“E Patoi Atu i te Diabolo” Mei ta Iesu i Rave
“E Patoi Atu i te Diabolo” Mei ta Iesu i Rave
“E patoi atu i te diabolo, e nana e rere ke atu.”—IAKO. 4:7.
1. Eaa te patoianga ta Iesu i kite e ka aro atu aia i runga nei te enua, e eaa tei tupu?
KUA kite a Iesu Karaiti e ka aro atu aia i tetai patoianga mei te Tiaporo. Te taka ua ra teia tika mei ta te Atua i tuatua atu ki te ovi koia oki ki te vaerua kino meameaau e tuatua maira na roto i te reira: “Ka tuku oki au i te ke ia korua ko te vaine [te tuanga o to Iehova akaaerenga i te rangi], e to uanga e tona uanga; nana [na Iesu Karaiti] e akaparuparu i to mimiti, e naau e akaparuparu i tona pooavae.” (Gene. 3:14, 15; Apo. 12:9) Te akaparuparuia anga to Iesu pooavae ko te aiteanga e tuatau poto ua tona mate i runga nei i te enua, no te mea ka akatu akaou mai a Iehova iaia ki te turanga kaka i te rangi. Inara ko te akaparuparu anga i te ovi i runga i te mimiti ko te aiteanga ka mate takiri te Tiaporo e kare rava aia e ora akaou mai.—E tatau ia Angaanga 2:31, 32; Ebera 2:14.
2. Eaa ra a Iehova i irinaki papu ei e ka autu a Iesu i te patoi anga i te Tiaporo?
2 Kua irinaki papu tikai a Iehova e ka autu a Iesu i te akatupu anga i tana tukuanga angaanga e ka rauka iaia i te patoi atu i te Tiaporo iaia i te enua nei. Eaa ra a Iehova i papu ei no runga i teia? No te mea no muatangana rava aia i anga ai ia Iesu, e kua akara matatio ana iaia, e kua kite e e tamaiti akarongo e te tiratiratu teia “pu rave angaanga” e te ‘Tama mua o te au mea ravarai i angaia ra.’ (Mase. 8:22-31, NW; Kolo. 1:15) No reira i to Iesu tonoia mai anga ki te enua nei e kua akatikaia te Tiaporo kia timata iaia e tae ua atu ki te mate, kua irinaki papu tikai te Atua e ka autu Tana Tamaiti anau tai.—Ioa. 3:16.
Paruru a Iehova i Tona Au Tavini
3. Eaa ra to te Tiaporo tu ki te au tavini o Iehova?
3 Kua taiku mai a Iesu i te Tiaporo e ko “te ariki o teianei ao” e kua akamatakite atu i Tana au pipi e ka takinga kinoia ratou, mei iaia katoa rai. (Ioa. 12:31; 15:20) Te makitakita ua nei teia ao i raro ake i te mana o te Tiaporo ko Satani i te au Kerititiano mou no te mea te tavini ra ratou ia Iehova, e e aronga tutu aere ratou i te tuatua tika. (Mata. 24:9; 1 Ioa. 5:19) Ko te toenga tikai o te aronga akatainuia ta te Tiaporo e akakoro ra no te mea ko ratou te ka tutara kapiti e Karaiti i roto i tona Patireia i te rangi. Te akakoro katoa ra a Satani i te manganui ua atu o te Au Kite o Iehova tei rauka te manakonakoanga no te oraanga mutu kore i runga nei i te enua parataito. Te akamatakite maira te Tuatua a te Atua e: “Te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.”—1 Pete. 5:8.
4. Eaa te akapapu maira e kua autu te iti tangata o te Atua i te patoi atu i te Tiaporo i to tatou nei tuatau?
4 Ei akaaerenga e rekareka nei i te turuturuanga a te Atua ko Iehova, te autu tika nei tatou i te patoi atu i te Tiaporo. Ka akamanako ana i teia au tika: I te 100 mataiti i topa, kua titau ana tetai o te au tutara kino pakari roa atu i roto i te tuatua enua i te takore i te Au Kite o Iehova. Inara te maata ua atura rai te numero o te Au Kite e i teianei kua taeria vaitata rai e 7,000,000 i roto i te 100,000 tuma putuputuanga i teianei ao katoa. Ko te au tutaraanga kino tei takinga kino ana i to Iehova iti tangata, ko ratou tei takore takiriia!
