Eaa Taau ka Oronga kia Rauka te Ora Mutu Kore?

‘Eaa ta te tangata nei kia oronga ei oko i tona ora?’​—MATA. 16:26.

1. Eaa a Iesu i patoi pakari atu ei i te ako a Petero?

KUA poitirere tikai te apotetoro ko Petero i tana e akarongo ra. Te “akakite pu tika ra” tona Arataki akaperepere a Iesu Karaiti e, kare e roa atu ana ka rave kinoia aia e ka mate Aia! I te pau anga atu a Petero​—kare e ekoko e ma te akakoroanga meitaki ua—​kua ako atu aia ia Iesu i te na ko anga e: “Kia takinga meitaki ia koe uaorai, e te Atu; auraka roa teia [tu] kia tupu kia koe.” Kua anga mai a Iesu i tona tua kia Petero e kua akara atura ki tana au pipi. Penei e mei te reira katoa rai to ratou manako tarevake. I reira kua tuatua atura aia kia Petero e: “Ka aere mai ki muri iaku, e Satani e! Te riro nei koe ei tatipake iaku, no te mea kare koe e manako ana, i te au manako o te Atua, kareka ra i to te tangata.”​—Mare. 8:32, 33; Mata. 16:21-23, NW.

2. Akapeea a Iesu i te akataka mai anga i te au umuumuanga no tetai pipi mou tikai?

² Penei e kua riro ta Iesu au tuatua tei aru mai ei tauturu ia Petero kia kite i te tumu i patoi pakari atu ei a Iesu i tana ako. “Kua karanga atura oki [Iesu] ki te tangata tini ra, ma tana uaorai au pipi” e kua na ko atura e: “Ko tei inangaro i te aru mai iaku ra, e akaruke aia iaia uaorai, e rave i tana [“rakau tamamae,” NW ], ka aru mai ei iaku. Ko tei umuumu atu i tona uaorai ora, ka ngere aia i te ora: ko tei kopae ra i tona ora iaku, e i te evangelia nei, e ora ïa tona.” (Mare. 8:34, 35) Te taka ua ra e, kare anake ua e ka akaatinga aia i tona oraanga, te inangaro katoa maira ra aia e kia papa te aronga te ka aru mai iaia i te akaatinga i to ratou oraanga i roto i te angaanga a te Atua. Me akapera ratou, ka rauka ia ratou tetai tutaki maata.​—E tatau ia Mataio 16:27.

3. (a) Eaa te nga uianga ta Iesu i ui atu ki te aronga e akarongo maira iaia? (e) Eaa ta te rua o te uianga a Iesu, i akamaara atu ki te aronga e akarongo maira iaia?

³ I taua atianga rai, kua ui atu a Iesu e rua nga uianga umere tikai: ‘E eaa ta te tangata nei puapinga, kia rauka iaia to teianei ao katoatoa, e riro atura tona ora?’ e ‘Eaa ta te tangata nei kia oronga ei oko i tona ora?’ (Mare. 8:36, 37) Te pauanga ki te  uianga mua te taka ua ra te reira ki te tangata. Kare e puapinga kia rauka i tetai tangata teianei ao me mate aia. E puapinga ua to te au apinga me te ora nei aia i te rekareka anga i te reira. Penei te riro ra te rua o ta Iesu uianga: ‘E eaa ta te tangata nei kia oronga ei oko i tona ora?’ ei akamaara i te aronga e akarongo maira iaia i ta Satani tapepeanga i te tuatau o Iobu e: “E riro oki ta te tangata katoa ra ei oko i tona ora.” (Iobu 2:4) No tetai aronga kare e akamori ana ia Iehova, penei e te tika ra rai te au tuatua a Satani. E maata ua atu te ka aati i tetai ua atu kaveinga tau, kia ora ua. Kareka ra te au Kerititiano, e tuke rai to ratou manako.

