E Tauturu Atu i te Aronga Tei Aere Ke mei te Anana
E Tauturu Atu i te Aronga Tei Aere Ke mei te Anana
“E rekareka katoa tatou; kua kitea oki iaku taku mamoe i ngaro ra.”—LUKA 15:6.
1. Akapeea a Iesu i te akapapu anga e e tiaki takinga meitaki aia?
KUA kapikiia a Iesu Karaiti te Tamaiti anau tai a Iehova e ko “te tiaki mamoe maata.” (Ebe. 13:20) Kua totou te au Tuatua Tapu i tona taenga mai, e kua akaari mai e e Tiaki umere tikai aia tei umuumu i te kimi i te “mamoe i ngaro” o Iseraela. (Mata. 2:1-6; 15:24) Pera katoa, mei tetai tiaki mamoe tikai tei oronga i tona oraanga ei paruru i tana mamoe, kua mate a Iesu ei atinga oko no te aronga mei te mamoe te tu tei ariki i tana atinga.—Ioa. 10:11, 15; 1 Ioa. 2:1, 2.
2. Eaa tei akatupu i tetai pae Kerititiano kia paruparu i te pae vaerua?
2 Te mea mii ra, ko tetai pae tei akaraanga e kua ariki i te atinga a Iesu e kua akatapu ia ratou ki te Atua, kare e maroiroi akaou ana i roto i te putuputuanga Kerititiano. Penei e na te ngakau taitaia, te au tu makimaki o te kopapa, me kore na tetai atu au tumu ke i akaiti mai to ratou maroiroi e kua akaparuparu ia ratou i te pae vaerua. Inara, na te riro ua anga ei tuanga no te anana a te Atua i rauka ai ia ratou te tu ponuiaau e te mataora ta Davida i tuatua i roto ia Salamo 23. Ei akatauanga, kua imene aia e: “Ko Iehova toku tiaki; kare rava au e ngere.” (Sala. 23:1) Kare te aronga i roto i te anana i ngere ana i tetai apinga i te pae vaerua, inara kare ko te tu ia o te au mamoe tei aere ke. Koai ka tau kia tauturu ia ratou? Akapeea te oronga anga i te tauturu? Ae, eaa ra te ka rauka i te rave i te tauturu atu ia ratou kia oki akaou mai ki te anana?
Koai te ka Tau kia Tauturu?
3. Akapeea a Iesu i te akaari anga e eaa te ka anoanoia i te akaora mai i te mamoe ngaro o te koro a te Atua?
3 Ka anoanoia te tautaanga pakari kia akaora mai i te mamoe ngaro o te koro a te Atua. (Sala. 100:3) Kua akatutu atu a Iesu i teia i tona tuatua anga e: “Kia anere te mamoe a tetai tangata, kia aere ke ra tetai, kare aina aia e vaoo i te iva ngauru e iva ara, ka aere ei ki runga i te maunga, e kimi i tei aere ke ra? E kitea atura e ia, koia mou taku e karanga atu kia kotou na, e rai tona rekareka i te reira, i te au mamoe e iva ngauru e iva ara te kore i aere ke ra. Koia katoa to kotou Metua i te ao ra, kare ïa i inangaro e kia mate tetai o teianei au tangata rikiriki.” (Mata. 18:12-14) Koai te ka tau kia tauturu i teia aronga mei te mamoe te tu tei aere ke mei te anana?
4, 5. Eaa te tu e anoanoia ra te aronga pakari kia akaari ki te anana a te Atua?
4 Me inangaro te aronga pakari Kerititiano i te tauturu i te mamoe tei aere ke, kia akamaara ratou e ko te anana a te Atua e akaputuputuanga te reira no te au tangata tei akatapuia kia Iehova—ae, e mea puapinga maata tikai ‘te anana o ta te Atua ra koro.’ (Sala. 79:13) Ka anoanoia taua au mamoe akaperepere ra kia akonoia ma te maru, tera te aiteanga kia akaari te au tiaki takinga meitaki i te inangaro uaorai no ratou. Ka riro te atoroanga oaoa a te au tiaki ei akakeuanga meitaki tikai kia ratou. Ka akamatutuia to ratou akarongo e te akamaroiroianga aroa ta tetai tiaki ka oronga kia ratou, e ka akamaata atu i to ratou inangaro kia oki mai ki te anana.—1 Kori. 8:1.
