Eaa ra ka Akono Tamou ei i Toou Tu Apakore?

‘E akava mai koe iaku nei, e Iehova e, kia tau ki toku nei apakore i roto iaku nei.’​—SALA. 7:8, NW.

1, 2. Eaa ra tetai au turanga matauia te oronga maira i te au akaaoanga ki te tu apakore o tetai Kerititiano?

E AKAMANAKO ana e toru akatutuanga: Ko tetai tamaiti e tatiaeaeia ra e tona au oa i te apii. Te tauta ra ratou i te akariri iaia, penei kia tao atu me kore kia uri mai aia e kia tata atu kia ratou. Ka tanga atu ainei aia, me ka tapu ainei aia iaia uaorai e ka aere ke atu? Ko tetai tangata akaipoipo koia anake ua i te kainga te rave ra i tetai kimikimianga i runga i te Internet. Kua ata mai tetai ngai i runga i te komopiuta, te akaariari ra i tetai au tutu viivii tau kore i runga i te reira ngai o te Web. Ka timataia ainei aia kia akara ki roto i te reira ngai, me ka akapapu ainei aia e kia kopae atu aia i te reira? Te pukapuka ra tetai vaine Kerititiano ki tetai au tuaine e kua taui te tu o te tuatuaanga ki te urutoe anga kino i tetai tuaine i roto i te putuputuanga. Ka piri atu ainei aia ki te reira, me kore ka tauta ainei aia kia taui i te manako e tuatuaia ra?

² Noatu e e tuke rai taua au akatutuanga ki tetai e tetai, te aiteite ra rai to ratou turanga. Te o maira te tautaanga kia akono tamou i te tu apakore ei Kerititiano. Te akamanako ra ainei koe i toou uaorai tu apakore ia koe e aro atura i toou au manamanata, toou au anoano, e toou au akakoroanga i roto i te oraanga? I te au ra ravarai, te manako ra te tangata no runga i to ratou tu akaraanga, to ratou oraanga kopapa, te au akaaoanga no te kimianga puapinga no te oraanga, te au tuatau meitaki e te au tuatau kino o te pirianga oa, e pera katoa to ratou pirianga i te tuatau akainangaro. Penei e ka maata to tatou manako ki runga i teia au manamanata. Inara, eaa te mea puapinga rava atu kia Iehova iaia e unuunumou maira i to tatou ngakau? (Sala. 139:23, 24) Ko to tatou tu apakore.

3. Eaa te ikianga meitaki tikai ta Iehova i oronga mai kia tatou, e eaa ta tatou ka akamanako i roto i teia atikara?

³ Ko Iehova, ko Tei Oronga mai i “te au apinga aroa meitaki ravarai e te au apinga tiama ravarai,” kua akameitaki mai aia ia tatou tataki tai ki te au apinga aroa tukeke. (Iako. 1:17, NW) Kia akameitakiia aia, no te au apinga aroa tei rauka ia tatou mei te kopapa, te manako, te oraanga kopapa meitaki, e te au tareni tukeke. (1 Kori. 4:7) Inara, kare roa a Iehova e maro mai ia tatou kia akaari i te tu apakore. Kua tuku aia e na tatou uaorai e iki me ka inangaro tatou i te akatupu i teia tu. (Deu. 30:19) No reira, ka inangaroia tatou kia makitoro marie e eaa tikai te tu apakore. Ka akamanako katoa tatou e toru au tumu i puapinga maata tikai ei teia tu.

Eaa te Tu Apakore?

4. Eaa te o maira ki te tu apakore, e eaa ta tatou ka kite mai mei ta Iehova ture no runga i te au atinga manu?

⁴ E manganui ua atu te tangata kare i papu roa e eaa tikai te tu apakore. Ei akaraanga, me akapaapaa te aronga poritiki i to ratou tu apakore, te maataanga o te taime te manako ra ratou e ko te tu tika te aiteanga o te reira. E tu puapinga te reira, inara e manga tuanga ua rai te reira no te tu apakore. Mei tei taangaangaia i roto i te Pipiria, te o maira ki te tu apakore te tu ki katoa o te pae akono tau, e te tu kino kore. Te au tuatua Epera e piri atura ki te tu “apakore” no roto mai te reira i tetai tuatua tumu te aiteanga e kino kore, e katoaanga, me kore e tika tikai. Ko tetai o teia au tuatua te taangaangaia ra no runga i te au atinga te ka orongaia kia Iehova. E mareka mai ei aia i tetai manu no te akaatinga, mei te mea ua e e kino kore te reira me kore me ko te katoaanga tikai o te manu. (E tatau ia Levitiku 22:19, 20.) E mea mareka kore tikai na Iehova te aronga tei kopae akakoro tikai i tana aratakianga na te oronga anga i te au manu pirikoki, i te au mea maki, me kore i te au manu matapo ei atinga.​—Mala. 1:6-8.