4. Eaa te aiteanga o ta Iesu nga uianga i puapinga maata rava ai ki te au Kerititiano?

⁴ Kua kite tatou e kare a Iesu i aere mai ki te enua nei kia oronga mai i te oraanga maroiroi, i te apinga nui, e tetai oraanga roa i roto i teia ao. Kua aere mai ra aia ei akatuera mai i te tikaanga no tatou kia ora e mutu kore ua atu i roto i te ao ou, e ko te manakonakoanga no taua oraanga ra te mea puapinga maata rava atu kia tatou. (Ioa. 3:16) Ka marama ua tetai Kerititiano i te aiteanga o ta Iesu uianga mua, “E eaa ta te tangata nei puapinga, kia rauka iaia to teianei ao katoatoa, e riro atura tona manakonakoanga no te oraanga mutu kore?” Ko te pauanga kare takiri ona puapinga. (1 Ioa. 2:15-17) Ei tauturu ia tatou kia pau i te rua o ta Iesu uianga, penei ka ui tatou kia tatou uaorai e, ‘Mei teaa ra te maata o taku e inangaro nei i te akaatinga i teianei, ei akapapu i toku manakonakoanga no te ora i roto i te ao ou?’ Ka akaari mai ta tatou pauanga ki taua uianga ra, i te tu ketaketa o taua manakonakoanga ra i roto i to tatou ngakau, mei tei kiteaia i roto i to tatou oraanga.​—Akaaite ia Ioane 12:25.

5. Ka akapeea e rauka ai ia tatou te apinga aroa ua o te oraanga mutu kore?

⁵ E tika oki e, kare a Iesu e karanga ra e ka rauka i te oko i te oraanga mutu kore. Ko te ora​—to tatou oraanga poto ua i roto i teia akatereanga o te au mea nei—​e apinga aroa ua. Kare e rauka ia tatou i te oko mai me kore kare o tatou tikaanga ki te reira. Te mataara okotai ua rai e rauka ai ia tatou te apinga aroa no te oraanga mutu kore koia oki kia ‘akarongo tatou ia Iesu Mesia’ e ia Iehova, “tei tutaki mai i te aronga i kimi tikai iaia.” (Gala. 2:16; Ebe. 11:6) Noatu ra, kia akaari tatou i to tatou akarongo na roto i te angaanga, i te mea e ko “te akarongo kare e angaanga ra, e mea mate katoa ïa.” (Iako. 2:26) No reira, me akamanako maata atu rai tatou no runga i ta Iesu uianga, e mea tau kia akamanako pakari tatou e mei teaa te maata i ta tatou e inangaro ra i te akaruke i roto i teia akatereanga o te au mea nei, e eaa ta tatou e inangaro ra i rave i roto i ta Iehova angaanga ei akaari e te ora tika tikai ra to tatou akarongo.

“Kare Katoa oki te Mesia i Akarekareka Iaia Uaorai”

6. Eaa te mea puapinga maata rava atu kia Iesu?

⁶ Kare aia i akamou i tona manako ki runga i ta te ao o tona tuatau e oronga maira, kua tamou ra a Iesu ki runga i te au apinga puapinga e kua patoi i te timataanga kia akameitaki i tona uaorai oraanga i te pae kopapa. E oraanga akaatinga tikai tona e te akarongo i te Atua. Kare i akarekareka iaia uaorai mari ra, kua tuatua aia e: “Kare oki au i tukumoe i te rave i te mea e mareka mai ei [te  Atua].” (Ioa. 8:29) Eaa te maata i ta Iesu i inangaro i te rave i te akamareka i te Atua?

7, 8. (a) Eaa te akaatingaanga ta Iesu i rave, e i akapeea aia i te tutakiia anga? (e) Eaa te uianga ka tau kia ui tatou kia tatou uaorai?

⁷ I tetai atianga, kua akakite a Iesu ki tana au pipi e: “Kare oki te Tamaiti a te tangata i aere mai kia taviniia tona, ei tavini ra, e kia oronga i tona ora ei oko no te tangata e manganui.” (Mata. 20:28) I muao ana, i to Iesu akamatakite anga i tana au pipi e kare e roa atu ‘ka oronga aia i tona ora,’ kua raurau atu a Petero e kia takinga meitaki aia iaia uaorai. Inara kua vai ngaueue kore rai a Iesu. Kua inangaro ua aia i te oronga i tona ora, i tona oraanga tangata apa kore, no te tangata ravarai. Tei tupu no tona oraanga akaatinga, kua tinamou to Iesu uaorai oraanga no te tuatau ki mua. Kua akatu akaouia aia e kua “akateiteiia aia i te rima katau o te Atua.” (Anga. 2:32, 33) Kua riro maira aia ei akaraanga meitaki tikai no tatou.

⁸ Kua ako atu te apotetoro ko Paulo i te au Kerititiano i Roma “eiaa e akatika” i ta ratou uaorai, e kua akamaara atu kia ratou e “kare katoa oki te Mesia i akarekareka iaia uaorai.” (Roma 15:1-3) No reira, eaa te maata o te akoanga a te apotetoro ta tatou ka taangaanga e ta tatou ka akaatinga ia tatou uaorai i te aru anga ia Karaiti?

