Tauturu ia Ratou kia Oki Viviki Mai!

“Ka aere tika matou kiaai ra? tei ia koe te tuatua o te ora mutu kore ra.”​—IOA. 6:68.

1. Eaa ta Petero i tuatua ai i te akaruke anga te maataanga o te au pipi ia Iesu?

I TETAI atianga kua akarukeia a Iesu Karaiti e te maataanga o tana au pipi tei kopae i tetai o tana au apiianga. “Ka aere katoa ainei kotou?” i ui atu ei aia ki tana au apotetoro. Kua pau maira a Petero e: “E te Atu, ka aere tika matou kiaai ra? tei ia koe te tuatua o te ora mutu kore ra.” (Ioa. 6:51-69) Kare e ngai ke atu kia aere. Kare a te akonoanga ngati Iuda “tuatua o te ora mutu kore ra” i te reira tuatau, e i teia tuatau kare e kiteaia te reira au tuatua i roto ia Babulonia Maata, te patireia o te akonoanga pikikaa o teianei ao. No tetai ua atu tei aere ke mei te anana a te Atua inara te inangaro ra i te akarekareka ia Iehova, “teia te taime kia ara” e kia oki ki te koro.​—Roma 13:11, King James Version.

2. Eaa te ka tau kia akamaaraia no runga i te au mea muna me kore i te au tumu no te akavaanga?

² Kua akaari mai a Iehova i te manako oonu no te mamoe o Iseraela i ngaro. (E tatau ia Ezekiela 34:15, 16.) E inangaro katoa rai to te aronga pakari Kerititiano i te rave i ta ratou apainga kia tauturu i te aronga mei te mamoe te tu tei aere ke mei te anana. Me ka tukuia tetai papuritia kia apii i tetai tangata tei paruparu i te pae vaerua e inangaro ra i te tauturu, eaa te ka tau kia raveia me kite te puapii e kua rave te reira tangata i tetai ara kino? I to te oronga atu i tetai akoanga no runga i te au tumu no te akavaanga me kore i tetai au mea muna, e mea tau kia akamaroiroi atu te papuritia iaia kia tuatua atu ki te aronga pakari. Me kare aia e rave i te reira, e mea tau e kia akakite atu te papuritia uaorai ki te aronga pakari.​—Levi. 5:1; Gala. 6:1.

3. I akapeea te tangata e 100 ana mamoe i te ariu atu anga i te kitea mai anga te mamoe i ngaro?

³ I roto i te atikara i mua ake, kua taikuia mai ta Iesu akatutuanga no runga i tetai tangata e 100 ana mamoe. I te ngaro anga e tai mei te koro, kua akaruke aia i te 99 e kua aere atu i te kimi i te mamoe i ngaro. E rekareka maata tikai to taua tangata ra i te kitea anga iaia te reira! (Luka 15:4-7) Mei te reira katoa to tatou rekareka me oki mai tetai mamoe a te Atua tei ngaro ana mei te anana. Akakeuia e te aroa, kare e kore e  kua atoro ana rai te aronga pakari e etai atu au mema o te putuputuanga i taua tangata ra tei paruparu i te pae vaerua. Te inangaro katoa ra ratou i te kite atu i te reira tangata i te oki mai anga ki te koro e kia mataora i te turuturu, te paruruanga, e te akameitakianga a te Atua. (Deu. 33:27; Sala. 91:14; Mase. 10:22) Me rauka ia ratou tetai atianga i te tauturu i tetai kia oki mai ki te putuputuanga, eaa ta ratou ka rave?

4. Eaa te manako ka kiteaia i roto ia Galatia 6:2, 5?

⁴ Penei ka rauka ia ratou i te akamaroiroi atu i tetai tangata kia oki mai ki te putuputuanga na te akaari anga ma te takinga meitaki kiaia e te aroa maira a Iehova i Tana au mamoe e te umuumu ua maira i te ka rauka ia tatou i te rave. Te kapiti maira teia i te apii anga i te au Tuatua Tapu, te aere anga ki te au uipaanga Kerititiano, e te tutu anga i te tuatua meitaki o te Patireia. Penei ka tau kia tatau ia Galatia 6:2, 5 e kia taiku atu e ka rauka i te au Kerititiano i te tauturu i te apai i te au apainga a tetai e tetai, inara “ei runga iaia uaorai ta te tangata ravarai apainga” kia Iehova. Kare e rauka i tetai ke kia tiratiratu ki te Atua no tatou.

Akaparuparuia Ainei e te “Pekapeka o Teianei Ao”?

