Akamaata Atu i te Kite Tika Tikai ma te “Manako Maoraora”

KO TE au tavini pouroa o Iehova te kimi ra ratou i tona marekaanga. I te anoano anga kia rauka mai te reira, te inangaro ra tatou i te akameitaki mai i te tu o to tatou akarongo e te oronga maroiroi anga i te akamorianga tapu. Inara, te akamatakite maira te apotetoro ko Paulo kia tatou i tetai mea kino tei tupu ana ki tetai au ngati Iuda i tona tuatau e: “E maroiroi to ratou i ta te Atua, kare ra i te maroiroi [“kite tika tikai,” NW].” (Roma 10:2) Te taka meitaki ra e, auraka to tatou akarongo e ta tatou akamorianga ia Iehova e akatumuia ki runga ua i te manako ngakau. Ta tatou e anoano ra ko te kite tika tikai i Tei Anga mai ia tatou e tona anoano.

I tetai au ngai ke atu i roto i tana au tataanga, kua akapiri atu a Paulo i te tu tei marekaia mai e te Atua ki te inangaro anga kia rauka mai ia tatou te kite. Kua pure aia no te au pipi a Karaiti “kia akakiia mai i te [“kite tika tikai,” NW]” no te anoano o te Atua ‘kia tau to ratou aerenga i te Atu i te au mea katoa e mareka mai ei ra, e kia tupu te au angaanga meitaki katoa ia ratou, e kia maata oki to ratou [“kite tika tikai,” NW] i te Atua.’ (Kolo. 1:9, 10) Eaa i riro ei to tatou anoano i te “kite tika tikai” ei mea puapinga maata? E eaa ra tatou ka akamaata atu ei i taua kite ra?

Taviri ki te Akarongo

Ko te kite tika tikai i te Atua e tona anoano tei akakiteia mai i roto i te Pipiria ko te tumuanga ia o to tatou akarongo. Me kare taua kite irinakiia ra, ka aite rai to tatou akarongo ia Iehova mei te are i maaniia ki te pere pepa ka pururu ua me aangi mai tetai manga matangi. Te akamaroiroi maira a Paulo ia tatou kia oronga i te tavinianga tapu ki te Atua ma to tatou “mana no te akamanako anga” e kia kimi meitaki ‘ua rai i to tatou manako.’ (Roma 12:1, 2, NW) Na te apii putuputu anga i te Pipiria e tauturu mai ia tatou i roto i taua turanga ra.

Te akakite maira a Ewa, e painia tamou i Porani e: “Me kare au e apii putuputu i te Tuatua a te Atua, kare toku kite tika tikai ia Iehova e tupu. Ka kino viviki toku tu ei Kerititiano, ka paruparu toku akarongo i roto i te Atua​—te ka tupu mai ka kino roa atu toku pirianga ki te Atua.” Auraka rava te reira e tupu kia tatou! E akamanako ana i te akaraanga o tetai tangata tei maata tona kite tika tikai ia Iehova e tei rekareka i Tana akaperepereanga.

“Te Maata Rava nei Toku Inangaro i Taau ra Ture!”

Te akakite maira te imene pee tei papaia i roto ia Salamo 119 i roto i ta tatou au Pipiria, i te au manako ngakau o te tata taramo no runga i te au ture, te au akamaaraanga, te au ikuikuanga, te au akauenga, e te au tukuanga tika a Iehova. Kua tata te tata taramo e: “Ka rekareka au i taau ra au akonoanga . . . Ko taau au tuatua-akakite, ko taku ïa e mataora.” Kua tata katoa aia e: “Te maata rava nei toku inangaro i taau ra ture! ko toku ïa maaraara anga i te au rā katoa nei.”​—Sala. 119:16, 24, 47, 48, 77, 97.

Te akakite maira te nga tuatua “rekareka” e te “maaraara anga” i te akamanako oonu anga i ta te Atua Tuatua, te rekareka anga i taua akamanako anga oonu ra. Te akakite pakari maira taua au tuatua i te inangaro tikai tei rauka i te tata taramo no te apiianga i te ture a te Atua. Kare taua inangaro ra i te mea tupu ua mai no tei maata ua te rekareka i roto i te ngakau o te tata taramo. Mari ra, e anoano ngakau tae tikai tona kia ‘maaraara ua rai aia’ i te ture, kia rauka mai te kite i roto i te au tuatua a Iehova. Me akara tatou i tona tu te inangaro tikai ra aia i te kite i te Atua e tona anoano.