5 E apainga ta te au tiaki o te anana a te Atua i te kimi i te mamoe tei aere ke e oti kia tauturu atu ia ratou. Kua akamaara atu te apotetoro ko Paulo i te aronga pakari Kerititiano o Ephesia i taito no ta ratou au apainga ei tiaki, i tona tuatua anga e: ‘E matakite ia kotou uaorai, e te anana katoa i akariroiaʼi kotou e te vaerua tapu ei tiaki i rungao ra, kia akaangai oki kotou i te ekalesia a te Atua, ko tana i oko i te toto’ o tana uaorai Tamaiti. (Anga. 20:28) Mei te reira katoa te akoanga ta te apotetoro ko Petero i oronga ki te aronga pakari akatainuia e: “Ka angai i te anana a te Atua i roto ia kotou na, ka rave i te taoonga tiaki auraka ra no te akaueue, no te anoano ra; auraka no te apinga tika kore ra kia rauka, no te tae tikai ra o te ngakau; Auraka ma te akaueue ua ki runga i te tuanga a te Atua ra, ei kaveinga ra kotou no te anana.”—1 Pete. 5:1-3.
6. Eaa te mamoe a te Atua ka anoano tikai ei i te akono meitaki a te tiaki i teia tuatau?
6 Ka anoanoia te au tiaki Kerititiano kia aru i te “tiaki mamoe meitaki,” ko Iesu. (Ioa. 10:11) Kua manamanata tikai aia i te mamoe a te Atua e kua akaketaketa mai i te puapinga o te akono anga ia ratou i tona akakite anga kia Simona Petero kia ‘tiaki i Tana au mamoe.’ (E tatau ia Ioane 21:15-17.) Ka anoanoia kia akono meitakiia tikai te mamoe i teia tuatau, no te mea kua akaririnui rava atu te Tiaporo i tana tautaanga kia takino i te tu tiratiratu o te aronga tei akatapuia ki te Atua. E taangaanga ana a Satani i te au akavareanga o tona ao i te titau anga kia o atu te au mamoe a Iehova ki roto i te au angaanga tarevake. (1 Ioa. 2:15-17; 5:19) Ko te aronga paruparu tikai te mea apikepike roa atu no reira ka anoano ratou i te tauturu kia rauka ia ratou i te taangaanga i te ako kia ‘akono i ta te vaerua.’ (Gala. 5:16-21, 25) E rauka ai i te tauturu i taua au mamoe ka anoanoia kia pati i te aratakianga a te Atua e tona vaerua, e te taangaanga i tana Tuatua ma te tu karape.—Mase. 3:5, 6; Luka 11:13; Ebe. 4:12.
7. Mei teaa tikai te puapinga no te aronga pakari kia tiaki i te aronga mei te mamoe te tu e akono ra ratou?
7 E taangaanga ana te tiaki i te tuatau o Iseraela i taito i te tokotoko roroa tei amingiia a mua, ei arataki i tana anana. I te mamoe e tomo atura e e aere maira ki vao i te aua, ka na raro ratou i te tokotoko kia rauka i te tiaki i te tatau ia ratou. (Levi. 27:32; Mika 2:12; 7:14) Ka anoano katoaia tetai tiaki Kerititiano kia kite meitaki i te anana a te Atua e kia kite e te akapeea ra ratou. (Akaaite ia Maseli 27:23.) No reira, ko te tiakianga tetai mea puapinga rava atu tei uriuriia e te pupu aronga pakari. Te kapiti maira teia i te rave anga i tetai akanoonooanga i te tauturu i te mamoe tei aere ke. Kua tuatua a Iehova uaorai e ka kimi aia i tana mamoe e ka akono i to ratou au anoano. (Eze. 34:11) No reira e mareka ana te Atua me tauta katoa te aronga pakari i te tauturu i te mamoe tei aere ke kia oki mai ki te anana.