5, 6. (a) Eaa ra i puapinga ai kia akarongo meitaki tatou ki te au tuatua a te au taeake irinaki tei paruparu i te pae vaerua? (e) Akapeea ra e rauka ai ia koe i te tauturu i te aronga tei paruparu i te pae vaerua kia kite e no te kare ratou e aere mai ana ki te au uipaanga kua riro te reira ei kino kia ratou?

⁵ Kia kite e ka akapeea i te tauturu anga i te au taeake irinaki tei paruparu i te pae vaerua, ka anoanoia te aronga pakari e tetai atu au papuritia tukatau kia akarongo meitaki i taua aronga ra e akakite maira i to ratou manako ngakau. Akapeea me e tangata pakari koe e atoro ra i tetai tokorua akaipoipo kare e tae mai ana ki te putuputuanga no te mea kua akaparuparuia raua i te pae vaerua e te au “pekapeka o teianei ao.” (Luka 21:34) Penei e na te au manamanata o te moni me kore no te maata o te au apainga ngutuare tangata i akaparuparu ia raua kia akamutu marie i ta raua angaanga Kerititiano. Penei e te inangaro ra raua kia mama mai ta raua au apainga, inara e akakite atu koe e kare te akatakake anga ia raua mei te putuputuanga, e tauturu ia raua. (E tatau ia Maseli 18:1, NW. *) Penei e ui matakite ua atu koe kia raua e: “E maata atu ainei to korua mataora i te akamutu anga korua i te aere ki te au uipaanga? E meitaki atu ainei to korua oraanga ngutuare tangata? Te riro ra ainei rai te rekareka no Iehova ei punanga ketaketa no korua?”​—Nehe. 8:10, NW.

⁶ I te akamanako anga no runga i taua au uianga ra penei e ka tauturuia te aronga tei paruparu i te pae vaerua kia kite e no te mea kua akamutu ratou i te aere mai ki te uipaanga, kua ngaro to ratou turanga pae vaerua e to ratou mataora. (Mata. 5:3; Ebe. 10:24, 25) Penei ka rauka i te tauturu ia ratou kia kite e te ngere ra ratou i te mataora e rauka mai ana mei te tutu aere i te tuatua meitaki. (Mata. 28:19, 20) E no reira, eaa ra te mea tau no ratou kia rave?

7. Eaa ta tatou ka akamaroiroi atu i te aronga tei aere ke mei te anana kia rave?

 ⁷ Kua tuatua a Iesu e: “E matakite ra ia kotou, ko te opue aea to kotou ngakau i te maata o te kai e te kona, e te pekapeka o teianei ao. . . . E tenana, e ara kotou, e tamou tikai i te pure, kia tau ia kotou te ora i teianei au mea katoa e vaitata mai nei.” (Luka 21:34-36) Te aronga tei aere ke mei te anana, inara te inangaro ra kia rauka te mataora ta ratou i kite i mua ana ka rauka i te akamaroiroi atu ia ratou kia pure no te vaerua tapu e te tauturu a te Atua e kia akono i ta ratou e pure ra.​—Luka 11:13.

Kua Akaturoriia Ainei Ratou?

8, 9. Akapeea tetai tangata pakari me tuatua atu ki tetai tei akaturoriia?

⁸ No te mea e e tu apa ua to te tangata, ka tupu rai te manamanata, e penei na te reira e akaturori i tetai. Kua akaturoriia ana tetai pae i te rave anga tetai tangata akangateiteiia i roto i te putuputuanga i tetai angaanga tarevake. Me kua kinokino tikai te tangata tei paruparu i te pae vaerua, kia akakite atu te tangata pakari e atoro ra iaia e kare a Iehova e akaturori ana i tetai ua atu. No reira eaa ra tetai ka takore ei i tona pirianga ki te Atua e Tona iti tangata? Mari ra, kare ainei e tau kia tavini ua atu rai aia i te Atua, ma te papu tikai e te kite ua maira “te Akava i to te ao katoa nei” e eaa tei tupu e ka akono aia i te reira ma te tu tau tikai? (Gene. 18:25; Kolo. 3:23-25) Me ka inga e me ka topa tetai tangata ki raro, kare aia e noo akakoro ua atu rai ki reira e kare e tauta i te tu mai ki runga.