Te taka meitaki ra e no roto roa mai i tona ngakau te inangaro o te tata taramo i te Tuatua a te Atua. Ka ui ana tatou kia tatou uaorai e: ‘E  oonu katoa ainei toku inangaro i te Tuatua a te Atua? Te rekareka katoa ra ainei au i te tatau anga e te akarakara anga i tetai tuanga o te Pipiria i te au ra ravarai? Te tauta pakari ra ainei au i te tatau i te Tuatua a te Atua e kia akavaitata atu kia Iehova na roto i te pure i mua ake ka rave ei te reira?’ Me ka rauka ia tatou i te pau e ae ki taua au uianga ra, penei te ‘maata atura to tatou kite tika tikai i te Atua.’

Kua tuatua mai a Ewa e: “E tauta putuputu ua ana au kia akameitaki mai i te tu e rave ana au i taku uaorai apii. Te rauka anga mai te poroutia ‘See the Good Land,’ vaitata rai e e tatau ana au i te reira i te au taime ravarai me apii au. E maata te taime ka akara au i te au mea tei tataia i roto i te Insight on the Scriptures, e i roto i tetai atu au papaanga tuatua me te anoanoia ra.”

E akamanako katoa ana i te akaraanga o Wojciech raua ko Małgorzata, e maata tikai ta raua au apainga no te ngutuare. Akapeea raua i te akono anga i te apii Pipiria na raua uaorai i roto i ta raua papaanga? “E akanoo ana maua i tetai tuatau kia apii takake i te Tuatua a te Atua. E oti, i te tuatau o ta matou apii a te ngutuare e te au pukapukaanga i te au ra ravarai, ka uriuri matou i te au tumu manako ta matou i kite mai ei mea reka tikai me kore ei akakeuanga.” E maata te rekareka i rauka mai ia ratou no ta ratou uaorai apiianga oonu i te tauturu anga ia ratou ‘kia maata atu te kite tika tikai.’

Apiianga ma te Manako Ariki Ua

Ei au Kerititiano, te irinaki nei tatou e ko to te Atua anoano ia ‘kia ora te tangata katoatoa, e kia rauka te [“kite tika tikai,” NW] i te tuatua-mou.’ (1 Timo. 2:3, 4) Te akakite pakari maira teia tikaanga i te puapinga no te tatau anga i te Pipiria e te aruaru anga kia rauka te “kite.” (Mata. 15:10) Ko tetai tauturu e rauka ai te reira, koia oki kia apii ma te manako ariki ua. Ko te tu teia ta te au tangata o Berea i taito i akaari mai i te akakite anga a Paulo i te tuatua meitaki kia ratou e: “Kua ariki ua ratou i te tuatua ma te manako maoraora tikai, na te makitoro marie anga i te au Tuatua Tapu i te au ra ravarai me e tika teia au mea nei.”​—Anga. 17:11, NW.

Ka aru ainei koe i te akaraanga o te au tangata o Berea te rauka anga te manako maoraora e kia kore e akaapiapi i toou manako ki te au mea anoano koreia, ia koe e apii ra i te Pipiria? Ka rauka i tetai Kerititiano i te aru i te au tangata o Berea, noatu e kare aia i manako ana i mua ana e e mea reka te apii. Pera katoa, ko tetai aronga e iti mai ana to ratou inangaro i te tatau e i te apii ia ratou e ruaine atura, auraka rava te reira e tupu ki tetai Kerititiano. Noatu e eaa te mataiti o tetai tangata, ka rauka ua i te kopae i te au tamanamanataanga. E ia koe e tatau ra, ka rauka ia koe i te kimi rekareka i tetai au akakiteanga te ka rauka ia koe i te akakite atu ki tetai ke. Ei akaraanga, ka rauka ainei ia koe i te taiku atu ki toou tokorua me kore ki tetai oa Kerititiano i te au mea taau i tatau ana me kore i kite mai i te tuatau o taau apii? Na te rave anga i te reira ka rauka i te tamou meitaki ki roto i toou manako e te ngakau i taua au mea ra, koi rauka ai tetai akakeuanga papu ki runga i tetai ke.