8. Eaa te au mataara ka rauka i te aronga pakari kia tauturu uaorai i te mamoe?
8 Me makiia tetai taeake irinaki i te pae kopapa, e tumuanga mataora tikai e te akamaroiroianga me atoro atu tetai tiaki o te anana a te Atua. Mei te reira katoa rai te tu me orongaia tetai tauturuanga uaorai ki tetai mamoe makimaki i te pae vaerua. Penei e ka tatau te aronga pakari i tetai au irava, ka uriuri i tetai atikara, ka uriuri i tetai au manako maata i te uipaanga, e ka pure kapiti e te tangata tei paruparu i te pae vaerua, e te vai atura. Ka rauka ia ratou kia akamarama atu e ka mataora rava te au mema o te putuputuanga i te kite mai iaia i te oki akaou mai anga ki te au uipaanga a te putuputuanga. (2 Kori. 1:3-7; Iako. 5:13-15) Ka tauturu maata roa te atoro atu, te ringi, me kore te tata atu i tetai reta! Ka riro katoa te tauturu uaorai anga i tetai mamoe kare e piri mai ana ki te anana, i te akamaata atu i te rekareka o te au tiaki Kerititiano ngakau aroa.
Tautaanga Taokotai
9, 10. No teaa koe ka karanga ai e kare te manako anga atu no runga i te mamoe tei aere ke i kotinga uaia ki te aronga pakari?
9 Te noo nei tatou i roto i te oraanga maata te angaanga e te au tuatau maata te kino, no reira penei kare tatou e kite ana e te aere ke atura tetai taeake irinaki mei te putuputuanga. (Ebe. 2:1) Inara, e mea puapinga tikai te mamoe a Iehova kiaia. E puapinga to ratou ravarai, mei te au mero, me kore te au tuanga ravarai o te kopapa tangata. No reira, ka anoanoia tatou katoatoa kia akaari i te manako oonu no to tatou au taeake e kia akono tika tikai i tetai e tetai. (1 Kori. 12:25) Mei te reira ainei rai toou tu?
10 Noatu e na te aronga pakari te apainga maata roa atu i te kimi anga e i te tauturu anga i te mamoe tei aere ke, kare te manako anga atu no runga i teia aronga, i kotinga uaia ki te au akaaere Kerititiano. Ka rauka rai i etai ke kia taokotai mai ki te au tiaki. Ka akatikaia tatou, e e mea tau katoa kia akamaroiroi e kia tauturu atu i to tatou au taeake e te au tuaine e anoano tauturu ra kia oki mai ki te anana. Ka akapeea ra e rauka ai i te oronga i taua tauturu ra?
11, 12. Eaa te tikaanga takake penei te ka orongaia atu kia koe kia tauturu i tetai tei paruparu i te pae vaerua?
11 I tetai au turanga, penei ka akanoo te aronga pakari i tetai au papuritia tukatau o te Patireia kia rave i tetai apiianga Pipiria uaorai ki te aronga tei paruparu i te pae vaerua tei akakite mai e ka anoano ratou i tetai tauturu. Te akakoroanga no te reira koia oki ei tauturu i taua aronga ra kia akatupu akaou i “to [ratou] inangaro mua ra.” (Apo. 2:1, 4) Ka rauka i te akamatutu i teia au taeake irinaki e i te akaketaketa i to ratou akarongo, na te akamanako anga i te au apiianga kare ratou i akarongo ana no te mea kare ratou i kapiti mai ana ki roto i te putuputuanga.
12 Me ka pati atu te aronga pakari ia koe kia apii ki tetai taeake irinaki e anoano ra i tetai tauturu pae vaerua, e pure e kia arataki mai a Iehova e kia akameitaki mai i taau au tautaanga. E mea tau tikai e kia, “tuku atu i taau angaanga kia Iehova ra, e ka akatinamouia taau i akakoro ra.” (Mase. 16:3) E akamanako oonu atu i te au irava Pipiria e te au manako akaketaketa i te akarongo te ka rauka ia koe i te uriuri atu ki te aronga e anoano ra i te tauturu pae vaerua. E akamanako ana no runga i te akaraanga meitaki roa o te apotetoro ko Paulo. (E tatau ia Roma 1:11, 12.) Kua anoano maata tikai a Paulo kia kite i te au Kerititiano i Roma kia tuku atu i te apinga aroa pae vaerua kia akatinamouia to ratou akarongo. Kua tapapa katoa atu aia kia rauka te akamaroiroianga i tetai e tetai. Kare ainei e tau kia rauka ia tatou taua tu ra me umuumu tatou i te tauturu i te mamoe tei aere ke mei te anana a te Atua?
