Ta Iehova Pauanga ki Tetai Pure Akatenga
Ta Iehova Pauanga ki Tetai Pure Akatenga
“Kia kite ratou e, ko Iehova toou ingoa, e ko koe anake Tei Teitei i te enua katoa nei.”—SALA. 83:18.
1, 2. Eaa te au tupuanga tei rauka ana i te manganui, e eaa te au uianga ka uiia?
TETAI au mataiti i topa, kua taitaia maata tikai tetai vaine i tetai tumatetenga tei tupu i tona ngai e noo ra. Anauia mai i roto i te kopu tangata e akonoanga Katorika, kua aere aia ki tona orometua no te tauturu, inara kare aia i inangaro ana i te tuatua mai kiaia. No reira kua pure aia ki te Atua e: “Kare au i kite e koai koe . . . , inara kua kite au e ti kona koe. Me ka tika e tauturu mai iaku kia kite ia koe!” I muri poto ua mai, kua atoro atu te Au Kite o Iehova iaia e kua oronga i te akapumaanaanga e te kite tana e kimi ra. Tetai o te au mea e manganui ta ratou i apii iaia, koia oki e ingoa tikai to te Atua, ko Iehova. E akakeuanga oonu tikai to taua tupuanga ra kiaia. “E akamanako ua ana,” i tuatua ai aia e, “ko teia tikai te Atua taku i nakunaku ana mei toku tamarikianga mai!”
2 E manganui ua atu tei akakeuia ana mei teia te tu i to ratou kite anga i te ingoa o te Atua. Te maataanga o te taime kua kite ratou i te ingoa o Iehova i te tatau mua anga ia Salamo 83:18 i roto i Pipiria. I roto i te Bibilia Tapu, te tatau ra taua irava ra e: “Kia kite ratou e, ko Iehova toou ingoa, e ko koe anake Tei Teitei i te enua katoa nei.” Inara kare ainei koe i manako ana e, no teaa ra a Salamo 83 i tataia ai? Eaa te au tupuanga te ka maro i te au tangata ravarai kia ariki e ko Iehova anake rai te Atua mou? Eaa ta tatou ka mou mai mei taua taramo ra i teia tuatau? Ka akamanako tatou i taua au uianga ra i roto i teia atikara. *
Orureau i to Iehova Iti Tangata
3, 4. Naai i atu i te Salamo 83, e eaa te tamatakuanga tana i akataka mai?
3 Kia tau ki te tataanga i runga ake, “e pee, e Salamo, na Asapha” te Salamo 83. Te tangata i atuia ai teia taramo kare e kore e e uanga no te tangata ngati Levi, ko Asapha, e tangata atu imene rongonui i te tuatau e tutara ra te Ariki ko Davida. I roto teia taramo, kua pati akatenga te tata taramo kia Iehova kia akamou i Tona turanga ngateitei e kia akakiteia Tona ingoa. Penei i atuia teia taramo i tetai taime i muri ake i te mate anga a Solomona. Eaa te tumu? No te mea i te tuatau e tutara ra a Davida e Solomona, te au ua ra te ariki o Turia kia Iseraela. Kia tae ra ki te tuatau i atuia ai te Salamo 83, kua piri atu to Turia ki tona au enemi i te tamaki mai ia Iseraela
4 E taingauru au enua ta te tata taramo e akakite maira e te orureau ra kia takore i te iti tangata o te Atua. Te noo ra taua au enemi ra i te au ngai takapini ia Iseraela mei tei papaia mai e: “Te au puakapa o Edoma, e te ngati Isemaela; to Moabi, e to Hagara; To Gebala, e to Amona, e to Amaleka; to Philiseti, e to Turia katoa ra. Kua kapiti Sala. 83:6-8) No runga i teea tupuanga tuatua enua ta te taramo e taiku ra? Te tamanako ra tetai aronga e te taiku ra te taramo no runga i te tamakianga a te au nuku taokotai o Amona, Moabi, e te aronga e noo ra i te Maunga o Seira ki runga ia Iseraela i te tuatau o Iehosaphata. (2 Para. 20:1-26) Te irinaki ra tetai papaki e te tuatua ra te reira no runga i te kaitamakianga tei matauia i roto i te tuatua enua o Iseraela, mei te au iti tangata i te pae mai.
katoa Asura ia ratou.” (5. Eaa te puapinga ka rauka i te au Kerititiano i teia tuatau mei ia Salamo 83?