5, 6. (a) Eaa te au akaraanga te akaari maira e e akaperepere ua ana tatou i tetai mea katoa ua me kore i tetai mea ki katoa? (e) No runga i te au tangata apa ua, ko te aiteanga ainei o te tu apakore e ko te tu tiama takiri? E akamarama mai.

⁵ Kare te manako no te kimianga e te akaperepere anga i tetai mea katoa ua me kore i tetai mea ki katoa, i te mea matau koreia. Ei akatauanga, e akamanako ana i tetai tangata e akaputu puka ana tei kite i tetai puka oko maata tikai i muri ake i tetai tuatau roa i te kimi anga, e oti kua kitea mai iaia e e maata te au kapi  puapinga tei ngaro. No tona taitaia, penei ka akaoki aia i te puka ki runga i te ngai vairanga. Me kore, e akamanako ana i tetai vaine e aaere ra na taatai, e koi ra i tetai au anga poreo tei pakokoia mai e te ngaru ki uta. No tona umere i te tukeke e te manea o teia au mea i angaia, tetai au taime ka piko aia ki raro i te makitoro marie i tetai. Ko teea ra tana ka apai? Ko te au mea kare i ngaangaa e te meitaki ua ra. Mei te reira katoa rai te Atua, te kimi ra aia i te tangata tei ia ratou teia tu ngakau katoa, me kore tei tika rava te ngakau iaia.​—2 Para. 16:9.

⁶ Inara, penei ka manako koe e me te umuumuia maira te tu tiama takiri no te tu apakore. No te mea kua takinoia tatou e te ara e e te tu apa ua, penei ka manako tatou ia tatou uaorai e mei te puka rai kua ngaro tetai au kapi me kore mei tetai anga poreo rai kua ngaangaa. E manako akapera ana rai koe i tetai taime? Kia papu, e kare a Iehova e tapapa mai ana ia tatou kia tiama takiri i roto i te tu e kare takiri o tatou apa. Kare roa aia e tapapa mai i tei kore i rauka ia tatou. * (Sala. 103:14; Iako. 3:2, NW) Inara, te tapapa maira aia ia tatou kia akono tamou i te tu apakore. E tuke ainei i reira tetai i rotopu i te tu tiama takiri e te tu apakore? Ae. Ei akatutuanga: Te inangaro ra tetai tamaiti mapu i tetai tamaine mapu tana e inangaro ra i te akaipoipo. Kare i te mea tau kia tapapa atu aia i te tu tiama takiri mei tana vaine. Kareka ra, ka tau aia kia tapapa atu i tana vaine kia inangaro mai iaia ma te ngakau katoa, koia oki, kia inangaro mai iaia anake ua. Na roto i taua tu rai, e “Atua vareae” a Iehova. (Exo. 20:5) Te tapapa maira aia ia tatou, kare e kia tiama takiri, mari ra kia inangaro iaia ma te ngakau katoa, i te oronga anga i te akamorianga kiaia anake ua.

7, 8. (a) Eaa te akaraanga ta Iesu i akanoo no runga i te tu apakore? (e) Eaa tikai te aiteanga Tuatua Tapu o te tu apakore?

⁷ Penei ka maara ia tatou te pauanga a Iesu i te uiia anga kiaia e eaa te mea puapinga roa atu i roto i te au ture katoatoa. (E tatau ia Mareko 12:28-30.) Kare a Iesu i oronga ua i te pauanga; kua akono katoa ra aia i te reira i roto i tona oraanga. Kua akanoo aia i te akaraanga maata rava atu o te anoano no Iehova ma te manako katoa, te ngakau katoa, te vaerua katoa, e te ririnui katoa. Kua akakite aia e e akaariia ana te tu apakore, kare e na roto i te tuatua ua anga, mari ra na roto i te au angaanga tei tupu mai mei roto i te au akakoroanga tiama. Te umuumu maira ta tatou akono tamou anga i te tu apakore kia aru tatou i te takainga vaevae o Iesu.​—1 Pete. 2:21.

