Te Manako Aroa ua Maira a Iehova i Tona Au Tavini Ruaine

“Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa.”​—EBE. 6:10.

1, 2. (a) I te kite atu anga i tetai tangata rauru teatea eaa ta te reira ka akamaara mai kia koe? (e) Mei teaa ra to Iehova manako no te au Kerititiano ruaine?

ME KITE koe i te aronga ruaine i roto i te putuputuanga kua teatea te rauru, kare ainei te reira e akamaara mai ana ia koe i tetai tua i roto i te puka Pipiria o Daniela? I roto i tetai orama Tana i oronga kia Daniela, kua akatutu mai te Atua ko Iehova iaia uaorai ma te rauru teatea. Kua tata a Daniela e: “Te akara ra au, e kua akanooia iora te au terono, e kua noo maira To te au rā taito ra, ko tei tau tona kakau ki te kiona i te teatea, e te rauru o tona upoko mei te uru-mamoe meitaki ra ïa.”​—Dani. 7:9.

² I roto i tona tu natura, i te maataanga i te taime e kara teatea maanaana ua to te uru mamoe. No reira, te akakite maira te rauru teatea e te taoonga, “To te au rā taito ra” no runga i te roa o to te Atua tuatau e tona pakari, tei tau nga mea roa ai i ta tatou akangateiteianga oonu. Eaa ra te manako o te Au Ra Taito ko Iehova no runga i te au taeake e te au tuaine ruaine akarongo mou? Te karanga ra te Tuatua a te Atua e “e korona kakā te upoko inaina, kia rokoia atu tei te arataa tuatua-tika ra.” (Mase. 16:31) Ae, me inaina me kore me teatea te rauru o tetai Kerititiano akarongo mou, e mea manea roa taua tu ra i roto i te mata o te Atua. Te aite ra ainei toou manako no toou au taeake e te au tuaine ruaine mei to Iehova rai?

Eaa i Akaperepere Maataia Ai?

3. Eaa tatou ka akaperepere ei i to tatou au taeake irinaki kua ruaine?

³ I rotopu i taua au tavini akaperepere ruaine o te Atua koia oki, ko te au mema o te Pupu Akaaere o te Au Kite o Iehova, te au akaaere tutaka o teia taime e to mua atu, te au painia maroiroi, e te au papuritia o te Patireia​—te au taeake e te au tuaine e tavini tiratiratu ra i roto i to tatou au putuputuanga. Penei kua kite koe i tetai aronga tei akakitekite maroiroi ua ana i te tuatua meitaki no te au rau ngauru mataiti e tei riro to ratou akaraanga meitaki ei tauturu i te akakeu i te au mapu ou e te tu o to ratou oraanga. Kua apai ana tetai au taeake irinaki kua ruaine i te au apainga teiaa e kua akakoromaki ana i te takinga kino no te tuatua meitaki. Te ariki oonu maira a Iehova e “te tavini akono meitaki e te pakari” i ta ratou au tauturu pouroa i oronga no te angaanga Patireia, te tuatau i topa e i teia tuatau.​—Mata. 24:45.

4. Eaa tatou ka akangateitei ei i te au Kerititiano ruaine e ka pure ei no ratou?

⁴ Kua tau taua aronga pakari akarongo mou ra i te akameitakianga e te akangateiteianga a te au tavini ke atu o te Atua ko Iehova. Te akaari maira te Ture a te Atua tei orongaia na roto ia Mose i te pirianga i rotopu i te akamanakoanga e te akangateiteianga no te aronga ruaine, e te mataku ia Iehova. (Levi. 19:32) E tau tatou kia pure putuputu ua rai no teia aronga akarongo mou e kia akameitaki i te Atua no to ratou inangaro i te angaanga. Kua pure te apotetoro ko Paulo no tona au oa angaanga, te mapu e te pakari.​—E tatau ia 1 Tesalonia 1:2, 3.