Te Inangaro Maira a Iehova kia Oronga Tatou ma te Ngakau Katoa

9. Eaa tikai ta tetai Kerititiano ka rave me akatapu aia iaia uaorai ki te Atua?

⁹ I te tuatau ia Iseraela i taito, kua akaue te Ture a Mose e kia tukuia te au tavini ngati Epera i te itu o te mataiti mei te tuikaaanga me kore i te tuatau o te Tiupiri. Inara, e ikianga ke atu rai ta ratou. Me te inangaro ra te tavini i tona pu, ka rauka iaia i te iki kia noo rai ei tavini i roto i taua ngutuare ra no te toenga o tona oraanga. (E tatau ia Deuteronomi 15:12, 16, 17) Mei te reira katoa te turanga me iki tatou i te akatapu i to tatou oraanga ki te Atua. Kua ariki rekareka ua tatou i te rave i to te Atua anoano, eiaa e aru i to tatou uaorai au inangaro. I te rave anga i te reira, te akaari ra tatou i to tatou inangaro oonu no Iehova e to tatou anoano kia tavini iaia e tuatau ua atu.

10. I roto i teea tu i riro ei tatou ei apinga na te Atua, e akapeea tikai taua tika ra i te akakeu anga i to tatou manako e ta tatou angaanga?

¹⁰ Me te apii ra koe i te Pipiria ki te Au Kite o Iehova i teianei, te piri atura ki te tutu aere anga i te tuatua meitaki e te aere ra ki te au uipaanga Kerititiano, kia akameitaki maataia koe. Te irinaki nei matou e kare e roa atu ka akakeuia koe kia akatapu ia koe uaorai kia Iehova e kia ui i te uianga ta te tangata Etiopia i ui atu kia Philipa e: “Eaa au nei e kore ei e bapetizoia?” (Anga. 8:35, 36) Ka aite i reira toou pirianga ki te Atua mei to te au Kerititiano rai ta Paulo i tata atu ei e: “Kare oki kotou i to kotou uaorai? Kua okoia kotou i te oko.” (1 Kori. 6:19, 20) Noatu to tatou manakonakoanga e no te rangi me kore no te enua, me kua akatapu tatou i to tatou oraanga kia Iehova, koia i reira to tatou Pu. No reira e mea puapinga tikai kia takore i te au anoano noinoi ‘auraka e riro ei tavini no te tangata.’! (1 Kori. 7:23) E tikaanga akaperepere tikai kia riro ei tavini tiratiratu kia taangaangaia e Iehova kia tau ki tona inangaro!

11. Eaa te au akaatingaanga e raurauia maira te au Kerititiano kia oronga, e eaa tikai tona aiteanga, mei tei akatutuia mai e te au atinga i raro ake i te Ture a Mose?

¹¹ Kua ako a Paulo i te au taeake akarongo e: “Kia tuku atu kotou i to kotou au kopapa ei atinga ora, e te tapu, e tau oki i te Atua, ko te akamori e tau ïa ia kotou.” (Roma 12:1) Penei kua akamaara atu taua au tuatua ra i te au Kerititiano ngati Iuda i te au atinga tei riro ana ei tuanga no ta ratou akamorianga i mua ake ka riro mai ei ratou ei au pipi na Iesu. Kua kite ke ana ratou e i raro ake i te Ture a Mose e, ko te au manu tei orongaia ki runga i te atarau a Iehova ka anoanoia ei mea memeitaki tikai. Tetai ua atu mea kinokino kare te reira e arikiia. (Mala. 1:8, 13) Te tika katoa ra te reira me oronga tatou i to tatou kopapa “ei atinga ora.” Ka oronga tatou ma te ngakau katoa kia Iehova, eiaa te toetoenga ua i muri ake i te akamareka anga i to ratou uaorai anoano. Me akatapu tatou ia tatou uaorai ki te Atua, ka oronga puareinga ua tatou i to tatou “ora,” koia oki to tatou oraanga kiaia​—tei kapiti mai i to tatou maroiroi, ta tatou au apinga, e to tatou au tareni. (Kolo. 3:23) Ka akapeea ra tatou me taangaanga i teia i roto to tatou oraanga?

