Tavini i te Atua ma te ‘Ngakau e te Tu Okotai’

KUA uipa maira te ngati Iuda e te au tangata ke ki ko i te au pipi a Iesu Karaiti. Ko te Oroa Penetekote teia, e kua aere mai teia au manuiri ki Ierusalema mei Roma roa mai i te tua opunga, e mei Paretia roa mai i te tua itinga. E tukeke te au reo e akarongoia ra i roto i teia urupu. Inara ko te au pipi a Iesu e tuatua ra kia ratou, e au tangata Galilea. Kua ui atu tetai papaki o te au manuiri tei va ua e: “Eaa ra oki teia i akarongo ei tatou ravarai nei i te reo, tonao tonao, i anau ei ra?”​—Anga. 2:8.

Kua tu akera te apotetoro ko Petero e kua akamarama atura i te tumu no te temeio ta ratou e kite ra. Kua ariki viviki ua mai te urupu  i te karere. E tauatini ua atu aronga ou ua tei papetitoia! (Anga. 2:41) Noatu e te tupu viviki ua ra te putuputuanga, kua vai taokotai rai te reira. “Ko te urupu o te aronga tei irinaki e ngakau okotai e te tu okotai [to ratou],” e karanga ra te tangata tata Pipiria ko Luka.​—Anga. 4:32.

E tauatini ua atu tei papetitoia i te ra o te Penetekote i te mataiti 33 T.N. tei inangaro kia noo roa atu ki Ierusalema kia apii maata atu no runga i to ratou akarongo ou. Inara kare ratou i manako ana e ka noo roa mai ratou. No reira, kua raveia tetai akaputuanga moni no tera taime ua. Kua inangaro ua tetai aronga irinaki i te oko i to ratou au apinga e kua apai mai i tei rauka mai ki te au apotetoro kia tuaia ki te aronga tei anoano i te tauturu. (Anga. 2:42-47) Kua akaari mai ratou i te tu aroa e te tu maoraora tikai!

Kua vai ua ana rai teia tu aroa e te tu maoraora o teia au Kerititiano mou. Teia tuatau, te tavini taokotai ua nei rai te putuputuanga Kerititiano ia Iehova ma te “ngakau okotai e te tu okotai.” Te oronga maoraora ua nei te au Kerititiano ravarai i to ratou taime, to ratou maroiroi, e ta ratou moni kia tutu aereia te tuatua meitaki e kia turuturu i te au anoano o te Patireia o te Atua.​—E akara i te pia  “Au Ravenga ta Etai e Iki ra no te Oronga.”

[Pia i te kapi 6, 7]

 AU RAVENGA TA ETAI E IKI RA NO TE ORONGA

AKAPUTUANGA NO TE ANGAANGA I TEIANEI AO

E manganui te akapae ra, me kore te akapapa ra, i tetai moni no te tuku ki roto i te au pia akaputu anga tei akairoia: “Akaputuanga no te Angaanga i Teianei Ao​—Mataio 24:14.”

Te au marama katoatoa, e tuku ana te au putuputuanga i teia au moni ki te opati manga o te Au Kite o Iehova te akono ra i to te reira au enua tataki tai. Kia tuku tika katoaia te au moni tauturu tei oronga uaia ki te Treasurer’s Office, Watchtower Bible and Tract Society of New Zealand, PO Box 75142, Manurewa, Manukau 2243, ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te akakite anga mai e e au apinga aroa tikai taua au apinga ra no teia au akaputu anga.

AKANOOANGA I TE TURANGA NO TE TAUTURU

Penei ka orongaia te moni na roto i tetai akanooanga takake, e me ka pati mai te tangata oronga ra i te reira, ka akaokiia atu te moni oronga ua kiaia. No tetai akakite anga maata atu, e tata ki te Treasurer’s Office i te atereti i akakiteia i runga akenei ine.

PARANIANGA ORONGA UA

I te pae i te au moni oronga aroa ua e te au moni oronga tauturu ua, te vai ra tetai atu au ravenga orongaanga no te akapuapinga i te angaanga Patireia i teianei ao. Te kapiti maira teia i te:

Initurini: Penei kia tukuia te ingoa o te Watchtower Society e ko tei puapingaia mei tetai koreromotu initurini no te oraanga me kore tetai akapapaanga akaangaroi anga/moni pakari.

Apinga Akaputuia e te Au Poni: Penei ka orongaia te au apinga akaputuia e te au poni ki te Watchtower Society ei apinga aroa.

Are e te Enua: Penei ka orongaia te au enua e te au are ka rauka i te oko ki te Watchtower Society ei apinga aroa me kore, na te akono anga i tetai koreromotu no te au apinga o te oraanga ki tei orongaia mai i te reira, te ka rauka iaia i te noo ki roto i te tuatau e ora ra aia. Kia araveiia atu te opati manga i toou enua i mua ake ka akamanaia ai tetai ua atu enua e te are.

Au Koreromotu e te Au Taokotaianga: Penei ka oronga tikaia te apinga me kore te moni ki te Watchtower Society na roto i tetai koreromotu tikaia e te ture, me kore kia tukuia te ingoa o te Watchtower Society te ka puapingaia no tetai koreromotu no te taokotaianga.