5 Noatu e naai i atu, te papu ua ra e na te Atua na Iehova i akauru mai i te tataanga o teia pure na roto i te pee i te tuatau i rokoia ai tona iti tangata e te kino. Te oronga katoa maira te taramo i te akamaroiroianga no te au tavini o te Atua i teia tuatau, tei kite ana i roto i to ratou tuatua enua katoa, i te kaitamakianga a te au enemi tei umuumu kia takore ia ratou. Papu roa e ka akaketaketa te reira ia tatou i te tuatau ki mua e vaitata ua maira, e akaputuputu mai ei a Goga e Magoga i tona au nuku, i te tauta openga anga kia takore katoatoa i te aronga e akamori ra i te Atua ma te vaerua e te tuatua mou.—E tatau ia Ezekiela 38:2, 8, 9, 16.
Te Mea Puapinga Maata Roa Atu
6, 7. (a) No runga i teaa ta te tata taramo i pure ei i roto i te au tuatua akamataanga o Salamo 83? (e) Eaa te mea puapinga maata roa atu ki te tata taramo?
6 E akarongo ana i te tata taramo e akakite maira i tona manako ngakau na roto i te pure e: “Auraka koe e muteki ua, e te Atua e; auraka koe, e te Atua, e noo ua, ma te tuatua kore. I na oki, te mutamuta nei to au enemi; e te aronga i riri mai ia koe ra, kua akateitei i te upoko. Kua kimi ratou i te ravenga pakari i toou ra au tangata, . . . Kua uipa katoatoa i ta ratou tuatua anga; kua koreromotu ra ratou ia koe.”—Sala. 83:1-3, 5.
7 Eaa te mea puapinga maata roa atu ki te tata taramo? E tika oki e, e aka manamanata tona i tona uaorai ora pera katoa tona ngutuare tangata. Kareka ra ko te tumu maata o tana pure koia oki, ko te akakino e apaiia maira ki runga i te ingoa o Iehova e e te au tamatakuanga ki runga i te iti tangata e apai ra i tona ingoa. Kia tamou marie katoa rai tatou katoatoa i taua tu manako tau ra ia tatou e akakoromaki ra i te au tuatau openga ngata o teia ao taito.—E tatau ia Mataio 6:9, 10.
8. Eaa ra te akakoroanga o te au pa enua i te orureau anga i to Iseraela?
8 Te taiku ra te tata taramo i te au enemi o Iseraela i te karanga anga e: “E aere mai tatou e tipu ke atu, auraka ratou kia riro ei enua; e auraka te ingoa ra o Iseraela kia manako akaouia atu.” (Sala. 83:4) E aka riri tikai to taua au pa enua ra i te iti tangata ikiia o te Atua! Inara e akakoroanga ke atu rai to ratou no ta ratou orureau. Te noinoi ra ratou i te enua o Iseraela e kua tuatua akatietie ratou e: “Tatou e rave i te au nooanga o te Atua no tatou uaorai.” (Sala. 83:12) E mea ainei tetai mei teia te tu tei tupu ana i to tatou nei tuatau? Ae!
“Toou ra Nooanga Tapu”
9, 10. (a) I te au tuatau taito, eaa ra to te Atua ngai nooanga tapu? (e) Eaa te au akameitakianga e rekarekaia nei i teia tuatau e te toenga akatainuia, e te “mamoe ke atu”?
9 I te au tuatau taito, kua karangaia te Enua Taputou e ko te ngai nooanga tapu o te Atua. E akamaara ana i te imene autu ta te ngati Iseraela i imene i muri ake i te akaoraia mai anga mei Aiphiti: “E arataki rai koe i te au tangata nei ma to takinga meitaki, i tei akaoraia e koe ra; e arataki rai koe ia ratou ki toou ra nooanga tapu i to ririnui.” (Exo. 15:13) I muri mai, ko taua ngai “nooanga” ra e iero tetai i roto ma tona au taunga e tetai oire maata, ko Ierusalema, e tetai ui ariki tei uangaia mai mei roto ia Davida, e tei noo i runga i te terono o Iehova. (1 Para. 29:23) E tumuanga tetai i kapiki ei a Iesu ia Ierusalema e ko “te oire ïa o te Ariki maata.”—Mata. 5:35.