13. Eaa ra taau ka uriuri ki tetai tei paruparu i te pae vaerua?
13 I te tuatau o ta korua apiianga, penei ka ui koe e, “I akapeea koe i kite ei i te tuatua mou?” E tauturu ia ratou kia akamaara i te au tuatau mataora i to ratou tavini anga ia Iehova, i te akamaroiroi anga i te tangata paruparu i te pae vaerua kia tuatua mai no runga i te au tupuanga rekareka tana i kite i ko i te au uipaanga, i roto i te angaanga tutuanga, e i te au uruoaanga. E tuatua katoa no runga i te au tuatau mataora ta korua i kite ana i roto i te angaanga a Iehova. E tuatua no runga i te rekareka taau i kite i te akavaitata anga atu kia Iehova. (Iako. 4:8) E akakite i taau akameitakianga no te mataara e akono ana te Atua ia tatou ei iti tangata nona—i te oronga mai anga tikai i te akapumaana e te manakonakoanga i roto i to tatou au tuatau tumatetenga.—Roma 15:4; 2 Kori. 1:3, 4.
14, 15. Eaa te au akameitakianga puapinga ka tau kia akamaara atu ki te aronga tei paruparu i te pae vaerua?
14 Penei e, e mea puapinga kia akamaara atu ki tetai tei paruparu i te pae vaerua, i te au akameitakianga tana i mataora ana i tona piri vaitata atu anga ki te putuputuanga. Ei akatauanga, te au akameitakianga no te maata o te kite i te Tuatua a te Atua e tona au akakoroanga. (Mase. 4:18) I tona ‘aru anga i ta te vaerua,’ kare e ekoko e i ngoie roa atu nona kia patoi i te au timataanga o te ara. (Gala. 5:22-26) Tei tupu mai, kua tauturu te akava ngakau ma iaia kia akavaitata atu kia Iehova na roto i te pure e kia rauka ‘te au o te Atua, ko tei maata ua atu i te kite tangata, e akamaroiroi mai i to tatou ngakau e to tatou manako.’ (Phili. 4:6, 7) E akamaara meitaki i taua au manako ra, e akaari i te inangaro ngakau tae, e kia akamaroiroi atu ma te aroa i to taeake me kore i to tuaine kia oki mai ki te anana.—E tatau ia Philipi 2:4.
15 Peea mei te mea e e tangata pakari koe, te rave ra i te angaanga tiaki. Penei ka akamaroiroi atu koe i tetai tokorua akaipoipo tei paruparu i te pae vaerua kia akamanako i to raua tuatau i apii mua ai i te tuatua mou mei te Tuatua a te Atua. Kare e aiteia te manea, te tau, te mareka, e te tu rangatira o te tuatua mou! (Ioa. 8:32) Mei teaa ra te maata o to raua rekareka no ta raua e apii ra no runga ia Iehova, tona aroa, e tona akakoroanga umere tikai! (Akaaite ia Luka 24:32.) E akamaara atu kia raua i to raua pirianga vaitata kia Iehova e te tikaanga manea o te pure te rekarekaia ana e te au Kerititiano akatapuia. E akamaroiroi atu ma te ngakau tae i te aronga tei paruparu i te pae vaerua kia ariu akaou atu ki “te evangelia kakā o te Atua kakā,” ko Iehova.—1 Timo. 1:11.
E Akaari ua Atu rai i te Aroa no Ratou
16. E akakite mai i tetai akaraanga i te akaari e e puapingaia ana tikai te au tautaanga kia tauturu i te aronga tei paruparu i te pae vaerua.