Taporoporo Marie i Toou Tuatau

12, 13. Eaa tetai mataara ka rauka ia tatou i te oronga i to tatou ngakau katoa kia Iehova?

¹² Tetai mataara i te oronga i to tatou ngakau katoa kia Iehova koia oki na te taporoporo marie anga i to tatou tuatau. (E tatau ia Ephesia 5:15, 16.) Ka anoanoia tatou kia akaaere meitaki i  to tatou taime. Ka riro te au tu o teianei ao e te tu apa ua i anauia mai ei tatou i te akakeu ia tatou kia akapou ua i te taime ki runga i te tamataora anga me kore i te akapuapinga anga ia tatou uaorai. E tika e, “e atianga to te au mea katoa nei,” tei kapiti mai i te taime no te akaangaroianga e no te ngai angaanga moni kia rauka ia tatou i te akatupu i ta tatou au apainga Kerititiano. (Kohe. 3:1) Inara, ka anoanoia te Kerititiano tei akatapuia kia vai ngaueue kore ua e kia taporoporo marie i tona tuatau.

¹³ I te aere anga a Paulo ki Atene, kua kite aia e “kare rai oki a to Atene ravarai e te tangata ke e noo ki o ratou ra angaanga ke, mari ra ko te akakite e te akarongo atu i te tuatua rikiriki ou.” (Anga. 17:21) Teia tuatau, e manganui katoa mei te reira rai, te kaimoumou ua nei i to ratou taime. Ko te au tamanamanataanga i teia tuatau, te kapiti maira te reira i te akarakara tivi, te kangakanga i te au tarekarekaanga vitio, e te akarakara aere i runga i te Internet. E maata ua atu te au apinga te ka akatarurike ia tatou e te ka akakeu ia tatou kia kaimoumou ua i to tatou taime. Me tuku ua atu tatou ki te reira, penei kare tatou e akono i to tatou au anoano i te pae vaerua. Penei ka akariro katoa te reira ia tatou kia manako e e maata roa ta tatou angaanga i te akono atu i “te au mea e maata ua atu te meitaki”​—te au mea e piri atura ki te tavini anga ia Iehova.​—Phili. 1:9, 10.

14. Eaa te au uianga ka tau tatou kia akamanako meitaki tikai?

¹⁴ No reira, ei tavini akatapuia no Iehova, e ui kia koe uaorai e, ‘Te kapiti maira ainei taku papaanga no te au ra ravarai i te taime no te tatau anga Pipiria, te akamanakoanga oonu, e te pure?’ (Sala. 77:12; 119:97; 1 Tesa. 5:17) ‘Te akanoo ra ainei au i te taime i te akapapa no te au uipaanga Kerititiano? Te akamaroiroi ra ainei au i etai ke na te paupau anga i roto i te au uipaanga?’ (Sala. 122:1; Ebe. 2:12) Te akakite ra te Tuatua a te Atua e e maata te taime o Paulo raua ko Banaba i akapou ‘i te noo anga roa i te tuatua anga i te tuatua a te Atu ma te mataku kore.’ (Anga. 14:3) Ka rauka ainei ia koe i te akatanotano i toou au turanga kia akapou maata atu i te taime, e te “noo anga roa,” katoa atu ki roto i te angaanga tutuanga, penei i te tavini anga ei painia?​—E tatau ia Ebera 13:15.

15. Akapeea te aronga pakari i te akapou meitaki anga i to ratou taime?

¹⁵ I te aere anga te apotetoro a Paulo raua ko Banaba i te atoro i te putuputuanga Kerititiano i Anetioka, “e roa kitu to raua noo anga i reira e te au pipi katoa ra” i te akamaroiroi anga ia ratou. (Anga. 14:28) Mei te reira katoa te aronga pakari aroa ua i teia tuatau te akapou maata nei i to ratou taime i te akaketaketa atu i etai ke. Kapiti katoa mai ki ta ratou angaanga orometua, e angaanga pakari ana te aronga pakari i te tiaki i te anana, te kimi i te au mamoe ngaro, te tauturu i te maki, e te akono i etai atu au apainga i roto i te putuputuanga. Me e taeake papetitoia koe, te akatika ra ainei toou au turanga ia koe kia itae atu i teia au tikaanga no tetai au apainga ke atu?

