Eaa te Tu Tangata Taau e Inangaro ra kia Riro Mai?

KUA ui atu te akava maata i roto i tetai oire i te Piripine ki tetai painia e, “Eaa taau i rave ei kia taui tera tangata i tona au tu?” I te tou atu anga ki te putunga pepa i runga i tona kaingakai, kua karanga atu aia e: “Kua kite koe e e au rekoti pouroa teia no tona au akavaanga tei raveia ana? E maata tikai te au manamanata tana i akatupu ana i roto i teia oire, inara kua rauka ia koe i te tauturu iaia kia taui i tona tu kino.” Te tangata ta raua e tuatua nei e tangata kona kava akatupu pekapeka. Eaa ra tei akakeu iaia kia rave i teia au tauianga maata i roto i tona oraanga? Na te karere akauruia a te Tuatua a te Atua, koia oki te Pipiria.

E maata ua atu te aronga tei akamanako meitaki tikai i te ako a te apotetoro ko Paulo kia ‘kopae i ta ratou tuatua i muatangana ra, i te tangata taito, e kia akatangata ou oki ko tei angaia kia tau i te Atua ra.’ (Ephe. 4:22-24) Noatu e e maata me kore e meangiti te au tauianga ka anoanoia tatou kia rave, e tuanga te akatangata ou anga no te riro mai anga ei Kerititiano.

Inara, ko te au tauianga e te tere atu anga ki te turanga e tau ei kia papetitoia, ko te akamataanga ua te reira. Me oronga tatou ia tatou uaorai kia tarukuia ki te vai kua aite tatou ki tetai potonga rakau tei taraiia ki roto i te tu ta te tangata tarai e inangaro ra. Te kite ra koe e mei teaa te akaraanga o teia apinga, inara e maata rai te angaanga ka anoanoia i te rave. Ka anoanoia rai te tangata tarai kia kapiti atu i tetai au mea ke mai kia manea taua apinga ra. I te taime o te papetitoanga, kua rauka ia tatou te au tu tei anoanoia kia riro mai ei tavini no te Atua. Inara, ka anoanoia tatou kia akatupu atu rai i to tatou tu tangata ou. Kia akameitaki ua atu rai tatou i te reira na te rave anga i te au akatikatikaanga.

Kua kite katoa rai a Paulo e ka anoanoia kia akameitaki atu i te reira. Kua akatika aia e: “Kia anoano au i te rave i te mea meitaki ra, te vaitata ua nei te kino iaku i reira.” (Roma 7:21) Kua kite meitaki a Paulo e eaa tikai tona tu e kua kite aia e eaa tana e inangaro ra kia riro mai. Akapeea ra tatou? Ka anoano katoaia tatou kia ui kia tatou uaorai e: ‘Eaa ra te mea e vaitata ua nei iaku? Eaa tikai toku tu? E eaa te tu tangata taku e inangaro ra kia riro mai?’

 Eaa ra te Mea e ‘Vaitata ua nei Iaku’?

Me akaou tatou i tetai are taito, kare e rava kia peni ua ia vao me te pe ra te au rakau tarava i roto. Me kare tatou e ripea i te au kino o te turanga are, ka maata roa atu te manamanata a muri mai. Mei te reira katoa rai te tu tiratiratu tutu ua, kare te reira e rava. Kia tirotiro mata meitaki tatou i to tatou tu e kia kite i te au manamanata ka anoanoia i te akatika. Te openga, ka ata akaou mai te au tu o te tangata taito. No reira kia kimi matatio tikai tatou ia tatou uaorai. (2 Kori. 13:5) Ka anoanoia tatou kia akataka e eaa te au tu tau kore e kia akatikatika i te reira. E rauka ai te reira kua oronga mai a Iehova i te tauturu no tatou.