5. Akapeea tikai a Isaia 54:17 i te akatupu angaia no runga i te au tavini o Iehova?
5 I te tuatua atu anga ki te putuputuanga o Iseraela i taito ei “vaine” nana, kua taputou te Atua e: “Te [“taonga tamaki,” NW] ra noou i angaiaʼi ra, kare ïa e manuia; e te au vaa katoa e patoi ia koe, i te akava anga ra, naau ïa e akaapa atu. Ko te tuanga teia o te au tavini o Iehova; e tei iaku ta ratou tuatua-tika.” (Isa. 54:1, 17) Kua tupu tikai taua taputou ra no runga i to Iehova iti tangata i te ao katoa i teia au “tuatau openga.” (2 Timo. 3:1-5, 13) Ka patoi ua atu rai tatou i te Tiaporo, e kare ana taonga tamaki e autu i te takore i te iti tangata o te Atua, no te mea tei ia tatou a Iehova.—Sala. 118:6, 7.
6. Eaa ta te totou a Daniela e akakite maira kia tatou no runga i te tutaraanga a te Tiaporo no te tuatau ki mua?
6 I te openga o teia akatereanga o te au mea nei e aere viviki maira, ka takore takiriia te au tuanga ravarai o ta Satani tutaraanga. I te tata anga i raro ake i te akauruanga a te Atua, kua totou te peroveta ko Daniela e: “E i te au rā o taua au ariki ra [i to tatou nei tuatau], e akatupu ei te Atua no te rangi i tetai basileia [i te rangi], te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra [e vai nei i teianei], e ka vai rai te reira e tuatau ua atu.” (Dani. 2:44) Me tupu te reira, ka ngaro ke atu te tutaraanga a Satani e te tutaraanga a te tangata. Ka kore te au tuanga ravarai o ta te Tiaporo akatereanga o te au mea nei e tuatau ua atu, e ka tutara te Patireia o te Atua ma te patoi koreia i te enua katoa nei.—E tatau ia 2 Petero 3:7, 13.
7. Akapeea tatou i kite ei e ka autu rai te au tavini tataki tai o Iehova i te patoi atu i te Tiaporo?
7 Kare e ekoko e ka paruru ua rai a Iehova i tona akaaerenga e ka puapinga ua atu rai mei te au akameitakianga a te Atua. (E tatau ia Salamo 125:1, 2.) Akapeea ra tatou? Te akakite maira te Pipiria e ka autu tatou i te patoi atu i te Tiaporo, mei ta Iesu i rave. E tika rai e, te akaari maira te totou ta Karaiti i oronga na roto i te apotetoro ko Ioane e noatu te patoianga a Satani, “e aronga maata rava” tetai e manakonakoanga to ratou no te enua nei te ka ora atu i te openga o teia akatereanga. Kia tau ki te au Tuatua Tapu, kua kapiki nui atura ratou e: “No to tatou Atua te ora, tei noo ki rungao i te terono, e no te Punua-mamoe [ko Iesu Karaiti].” (Apo. 7:9-14) Te tuatuaia ra te aronga akatainuia ei aronga tei autu ki rungao ia Satani, e kua autu katoa to ratou au oa te “mamoe ke atu,” i te patoi atu iaia. (Ioa. 10:16; Apo. 12:10, 11) Inara e autu ei i te patoi atu i te Tiaporo, ka anoanoia te tautaanga maroiroi e te pure akatenga kia ‘akaoraia mai mei tei kino ra.’—Mata. 6:13, NW.
Akaraanga Apa Kore i te Patoi Anga Atu i te Tiaporo
8. Eaa te timataanga mua tei tataia, ta te Tiaporo i taangaanga ki runga ia Iesu i roto i te metepara, e i akapeea a Karaiti i te pau atu anga?