16. Eaa tetai au mataara ka rauka ia tatou kia oronga ‘takinga-meitaki ki to te ngutuare o te akarongo ra’?

¹⁶ E manganui ua atu tei kite i te mataora i te oronga anga i te tauturu ki te aronga tei ngere i ta ratou apinga na roto i te au tumatetenga natura me kore i ta te tangata i akatupu. Ei akatauanga, tetai tuaine mei te 65 ona mataiti, e tavini ra i Betela, e mamao te ngai e aere ana aia i tetai au atianga ei vaine rave angaanga tauturu. Eaa ra aia i akapou ei i tona taime orote na te reira mataara? Karanga aia e: “Noatu e kare oku kite karape, e  tikaanga ngateitei tikai i te rave i tei anoanoia kia rave. E maata tikai te akamaroiroianga tei rauka iaku i te kite anga i te akarongo maroiroi o toku au taeake e te au tuaine tei rokoia e te ngere maata i te au mea o te pae kopapa.” Pera katoa, e tauatini ua atu i te ao katoa nei tei tauturu i te akatu anga i te au Are Uipaanga Patireia e te au Are Uipaanga Akaputuputuanga. Na te piri atu anga ki roto i teia au angaanga, te oronga karapii kore nei tatou i te ‘takinga-meitaki ki to te ngutuare o te akarongo ra.’​—Gala. 6:10.

“Tei Vaitata ua ra Au ia Kotou i te Au Ra Katoa”

17. Eaa taau uaorai ka oronga kia rauka te oraanga mutu kore?

¹⁷ Te vaitata nei te taiate tangata tei takake mai mei te Atua i te ngaro ke atu. Kare tatou i kite tikai e aea te reira e tupu ei. Inara, kua kite tatou e “te poto nei te tuatau” e “te ngaro ke nei oki te tu o teianei ao.” (E tatau ia 1 Korinetia 7:29-31.) Te oronga maira te reira i te aiteanga puapinga tikai ki ta Iesu uianga e: ‘Eaa ta te tangata nei kia oronga ei oko i tona ora?’ Kia akapapu tikai tatou e kia rave i tetai ua atu au akaatingaanga ta Iehova e pati maira ia tatou kia rauka “te ora mutu kore.” (1 Timo. 6:19) E tika rava e, e puapinga maata tikai kia akarongo i te ako a Iesu e kia ‘aru iaia’ e kia ‘na mua i te kimi i te basileia.’​—Mata. 6:31-33; 24:13.

18. Eaa te irinakianga ka rauka ia tatou, e no teaa ra?

¹⁸ E tika oki e, kare i te mea mama i te aru ia Iesu, e te tika ua ra ki te akamatakiteanga a Iesu, kua mate tetai papaki i roto i teia akatereanga o te au mea nei. Noatu ra, mei ia Iesu rai, ka kopae tatou i te timataanga ‘kia takinga meitaki ia tatou uaorai.’ E akarongo to tatou i roto i te akapapuanga tana i oronga ki tana au pipi akatainuia o te anere mataiti mua e: “Tei vaitata ua ra au ia kotou, e tae ua atu ki te openga o teianei.” (Mata. 28:20) No reira, kia akapou tatou i te katoaanga o te taime e te terenianga ka rauka ia tatou, ki roto i te angaanga tapu. Ia tatou e rave ra i te reira, te akaari ra tatou i to tatou irinakianga e ka paruru a Iehova ia tatou na roto i te mate maata me kore ka akaora akaou mai aia ia tatou i roto i te ao ou. (Ebe. 6:10) Kua rauka i reira ia tatou i te akaari e e puapinga maata rava tikai te apinga aroa o te oraanga.

Eaa Taau Au Pauanga?

• Akapeea a Iesu i te akaari anga i te tu inangaro takake i te tavini i te Atua e te tangata?

• Eaa ra tetai ka akaruke ei iaia uaorai, e ka akapeea me rave i teia?

• I te tuatau o te Iseraela i taito, eaa anake ua te au tu atinga tei marekaia mai e Iehova, e akapeea te reira i te arataki anga ia tatou i teia tuatau?

• Na roto i teea au mataara e rauka ai ia tatou i te taporoporo marie i to tatou tuatau?

[Au Uianga Apii]

[Au Tutu i te kapi 26]

E rave ua ana a Iesu i te au mea e akamareka ana i te Atua

[Tutu i te kapi 28]

Kua turuturu te ngati Iseraela i te akamorianga mou ma te ngakau katoa

[Au Tutu i te kapi 29]

Ka akamareka tatou i te Atua na roto i te taporoporo marie anga i to tatou tuatau