“Te Pee o te Tai”​—E Tataanga mei te Tuatau Muteki Ua

I ROTO ia Me ra 22, mataiti 2007, kua akaariia tetai potonga pokaikai Epera no te tuatau mai o te itu me kore o te varu anere mataiti T.N. ki ko i te Runanga Apinga Taito o Iseraela i Ierusalema. E tataanga teia no Exodo 13:19–​16:1. Te kapiti maira te reira i tei kiteaia e ko “te Pee o te Tai”​—te pee akatatanga ta te ngati Iseraela i imene ei i muri ake i to ratou akaora temeioia mai anga i te Tai Muramura. No teaa ra te akaarianga o teia potonga pokaikai i puapinga maata ai?

Ko te pauanga, no runga te reira i te tuatau o taua tataanga ra. Kua tataia te Pokaikai Tuatua Tai Mate i rotopu i te toru o te anere mataiti M.T.N. e te anere mataiti mua T.N. I mua ake i te kitea mai anga te reira mei tetai 60 mataiti i topa, ko te Puka Aleppo te tataanga Epera taito roa atu, no te mataiti 930 T.N.”

Ko “te tataanga no te Pee o te Tai,” e karanga ra a James S. Snyder, te akaaere o te Runanga Apinga Taito o Iseraela, “e tataanga [te reira] no te tuatau muteki ua o te tuatua enua i rotopu i te Pokaikai Tuatua Tai Mate . . . e te Puka Aleppo.” Kia tau ki tana i akakite, ko teia tataanga kapiti mai tetai au tataanga Pipiria taito “e akaraanga takake tikai no te tu i akonoia ai tetai tataanga kare i tauiia ana.”

Kua irinakiia e ko taua potonga pokaikai tetai o te au tataanga tei kiteaia mai i roto i te tuanga openga o te 19 o te anere mataiti i roto i te tunako i Cairo, i Aphiti. Inara kare tetai tangata akaputuputu tataanga Epera i kite ana e mei teaa tikai te puapinga o te reira mari ua, i tona aravei atu anga i tetai tangata kite karape i te pae openga o te mataiti 1970, i kite ei aia. Kua akaraia e eaa te roa o teia potonga tataanga i taua taime ra e kua akaputuia te reira ki te vairanga e tae ua atu ki te taime i akaariia ai i ko i te Runanga Apinga Taito i Iseraela.

I te tuatua anga no runga i te puapinga o te potonga pokaikai, kua akakite a Adolfo Roitman, te akaaere o te Vairanga o te Puka, i te Runanga Apinga Taito o Iseraela, e te tangata e akono ra i te Pokaikai Tuatua Tai Mate e: “Te akatutu maira te tataanga o te Pee o te Tai i te tu tiratiratu tikai i te kopiia anga te urianga Matorete o te Pipiria i te au anere mataiti i aereia mai ei. E mea umere tikai e kua vai rai taua tu taka meitaki ua i tataia ai te Pee o te Tai i teia tuatau mei to te itu ki te varu anere mataiti rai.”

Ko te Pipiria te Tuatua akauruia a te Atua, e na Iehova tikai i paruru i te reira. Tetai katoa, kua kopi meitaki tikai te au tata tuatua i te au Tuatua Tapu. No reira, ko te tataanga o te Pipiria ta tatou e taangaanga nei i teia tuatau, kare e ekoko e kua tau tikai kia irinakiia.

[Akameitakianga no te Tutu i te kapi 32]

Courtesy of Israel Museum, Jerusalem