8 Kua titau ana te Tiaporo i te takore i to Iesu tu tiratiratu. I roto i te metepara, kua taangaanga a Satani i te au timataanga i te titau anga kia akarongo kore a Iesu ia Iehova. Inara, kua akanoo a Iesu i te akaraanga apa kore i te patoi anga ia Satani. Muri ake i te akakoreanga kai e 40 ra e te 40 po, kare kore e mate pongi tikai to Iesu e te inangaro ra i te kaikai. “E Tamaiti koe na te Atua ra,” i tuatua atura a Satani, “ka karanga atu koe ki teianei au toka kia riro ei kai.” Inara kare a Iesu i inangaro ana i te taangaanga i tona mana i orongaia mai e te Atua no tona uaorai puapinga. Mari ra, kua karanga atura a Iesu e: “Kua tataia, ‘Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.’”—Mata. 4:1-4; Deu. 8:3.
9. Eaa te tumu ka patoi ei tatou i te au timataanga a te Tiaporo kia taangaanga i te au anoano natura o to tatou kopapa?
9 Teia tuatau, te umuumu nei te Tiaporo kia taangaanga i te au anoano natura o te kopapa, o to Iehova au tavini. No reira kia ngaueue kore tatou i te patoi atu i te au timataanga o te ainga tureia, tei riro ei mea noa ua i roto i teia ao tu tau kore. Te akakite papu tika ua maira te Tuatua a te Atua e: “Kare ainei kotou i kite e, kare te aronga tuatua-tika kore e noo i te basileia o te Atua? Auraka e vavare: kare te kanga, e te akamori idolo, e te akaturi, e te akavaine, e te aronga sodoma, . . . e noo i te basileia o te Atua.” (1 Kori. 6:9, 10) No reira te taka meitaki ua ra e, ko te aronga e noo ra i te oraanga tau kore e kare e inangaro ana i te taui, kare e akatikaia kia noo i roto i te ao ou o te Atua.
10. Kia tau ki ta Mataio 4:5, 6, eaa ra tetai timataanga ke mai ta Satani i taangaanga ai i te titau anga kia takore i to Iesu tu tiratiratu?
10 No runga i tetai o te au timataanga tei tupu kia Iesu i roto i te metepara, te akakite maira te au Tuatua Tapu e: “Kua arataki atura te diabolo iaia ki te oire tapu ra, e kua tuku atura iaia ki rungao i te poretiko o te iero ra, E kua karanga atura kiaia, E Tamaiti koe na te Atua ra, akatopa atu koe ia koe uaorai ki raro; kua tataia oki e, ‘Ka ikuiku aia i tana au angela ia koe;’ ‘ka mou oki ratou ia koe i to ratou rima, ko te tukia ua atu aea to vaevae ki te toka.’” (Mata. 4:5, 6) Te karanga ra a Satani e, ka riro teia ei akaarianga i to Iesu taoonga mana ei Mesia. Inara ko te tikaanga tikai, e angaanga tau kore teia e te akatietie tei kore roa te Atua i ariki mai ana e i turuturu ana. Inara, kua tamou marie akaou rai a Iesu i tona tu tiratiratu kia Iehova e kua pau atu na te taiku anga i tetai irava. Kua tuatua aia e: “Kua tata katoaia, e, ‘Auraka koe e timata atu i toou Atua ra ia Iehova.’”—Mata. 4:7; Deu. 6:16.
11. E akapeea ana ra a Satani me timata ia tatou, e eaa ra te ka tupu mai?
11 Penei ka timata mai a Satani ia tatou kia umuumu i te kaka na roto i te au tu mataara tuke ke. Penei ka titau katoa aia i te akanauru ia tatou kia aru i te au tu peu o te kakau e te akamaneaanga o teianei ao me kore kia piri atu tatou ki tetai au tamataoraanga tau kore. Inara me ka kopae tatou i te ako a te Pipiria e ka aru i to teianei ao, ka tau ainei kia tapapa atu tatou i te au angera kia paruru ia tatou mei te au tu kino o taua arataa ra? Noatu e kua tataraara te Ariki ko Davida no tana au ara e kapiti maira ia Bate-seba, kare aia i paruruia ana mei te au kino o tana i rave. (2 Samu. 12:9-12) Auraka tatou e timata ia Iehova na roto i te au mataara tau kore, penei e na te akatupu anga i tetai pirianga oa ki teianei ao.—E tatau ia Iakobo 4:4; 1 Ioane 2:15-17.
