Te Akara Maira a Iehova ia Tatou ei Meitaki Rai no Tatou

“Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga [“ngakau katoa kiaia,” NW].”​—2 PARA. 16:9.

1. Eaa ra a Iehova i unuunumou ua mai ei ia tatou?

KO IEHOVA te Metua apakore. Kua kite meitaki tikai aia ia tatou e te kite katoa maira aia i te “akakoroanga o [to tatou] au manako katoa.” (1 Para. 28:9) Inara, kare aia e unuunumou ua maira ia tatou i te kimi apa. (Sala. 11:4; 130:3) Mari ra, te inangaro aroa ua maira aia i te paruru ia tatou mei tetai ua atu apinga te ka takino i to tatou pirianga kiaia me kore i to tatou manakonakoanga kia rauka te oraanga mutu kore.​—Sala. 25:8-10, 12, 13.

2. E akaari ana a Iehova i tona maroiroi noai ma?

² E mana katoatoa oki a Iehova e te kite ua maira i te au mea ravarai. No taua tumu ra, ka rauka iaia i te tauturu i tona aronga tiratiratu i tetai ua atu taime ka kapiki ratou iaia, e ka rauka iaia i te turuturu mai ia ratou i to ratou au tuatau timataanga. “Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga [“ngakau katoa kiaia,” NW]” e karanga maira a 2 Paraleipomeno 16:9. E akara ana e e taangaanga ana a Iehova i tona maroiroi no te aronga e tavini ra iaia ma te ngakau katoa, te ngakau viivii kore e te ngakau tae te akakoroanga. Kare ra aia e akaari ana i taua tu manako oonu ra no te aronga pikipikikaa.​—Iosu. 7:1, 20, 21, 25; Mase. 1:23-33.

 E Aaere e te Atua

3, 4. Eaa ra te aiteanga e kia ‘aaere e te Atua,’ e eaa te au akaraanga Pipiria e tauturu maira ia tatou kia marama no runga i teia?

³ Ki te manganui, e ngata tikai i te irinaki e ka akatika Tei Anga mai i to tatou ao katoa e pini ua ake, i te tangata kia aaere e ia na roto i te mataara akatutu ua. Inara, ko te reira tikai ta Iehova e inangaro maira ia tatou kia rave. I te tuatau o te Pipiria, kua ‘aaere a Enoka raua ko Noa e te Atua.’ (Gene. 5:24; 6:9) Kua “maroiroi rava atura [a Mose] i te akara anga atu iaia, i tei kore e kitea kia akara ra.” (Ebe. 11:27) Kua aaere kapiti te Ariki ko Davida ma te akaaka e tona Metua i te rangi. Kua tuatua aia e: “Tei toku rima katau [a Iehova] kare au e ngaueue.”​—Sala. 16:8.

⁴ E tika e, kare e rauka ia tatou i te mou i te rima o Iehova e kia aaere kapiti e ia. Inara ka rauka ia tatou na roto i te tu akatutu ua. Ka akapeea ra? Kua tata te tata taramo ko Asapha e: “Ei ia koe rai au; na to rima katau i mou mai iaku. Ka riro rai koe i te arataki iaku i taau ra tuatua.” (Sala. 73:23, 24) Te taka ua ra e, te aaere ra tatou e Iehova me aru vaitata tatou i tana au akoanga, e rauka maira na roto mai tikai i tana Tuatua i tataia e na roto i “te tavini akono meitaki e te pakari.”​—Mata. 24:45; 2 Timo. 3:16.

5. Akapeea a Iehova i te akara anga mai i tona aronga tiratiratu mei tetai metua aroa, e mei teaa ra to tatou manako ngakau no runga iaia?

⁵ No te mea e te akaperepere ra a Iehova i te aronga e aaere ra e ia, te akara ua maira aia ia ratou mei tetai metua aroa, te akono ia ratou, te paruru ia ratou, e te apii ia ratou. “E apii atu au ia koe, e akakite atu ei kia koe i taau arataa kia aere ra,” e tuatua maira te Atua. “E ako atu au ia koe; ei runga ia koe toku mata vaoo ei.” (Sala. 32:8) E ui kia koe uaorai e: ‘Te aaere kapiti ra ainei au e Iehova ma te mou i tona rima, i na te reira tuatua ai, te akarongo anga ki tona pakari e te kite anga e tei runga ua tona mata aroa iaku? Te riro ra ainei toku kite anga e tei vaitata uao aia iaku i te akakeu i toku aerenga manako, taku au tuatua, e te au angaanga? E me tarevake au, te manako ra ainei au ia Iehova eiaa ei Atua aroa kore e te mata piko, mari ra ei Metua pumaana e te aroa ua, e inangaro maira i te tauturu i te aronga tei tataraara kia rauka akaou tetai pirianga vaitata kiaia?’​—Sala. 51:17.

