“Teia Tikai to te Atua Ingoa Tapu Rava Atu e te Ngateitei”
“Teia Tikai to te Atua Ingoa Tapu Rava Atu e te Ngateitei”
Na Nicholas o Cusa i akakite mai i taua tuatua ra i roto i tana akoanga i te mataiti 1430. * E tangata inangaro aia i te apii i te au mea e manganui, i te akamou anga i tona manako, ei akatauanga, ki runga i te apii Ereni, te Epera, te irinakianga o te tangata, te akonoanga atua, te numero, e te au mea o te mareva. I te tae anga tona mataiti ki te 22, kua riro mai aia ei taote no te ture a te akonoanga Katorika o Roma. I te mataiti 1448 kua ikiia aia ei orometua maata i roto i te akonoanga Katorika.
Mei tetai 550 mataiti i topa, kua akatu a Nicholas o Cusa i tetai kainga no te aronga ruaine i Kues, tei kiteaia i teia taime e ko Bernkastel-Kues, e oire mei tetai 13 kiro mita i te tua tonga o Bonn, i Tiamani. Ko teia are, e runanga puka no Cusa i teianei tei tere atu i te 310 au tataanga e vai ra i roto. Tetai o taua au tataanga ra koia oki ko te Codex Cusanus 220 te ka kiteaia te akoanga a Cusa i te mataiti 1430. I roto i taua akoanga ra, In principio erat verbum (I Vai Ana te Logo i Muatangana), kua taangaanga a Nicholas o Cusa i te tataanga Ratino ko Iehoua no Iehova. * Tei roto i te kapi 56 te tuatua e aru maira no runga i te ingoa o te Atua: “E mea orongaia mai e te Atua. E Tetarakaramatona te reira, koia oki, te ingoa e a reta. . . . Teia tikai to te Atua ingoa tapu rava atu e te ngateitei.” Te au ra te tuatua a Nicholas o Cusa ki te tika e tei roto te ingoa o te Atua i te tataanga mua tikai o te au Tuatua Tapu Epera.—Exo. 6:3.
Ko teia codex tetai tataanga taito e vai nei mei te tuanga mua mai o te 15 anere mataiti, i uriia ai te Tetarakaramatona ko “Iehoua.” Ko teia tuatua i tataia, tetai akapapuanga ke mai e ko te urianga o te ingoa o te Atua tei aiteite kia “Iehova,” te tataanga matau ravaia atu no te ingoa o te Atua, no te au anere mataiti.
[Au Tataanga Rikiriki i Raro]
^ para. 2 Kua kite katoaia a Nicholas o Cusa e ko Nikolaus Cryfts (Krebs), Nicolaus Cusanus, e ko Nikolaus von Kues. Ko Kues te ingoa o te oire Tiamani te ngai i anauia ai aia.
^ para. 3 Ko te akakoroanga o teia akoanga koia oki ei turu i te apiianga o te Toru Tai.
[Tutu i te kapi 16]
Runanga Puka a Cusa