No te au tuatau o taau apiianga, e aru i te akaraanga o Ezera, te tavini o te Atua i taito tei ‘akanoonoo ua i tona ngakau i te kimi i te ture a Iehova.’ (Ezera 7:10) Akapeea koe i te rave anga i te reira? Ka rauka ia koe i te akanoo i tetai turanga te ka tauturu ia koe i te rave i te apii. E oti, e noo ki raro e e pure kia Iehova no tana aratakianga e te pakari. (Iako. 1:5) E ui kia koe uaorai e, ‘Eaa taku e inangaro ra i te kite i te tuatau o teia apiianga?’ Ia koe e tatau ra, e akara e eaa te au manako maata. Penei ka inangaro koe i te tata i te reira me kore i te akairo i te au tuanga taau e inangaro tikai ra i te  akamaara. E akamanako ana e akapeea koe i te taangaanga anga i te au tumu manako i te tuatau tutuanga, i te rave anga i te au ikianga, me kore i te akamaroiroi anga i te au taeake irinaki. I te vaitata anga ki te openga o te tuatau o taau apiianga, e akara poto akaou i taau i kite mai. Na te reira e tauturu kia mou mai ia koe taau i kite mai.

Te akataka maira a Ewa e e akapeea ana aia: “Iaku e tatau ra i te Pipiria, ka akara au i te au irava turu, te Watch Tower Publications Index, e te Watchtower Library i runga i te CD-ROM. Ka tata au i te au manako ei taangaanga i roto i taku angaanga orometua.”

Kua rekareka tetai aronga i te apii oonu i te au mataiti e manganui, i te apiianga no runga i te Atua. (Mase. 2:1-5) Noatu rai, e manganui ta ratou au apainga e e mea ngata i te akanoo i te tuatau no ta ratou uaorai apii. Me te tano ra tera kia koe, eaa te au akatanotanoanga taau ka rave i roto i taau papaanga?

Akapeea Au i te Akanoo Anga i Tetai Taime?

Penei te ariki ra koe e e ngoie ake i te akanoo i te tuatau no te rave i te au mea taau e reka ra. E manganui tei kite mai e ko te tauturu tei rauka mai i roto i te apii naau uaorai, koia oki te akanoo anga i tetai akakoroanga tau, mei te tatau anga rai i te katoaanga o te Pipiria. E tika rai, penei e ngata tikai i te tatau i te au papaanga tupuna roa roa, te au akatakaanga taka meitaki o te iero taito, me kore te au totou oonu kare e pirianga ki te oraanga i te au ra ravarai. E tamata i te rave i te au takainga tau kia taeria toou akakoroanga. Ei akaraanga, i mua ake ka akara ai i tetai tuanga ngata o te Pipiria, penei ka tatau koe no runga i ta te reira akanooanga tuatua enua me kore i ta te reira akatakaanga tau. Ka kiteaia taua au akakiteanga ra i roto i te puka “All Scripture Is Inspired of God and Beneficial,” te ka rauka, vaitata rai mei te 50 reo.

E akakeuanga te reira ei taangaanga i toou manako ia koe e tatau ra i te Pipiria. Na teia e tauturu ia koe i te akanoo i roto i toou manako i tetai tutu o te au tangata e te au tupuanga i roto i te Pipiria te ka o mai. Na te akono anga i teia au manako tokoiti ua ka akariro te reira i te au tuatau o taau apii ei mea reka tikai e te puapinga. No reira, penei ka inangaro koe i te akanoo i te tuatau no te reira. Ka ngoie ua i te akono tamou i te peu no te tatau anga i te Pipiria i te au ra ravarai.