6. Eaa a Iehova i meitaki roa atu ei i te au metua tangata ua nei?

⁶ I tetai au taime, ka tauturu mai a Iehova ia tatou penei i mua ake ka aru ei tatou i tetai mataara tarevake. Ei akatauanga, penei te kite maira aia i te tu paruparu o to tatou ngakau pikikaa e akamata ra i te umuumu i te au mea tau kore. (Iere. 17:9) I roto i taua turanga ra, e viviki atu tana ariu mai anga, i ta tetai metua tangata ua nei ka rauka, no te mea ka rauka ua i tona “mata kaka” kia akara oonu ki roto ia tatou, i te unuunumou mai i te oonuanga o to tatou ngakau. (Sala. 11:4, NW; 139:4; Iere. 17:10) E akamanako ana i to te Atua manako no runga i tetai turanga tei tupu i roto i te oraanga o Baruka, te tata tuatua e te taeake piri mou o te peroveta ko Ieremia.

E Metua Meitaki Tikai kia Baruka

7, 8. (a) Koai a Baruka, e eaa te au inangaro tau kore tei akamata i te tupu ki roto i tona ngakau? (e) I akapeea a Iehova i te akatutu mai anga i tona manako aroa metua no Baruka?

⁷ E tata tuatua kite karape a Baruka tei tavini kapiti e Ieremia ma te akarongo mou, i roto i tetai tukuanga angaanga ngata​—i te akakite i ta Iehova akavaanga no Iuda. (Iere. 1:18, 19) Kia tae ra ki tetai taime, kua akamata a Baruka, penei no roto mai i tetai kopu tangata rongonui, i te kimi i te “meitaki maata” nona uaorai. Penei kua akamata aia i te akatupu i te au anoano noinoi uaorai me kore i te inangaro no te au mea pae kopapa e kia rauka te turanga puapinga. Noatu eaa te turanga, kua kite a Iehova e e aerenga manako kino tikai teia e tupu maira i roto i te ngakau o Baruka. I te tuatua anga na roto ia Ieremia, kua tuatua viviki atu a Iehova no runga i taua mea ra, i te na ko anga kia Baruka e: “I tuatua ana oki koe e, E ae oki au nei e! kua kapiti katoa mai a Iehova i te mii ki toku mamae nei; kua roiroi au i toku ngengeti ua anga, e kare oku e akaeaanga i kitea.” I reira kua tuatua atura te Atua e: “Te kimi ra ainei koe i te meitaki maata noou uaorai? Auraka e kimiia.”​—Iere. 45:1-5.

⁸ Noatu e kare aia i tuku ua atu ki ta Baruka, kare a Iehova i ariu riri atu, mari ra ma te manako inangaro tikai o te metua. Te papu ua ra e, kua kite te Atua e kare te au anoano o taua tangata ra e akaari maira i te ngakau kino me kore  i te ngakau pikikaa. Kua kite katoa a Iehova e tei roto a Ierusalema e Iuda i to raua au ra openga, e kare aia e inangaro ana ia Baruka kia turori i taua tuatau kino maata ra. No reira, ei akaari ki tona tavini i te tikaanga tikai o tona turanga, kua akamaara atu te Atua iaia e “te apai mai nei [Aia] i te kino ki runga i te tangata katoa ra,” i te kapiti atu anga e me rave a Baruka i te tu pakari, ka ora aia. (Iere. 45:5) Te tika anga, kua karanga te Atua e: ‘Kia matakite, e Baruka. E akamanako meitaki i te ka tupu, kia Iuda e Ierusalema no ta raua ara maata, e kare te reira e roa atu ana. Kia vai akarongo mou ua e kia ora! Ka paruru au ia koe.’ Papu e kua tukia te ngakau o Baruka e ta Iehova tuatua, no te mea kua ariu meitaki ua mai aia e kua ora mai i te akapouia anga a Ierusalema, tei tupu e 17 mataiti i muri mai.