10 Akapeea ra i to tatou nei tuatau? I te mataiti 33 T.N., kua anauia mai tetai iti tangata ou, ko “te Iseraela o te Atua.” (Gala. 6:16) Taua iti tangata ra, ko te au taeake akatainuia o Iesu Karaiti to roto, tei akatupu i te angaanga tei kore i rauka i te Iseraela kopapa i te rave, koia oki kia riro ei au kite no te ingoa o te Atua. (Isa. 43:10; 1 Pete. 2:9) Kua papau a Iehova i taua koreromotu rai kia ratou, mei tana i papau ki to Iseraela i taito e: “Ei Atua au no ratou, e ei tangata oki ratou noku.” (2 Kori. 6:16; Levi. 26:12) I te mataiti 1919, kua apai mai a Iehova i te toenga o “te Iseraela o te Atua” ki roto i tetai turanga akaperepereia, e i taua tuatau ra, kua rauka ia ratou tetai “enua,” e ngai angaanga pae vaerua ta ratou e rekareka ra i te rave i roto i te parataito pae vaerua. (Isa. 66:8) Mei te au mataiti 1930 mai, e mirioni ua atu te au “mamoe ke atu” tei kapiti mai kia ratou. (Ioa. 10:16) Te riro nei te turanga mataora e te puapinga pae vaerua o teia au Kerititiano i teia tuatau i te oronga mai i tetai akapapuanga ririnui no te tu tika tikai o to Iehova turanga ngateitei. (E tatau ia Salamo 91:1, 2.) Tei akamaata rava atu i te riri o Satani!
11. Eaa tei riro ua atu rai ei akakoroanga maata no te au enemi o te Atua?
11 I roto i teia tuatau openga tei aereia mai, kua akanauru a Satani i tona au rima rave i te enua nei kia patoi atu i te toenga o te aronga akatainuia e to ratou au oa o te mamoe ke atu. Kua tupu te reira i Europa Opunga i raro ake i te Nazi e i Europa Itinga i raro ake i te kavamani Komuniti o te Toviete Unioni. Kua tupu katoa te reira i roto i tetai au enua e manganui, e ka tupu akaou rai te reira, i te tuatau tikai o te tamakianga openga a Goga e Magoga. I roto i taua tamakianga ra, penei ka rave noinoi te aronga patoi i te au kainga e te au apinga a te iti tangata o Iehova, mei ta te au enemi rai i rave ana i te au tuatau i topa. Inara, ko to Satani akakoroanga maata ua rai mei mua mai koia oki, kia akapueu takiri ia tatou ei iti tangata kia kore roa to tatou ingoa tei orongaia mai e te Atua, e akamaara akaouia. Eaa ra to Iehova manako i taua tu patoianga i tona turanga ngateitei? E akara akaou i te au tuatua a te tata taramo.
Akaraanga no to Iehova Autuanga
12-14. Eaa te nga autuanga tuatua enua e rua i vaitata atu ki te oire ko Megido ta te tata taramo i akamaara?
12 Ka akara ana kia kite i te akarongo pakari o te tata taramo i roto i to Iehova kite karape i te akatarurike i te au ravenga a te pa enua enemi. Kua kapiti mai aia e rua nga autuanga puapinga a to Iseraela ki rungao i tona au enemi tei vaitata ua atu ki te oire taito ko Megido, tei akatere i tetai o mataataa tei tapaia i taua ingoa rai. I te tuatau maana, ka kitea uaia atu te papa maro o te Kauvai o Kisona na roto i taua o mataataa ra. I te tuatau paroro i muri ake i tetai ua maata, e puke ana taua ngai mataataa ra. Penei e ko te tumu te reira, i kapiki katoaia ai taua kauvai ra e ko “te vai ra ko Megido.”—Aka. 4:13; 5:19.
