‘Umuumu i te Tuatua ka Akatupu i te Au’

E AKARA anga matutu tikai tetai mataara tei patuia, kare roa e kino. Inara, i te au taime tei aereia, kua kitea mai te au ngai ngaangaa e te vaarua rua. Ka anoanoia kia maani akaouia, i te akapapu e kia meitaki ua te reira e kia paruru i te mataara.

Mei te reira katoa rai te tu o to tatou au pirianga ki etai ke, i tetai au taime penei ka tupu te pekapeka e ka tupu te ke. Kua ariki rai te apotetoro ko Paulo e e tukeke te au manako i rotopu i te au Kerititiano i Roma. Kua ako atu aia i te au taeake Kerititiano e: “Ka umuumu tatou i te tuatua i akatupu i te au, e te tuatua e meitaki kapipiti ei ra.” (Roma 14:13, 19) Eaa ra i anoanoia ai kia “umuumu tatou i te tuatua i akatupu i te au”? Ka akapeea tatou i te aruaru anga i te au ma te ngakau toa e te tau tikai?

Eaa ra ka Umuumu ei i te Au?

Me kare e ripeaia, ka riro mai te au ngaangaa rikiriki ei au vaarua mamaata kino. Mei te reira katoa rai me kare tatou e akatikatika i to tatou au manamanata uaorai, ka riro te reira ei kino. Kua tata te apotetoro ko Ioane e: “Kia karanga tetai tangata e, Te anoano nei au i te Atua, e kare i aroa i tona taeake, e pikikaa aia; ko tei kore e aroa i tona taeake tei akaraia e ia ra, eaa e tikaʼi iaia kia anoano i te Atua tei kore i akaraia e ia ra.” (1 Ioa. 4:20) Ko tetai manamanata uaorai kare i akatikatikaia, i te openga ka riro ei akanauru i tetai Kerititiano kia makitakita atu i tona taeake.

Kua akaari mai a Iesu Karaiti e kare ta tatou akamorianga e arikiia mai e Iehova me kare tatou i akaau atu ki etai ke. Kua ikuiku atu a Iesu ki tana au pipi e: “E teianei, kia apai koe i taau apinga oronga ua ki te atarau, e kua manako iora koe i reira e, e ara ta to taeake ia koe na: Vaio atu i to apinga i mua i te atarau, e akamata i te aere e ongi i to taeake, ka aere ei ka apai i taau apinga.” (Mata. 5:23, 24) Ae, ko te tumu maata tikai e umuumu ei tatou i te au koia oki te inangaro ra tatou i te akamareka i te Atua ko Iehova. *

Te akaari maira tetai turanga i roto i te putuputuanga i Philipi i tetai tumu ke mai ka umuumu ei tatou i te au. Tetai manamanata kare i akatakaia mai, tei tupu i rotopu i tetai nga tuaine Kerititiano, ko Euodia raua ko Sunetuke, kua riro ei takino i te turanga au i roto i te putuputuanga katoa. (Phili. 4:2, 3) Te au manamanata uaorai kare e akatikatikaia, ka viviki ua te katoatoa i te kite. Na te anoano kia paruru i te aroa e te tu rotai o te putuputuanga e akakeu ia tatou kia  umuumu i te au i rotopu i to tatou au taeake irinaki.

“E ao to tei akamoeau,” i akakite ei a Iesu. (Mata. 5:9) Ka apai mai te au i te tu merengo mou tikai. Tetai katoa, ka akatupu te au i te oraanga kopapa meitaki, no te mea “tei te maki kore o te ngakau, ko to te kopapa ïa ora.” (Mase. 14:30) I tetai tua, penei ka akamaata atu te tu akamou riri i te maki i te pae kopapa.

Noatu e te akatika ra te maataanga o te au Kerititiano e ka anoanoia te umuumu i te au, penei ka inangaro koe kia kite e ka akapeea te akatikatika anga i tetai manamanata uaorai. Ka makitoro marie ana tatou i te au kaveinga Tuatua Tapu te ka arataki ia tatou.

Uriuri Maru ka Akatupu Akaou i te Au

Maataanga i te taime ka rauka ua i te ripea i te au ngaangaa i roto i te mataara patuia, na te tapoki anga atu i te au ngai kino. Ka rauka ainei ia tatou kia akakore e kia akangaro atu i te au tarevake rikiriki o to tatou au taeake? Kare e kore e, ka angaanga teia ravenga no te maataanga o te au manamanata uaorai, no te mea kua tata te apotetoro ko Petero e “ka ngaro oki te apa e manganui i te aroa.”​—1 Pete. 4:8.