5. Akapeea tatou e puapingaia ai mei te kapiti anga atu ki te aronga ruaine e akamori ra ia Iehova?

⁵ Tetai katoa, ka puapingaia te katoatoa rava i roto i te putuputuanga i te kapiti atu ki te au Kerititiano ruaine. Na roto i te apii, te kimi matatio, e ta ratou uaorai i kite, i rauka ai i te aronga ruaine tei akamori ia Iehova ma te akarongo mou, i te akamaata atu i to ratou kite puapinga maata tikai. Kua rauka ia ratou i te akakoromaki e te akaari i te tu tangi, e kua riro te apii anga atu i ta ratou i kite ki te uki tei aru mai ei apai mai i te rekareka maata e te tu merengo ua. (Sala. 71:18) E te au mapu ou, kia pakari kotou e kia puapingaia mei teia kite, mei ia kotou rai me uti mai i te vai mei tetai rua vai oonu.​—Mase. 20:5.

6. Akapeea koe i te akaari anga ki te aronga ruaine e e mea puapinga tikai ratou kia koe?

 ⁶ E akakite ana ainei koe ki te aronga ruaine e te manako akaperepere ra koe ia ratou mei ia Iehova rai e manako akaperepere maira ia ratou? Tetai mataara e rauka ai ia koe kia akapera koia oki na te akakite anga kia ratou e mei teaa te maata o toou inangaro ia ratou no to ratou tu akarongo mou e e mea puapinga tikai to ratou au manako kia koe. Pera katoa, me aru koe i ta ratou ako, te akaari ra koe e no roto mai tikai te ngakau toou akangateitei ia ratou. E maata te au Kerititiano ruaine ka maara ia ratou te ako pakari tei rauka ia ratou mei tetai aronga ruaine akarongo mou, e akapeea te aru anga i te reira i te akapuapinga anga ia ratou i roto i to ratou oraanga. *

Akaari i te Manako Ngakau Aroa na Roto i te Au Mataara Tau

7. Kua oronga a Iehova i te apainga puapinga no te akono anga i te aronga ruaine, kiaai?

⁷ Kua oronga mai te Atua ki te au ngutuare tangata o te aronga ruaine, i te apainga puapinga no te akono anga ia ratou. (E tatau ia 1 Timoteo 5:4, 8.) E rekareka ana a Iehova me akatupu te au ngutuare tangata i ta ratou apainga no te au kopu tangata ruaine, te akaari mai anga i reira e te manako ra ratou i te aronga ruaine mei tana uaorai e rave ra. Te turuturu ra te Atua i teia au ngutuare tangata e te akameitaki ra ia ratou no ta ratou au tautaanga e no ta ratou au akaatingaanga pouroa. *

8. Eaa i tau ei kia akaari te au putuputuanga i to ratou manako aroa no te au Kerititiano e pakari atura?

⁸ E rekareka katoa ana a Iehova me tauturu to tatou au putuputuanga i te aronga ruaine akarongo mou tei ngere inara kare o ratou ngutuare tangata irinaki me kore kare te ngutuare tangata e inangaro ana i te akono ia ratou. (1 Timo. 5:3, 5, 9, 10) No reira kia akaari te putuputuanga e e ‘ngakau aroa, e aroa taeake, e e ngakau maru’ to ratou no te aronga ruaine. (1 Pete. 3:8) Kua akatutu meitaki mai a Paulo i to ratou manako ngakau no te au mema ruaine o te putuputuanga, i tona akataka mai anga e me mamae tetai mero o te kopapa tangata, “e mamae katoa te au melo ravarai.” (1 Kori. 12:26) I te tauturu anga i to tatou aronga ruaine ma te tu tau e te ngakau aroa ua te akatutu maira te reira i te kaveinga e turu ra i te ako a Paulo e: “Ka rave atu tetai i ta tetai apainga,  kia pera kotou i te akatika i te ture a te Mesia.”​—Gala. 6:2.