16 Te angaanga tikai ra ainei teia au tamanakoanga i mua akenei? Ae. Ei akatauanga, tetai mapu tei akamata mai ei papuritia no te Patireia i te tae anga tona mataiti ki te 12, kua paruparu aia i te pae vaerua i te tae anga aia ki te 15 mataiti. Inara kua maroiroi akaou mai aia i muri mai, e kua pou e 30 tuma mataiti iaia i roto i te angaanga orometua tamou. Te tumu maata i rauka ai iaia i te oki akaou mai koia oki no te tauturu a tetai tangata pakari Kerititiano. Rekareka maata tikai aia i te tauturu a taua tangata pakari ra!
17, 18. Eaa te au tu ka riro ei tauturu ia koe i te tauturu atu i tetai tei aere ke mei te anana a te Atua?
17 Na te aroa e akakeu ana i te au Kerititiano kia tauturu i te aronga tei paruparu i te pae vaerua, kia oki mai ki te putuputuanga. I te tuatua atu anga ki tana au pipi kua na ko atura a Iesu e: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioa. 13:34, 35) Ae, e akairo te aroa no te au Kerititiano mou tikai. Kare ainei i reira e tau kia akaari i taua tu aroa ra no te au Kerititiano i papetitoia, e tei paruparu i te pae vaerua? Papu rava e e mea tau rai! Me te tauturu ra tatou i taua aronga paruparu ra ka anoanoia tatou kia akaari i te au tu Kerititiano tukeke.
18 E rauka ai ia koe te tauturu i tetai tei aere ke mei te anana a te Atua, eaa te au tu ka anoanoia koe kia akaari? I te pae mai i te aroa, penei ka anoanoia koe kia akaari i te ngakau aroa, te takinga meitaki, te maru, e te akakoromaki maata. Tei runga ua i te au turanga, penei ka anoano katoaia koe kia akakore ua atu i te apa. Kua tata a Paulo e: “Ka akangakau aroa ua e te takinga-meitaki, te akaaka, te maru, te akakoromaki maata, mei te aronga tapu e te akaperepereia, e te ikiia e te Atua ra: E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou. E ei runga ravao i taua au mea katoa nei e kakau na i te aroa, ko taua tatua apa kore ua ra ïa.”—Kolo. 3:12-14.
19. Eaa ra i puapinga ai kia tauta i te tauturu atu i te aronga mei te mamoe te tu kia oki mai ki te koro Kerititiano?
19 Ko te atikara ka aru mai i roto i teia tuanga, ka akamanako te reira i te au tumu e aere ke ei tetai aronga mei te anana a te Atua. Ka akaari katoa mai te reira e eaa te tu o te arikianga ka tapapa atu te aronga ka oki mai. Ia koe e apii ra i taua atikara ra e te akamanako no runga i teia, kia papu katoa e ka puapingaia tetai ua atu tautaanga taau ka rave ma te manakonakoanga kia tauturu atu i te aronga mei te mamoe te tu kia oki mai ki te koro Kerititiano. I roto i teia akatereanga o te au mea nei, e manganui ua atu te tangata e akapou ana i to ratou oraanga katoa i te akaputu i te apinga nui, inara e puapinga maata rava atu tetai oraanga okotai ua i te moni katoatoa i roto i teianei ao. Kua akaketaketa mai a Iesu i teia i roto i tana akatutuanga o te mamoe ngaro. (Mata. 18:12-14) Kia akamaara ua rai koe i teia, ia koe e aruaru pakari ra ma te rapurapu i te tauturu i to Iehova aronga akaperepere mei te mamoe te tu tei aere ke e kia oki mai ki te anana.
Akapeea Koe me Pau?
• Eaa te apainga a te au tiaki Kerititiano no te aronga mei te mamoe te tu tei aere ke mei te anana?
• Ka akapeea e rauka ai ia koe te tauturu i te aronga kare e piri akaou mai ana ki te putuputuanga?
• Eaa te au tu te ka tauturu ia koe kia tauturu atu i te aronga tei aere ke mei te anana?
[Au Uianga Apii]
[Tutu i te kapi 10]
E tauta ana te au tiaki Kerititiano ma te ngakau tae kia tauturu i te aronga tei aere ke mei te anana a te Atua