Au Uianga a te Aronga Tatau

I roto ia Nehemia 8:10, kua akakiteia ki te ngati Iuda kia “kai i te kai matu,” noatu e te akakite ra te Ture i roto ia Levitiku 3:17 e: “Ko te matu, . . . auraka rava kotou e kai.” Ka akapeea ra e rauka ai i te tarotai i teia au tuatua?

I roto i te reo mua, ko te au tuatua tei uriia e ko “te kai matu” i roto ia Nehemia 8:10, e tuke rai te reira ki te “matu” i roto ia Levitiku 3:17. Ko te kupu Epera cheʹlev, tei uriia ei “matu” i roto ia Levitiku 3:17, te tuatua ra te reira no runga i te matu o te manu me kore o te tangata. (Levi. 3:3; Aka. 3:22) Te akaari maira te katoaanga o te irava 17 e kare te ngati Iseraela e kai i te au kapikapi matu i runga i te ngakau e te tongaua o te au manu no te atinga, e pera katoa te matu i runga i te io kaokao no te mea “na Iehova anake te tongaua.” (Levi. 3:14-16) No reira ko te matu i roto i te kopapa o te manu te ka orongaia kia Iehova auraka te reira kia kaingaia.

I tetai tua, ko te kupu tei uriia ei “kai matu” i roto ia Nehemia 8:10 koia oki e mash·man·nimʹ, e ko teia ua te taime i taikuia mai ei teia kupu i roto i te au Tuatua Tapu Epera. No roto mai te reira i te verepa sha·menʹ, te aiteanga “kia matu, e kia matu atu rai.” Ko te manako tumu no te putunga tuatua tei piri atu ki teia verepa, i te akaraanga e turanga puapinga e te oraanga meitaki te reira. (Akaaite ia Isaia 25:6.) Tetai o te au tuatua matau roaia atu no roto mai i teia verepa koia oki ko te nomena sheʹmen, e uri putuputu uaia ana ei “inu,” ko tei kapiti mai i te tuatua “inu olive.” (Deu. 8:8; Levi. 24:2) Mei tei taangaangaia i roto ia Nehemia 8:10, i te akaraanga te tuatua ra te mash·man·nimʹ  no runga i te kai e maata te inu i tunuia ai ki roto e penei e kua kapiti katoaia mai te kiko e te matu i runga, eiaa ra te kapikapi matu iro koreia o te manu.

Noatu e kua tureia te ngati Iseraela auraka e kai i te au kapikapi matu o te manu, ka rauka ra ia ratou kia kai i te au manga memeitaki e te reka. Tetai au mea mei te keke tei maaniia ki te titona, e tunuia ana, eiaa ki roto i te matu manu, mari ra ki roto i te inu ua rakau, te maataanga i te taime ki roto i te inu orive. (Levi. 2:7) Te akamarama maira i reira te Insight on the Scriptures e ko “te kai matu” i konei, te “tuatua ra no runga i te au tuanga memeitaki, kare i te au mea ikoke me kore i te au mea maroka, mari ra i te au mea roro te kaianga, kapiti mai i te au mea reka tei tunuia ki roto i te inu ua rakau.”

Kia akamanako ra te au Kerititiano e ko te araianga e, eiaa kia kai i te matu, e tuanga te reira no te Ture. Kare ratou i raro i te Ture, tei kapiti mai i to te reira au umuumuanga tei piri atu ki te au atinga manu.​—Roma 3:20; 7:4, 6; 10:4; Kolo. 2:16, 17.