⁸ Ko teia i reira te aiteanga tikai no to tatou tu apakore i roto i te Tuatua Tapu: koia oki, kia akamori ma te ngakau katoa i te Peretana okotai i runga i te rangi, ko te Atua ko Iehova, tona anoano e tona akakoroanga tei akakiteia. Ko te aiteanga o te akono tamou anga i te tu apakore, koia oki, i te au ra ravarai o to tatou oraanga ko te mea maata roa atu ta tatou ka umuumu koia oki kia akarekareka i te Atua ko Iehova. Ka riro oki taua au mea ra i te akaari mai e ko te au mea puapinga roa atu ki te Atua, ko te au mea puapinga katoa rai ia kia tatou. Ka akamanako ana tatou e toru au tumu i puapinga rava ai teia.

9. Akapeea ra to tatou uaorai tu apakore i te piri atu anga ki te maroanga o te tutaraanga ngateitei i te ao katoa e pini ua ake?

⁹ Kare to Iehova tikaanga ngateitei kia tutara i akanooia ki runga i to tatou tu apakore. Ko tana tutaraanga e mea tika, e mea mutu kore, e no te ao katoa e pini ua ake. Ka tika ua rai te reira, noatu e eaa ta tetai o te au mea ora ka tuatua me kore ka rave. Inara, kua akakino pakariia to te Atua tikaanga kia tutara i runga i te rangi e i runga nei i te enua. Ka anoanoia i reira Tana tutaraanga kia akatikaia​—kia akapapuia e e mea tano, e mea tau, e te aroa ua—​i mua i te au mea ora kite katoatoa. Ei Au Kite no Iehova, e reka ua atu ana tatou i te uriuri manako no runga i to te Atua tikaanga kia tutara i te ao katoa e pini ua ake, ki tetai ua atu tangata te ka inangaro i te akarongo mai. Ka akapeea ra tatou i te iki anga e te aru rotai anga i ta tatou i kite mai no runga i tona tikaanga kia tutara? Akapeea tatou i te akaari anga e te iki nei tatou ia Iehova ei Tutara Ngateitei no tatou? Na te akono tamou anga i te tu apakore.

10. Eaa ra te akaapaanga a Satani no runga i te tu apakore o te au tangata ravarai, e ka akapeea koe me ariu atu ki te reira?

¹⁰ E akamanako ana e i akapeea toou tu apakore i te o mai anga. Kua akaapa pikikaa a Satani e kare rava e tangata e turuturu i te tutaraanga ngateitei a te Atua, e kare rava e tangata e tavini ia Iehova ma te inangaro tika tikai. I mua tikai i te manotini ua atu o te au angera, kua karanga atu te Tiaporo kia Iehova e:  “Ei kiri no te kiri, e riro oki ta te tangata katoa ra ei oko i tona ora.” (Iobu 2:4) Ka akara ana, e kare ko te tangata tuatua tika ua ko Iobu ta Satani e akaapa pikikaa ua ra, mari ra ko te au tangata ravarai. Kua kapiki katoa te Pipiria ia Satani e ko “te akaapa i to tatou au taeake.” (Apo. 12:10) Kua akakino aia ia Iehova i te karanga anga e ko te au Kerititiano​—kapiti mai ia koe—​kare e vai akarongo mou ua. Kua karanga a Satani e ka pikikaa koe ia Iehova kia ora koe. Eaa toou manako no runga i teia au akaapaanga tarevake ia koe? Kare ainei koe e inangaro ana i tetai tikaanga kia akapapu e e pikikaa a Satani? Ka rauka ia koe i te akapera na roto i te akono tamou anga i toou tu apakore.

11, 12. (a) Eaa te au akaraanga e akatutu maira i te pirianga o ta tatou au ikianga no te au mea o te au ra ravarai, ki te maroanga o to tatou tu apakore uaorai? (e) No teaa ra te tu apakore i riro ei ei tikaanga ngateitei?