⁹ I te tauta anga i te tauturu ia ratou kia oki akaou mai, penei e taiku atu tetai tangata pakari e i te au tuatau tei aereia mai ana, kua kite mai tetai pae e kare ua rai te mea i akaturori ei ia ratou i te mea puapinga tikai. Ko te tika, penei kua kore te turanga tei akaturori ia ratou. Me kua akaturoriia tetai tangata no te mea kua akoia aia, na te akamanako oonu anga na roto i te pure e tauturu iaia kia ariki e kua apa rai aia i tetai tua, e kare rai i te mea tau kia akariro aia i te ako ei akaturori iaia.​—Sala. 119:165; Ebe. 12:5-13.

Ko te Apiianga Ainei te Manamanata?

10, 11. Eaa te au tuatua ka puapingaia i te tauturu anga i tetai tei tuke rai tona marama anga no runga i tetai au apiianga Pipiria?

¹⁰ Kare e kore e kua akaruke tetai i te anana a te Atua no te mea kare ratou i ariki ana i tetai au apiianga Tuatua Tapu. Ko te au ngati Iseraela tei matara mai mei te tuikaaanga i Aiphiti kua ‘ngaropoina ta te Atua au angaanga’ i rave no ratou e “kare i tiaki i tana tuatua.” (Sala. 106:13) Ka tauturu maata roaia kia akamaara atu i tei paruparu i te pae vaerua e te oronga maira te “tavini akono meitaki e te pakari” i te kai meitaki rava atu i te pae vaerua. (Mata. 24:45) I akapera oki taua tangata ra i te kite mua anga i te tuatua mou. No reira eaa ra aia ka kore ei e aruaru tikai i te aaere akaou i roto i te tuatua mou?​—2 Ioa. 4.

¹¹ I te tauta anga kia tauturu i te aronga tei aere ke mei te anana a te Atua, penei ka taiku atu te tangata pakari i te au pipi tei akaruke ia Iesu no te mea kua patoi ratou i tetai o tana au apiianga. (Ioa. 6:53, 66) Na te takore anga i to ratou pirianga kia Karaiti e tana au pipi akarongo mou, kua ngaro to ratou inangaro e to ratou mataora i te au mea pae vaerua. Kua kitea ainei e te aronga tei akamutu i te piri mai ki te putuputuanga Kerititiano tetai ngai ke mai e maata te kai pae vaerua meitaki tikai? Kare, kare e ngai ke atu!

Te O Maira Ainei te Ara Kino?

12, 13. Me akakite mai tetai tei aere ke mei te anana e kua rave ana aia i tetai ara kino, ka akapeea e rauka ai te tauturu iaia?

¹² E akamutu ana tetai aronga i te tutu anga e te aere anga ki te uipaanga no te mea kua rave ratou i tetai ara kino. Te manako ra ratou e me aaki ratou i ta ratou angaanga tarevake ki te aronga pakari, ka akaateaia ratou. Inara kare ratou e akaateaia mei te putuputuanga me kua akamutu ratou i te rave i te angaanga kare i tau i te tuatua tapu e kua tataraara tika tikai. (2 Kori. 7:10, 11) Mari ra, ka arikiia mai ratou, e ka oronga atu te aronga pakari i te tauturu pae vaerua e anoanoia ra no ratou.

¹³ Me e papuritia tukatau koe tei patiia kia tauturu i tetai tangata tei paruparu i te pae vaerua, eaa taau ka tau kia rave me akakite mai aia kia koe e kua rave ana aia i tetai ara kino? Mei tei akakiteia mai i mua ake, i to te akao atu ia koe ki roto i taua turanga ra, e akakite kiaia kia tuatua atu ki te aronga pakari no runga i te reira. Me kare aia e inangaro i te rave i te reira, te akaari ra koe i toou manako oonu no te ingoa o Iehova e te turanga pae vaerua o te putuputuanga na te akono anga i  ta te Atua aratakianga no runga i taua au mea ra. (E tatau ia Levitiku 5:1.) Ka kite te aronga pakari e ka akapeea me tauturu i tetai ua atu e inangaro ra i te oki mai e kia tau te oraanga ki te anoano o te Atua. Penei ka anoanoia te akoanga takinga meitaki. (Ebe. 12:7-11) Me ariki rai tetai tangata e kua ara aia i te Atua, kua akaruke i tana angaanga tarevake, e kua tataraara tikai, ka tauturu te aronga pakari iaia, e ka rauka iaia te akakoreanga ara a Iehova.​—Isa. 1:18; 55:7; Iako. 5:13-16.