Mei te mea e ka rauka i te au manako i runga akenei i te tauturu i to tatou turanga tataki tai, eaa ra ta tetai ngutuare tangata maata te angaanga ka rave? Kore ei e noo taokotai ki raro no tetai  uriurianga mataora no runga i te au akameitakianga maata no te apii a te ngutuare tangata? Mei roto mai i taua uriurianga ra penei ka rauka mai te au manako tau, mei te tu vave mai anga i te popongi i te au ra ravarai, me kore i tetai au ra i te akamanako anga i tetai tuanga o te Pipiria. Me kore penei te akaari maira taau uriuri anga i te anoano kia akatikatika i te papaanga a te ngutuare tangata. Ei akaraanga, kua kitea mai e etai au ngutuare tangata e e mea tau i te uriuri i te tia no te ra me kore i te tatau i tetai tuanga o te Pipiria me oti te kaikai a te ngutuare tangata. I mua ake ka akamata ai tetai i te akaatea i te au apinga i runga i te kaingakai me kore i te aere atu i te rave i tetai angaanga, e akanoo te ngutuare tangata e 10 me kore e 15 miniti i te uriuri anga i te au irava me kore i te tatau anga i te Pipiria tei akapapaia. I te akamataanga, penei ka riro teia ei mea ngata, inara kare e roa atu ka riro mai ei mea matauia no te ngutuare tangata e ei mea mareka tikai.

Kua akamarama mai a Wojciech raua ko Małgorzata e eaa tei tauturu i to raua ngutuare tangata: “I te tuatau i topa, kua pou ua to matou taime ki runga i te au angaanga puapinga kore ua e te au angaanga rikiriki. Kua iki maua i te akaiti i te tuatau e akapou ana maua i te tuku reta na roto i te komupiuta. Kua akaiti katoa mai matou i tetai o ta matou au tamataoraanga e kua akanoo i tetai ra e te taime tikai no te apiianga oonu.” Kare takiri teia ngutuare tangata e manata ana i te rave anga i taua au akatanotanoanga ra, e ka kite katoa rai koe i te reira i roto i toou ngutuare tangata.

E Puapinga te Akamaata Atu i te Kite Tika Tikai!

No te apii oonu anga i te Tuatua a te Atua ka uua mai “te au angaanga meitaki katoa.” (Kolo. 1:10) Me tupu mai te reira i roto i toou oraanga, ka kite te katoatoa i toou tere anga ki mua. Ka riro mai koe ei tangata tei marama meitaki i te tuatua mou o te Pipiria. Ka riro mai taau au ikianga ei mea tau e ka papa meitaki ua koe i te tauturu atu i tetai ke, tei matara mai mei te au taomianga pakari, e tamanamanata ra i te aronga kare i kite. Pera katoa, ka akavaitataia atu koe kia Iehova. Ka oonu atu toou ariki rekareka anga i tona au tu, e ka kiteaia teia, ia koe e akakite aere ra iaia ki tetai ke.​—1 Timo. 4:15; Iako. 4:8.

Noatu e eaa toou mataiti e te kite, e tauta pakari i te kimi tamou atu rai i te rekareka i roto i te Tuatua a te Atua e te apii oonu anga i te reira ma te manako ariki ua. Ka rauka ia koe i te irinaki e kare e ngaropoina ia Iehova taau au tautaanga. (Ebe. 6:10) Ka riringi mai aia i tana au akameitakianga maata ki runga ia koe.

[Pia i te kapi 13]

ME ‘MAATA TO TATOU KITE TIKA TIKAI’. . .

Ka akaketaketa tatou i to tatou akarongo i roto i te Atua e ka tau te aerenga ma Iehova.​—Kolo. 1:9, 10

Ka rauka ia tatou te kite maata, ka rauka i te taangaanga i te kite tau e te rave i te au ikianga tau.​—Sala. 119:99

E rekareka maata ana tatou i te tauturu i tetai ke kia akavaitata atu kia Iehova.​—Mata. 28:19, 20

[Au Tutu i te kapi 14]

E mea ngata i te kimi i tetai ngai tau no te apii, me rauka mai ra e mea mareka tikai

[Tutu i te kapi 15]

E tatau ana tetai au ngutuare i tetai tuanga o te Pipiria me oti te kaikai