13 Mei te 15 kiro mita ki tetai tua i te o mei Megido atu, te reira te maunga ko More, te ngai i taokotai mai ei te nuku o Midiana, to Amaleka, e to te Itinga o te ra i te tamaki, i te tuatau o te akava ko Gideona. (Aka. 7:1, 12) Taopenga mai, e 300 rai au tangata i roto i to Gideona manga nuku meangiti ua, inara ma te tauturu a Iehova, kua autu ratou ki rungao i te nuku maata o te enemi. I akapeea ra? I te aru anga i te aratakianga a te Atua, kua koropini ratou i te puakapa o te enemi i te turuaipo ma te mou i ta ratou au kapu tei uunaia te au ramepa ka ki roto. I te oronga mai anga a Gideona i te akairo, kua vavai tona au tangata i te au kapu e kua akaari poitirereia mai te au ramepa i roto. I taua taime rai, kua akatangi ratou i ta ratou au pu e kua kapiki maata atura e: “Te koke a Iehova, e ta Gideona!” Kua akaoripu uaia te au enemi, e kua tanga akera ratou i te ta i tetai e tetai; e kua oro te aronga i ora mai ki tetai tua i te Kauvai i Ioridana. Inara i taua taime ra, e maata tikai te au ngati Iseraela tei piri mai i te arumaki anga i te enemi. Te katoatoa anga, e 120, 000 vaeau o te enemi tei taia.—Aka. 7:19-25; 8:10.
14 Mei te ono kiro mita te mamao mei te maunga atu ko More, mei tetai tua mai i te o o Aka. 4:13-16; 5:19-21.
Megido, te reira te Maunga ko Tabora. Te ngai te reira i akaputuputu mai ei te Akava ko Baruka e 10,000 nuku ngati Iseraela i muao, e tamaki atu i te nuku o Iabina, te ariki Kanaana o Hazora, i raro ake i te akatereanga a te rangatira vaeau ko Sisera. E 900 o teia nuku Kanaana kariota e au tipi auri koi to runga i te uira, e taka ana me taka te uira. I te akaputuputu atu anga te au nuku rava kore te taonga tamaki o Iseraela ki te pae Maunga ko Tabora, kua akavareia te nuku o Sisera kia aere ki roto i te o. I reira, kua “eke iorā Sisera, e te au kariota katoa nona, ia Iehova, e te nuku katoa.” Kare e kore e, na te ua maata tei topa poitirere ua mai i akanonoka i te au kariota ki roto i te vari i te puke anga te Kauvai Kisona. Kua pou rava akera te nuku katoa i te taiaia e te ngati Iseraela.—15. (a) Eaa ta te tata taramo i pure ei e ka rave a Iehova? (e) Eaa ta te ingoa o te tamakianga openga a te Atua, e akamaara maira ia tatou?
15 Kua pati akatenga te tata taramo ia Iehova kia rave i tetai mea mei te reira rai ki te pa enua e tamataku maira i te oraanga o to Iseraela i tona tuatau. Kua pure aia e: “E akapera koe ia ratou mei taau i rave ia Midiana; mei ia Sisera, mei ia Iabina i te kauvai ra ia Kisona. Mate iora oki ratou i Eni-dora, riro atura ei teita no te enua.” (Sala. 83:9, 10) E puapinga maata tikai e, kua kapikiia te tamakianga openga a to Satani ao e ko Aramakito (te aiteanga ko te “Maunga o Megido”). Te akamaara maira taua ingoa ra ia tatou i te au tamakianga umere tikai tei raveia ana, vaitata atu ki Megido. Te akapapu maira to Iehova au autuanga i roto i taua au tamakianga taito ra e ka autu rai aia i te tamakianga o Aramakito.—Apo. 16:13-16.
E Pure no te Akatikaanga i to Iehova Turanga Ngateitei
16. Akapeea ra te au mata o te aronga patoi i ‘akakiia ai ki te akama’ i teia tuatau?
16 I roto i teia au “tuatau openga” i aereia mai, kua tarurikeia e Iehova te au tautaanga katoatoa kia takore i tona iti tangata. (2 Timo. 3:1) Tei tupu mai, kua taakamaia te aronga patoi. Kua akatutuia mai teia e te Salamo 83:16 i te tuatua anga te reira e: “E akaki i to ratou mata ki te akama, kia kimi ratou i toou ra ingoa, e Iehova.” I roto i tera enua e i tera enua, kua puapinga kore takiri te aronga patoi i roto i ta ratou tautaanga kia akamuteki i te Au Kite o Iehova. I roto i taua au enua ra, kua riro te tu ngaueue kore e te akakoromaki o te aronga akamori o te Atua mou ei kite ki te aronga tei tika te ngakau, e e manganui ua atu tei ‘kimi i te ingoa, o Iehova.’ I roto i tetai au enua tei takinokino pakariia ana te Au Kite o Iehova, i teianei e rau ngauru ua atu au tauatini, e tae ua atu ki te anere anga o te tauatini, o te aronga akapaapaa mataora ia Iehova. E autuanga maata tikai no Iehova! E e mea akama tikai no tona au enemi!—E tatau ia Ieremia 1:19.