Rekareka Maata tei Tupu te Oki Mai Anga te Tamaiti

14. I roto i taau uaorai au tuatua, e akakite mai i ta Iesu akatutuanga no runga i te tamaiti kaimoumou apinga.

¹⁴ I te umuumu anga kia tauturu atu i tetai mamoe tei aere ke, kia taiku atu te tangata tei patiia kia tauturu, i te akatutuanga a Iesu tei rekotiia i roto ia Luka 15:11-24. I roto i taua parapore ra, kua kaituauau ua tetai mapu tane i tana tuanga apinga i roto i te oraanga tau kore. I te openga kua vinivini tikai aia i tona oraanga viivii. Kua mate aia i te pongi, kua mii i te ngutuare, e kua papu tikai iaia i roto i tona manako e​—te oki nei aia ki te kainga! Tei te ngai mamao rai aia, kua kite mai tona metua iaia, kua oro mai e kua takave maira i te kaki o tana tamaiti, e kua ongi mari maira iaia, e kua ki rava akera i te rekareka maata. Na te akamanako anga i teia akatutuanga ka akakeu te reira i tetai tei aere ke kia oki mai ki te koro. I te mea e kare e roa atu ka takoreia teia akatereanga o te au mea nei, e mea tau e kia ‘oki viviki mai’ aia.

15. No teaa ra tetai pae i aere ke ei mei te putuputuanga?

¹⁵ Kare te maataanga o tei aere ke mei te putuputuanga i aite tikai ki te tamaiti kaimoumou apinga. No tetai aronga, e tupu marie ua ana te aere ke anga, mei tetai poti rai e panu marie ua atura mei te enua. Tetai pae no te maata o to ratou manamanata i te au pekapeka o teianei ao kare ratou i akono i to ratou pirianga kia Iehova. E ko etai kua akatika ua ia ratou uaorai kia akaturoriia e tetai mema o te putuputuanga, me kore ra kua akaruke ratou no te mea kare ratou e ariki ana i tetai apiianga Tuatua Tapu. Tetai papaki kua o atu ki roto i tetai angaanga kare i tau i te tuatua tapu. Inara, ko te ako tei orongaia mai no runga i teia au mea penei ka tauturu ia koe i te tauturu atu i te aronga tei akaruke i te koro no teia au mea me kore no tetai atu au tumu ke, kia oki mai i mua ake ka tureti ei.

“Aere Mai ra e Taku Tamaiti!”

16-18. (a) Akapeea tetai tangata pakari i te tauturu anga i tetai taeake tei paruparu ana i te pae vaerua no tetai au mataiti? (e) Eaa te tumu i paruparu ei teia taeake i te pae vaerua, i akapeea aia i te tauturuia anga, e i akapeea aia i te arikiia mai anga e te putuputuanga?

¹⁶ Kua karanga tetai tangata pakari Kerititiano e: “E tauta pakari ua ana rai to matou pupu aronga pakari i te atoro atu i te aronga tei paruparu i te pae vaerua. Kua akamanako mai au i tetai taeake taku i apii ana e i tauturu ana kia kite i te tuatua mou. Kua paruparu ana aia no tetai 25 mataiti e te na roto ra i tetai turanga ngata tikai, no reira kua akamarama atu au e na te taangaanga anga i te au kaveinga Pipiria ka tauturuia aia. I tetai tuatau i muri mai, kua akamata aia i te aere mai ki te Are Uipaanga Patireia e kua ariki mai i tetai apii Pipiria nana uaorai ei tauturu i te akamaroiroi iaia kia oki mai ki te anana.”

 ¹⁷ Eaa ra te taeake i paruparu ei i te pae vaerua? Kua akakite aia e: “Kua akamata au i te akamanako ua i te au akakoroanga o teianei ao e toku oraanga i te au ra, eiaa ra i toku pirianga kia Iehova. I reira kua akamutu au i te apii, te tutu aere e te aere ki te au uipaanga. Kite ua ake au, kare au e piri akaou ana ki te putuputuanga. Inara kua riro te tu inangaro uaorai e te ngakau tae tei akaariia mai e te tangata pakari ei tauturu iaku kia oki mai.” Kua iti mai te au manamanata o teia taeake i muri ake i tona ariki anga i tetai apii Pipiria nana uaorai. Kua karanga aia e, “Kua kite mai au e ko te mea tei ngere i roto i toku oraanga koia oki ko te aroa e te aratakianga a Iehova e tana akaaerenga.”