9. Ka akapeea koe i te pau anga i te au uianga i roto i te parakarapa?

⁹ Ia koe e akamanako ra i te tuatua o Baruka, e akamanako ana i te au uianga e te au irava e aru maira: Eaa ta te mataara i akono ei te Atua ia Baruka e akakite maira no runga ia Iehova, e tona manako ngakau no tona au tavini? (E tatau ia Ebera 12:9.) No runga i te au tuatau kino maata e noo nei tatou, eaa ta tatou ka mou mai mei te akoanga a te Atua kia Baruka e to Baruka tu? (E tatau ia Luka 21:34-36.) I te aru anga ia Ieremia, ka akapeea te aronga pakari Kerititiano i te akaari anga mai i to Iehova manako oonu no Tona au tavini?​—E tatau ia Galatia 6:1.

Kua Akaari Mai te Tamaiti i te Aroa o te Metua

10. I akapeea a Iesu i te akateateamamaoia anga kia akono i tona taoonga Upoko i roto i te putuputuanga Kerititiano?

¹⁰ I mua ake i te tuatau Kerititiano, kua akaariia mai to Iehova aroa no tona iti tangata na roto i tana au peroveta e tetai au tavini akarongo mou. Teia tuatau, e maata roa atu teia aroa i te kiteaia, i roto i te Upoko o te putuputuanga Kerititiano, ko Iesu Karaiti. (Ephe. 1:22, 23) No reira i roto i te puka o Apokalupo, te akatutuia maira a Iesu ei mamoe e ‘itu oki mata, koia oki nga vaerua o te Atua toko itu, i tono aereia na te ao katoa nei.’ (Apo. 5:6) Ae, i te mea e kua akamanaia ki te katoaanga o te vaerua tapu o te Atua, e kite karape apakore tikai to Iesu. Te kite katoa maira aia i te au mea ravarai e tupu ra, e kare e apinga e ngaro iaia.

11. Eaa te tuanga angaanga a Karaiti, e akapeea ra tona tu kia tatou i te akaari mai anga i te tu o tona Metua?

¹¹ Inara, mei ia Iehova rai, kare a Iesu i te akava e akara ua maira mei te rangi. Te unuunumou maira aia ia tatou mei te metua aroa rai. Tetai taoonga o Iesu koia oki, te “Metua no te tuatau mutu kore,” te akamaara maira te reira ia tatou i te tuanga angaanga tana ka rave i te oronga anga mai i te oraanga mutu kore ki te katoatoa rava tei  taangaanga i to ratou akarongo i roto iaia. (Isa. 9:5) Tetai katoa, ei Upoko no te putuputuanga Kerititiano, ka rauka ia Karaiti i te akakeu i te au Kerititiano tukatau, i te aronga pakari tikai kia oronga i te pumaana me kore i te akoanga ki te aronga e anoano ra i te reira.​—1 Tesa. 5:14; 2 Timo. 4:1, 2.

12. (a) Eaa ta te au reta ki te au putuputuanga e itu i Asia Minora e akaari maira no runga ia Iesu? (e) E akapeea ana te aronga pakari i te akaari anga i to Karaiti tu ki te anana a te Atua?

¹² Te akaariia maira to Karaiti inangaro oonu no te anana i roto i te au reta ki te aronga pakari o te au putuputuanga e itu i Asia Minora. (Apo. 2:1–​3:22) I roto i taua au reta ra, kua akaari mai a Iesu e te kite ra aia i te au mea e tupu ra i roto i te au putuputuanga tataki tai e te oonuanga o tona manako no tana au pipi. E maata katoa atu ra i teia tuatau i te mea e te akatupuia nei te orama o Apokalupo “i te rā o te Atu.” * (Apo. 1:10) E akaari putuputu uaia mai ana te aroa o Karaiti na roto i te aronga pakari, e tavini ra ei au tiaki no te putuputuanga. Ka rauka iaia i te akakeu i “te meitaki i te tangata nei” ei akapumaana, ei akamaroiroi, me kore ei akoanga me anoanoia. (Ephe. 4:8; Anga. 20:28; e tatau ia Isaia 32:1, 2.) Te manako ra ainei koe i ta ratou au tautaanga ei akaarianga no to Karaiti inangaro ia koe?

