 10]

Ka akamanako meitaki ainei koe ma te pure i te akoanga tei akatumuia ki runga i te Pipiria?