Kareka ra i tetai au taime, i te akaraanga e pakari tikai te kino o te manamanata e kare e rauka ia tatou kia akangaro ua atu i te reira. Ka akamanako ana e eaa tei tupu ki te ngati Iseraela i muri ua ake i te rauka anga ia ratou te Enua Taputouia. I mua ake ka neke ei “te tamariki a Reubena, e te tamariki a Gada, e te kopu veenga o Manase ra” ki tetai tua mai i te Kauvai Ioridana, kua akatu ratou i tetai ‘atarau maata i vaoo ua mai kia akaraia.’ Kua irinaki tikai tetai au kopu ke atu o Iseraela e kua taangaangaia ana taua atarau ra no te akamori itoro e kare e rauka i te akangaro ua atu i taua manamanata ra. Kua akateateamamao iora ratou no te tamaki atu.​—Iosu. 22:9-12.

Kare e kore e kua manako tetai papaki o te ngati Iseraela e te rava ua ra te akapapuanga e kua raveia te ara e me tamaki poitirere ua atu ratou e iti ua te mate ka tupu mai. Inara kare ratou i rapurapu, mari ra kua tono atu te au kopu i te tua opunga o Ioridana i tetai au mata kia uriuri i te manamanata ki to ratou au taeake. Kua ui atu ratou e: “Eaa tenana ara i raveia e kotou i te Atua o Iseraela nei, i anga ke ei kotou i teianei rā kare akera i aru ia Iehova?” Inara kare tikai te au kopu tei patu i te atarau e rave ra i tetai angaanga tiratiratu kore. Ka akapeea ra ratou me ariu atu ki teia akaapaanga? Ka tuatua akakino atu ainei ratou i te aronga e akaapa maira me ka kopae ainei i te tuatua atu kia ratou? Kua pau maru ua mai te au kopu tei akaapaia, i te akakite taka ua mai anga e ko ta ratou i rave i akakeuia tikai te reira e to ratou anoano kia tavini ia Iehova. Kua riro ta ratou pauanga maru ei paruru i to ratou pirianga ki te Atua e i te akaora i to ratou oraanga. Kua akatikatika te uriurianga maru ua i te manamanata e kua akatupu akaou mai i te au.​—Iosu. 22:13-34.

I mua ake ka rave ei i tetai mea kino, kua uriuri meitaki atu tetai mai ngati Iseraela i to ratou manamanata ma te tu pakari ki te au kopu o Reubena raua ko Gada e tetai apa o te kopu o Manase. “Auraka kia rapurapu ua to ngakau i te riri,” e karanga  maira te Tuatua a te Atua, “tei te manava o te neneva ra te riri i te vai marie anga.” (Kohe. 7:9) Ko te mataara Tuatua Tapu no te akono atu i tetai manamanata uaorai koia oki na roto i te tuatua atu anga ki tetai ao mai tangata no runga i te manamanata na roto i te tu maru e te tika. Ka tau ainei tikai ia tatou kia tapapa atu i ta Iehova akameitakianga me ka akamou riri tatou e kare e aravei atu i te tangata ta tatou e manako ra e kua tamamae mai ia tatou?

I tetai tua, ka akapeea ra tatou me ariu atu me aravei mai tetai taeake Kerititiano ia tatou no te mea te manako ra aia e kua akariri tatou iaia, penei i te akaapa tarevake katoa mai ia tatou? “Ko te tuatua maru ra tei akaanga ke i te riri,” i akakite ei te Pipiria. (Mase. 15:1) Kua akamarama maru ua atu ma te taka meitaki, te au kopu o te ngati Iseraela tei akatupu i te manamanata i to ratou turanga, e na roto i teia mataara kua rauka ia ratou i te akatikatika i taua manamanata ra ki to ratou au taeake. Noatu e na tatou e aravei mua atu i to tatou taeake me kore koia tei aere mai i te tuatua kia tatou no runga i tetai manamanata, e mea tau kia ui tatou kia tatou uaorai e, ‘Eaa ra te au tuatua, te tangianga o te reo, e te tu te ka riro ei akatupu i te au?’