17. Eaa te au turanga kino ta te tangata e aro atu nei, e eaa te au tuatua ta tatou ka maara kare e roa atu ana?
17 E tika e kua kite tatou, e kare te tamaki i oti ake. E ka tutu ua atu rai tatou i te tuatua meitaki—e ki te aronga patoi katoa. (Mata. 24:14, 21) Inara, te vaitata ua maira te openga o te tuatau e tuera atu nei ki taua aronga patoi ra kia tataraara e kia rauka te ora. E puapinga maata rava atu te akatapuanga i te ingoa o Iehova, i te ora o te tangata. (E tatau ia Ezekiela 38:23.) Me taokotai mai te au pa enua katoatoa i te enua nei i te tauta anga kia takore i te iti tangata o te Atua, ka maara ia tatou teia au tuatua no te pure a te tata taramo e: “Kia akama ratou e kia raungara e tuatau ua atu; kia rokoia ratou e te ngarangara, e kia mate atu.”—Sala. 83:17.
18, 19. (a) Eaa te tapapa maira i te aronga tei akakoro tikai i te patoi i to Iehova turanga ngateitei? (e) Akapeea ra te akatikaanga openga i to Iehova turanga ngateitei e vaitata maira i te akakeu anga ia koe?
2 Tesa. 1:7-9) Ka riro to ratou akapouanga e te ora mai anga o te aronga e akamori ra ia Iehova ma te tuatua mou, ei akapapuanga tika tikai e ko Iehova anake rai te Atua mou. I roto i te ao ou, kare taua autuanga maata ra e akangaropoinaia. Te aronga te ka oki mai i roto i te ‘tuakaouanga o te aronga tuatua-tika e te aronga tuatua-tika kore’ ka kite ratou i te angaanga maata ta Iehova i rave. (Anga. 24:15) I roto i te ao ou, ka kite ratou i te au akapapuanga tika tikai no te tu pakari o te noo anga i raro ake i to Iehova turanga ngateitei. Ka papu viviki ua i te aronga akaaka i rotopu ia ratou e ko Iehova anake rai te Atua mou.
18 E openga akama tikai te tapapa ua maira i te aronga tei akakoro tikai i te patoi i te turanga ngateitei o Iehova. Te akaari maira te Tuatua a te Atua e ko te aronga “tei kore i akarongo i te evangelia” ka tamateia ratou i Aramakito koia oki te “mate mutu kore.” (19 E mea umere tikai te tuatau ki mua tei akonoia e to tatou Metua aroa i te rangi no te aronga akarongo mou e akamori ra iaia! Kare ainei koe akakeuia ana kia pure e kare e roa atu ana ka oronga mai a Iehova i tetai pauanga openga ki te pure a te tata taramo kia Iehova e: “Kia rokoia [toou au enemi] e te ngarangara, e kia mate atu: Kia kite ratou e, ko Iehova toou ingoa, e ko koe anake Tei Teitei i te enua katoa nei”?—Sala. 83:17, 18.
[Tataanga Rikiriki i Raro]
^ para. 2 I mua ake ka akamanako ei i teia atikara, ka puapingaia koe kia tatau ia Salamo 83 kia akamatau ia koe uaorai ki te au mea i roto.
Ka Rauka Ainei ia Koe te Akataka?
• Eaa te turanga e aro atura i to Iseraela i te tataia anga a Salamo 83?
• Eaa te mea puapinga maata roa atu ki te tangata tata o Salamo 83?
• Koai ma te tumu o to Satani riri i teia tuatau?
• Ka akapeea a Iehova me oronga mai i te pauanga openga ki te pure tei akakiteia mai i roto ia Salamo 83:18?
[Au Uianga Apii]
[Mapu i te kapi 15]
(No runga i teia, akara i te puka)
Akapeea te au tamakianga tei rave vaitataia atu ki Megido i taito i te piri atu anga ki to tatou tuatau ki mua?
Kauvai Kisona
Haroseta-goima
Maunga Karamela
O o Iezereela
Megido
Taanaka
Maunga Gilaboa
Ruavai o Haroda
More
Eni-dora
Maunga Tabora
Tai o Galilea
Kauvai Ioridana
[Tutu i te kapi 12]
Eaa tei akakeu i tetai tata taramo kia atu i tetai pure akatenga?