¹¹ Te maroanga no toou tu apakore ka akariro te reira i toou tu e taau au ikianga i te au ra ravarai ei mea puapinga tikai. E akamanako akaou ana i te akatutuanga e toru tei taikuia i muao ana. Ka akapeea ra ratou i te akono tamou anga i to ratou tu apakore? Kua timata maataia te tamaiti tei tatiaeaeia e tona au oa i te apii kia tanga atu ki runga ia ratou, inara kua maara iaia te akoanga e: “E taku au akaperepere e, auraka e akaoko, tuku ua atura i te riri; kua tataia oki e, ‘Te tuatua maira te Atu, ei iaku te akaoko, e naku e tutaki atu.’” (Roma 12:19) Kua aere ke atura aia. Ka rauka ua i te tangata akaipoipo e taangaanga ra i te Internet i te akara i te au tutu ka akakeu i te inangaro ainga, inara kua maara iaia te kaveinga i roto i te au tuatua a Iobu e: “Kua papau au i te koreromotu i oku nei mata: eaa ra au ka akara atu ei ki te paretenia?” (Iobu 31:1) Mei te reira katoa rai te tangata kare i akara mou atu i te au tutu ka akakeu i te inangaro ainga, i te kopae anga i taua au tutu ra mei te mea rai e e poitini. E ko te vaine e pukapuka ra ki te au tuaine, e rongo atura aia i tetai urutoeanga kino, kare i piri atu ki roto no te mea kua maara iaia te aratakianga e: “E akarekareka tatou katoa nei i tetai ke, kia meitaki aia, kia maroiroi.” (Roma 15:2) Ko te urutoeanga tana ka ripiti aere atu, kare e riro mai ei mea akamaroiroi anga. E ka apai mai te reira i te akakino ki runga i tona tuaine Kerititiano; e kare katoa tona Metua i te rangi e mareka mai i te reira. No reira kua iki aia kia kore e piri atu ki roto i te reira urutoeanga e kua taui i te manako e tuatuaia ra.

¹² I roto i taua au akatutuanga tataki tai ra, kua rave te Kerititiano i te ikianga mei te mea rai e te  karanga ra aia e: ‘Ko Iehova toku Tutara. Ka tauta au i te akamareka iaia i roto i teia au mea nei.’ No runga i taau uaorai au ikianga, te tauta ra ainei koe i te akamareka ia Iehova? Me rave koe i te reira te akono tikai ra koe i te au tuatua akapumaana i te ngakau tei rekotiia i roto ia Maseli 27:11 e: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.” E tikaanga ngateitei tikai no tatou kia akarekareka i te ngakau o te Atua! Kare ainei e paunaia te taime no ta tatou au tautaanga ravarai i te akono tamou anga i to tatou tu apakore?

13. Akapeea te au tuatua a Iobu raua ko Davida i te akaari mai anga e kua akatumu te Atua i tana akavaanga ia tatou ki runga i te tu apakore?

¹³ Te marama nei tatou e ka tauturu te tu apakore ia tatou kia ngaueue kore no ta Iehova tutaraanga ngateitei. Kua akatumu te Atua i tana akavaanga ia tatou ki runga i te reira. Kua marama meitaki a Iobu i teia tuatua mou. (E tatau ia Iobu 31:6. *) Kua kite a Iobu e te akava nei te Atua i te au tangata ravarai ki te “arite tika tikai,” na te taangaanga anga i Tona turanga tiama takiri no te tu tika, i te akapapu anga e te akono nei tatou i to tatou tu apakore. Kua pera katoa rai a Davida i te tuatua anga e: “Na Iehova uaorai e tuku i te utunga ki runga i te tangata. E akava mai koe iaku nei, E Iehova e, kia tau ki taku nei tuatua tika E kia tau ki toku nei apakore i roto iaku nei. . . . E ko te Atua tuatua tika ra te timata maira i te ngakau e te oonuanga o te manako.” (Sala. 7:8, 9, NW) Kua kite tatou e ka rauka i te Atua i te akara ki roto i te oonu anga tikai o te ngakau tangata, i roto i te “ngakau e te oonuanga o te manako” akatutu. Inara, ka anoanoia tatou kia akamanako, e eaa tana e kimi maira. Mei ta Davida rai e tuatua ra e, te akava nei a Iehova ia tatou kia tau ki to tatou tu apakore.

14. No teaa ra tatou ka kore rava ai e manako e te arai nei to tatou tu apa ua e te tu ara ia tatou mei te akono tamou anga i to tatou tu apakore?