9. Eaa te au apainga teiaa ta te ruaineanga ka akatupu ki tetai tangata?

⁹ Eaa te au apainga teiaa ta te aronga ruaine e kite nei? E maata tei roiroi ua. Ka manako ratou e kare katoa rai paa e rauka ia ratou te rave i tetai au apinga e anoanoia ra mei te​—aere ki ko i te taote, te tutaki i te pira, te tama i te are, e te akapapa katoa i te kai. I te mea e kare e pakari ana te inangaro kia kai e kia inu i te vai i te ruaineanga, penei ka manako ratou e kare e inangaroia kia maata ta ratou ka kai me kore ka inu. Te aite katoa ra te reira ki te kaikaianga pae vaerua. Penei ka ngata i nga mata e nga taringa e ruaine atura i te tatau e te akarongo ki te au porokaramu pae vaerua, e te akapapa ua nei no te au uipaanga Kerititiano penei ka riro ei aka angaanga. Eaa i reira te ka rauka i etai atu kia rave no taua aronga ruaine ra?

Ka Rauka ia Koe i te Tauturu

10. Eaa te ka rauka i te aronga pakari kia rave i te akapapu anga e kia rauka tetai tauturu tau no te aronga ruaine?

¹⁰ I roto i te au putuputuanga e manganui, e meitaki tikai te tu e akonoia ra te aronga ruaine. Tetai au taeake e te au tuaine ngakau aroa, e tauturu ana ia ratou i te aere ki te toa, te tunu kai, e te tamama aere. E tauturu ana ratou i te aronga ruaine kia apii, kia akapapa no te au uipaanga, e kia aere putuputu ua rai ki roto i te angaanga orometua. E aru ana tetai Au Kite mapu ia ratou e e oronga ana ratou i tetai mataara. Me kare tetai aronga ruaine e rauka i te akaruke i te ngutuare, e akarongo ana ratou i te au uipaanga na roto i te terepaoni me kore e maaniia ana tetai au rekotianga na ratou. Te taime ua atu ka rauka, e akapapu ana te aronga pakari e kia orongaia tetai au tauturu tau kia rauka i te akono i te au anoano o te aronga ruaine i roto i putuputuanga. *

11. Akakite mai e akapeea tetai ngutuare tangata i te tauturu anga i tetai taeake ruiane.

¹¹ Ka rauka katoa i te au Kerititiano tataki tai kia akatuera atu i te ngakau maoraora e kia akaari i te tu oronga ua. Muri ake i te mate anga te vaine a tetai taeake ruaine, kare e rauka iaia i te tutaki i te are me kare te moni ruaine a tana vaine ei tauturu. Kua apii ana raua ko tana vaine i te Pipiria ki tetai ngutuare tangata​—e papa, e mama, e rua nga tamaine mapu ou​—e are maatamaata to ratou. Kua oake mai ratou e rua pia kia noo aia i roto. E 15 mataiti, to ratou kaikai kapiti anga, te katakata kapiti anga, e te noo kapiti anga ma te aroa taeake. E puapinga maata tikai tei rauka i nga tamariki mapu mei tona akarongo e te au mea e manganui tana i kite, e kua puapingaia rai aia no te taokotaianga mataora kia ratou. Kua noo rai teia taeake ruaine ma ratou e mate ua atu aia i te 89 mataiti. Te akameitaki ua nei rai teia ngutuare tangata i te Atua no te au akameitakianga maata tei rauka ia ratou na roto i te taokotaianga atu kiaia. Kare ratou e ‘ngere i ta ratou tutaki’ no te tauturu anga i tetai taeake pipi a Iesu Karaiti.​—Mata. 10:42. *

12. Eaa taau ka rave i te akaari anga i toou manako aroa no te au taeake e te au tuaine ruaine?

¹² Penei kare e rauka ia koe i te tauturu i tetai taeake me kore tuaine kua ruaine na roto i te mataara ta teia ngutuare tangata i rave, inara penei ka rauka ia koe te tauturu i te aronga ruaine kia tae ki te au uipaanga e ki te angaanga orometua. Ka rauka katoa ia koe i te pati atu ia ratou ki toou kainga e kia kapiti mai ia ratou me aere koe ki tetai au ngai matakitaki anga. Ka rauka ia koe i te atoro atu ia ratou, me maki tikai ratou me kore me kare e rauka kia aere ki tetai ngai. Tetai, ka rauka rai ia koe e e mea tau katoa kia akariro ua rai ia ratou ei aronga manako tangata mamaata. Me te meitaki ua ra to ratou manako, e mea tau kia kapitiia mai te au Kerititiano ruaine ki roto i te au tukuanga tika pouroa no runga ia ratou. Ka kite katoa rai te aronga tei ngaro tetai tuanga maata o to ratou manako e, me te akangateiteiia maira to ratou tu ngateitei e me kare.