Kua tata a Paulo e: “E mea ora oki te tuatua a te Atua, e te ririnui, e kokoi maata oki to te reira i to te koke matarua ra, e te koputa mama takiri anga oki e taka ke ua atu te vaerua e te ngakau, e te paunga e te uo ivi ra; e te akara matariki oki i te manako e te vananga o te ngakau ra.” (Ebe. 4:12) Ka riro te karere o te Tuatua a te Atua i tataia, koia oki te Pipiria, ei akakeuanga ririnui tikai ki runga i to tatou oraanga. Ka koputa oonu rava te reira ki roto ia tatou​—ei akatutu ua, ki roto i te uo ivi koia oki ki roto roa ake i te ivi. Ka akaari mai te reira i to tatou manako e te akakoroanga, i te akaari pu mai anga e eaa tikai to tatou tu i roto me akaaiteia atu ki to tatou akaraanga i vao me kore i to tatou manako ia tatou uaorai. Te tauturu maira tikai te Tuatua a te Atua ia tatou kia kite i to tatou au manamanata!

Me ripea tatou i tetai are taito, penei e kare e rava ua te mono i te au apinga i kino. Na te kite anga e eaa te akatupu ra i te au kino e tauturu ia tatou kia kimi i tetai au ravenga i te paruru kia kore e tupu akaou mai te au manamanata. Ka riro te kite anga e eaa to tatou au tu tau kore, e te akatakake anga i te mea tei akatupu me kore tei akamaata atu i te reira, ei tauturu ia tatou kia akamako i to tatou au tu paruparu. E maata ua atu te au mea ka o mai i te akatanotano anga i to tatou tu tangata. I roto i te reira au mea koia oki to tatou turanga i roto i te taiate tangata e to tatou turanga pae kimi puapinga, te ngai e noo ra tatou, ta tatou peu tini, to tatou au metua, te aronga e piri atura tatou, e to tatou irinakianga akonoanga. E pera katoa te au porokaramu tivi e te au teata ta tatou e akara ana, e tetai atu au tu tamataoraanga, te ka takino ia tatou. Na te kite anga i te au tu tau kore te ka takino i to tatou tu, e tauturu ia tatou kia akaiti mai i te kino ta te reira ka akatupu ki runga ia tatou.

Muri ake i te makitoro marie anga, penei ka karanga tatou e, ‘Toku tu rai teia.’ E manako tarevake tikai teia. I te tuatua anga no runga i te aronga i roto i te putuputuanga i Korinetia tei riro ana ei aronga moeaana, ei aronga totoma, ei aronga kona kava, e mei te reira te tu, kua tuatua a Paulo e: ‘Mei te reira oki tetai papaki o kotou na: kua oreiia ra kotou e te vaerua o to tatou Atua.’ (1 Kori. 6:9-11) Ma te tauturu a te vaerua tapu o Iehova, ka autu katoa tatou i te rave anga i te au tauianga e anoanoia ra.

Ka akamanako ana i te tu o tetai tangata ko Marcos tona ingoa, * e noo ra i te Piripine. I te tuatua anga no runga i tona oraanga, kua akakite a Marcos e: “E karo ua ana toku nga metua. No reira i te tae anga toku mataiti ki te 19, kare au i akarongo akaou kia raua.” E rongo kino tikai to Marcos no te pere moni, te keikeia, e te tamatakutaku i te tangata ki te pupui. Ka aere tikai aia e etai atu aronga ka keia i tetai pairere, inara kare taua parani ra i tupu ana. Kua rave ua atu rai a Marcos i tana au angaanga kino i muri ake i tona akaipoipo anga. I te openga kua pou tana au apinga katoatoa ki runga i te pere moni. I muri poto ua ake i te reira, kua piri atu a Marcos ki tana vaine i te apii anga i te Pipiria e rave ra te Au Kite o Iehova ki tana vaine. I te akamataanga, kua manako aia e kare aia e tau kia riro mai ei Kite. Inara, no te mea te taangaanga ra aia i tana e apii ra e te aere ra ki te  au uipaanga, kua tauturuia a Marcos kia akaruke i tona au tu o mua ana. Teianei e Kerititiano papetitoia aia, e piri putuputu ua ana ki te apii anga i etai ke kia rauka katoa ia ratou i te taui.

Eaa Taau e Inangaro ra kia Riro Mai?