12. Eaa ra te timataanga tei taikuia mai i roto ia Mataio 4:8, 9, e i akapeea te Tamaiti a te Atua i te pau atu anga?
12 Tetai timataanga akaou mai rai ta te Tiaporo i taangaanga i roto i te metepara koia oki te o maira te oronga anga i te mana poritiki kia Iesu. Kua akaari atura a Satani i te au patireia ravarai o teianei ao e to ratou kaka e kua tuatua atu e: “E oronga atu au i teianei au mea katoa kia koe, kia akatopa mai koe ki raro e akamori mai iaku.” (Mata. 4:8, 9) E titauanga kikite tikai kia rauka te akamorianga tei tau ia Iehova anake e i te akanauru ia Iesu kia tiratiratu kore ki te Atua! Na te manako ua anga no runga i te anoano kia akamoriia, kua topa atura taua angera tei tiratiratu ana, ki roto i te ara no tona noinoi e kua riro maira aia ei vaerua timata makitakita tikai, koia oki te Tiaporo ko Satani. (Iako. 1:14, 15) Inara ko te tuke maata, kua ngaueue kore tikai to Iesu manako kia vai tiratiratu ua ki tona Metua i te rangi e kua tuatua atura e: “E aere ke atu koe e Satani, kua oti oki i te tataia, ‘Ko toou Atua ra ko Iehova taau e akamori, e koia anake rai taau e akarongo.’” E kua patoi akaou atura a Iesu i te Tiaporo ma te papu tikai e te ekoko kore. Kare te Tamaiti a te Atua i inangaro ana kia riro ei tuanga no to Satani ao e kare rava aia e akamori i taua vaerua kino ra!—Mata. 4:10; Deu. 6:13; 10:20.
“E Patoi Atu i te Diabolo, e Nana e Rere ke Atu”
13, 14. (a) Na te akaari anga kia Iesu i te au patireia i teianei ao, eaa tikai ta te Tiaporo e oronga ra kiaia? (e) E akapeea ana a Satani i te titau anga kia takino ia tatou?
13 Na te akaari anga i te au patireia ravarai o teianei ao kia Iesu, te oronga ra te Tiaporo kiaia i te mana tei kore rava i rauka ana i tetai tangata i mua ana. Ko to Satani inangaro kia riro ta Iesu e kite ra ei akakeu iaia e ei akapapu tikai kiaia e me ariki aia i te reira ka riro mai aia ei arataki poritiki ririnui rava atu i te enua nei. Teia tuatau kare te Tiaporo e oronga mai ana i te au patireia kia tatou, mari ra te timata maira aia i te takino i to tatou ngakau na roto i te au mea ta tatou e kite ra, e akarongo ra, e e manako ra.
14 Ko te Tiaporo te akatere nei i teianei ao. No reira, te akatere nei aia i to te reira au nuti. No reira kare i te mea poitirere e ko ta teianei ao au apinga akarakara ra, e akarongorongo ra, e e tatau ra, kua ki ua i te au tu tau kore e te kino. E titau ana te au tuanga akakitekite anga o teianei ao i te akatupu i te anoano kia oko i te au apinga e manganui kare tikai tatou e anoano ana. Na roto i taua au ravenga ra, te timata ua nei rai te Tiaporo ia tatou ki te au apinga te ka akareka i to tatou mata, to tatou taringa, e to tatou manako. Inara me patoi tatou i te akarakara, i te akarongorongo, e i te tatau i te au apinga e aati ra i te au kaveinga Tuatua Tapu, te karanga ra tikai tatou e: “E aere ke atu koe e Satani.” Te aru ra tatou i reira ia Iesu i te patoi ngaueue kore anga e te papu tikai, i to Satani ao viivii. Te kitea katoaia ra te tika e kare tatou i te tuanga no to Satani ao, i roto i te tu mataku kore e akataka papu ra tatou ia tatou uaorai ei Au Kite no Iehova e ei au pipi na Karaiti i te ngai angaanga, i te apii, i te ngai e noo ra tatou, e i rotopu i to tatou au kopu tangata.—E tatau ia Mareko 8:38.