Kare a Iehova e Akangaropoina i Taau Angaanga

13. Eaa ra i puapinga ai te akamanakoanga i te manako ngakau o te au Kerititiano ruaine?

¹³ E mea puapinga tikai te akaari anga i te akamanakoanga no te manako ngakau o te aronga ruaine. E tu natura ua no te aronga ruaine kia taitaia no to ratou tu tukatau kore i te rave i te au mea  pouroa tei rauka ana ia ratou i te rave i to ratou mapu anga e te maroiroi anga. Ei akatauanga, tetai tuaine tei tavini maroiroi ana ia Iehova e 50 mataiti e tei painia tamou ana, kua rokoia aia e tetai maki tei akaparuparu marie ua iaia e tei riro ei akangata maata atu iaia kia tae ki te au uipaanga. I te akaaite anga aia i tana angaanga orometua i mua ana ki tona au turanga tukatau kore i teia taime, kua akamata aia i te aue. I te akapiko anga i tona upoko, kua tuatua aia ma te aue e, “Kare aku apinga puapinga akaou e rave nei.”

14. Eaa te akamaroiroianga ka rauka mai i te au tavini ruaine o Iehova mei roto mai i te au taramo?

¹⁴ Me e tangata ruaine koe, i kite ana ainei koe i taua au tu manako ngakau taitaia ra? Me e au taime ainei tetai i manako ana koe e penei kua akaruke a Iehova ia koe? Penei kua manako akapera ana rai te tata taramo i tona au mataiti i muri mai, no te mea kua pati akatenga aia kia Iehova e: “Auraka e akaruke iaku i te ruaine anga ra: me paruparu au ra, auraka e taka ke iaku. Me ruaine oki au, e me inaina toku mimiti, e te Atua e, auraka koe e akaruke mai iaku.” (Sala. 71:9, 18) E mea papu, e kare a Iehova e akaruke i te tangata i atuia ai taua taramo ra, e kare rai Aia e akaruke ia koe. I roto i tetai taramo ke mai, kua akakite a Davida i tona irinakianga i roto i ta te Atua turuturu anga. (E tatau ia Salamo 68:19, NW. *) Kia papu meitaki e me e Kerititiano ruaine akarongo mou koe, tei vaitata uao a Iehova ia koe e ka tauturu ua rai aia ia koe i tera ra e i tera ra.

15. Eaa te ka tauturu i te aronga ruaine kia tamou marie i te manakonakoanga papu no te tuatau ki mua?

¹⁵ Pouroa ta kotou au mea i rave ana e te Au Kite ruaine o Iehova e te rave nei rai no te kaka o te Atua, kare rava te reira e ngaro iaia. “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na,” e na ko ra te Pipiria. (Ebe. 6:10) No reira, auraka e akatupu i te manako ekoko, i te manako tarevake anga e no te mea kua ruaine koe, kare oou puapinga akaou kia Iehova. E tauta pakari i te mono i te au manako taitaia, mataora kore ki te au manako papu tikai. Kia rekareka maata i toou au akameitakianga e toou manakonakoanga no te tuatau ki mua! E ‘manakonakoanga to tatou e te tuatau ki mua’​—te mea meitaki rava atu​—e kua akapapuia mai teia e Tei Anga mai ia tatou. (Iere. 29:11, 12, NW; Anga. 17:31; 1 Timo. 6:19) Akamanako oonu no runga i toou manakonakoanga, tauta kia vai mapu ua i roto i toou ngakau e toou aerenga manako, auraka rava e manako e kare oou puapinga i roto i te putuputuanga! *

16. Eaa tetai taeake ruaine i manako ei e e mea tau kia akamutu aia i te tavini ei tangata pakari, inara akapeea te pupu aronga pakari i te akamaroiroi anga iaia?