¹⁸ Akapeea ra teia taeake i te arikiia mai anga i roto i te putuputuanga? Kua karanga aia e: “Mei te tamaiti kaimoumou apinga rai au, ta Iesu Karaiti i tuatua mai. Inara, kua karanga mai tetai tuaine pakari tei reira aia e 30 mataiti akenei e te tavini tiratiratu nei rai ia Iehova e, ‘Aere mai ra e taku Tamaiti!’ Kua akatukia tikai te reira i toku ngakau. Kua kite au i reira e ko teia tikai toku ngai. E te inangaro nei au i te akakite atu i te rekareka o toku ngakau no te aroa, te pumaana, te akakoromaki, e te inangaro tei akaariia mai kiaku e taua tangata pakari ra, e te putuputuanga katoatoa. Kua riro to ratou aroa no Iehova e no to ratou tangata tupu ei tauturu tikai iaku kia oki mai ki te anana.”

Raurau Atu ia Ratou kia Oki Viviki Mai!

19, 20. Akapeea koe me akamaroiroi i te aronga tei paruparu i te pae vaerua kia oki viviki mai ki te anana, e ka akapeea koe me akaari kia ratou e kare te Atua e tapapa mai ana e kia maata roa atu ta tatou ka rave?

¹⁹ Te noo nei tatou i roto i te au ra openga, e te vaitata roa mai nei te openga o teia akatereanga o te au mea nei. No reira, e akamaroiroi atu i te aronga tei paruparu i te pae vaerua kia aere mai ki te au uipaanga Kerititiano. E raurau atu ia ratou kia akamata i teia taime. E akamaara atu ia ratou e te titau nei a Satani i te takore i to ratou pirianga ki te Atua e kia manako ratou e ka mama mai ta ratou au apainga o te oraanga me akaruke ratou i te akamorianga mou. Ka rauka ia koe i te akapapu kia ratou e na te riro ua anga ei pipi akarongo mou na Iesu e rekareka ai tetai i te akaangaroianga mou tikai.​—E tatau ia Mataio 11:28-30.

²⁰ E akamaara atu i te aronga tei paruparu i te pae vaerua e te tapapa maira a Iehova ia tatou kia rave i ta tatou ka rauka. I te akaapaia anga a Maria te tuaine o Lazaro no te akamainu anga ia Iesu ki te manongi oko maata i mua ua ake i tona matenga, kua karanga atura aia e: “Vaio atu iaia. . . . Kua rave aia i te tika iaia nei.” (Mare. 14:6-8) Kua akapaapaa atu a Iesu i te vaine takaua tei oronga atu i te moni meangiti rava, i ko i te iero. Kua rave katoa rai aia i tana ka rauka i te rave. (Luka 21:1-4) Ka rauka katoa i te maataanga ia tatou kia aere ki te au uipaanga Kerititiano e kia piri atu ki te angaanga tutu aere i te Patireia. Ma ta Iehova tauturu, ka rauka i te manganui o te aronga tei paruparu i te pae vaerua i teianei i te rave i taua au mea ra.

21, 22. Eaa taau ka akapapu atu ki te aronga e oki maira kia Iehova?

²¹ Me ka emiemi tetai mei te mamoe te tu tei aere ke mei te anana i te aravei akaou i tona au taeake, penei e akamaara atu koe kiaia i te rekareka maata tei tupu i te oki mai anga te tamaiti kaimoumou apinga ki te kainga. E tumuanga rekareka katoa me oki mai taua aronga ra ki te putuputuanga. Akamaroiroi atu ia ratou kia patoi atu i te Tiaporo i teianei e kia akavaitata atu ki te Atua.​—Iako. 4:7, 8.

²² E turouanga rekareka tikai te tapapa maira i te aronga e oki maira kia Iehova. (Aue 3:40) Kare e ekoko e i to ratou tavini anga i te Atua i te tuatau i topa kua apai mai te reira i te rekareka maata kia ratou. E manganui ua atu te au akameitakianga no te tuatau ki mua, e tapapa maira i te aronga e oki viviki maira ki te anana!

[Tataanga Rikiriki i Raro]

Akapeea Koe me Pau?

• Ka akapeea koe i te tauturu anga i tetai Kerititiano tei akaturoriia e kua paruparu i te pae vaerua?

• Eaa te au tuatua penei te ka tauturu i tetai tei akaruke i te anana a te Atua no te mea e tuke rai tona uaorai manako no runga i tetai apiianga?

• Akapeea e rauka ai i te tauturu i tetai tei emiemi i te oki mai ki te putuputuanga?

[Au Uianga Apii]

[Tutu i te kapi 13]

E akarongo meitaki atu ki tetai taeake irinaki tei paruparu i te pae vaerua, iaia e akakite maira i tona manako

[Tutu i te kapi 15]

Na te akamanako anga i ta Iesu akatutuanga no te tamaiti kaimoumou apinga, penei ka akakeuia tetai aronga kia oki mai ki te anana