15. No teaa i anoanoia ai kia matakite ua atu rai i te patoi anga atu ia Satani?
15 Muri ake i te toru o te taime i titau ei te Tiaporo ma te manuia kore kia akaoko a Iesu i Tona tu tiratiratu ki te Atua, kua “akaruke iora te diabolo iaia.” (Mata. 4:11) Inara, kare tikai o Satani akakoroanga kia akamutu i te timata ia Iesu, no te mea te akakiteia maira kia tatou e: “E ope akera ta te diabolo timata anga [i roto i te medebara], aere ke atura aia, akaruke maira iaia i tetai tuatau iti.” (Luka 4:13) Me autu tatou i te patoi atu i te Tiaporo, mea tau kia akameitaki tatou ia Iehova. Inara e mea tau katoa kia umuumu atu rai tatou i ta te Atua tauturu, no te mea ka oki akaou mai te Tiaporo ka timata ia tatou i te taime tei tau kiaia—e kare tikai i te taime e tapapa atura tatou i te timataanga. No reira, kia vai matakite ua rai tatou i te au taime ravarai, kia papa ua i te oronga atu rai i te akamorianga tapu kia Iehova noatu eaa te timataanga ta tatou ka aro atu.
16. Te oronga maira a Iehova i teea mana ririnui kia tatou, e eaa te tumu ka pure ei tatou no te reira?
16 Ei tauturu ia tatou i roto i ta tatou tautaanga kia patoi atu i te Tiaporo, e mea tau kia pure tatou no te mana ririnui roa atu i te ao katoa e pini ua ake koia oki, te vaerua tapu o te Atua, ma te irinaki tikai e ka rauka te reira ia tatou. Ka tauturu te reira ia tatou kia rave i tetai au mea kare e rauka ia tatou kia rave i roto i to tatou uaorai maroiroi. Kua akapapu mai a Iesu ki tana au pipi e ka rauka ua te vaerua o te Atua i te na ko anga e: “Mei te mea e, te kite ra kotou i te oronga i te au mea meitaki na ta kotou au tamariki noatu e [e apa ua e] te kino ua ra kotou, ka kore atu ei to kotou Metua i te rangi e oronga mai i te vaerua tapu ki te aronga e pati kiaia!” (Luka 11:13, NW) Kia pure ua atu rai tatou kia Iehova no tona vaerua tapu. Ma te mana ririnui roa atu e turuturu maira ia tatou i roto i to tatou tu ngaueue kore i te patoi atu i te Tiaporo, ka autu tatou. Kapiti mai i te pure akatenga putuputu, ka anoanoia tatou kia kakau i te rakei katoa a te Atua kia rauka i te “patoi i te ravenga pakari a te diabolo ra.”—Ephe. 6:11-18.
17. Eaa ra te rekarekaanga tei tauturu ia Iesu kia patoi atu i te Tiaporo?
17 E apinga ke mai rai tetai tei tauturu ia Iesu kia patoi atu i te Tiaporo, e ka rauka katoa te reira i te tauturu ia tatou. Te akakite maira te Pipiria e: “No te rekareka tei tukuia ki mua [ia Iesu] ra kua akakoromaki aia i te rakau tamamae anga, te akakoreanga i te akama, e kua noo ki raro i te tua katau o te terono o te Atua.” (Ebe. 12:2, NW) Ka rauka katoa ia tatou te rekareka mei te reira na te turuturu anga i to Iehova turanga ngateitei, na te akangateitei anga i tona ingoa tapu, e te akamanako ua anga rai i te tutaki o te ora mutu kore. E aka rekareka tikai ta tatou ka kite me takoreia a Satani e tana au angaanga ravarai e tuatau ua atu e “te aronga maru ra, ka noo ïa i te enua, e ka rekareka ratou i te maata o te au ra”! (Sala. 37:11) No reira, e patoi ua atu rai i te Tiaporo mei ta Iesu i rave.—E tatau ia Iakobo 4:7, 8.
Akapeea Koe me Pau?
• Eaa te akapapuanga e vai nei e e paruru ana a Iehova i tona iti tangata?
• I akapeea a Iesu i te akanoo anga i tetai akaraanga i te patoi anga ia Satani?
• Na roto i teea au mataara e rauka ai ia koe i te patoi atu i te Tiaporo?
[Au Uianga Apii]
[Tutu i te kapi 29]
Ka riro te pirianga oa ki teianei ao ei akariro ia tatou ei au enemi no te Atua
[Tutu i te kapi 31]
Kua kopae a Iesu i te au patireia ravarai o teianei ao ta Satani i oronga atu