Tauturu i te Tuatau Tau

13-15. E akapeea ana te Atua me pau mai i ta tatou au pure? Oronga mai i te au akaraanga.

¹³ I pure akatenga ana ainei koe no te tauturu e kua rauka mai tetai pauanga i te atoro mai anga tetai Kerititiano tukatau e kua akamaroiroi mai ia koe? (Iako. 5:14-16) Me kore ra, penei kua na roto mai te tauturu i tetai akoanga i ko i tetai uipaanga Kerititiano me kore kua na roto mai i tetai o ta tatou au puka. E pau putuputu ua mai ana a Iehova i ta tatou au pure na roto i teia au tu nei. Ei akaraanga, i muri ake i te oronga anga i tetai akoanga kua araveiia atu te tangata pakari e tetai tuaine, ko tei akaapa tau koreia ana i tetai au epetoma i mua ake i te akoanga. Kare aia i kopekope no runga i tona manamanata, kua akakite ra aia i tona mareka i te au manako o te irava i roto i te ako. Kua tau tikai te reira ki tona turanga e kua akapumaana tikai te reira iaia. Kua rekareka tikai aia e kua tae aia ki taua uipaanga ra!

¹⁴ No runga i te tauturu e rauka mai ana na roto i te pure, e akamanako ana i te akaraanga o tetai au mouauri toko toru tei apiiia i te tuatua mou ia ratou i roto i te are auri e kua riro mai ei au papuritia kare i papetitoia. No tetai mea kino tei tupu, kua tuku akaouia atu tetai au araianga ki runga i te au mouauri katoatoa i roto i te are auri. Kua riro te reira ei akatupu i te meameaau. Kua manako te au mouauri e i muri ake i te kaikaianga o tera mai popongi, ei akaari anga i ta ratou patoianga, kare ratou e akaoki i ta ratou au mereki. Teianei kua o te au papuritia toko toru kare i papetitoia ki roto i tetai turanga manamanata tikai. Me ka piri atu ratou ki roto i te orureauanga, ka aati ratou i te ako a Iehova i roto ia Roma 13:1. Me kare ra ratou e piri atu, ka tanga mai te riri o te au mouauri ki runga ia ratou.

¹⁵ No te kare e rauka i te tuatua atu ki tetai e tetai, kua pure taua au tangata toko toru ra kia rauka te pakari. Tera mai popongi, kua kitea mai e ratou toko toru e e aiteite rai to ratou au manako​—ka iki ua ratou eiaa e kaikai i taua popongi ra. I te aere mai anga te au tiaki i te koi i te au mereki i muri mai, kare a taua au tangata toko toru ra mereki. Rekareka tikai ratou e te vaitata uao ra “tei akarongo [mai] i te pure” kia ratou!​—Sala. 65:2.

 Akamanako Anga i te Tuatau ki Mua ma te Papu Tikai

16. Akapeea te angaanga tutuanga i te akaari mai anga i to Iehova manako oonu no te aronga mei te mamoe rai te maru?

¹⁶ Ko te angaanga tutuanga i teia ao katoa tetai akapapuanga akaou mai o to Iehova manako oonu no te aronga ngakau tika, i te ngai ua atu e noo ra ratou. (Gene. 18:25) Putuputu ua atu te taime, na te taangaanga anga i te au angera kia rave i te aratakianga, ka rauka ia Iehova i te arataki i tona au tavini ki te aronga mei te mamoe te maru​—noatu te noo ra teia aronga i roto i te au ngai kare i taeria ake e te tuatua meitaki. (Apo. 14:6, 7) Ei akaraanga, na roto i tetai angera, kua akakite te Atua kia Philipa, e tangata tutu evangeria i te anere mataiti mua, kia aere e kimi i tetai tangata mana Etiopia e kia akamarama atu i te au Tuatua Tapu kiaia. Eaa tei tupu mai? Kua ariki mai taua tangata ra i te tuatua meitaki e kua riro mai ei pipi papetitoia na Iesu. *​—Ioa. 10:14; Anga. 8:26-39.