Eaa te au tauianga e anoanoia ra tatou kia rave ei akameitaki atu i to tatou au tu Kerititiano? Te ako maira a Paulo i te au Kerititiano e: “E kopae atu kotou i taua au mea katoa nei, te riri, te makitakita, te vareae, te akakino, te tuatua viivii ra, i to kotou vaa. Auraka e pikikaa tetai ki tetai, kua kopae oki kotou i te tangata taito ra e tana katoa au ravenga.” Kua na ko atu rai te apotetoro e: “E kua akatangata ou, ko tei akaouia i te kite mei te tu katoa o Tei anga iaia ra.”​—Kolo. 3:8-10.

No reira, ko to tatou akakoroanga maata tikai, koia oki kia kopae i te tu tangata taito e kia akatangata ou ia tatou. Eaa te au tu ka anoanoia tatou kia tatanu ei tauturu ia tatou i te akatupu i te reira? Te na ko maira a Paulo e: “Ka akangakau aroa ua e te takinga-meitaki, te akaaka, te maru, te akakoromaki maata, mei te aronga tapu e te akaperepereia, e te ikiia e te Atua ra: E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou. E ei runga ravao i taua au mea katoa nei e kakau na i te aroa, ko taua tatua apa kore ua ra ïa.” (Kolo. 3:12-14) Na te tauta pakari anga i te tatanu i teia au tu e tauturu ia tatou kia “akaperepereia mai e Iehova e te tangata katoa.” (1 Samu. 2:26) Iaia i te enua nei, kua akaari mai a Iesu i te au tu umere tikai o te Atua. Na te apii anga e te aru anga i tona akaraanga, ka rauka ia tatou kia riro mai mei ia Karaiti rai te tu ei aronga ‘aru i te Atua.’​—Ephe. 5:1, 2.

Tetai mataara ke mai kia kite e eaa te au tauianga ka anoanoia tatou kia rave koia oki na te apii anga i te au tu o te au tangata i roto i te Pipiria, i te akamanako anga e eaa to ratou au tu marekaia e tei kore e marekaia ana. Ei akaraanga, e akamanako ana ia Iosepha te tamaiti a te pateriareka ko Iakoba. Noatu te au tu tau kore tana i kite, kua tamou marie rai a Iosepha i te tu manako papu e te ngakau manea. (Gene. 45:1-15) I tetai tua, kua akapikikaa a Abasaloma te tamaiti a te Ariki ko Davida e te manako oonu atura aia i te tangata e kua akapaapaaia aia no tona purotu. Inara, ko te tikaanga tikai, e pikikaa ua rai aia e te ta tangata. (2 Samu. 13:28, 29; 14:25; 15:1-12) Kare te tu meitaki tutu ua e te manea o te kopapa e apai mai i te marekaanga mou tikai ki tetai.

Ka Rauka ia Tatou kia Autu

Kia akameitaki roa atu i to tatou tu e kia manea i roto i te mata o te Atua, ka anoanoia tatou kia akara matatio e eaa tikai to roto i to tatou ngakau. (1 Pete. 3:3, 4) Kia rave i tetai au tauianga i roto i to tatou tu ka anoanoia tatou kia akataka i to tatou au tu tau kore e tetai atu au mea ke e akatupu ra me kore e akamaata atura i te reira, e pera katoa te tatanu anga i te au tu o te Atua. Ka papu ainei ia tatou e me tauta pakari tatou i te akameitaki atu i taua au tu ra ka autu tatou?

Ae, ma te tauturu a Iehova ka rauka ia tatou te rave i te au tauianga e anoanoia ra. Mei te tata taramo rai, ka rauka ia tatou kia pure e: “E anga ana koe i te ngakau mā i roto iaku nei, e taku Atua, e akaou ana oki koe i te vaerua tika tikai i roto iaku nei.” (Sala. 51:10) Ka rauka ia tatou kia pati i te vaerua o te Atua kia akakeu ia tatou, kia akameitaki atu i to tatou anoano kia akaau i to tatou oraanga ma te ngakau katoa ki tona anoano. Ka rauka tikai ia tatou kia autu kia manea roa atu i roto i te mata o Iehova!

[Tataanga Rikiriki i Raro]

[Tutu i te kapi 4]

Ka rava ainei kia peni ua ia vao i teia are tei kino i te uriia?

[Tutu i te kapi 5]

Kua riro ainei toou tu mei to Karaiti rai?