¹⁴ E akamanako ua ana i te Atua ko Iehova, e kimi ra i te au ngakau o te au tangata e pirioni ua atu i teia tuatau. (1 Para. 28:9) Mei teaa ra te maata e kitea mai ana iaia tetai tangata e akono tamou ra i te tu apakore ei Kerititiano? Kare e maata rava ana! Inara, auraka rava tatou kia manako e te arai ra to tatou tu apa ua ia tatou mei te akono marie anga i te tu apakore. I tetai tua ra, e tumuanga tau kia irinaki tatou e ka kite mai a Iehova ia tatou e akono marie ra i te tu apakore, mei ia Davida rai raua ko Iobu, noatu to tatou tu apa ua. E akamaara e, kare te tu tiama takiri i te akapapuanga e ka akono tamou rai tatou i te tu apakore. E toru rai aronga tiama takiri tei aaere ana i runga nei i te enua, e rua, ko Adamu raua ko Eva, kare i akono tamou i te tu apakore. Noatu ra, e mirioni ua atu au tangata apa ua tei rauka i te rave i te reira. E ka rauka katoa ia koe.

15. I akapeea a Davida i te akaari anga e ka anoanoia te tu apakore no to tatou manakonakoanga no te tuatau ki mua?

¹⁵ No te mea oki, e te akatumu ra a Iehova i tana akavaanga ki runga i to tatou tu apakore, no reira ka anoanoia te reira no to tatou manakonakoanga no te tuatau ki mua. Kua kite a Davida e e mea tika teia. (E tatau ia Salamo 41:12. *) Kua akaperepere aia i te manakonakoanga no te rauka anga te akaperepereanga a te Atua e tuatau ua atu. Mei te au Kerititiano mou rai i teia tuatau, kua manakonako rai a Davida kia ora e tuatau ua atu e te akapiri vaitata ua atu anga ki te Atua ko Iehova na te tavini anga iaia. Kua kite a Davida e ka anoanoia aia kia akono marie i te tu apakore, me ka inangaro aia kia kite i te akatupuanga o taua manakonakoanga ra. Pera katoa rai, te turuturu nei a Iehova ia tatou, te apii nei ia tatou, te arataki nei ia tatou, e te akameitaki nei ia tatou, ia tatou e akono tamou nei i to tatou tu apakore.

16, 17. (a) Eaa koe i iki ei kia mou piri ua atu rai i toou tu apakore? (e) Eaa te au uianga ka uriuriia i roto i te atikara ka aru mai?

¹⁶ Ka anoanoia te manakonakoanga no to tatou turanga mataora i teianei. Ka oronga mai te reira i te rekareka e anoanoia ra e tatou i te na roto anga i te au tuatau ngata. Ka rauka katoa i te manakonakoanga  i te paruru i to tatou manako. E akamaara e te akaaite ra te Pipiria i te manakonakoanga ki te pare. (1 Tesa. 5:8) Mei tetai pare rai e paruru ra i te upoko o tetai vaeau i roto i te tamaki, te paruru ra rai te manakonakoanga i to tatou manako mei te au manako papu kore e te taitaia ta Satani e akatotoa nei i roto i teia ao taito e mate atura. E puapinga kore tikai te oraanga me kare o tatou manakonakoanga. Ka anoanoia tatou kia makitoro marie tika tikai ia tatou uaorai, na te akamanako meitaki anga i te turanga o to tatou uaorai tu apakore e te manakonakoanga tei piri atu ki te reira. Auraka rava e ngaropoina e na te akono tamou anga i te tu apakore, te turuturu pakari ra koe i ta Iehova tutaraanga ngateitei e te paruru ra i toou manakonakoanga akaperepere no te tuatau ki mua. Kia mou piri ua atu rai koe i toou tu apakore!

¹⁷ No te mea e e puapinga tikai te tu apakore, ka anoanoia tatou kia akamanako i tetai atu au uianga ke mai. Akapeea e rauka ai ia tatou te tu apakore? Akapeea tatou i te akono marie anga i te reira? Eaa te ka tau kia raveia me kare tetai tangata e akono i te reira tu no tetai tuatau? Ka pauia teia au uianga i roto i te atikara ka aru mai.

[Au Tataanga Rikiriki i Raro]

Akapeea Koe me Pau?

• Eaa ra te tu apakore?

• Akapeea ra te tu apakore i te o mai anga ki roto i te maroanga no te tutaraanga ngateitei i te ao katoa e pini ua ake?

• Akapeea te tu apakore i te oronga mai anga i te tumuanga no to tatou manakonakoanga?

[Au Uianga Apii]

[Au Tutu i te kapi 5]

E manganui ua atu te au akaaoanga ki to tatou tu apakore i roto te oraanga i te au ra ravarai