17. No teaa tatou kare ei e apiapi puapinga kore ua no runga i te tuatau ki mua?

¹⁷ I teia akatereanga o te au mea nei e vaitata atura ki tona openga, ka tupu ua atu rai te “au mea nei no te mate” tei totouia mai. (Mata. 24:8) Ei akaraanga, i te tangata e maata ua atura, ka maata atu rai te kai ka anoanoia, e ka kake atu rai te oko o te kai ki runga, te kino pakari o te reva, me kore te tinamou kore o te turanga pae puapinga. Penei ka ngata roa atu te kimi ngai angaanga, e penei ka rokoia te aronga angaanga e te taomianga maata kia akaroa roa atu i te au ora ka angaanga. Noatu eaa te ka tupu, pouroa te aronga e tuku ra i ta ratou tavinianga ia Iehova ei mea mua, e te ‘meitaki ra te mata’ koia oki te akamou ra i te mata ki runga i te akakoroanga okotai, kare ratou e apiapi puapinga kore ua. Kua kite ratou e te aroa maira te Atua ia ratou e ka akono mai aia ia ratou. (Mata. 6:22-34) E akamanako ana ei akaraanga, e i akapeea a Iehova i te angai anga ia Ieremia i te tuatau o to Ierusalema openga tumatetenga i te mataiti 607 M.T.N.

18. Akapeea a Iehova i te akapapu anga i tona aroa no Ieremia i te tuatau i koropiniia ai a Ierusalema?

¹⁸ I te tuanga openga o te tuatau i koropiniia ai a Ierusalema e to Babulonia, kua tapekaia a Ieremia ki roto i te Paepae o te Are Tapeka Anga. Ka akapeea ra e rauka mai ei tana kai? Naringa aia kare i tapekaia, ka rauka ua iaia i te kimi i tetai kai. Inara, ka anoanoia aia kia akanoo roto ua ki te au tangata o reira, te maataanga te makitakita maira iaia! Noatu rai, kua irinaki pu tikai a Ieremia, eiaa ki te tangata, mari ra, ki te Atua tei taputou mai i te akono iaia. Kua akatupu ainei ra a Iehova i tana tuatua? Papu tikai! Kua akapapu tikai aia e kia rauka ta Ieremia “faraoa okotai . . . kia ope roa te au faraoa o te oire i te pou.” (Iere. 37:21) Kua ora mai a Ieremia, pera katoa a Baruka, e Ebede-meleka, e etai atu, i taua tuatau ra o te onge, te maki, e te mate.​—Iere. 38:2; 39:15-18.

19. Ia tatou e aro atura i te tuatau ki mua, eaa tikai to tatou akakoroanga?

¹⁹ Ae, “tei te aronga tuatua-tika ra to Iehova mata, e tei ta ratou kapiki tona taringa.” (1 Pete. 3:12) Kare ainei koe e rekareka ana e te akara ua maira to Metua i te rangi? Te meitaki ra ainei toou turanga e te tinamou i te kite anga e tei runga tona mata ia koe ei meitaki rai noou? E akapapu i reira e, kia aaere ua atu rai koe e te Atua​—noatu eaa te ka tupu i te tuatau ki mua. Papu ia tatou e ka akara vaitata ua mai rai a Iehova i tona aronga tiratiratu katoatoa, mei te metua aroa rai.​—Sala. 32:8; e tatau ia Isaia 41:13.

[Au Tataanga Rikiriki i Raro]

Ka Rauka Ainei ia Koe te Akataka?

• Ka akapeea tatou me akaari e te ‘aaere ra tatou e te Atua’?

• I akapeea a Iehova i te akatutu mai anga i tona aroa no Baruka?

• Ei Upoko no te putuputuanga Kerititiano, akapeea a Iesu i te akaari mai anga i te au tu o tona Metua?

• Na roto i teea au mataara me akaari tatou e te irinaki ra tatou i te Atua i roto i teia au tuatau maata te kino?

[Au Uianga Apii]

[Au Tutu i te kapi 9]

Mei to Ieremia tu rai kia Baruka, kia akaari mai te aronga pakari Kerititiano i teia tuatau, i to Iehova manako oonu

[Tutu i te kapi 10]

Ka akapeea ra a Iehova me oronga mai i te tauturu i te tuatau tau?