Taangaanga i te Arero ma te Tu Pakari

Te marama maira a Iehova e ka anoano tatou i te akakite i to tatou manako. Inara, me kare e rauka ia tatou i te akatikatika i tetai manamanata uaorai, kare e kore ka timataia tatou kia akakite atu i taua mea ra ki tetai ke. Ko te riri kare i akatikatikaia, ka ngoie ua i te arataki atu ki te tuatua akaapaapa. No runga i te taangaanga tau kore anga i te arero, te akakite maira a Maseli 11:11 e: “Te tatipokiia nei ra [te oire] i te vaa o te aronga kino.” Mei te reira katoa rai, te tuatua manako kore ua no runga i tetai taeake Kerititiano, ka takino te reira i te turanga au o tetai putuputuanga mei te oire te tu.

Inara, ko te umuumu anga i te au, kare te aiteanga e kia kopae i te au tuatuaanga katoatoa no runga i to tatou au taeake e te au tuaine. Kua ako te apotetoro ko Paulo i te au taeake irinaki e: “Auraka rava e akatika i te tuatua kino kia topa mai mei roto i to kotou vaa.” Kua kapiti atu aia e: “E tuatua ua ra i te au mea meitaki ta te tangata e anoano ra kia rongo, te mea te ka tauturu tikai ia ratou. . . . Kia takinga meitaki atu i tetai e tetai, ei ngakau aroa ua, e kia akakore atu i te apa a tetai e tetai.” (Ephe. 4:29-32, The New American Bible) Me araveiia mai koe e tetai taeake tei mamae i taau tuatua me kore i toou tu, kare ainei i te mea ngoie atu i te tataraara e te akaau atu me kare rava aia i tuatua ana i tetai mea tau kore no runga ia koe ki tetai ke? Me kiteaia tatou no te taangaanga i te au tuatua akamaroiroi me tuatua no runga i te au taeake Kerititiano, ka ngoie roa atu ia tatou kia akatupu akaou i te au me tupu mai te au manamanata.​—Luka 6:31.

Tavini i te Atua “ma te Manako Okotai”

Ko to tatou tu tangata ara koia oki kia akaatea mai mei te aronga i akariri mai ia tatou, i te akatakake mai anga ia tatou uaorai. Inara kare te reira i te tu pakari. (Mase. 18:1) Ei iti tangata taokotai tei kapiki i te ingoa o Iehova, ei manako ngaueue kore to tatou i te ‘tavini atu iaia ma te manako okotai.’​—Zepha. 3:9.

Auraka rava te tuatua tau kore me kore te tu o etai ke kia akaiti mai i to tatou maroiroi no te akamorianga mou. I nga mea ra ua i mua ake ka mono ei ta Iesu atinga i te au atinga i ko i te iero, e i muri poto ua ake i te akaapa tika ua atu anga a Iesu i te au tata tuatua, kua kite atu aia i tetai vaine takaua putaua tei tuku e “ope rava tona apinga rikiriki” ki roto i te pia apinga o te iero. Kua tapu ainei a Iesu iaia? Kare, kua tuatua akameitaki ra aia no tana turuturu tiratiratu i to Iehova putuputuanga i taua taime ra. (Luka 21:1-4) Kare te au angaanga tika kore a etai ke i akamatara mai iaia mei tana apainga kia turuturu i te akamorianga a Iehova.

Noatu e te manako ra tatou e kua rave tetai taeake me kore tuaine Kerititiano i tetai mea tau kore, e te tika kore katoa, ka akapeea ra tatou me ariu atu? Ka akatika ainei tatou i te reira kia takino i ta tatou tavinianga ngakau katoa kia Iehova? Me ka ngakau toa ainei tatou i te akaau i tetai ua atu manamanata uaorai kia rauka i te paruru i te turanga au akaperepere o to te Atua putuputuanga i teia tuatau?

“Peneiake ko te tika,” e ako maira te au Tuatua Tapu ia tatou, “ko ta kotou ïa e aruaru e, kia noo au ua kotou i roto i te tangata katoa nei.” (Roma 2:18) Kia akakoro tikai tatou i te akapera e kia vai tinamou ua i reira i runga i te arataa o te ora.

[Tataanga Rikiriki i Raro]

[Tutu i te kapi 17]

Kua anoanoia a Euodia raua ko Sunetuke kia umuumu i te au

[Tutu i te kapi 18]

Eaa te au tuatua, te tangianga o te reo, e te tu te ka akatupu i te au?