¹⁶ E akamanako ana ia Johan, e 80 mataiti, koia ua te akono tinamou ra i tana vaine akarongo mou ko Sannie e pakipakitai i teianei. * E tuku tuku taime ana te au tuaine i te tiaki ia Sannie kia rauka ia Johan i te aere ki te au uipaanga e ki te angaanga orometua. Inara kare i roa akenei, kua rokoia a Johan e te roiroi kare e maroiroi e kua akamata aia i te manako e kare aia e tau kia tavini ua atu rai ei tangata pakari i roto i te putuputuanga. “Eaa te puapinga kia riro au ei tangata pakari?” i ui ei aia ma tona mata aue. “Kare aku angaanga puapinga e rave akaou ana i roto i te putuputuanga.” Kua akapapu atu tona au taeake aronga pakari kiaia e e mea puapinga maata tikai tona kite e tana tukuanga tika. Kua raurau ratou iaia kia tavini atu rai ei tangata pakari, noatu kua iti mai tona taime e piri mai ana. No tei akamaroiroi maataia, kua tavini atu rai a Johan ei tangata pakari, tei riro ei akameitakianga tikai ki te putuputuanga.

Te Manako Tika Tikai Maira a Iehova

17. Eaa te akapumaanaanga ta te Pipiria e oronga maira no te au Kerititiano ruaine?

¹⁷ Te akataka meitaki maira te au Tuatua Tapu e  ka rauka i te aronga ruaine kia uua atu rai i te pae vaerua noatu te au manamanata e piri maira ki te ruaineanga. Kua akakite te tata taramo e: “Ko tei tanumia i roto i te are o Iehova ra . . . Ka ua rai ïa, e tae ua atu ki te ruaine anga ra; ka ki i te tapou, e e vai mata ua ra.” (Sala. 92:13, 14) Penei kua akakoromaki ana te apotetoro ko Paulo i tetai tu maki i te pae kopapa, kare ra aia ‘i roiroi mate ua rai oki te tangata i vao nei.’​—E tatau ia 2 Korinetia 4:16-18.

18. Eaa ra te au oa irinaki ruaine e te aronga e akono ra ia ratou ka anoano ei i te tauturu a etai ke?

¹⁸ E manganui ua atu te au akaraanga o teia tuatau e akapapu maira e ‘ka uua rai’ te aronga ruaine. Inara e riro ana te au akaaoanga o te maki e te ruaineanga ei akaapikepike anga, i te aronga katoa e au mema ngutuare akono meitaki to ratou e te inangaro tikai te tauturu ia ratou. Penei ka roiroi katoa rai te aronga akono. E akangateiteianga tikai e e apainga katoa na te putuputuanga kia akaari i to ratou inangaro no te aronga ruaine e te aronga e akono ra ia ratou. (Gala. 6:10) Te akaari maira taua tu tauturu ra e kare mei te mea e te akakite ua ra tatou ki taua aronga ra e kia aere e “kia maanaana oki, . . . e kia merengo” ma te kore e tauturu atu ia ratou na roto i te au mataara tau.​—Iako. 2:15-17.

19. Eaa ka rauka ai i te au Kerititiano ruaine akarongo mou kia akamanako i te tuatau ki mua ma te irinaki papu tikai?

¹⁹ Penei ka riro te pakarianga ei taui i te au angaanga a tetai Kerititiano, kare ra te tuatau e akaiti mai i to Iehova aroa no tona au tavini ruaine tiratiratu. Ei mea tuke, pouroa teia au Kerititiano akarongo mou e mea akaperepere maataia ratou i roto i tona mata, e kare rava aia e akaruke ia ratou. (Sala. 37:28; Isa. 46:4) Ka tauturu a Iehova e ka arataki ia ratou i te katoaanga o to ratou tuatau ruaineanga.​—Sala. 48:14.

[Au Tataanga Rikiriki i Raro]

Akapeea Koe me Pau?

• Eaa koe i manako ei e e mea akaperepere maataia tikai te au Kerititiano ruaine akarongo mou?

• Akapeea tatou i te akaari anga i te manako aroa no te au taeake akamori e ruaine atura?

• Eaa te ka tauturu i te au tavini ruaine o Iehova kia rauka te manakonakoanga papu?

[Au Uianga Apii]

[Au Tutu i te kapi 18]

E manako akaperepere tikai to te au mema o te putuputuanga no te aronga ruaine