Ka Mou Piri Tikai Ainei Koe i Toou Tu Apakore?

“E mate ua atu au, kare rava au e pa i toku nei apakore!”​—IOBU 27:5, NW.

1, 2. Ka anoanoia tatou kia piri atu ki roto i teea angaanga akatu anga, e eaa te au uianga ta tatou ka akamanako?

E AKAMANAKO ua ana e te akara ra koe i te au parani o tetai are. Kua umere ua koe i te tu tau o te parani. Mataora ua koe i te akamanako anga i te au mataara ka puapingaia koe e toou ngutuare tangata mei teia are. Inara, kare ainei koe e akatika e ka puapinga kore ua taua au parani ra e taau i manako no te reira, mari ua ra kia akatu tikai koe i te are, kia noo ki roto, e kia akono i te reira?

² Mei te reira rai te tu apakore, penei ka manako tatou e, e tu puapinga te reira kia tatou e te aronga ta tatou e akaperepere maata ra. Inara kare tatou e puapingaia i te manako ariki ua no runga i te tu apakore mari ua kia tauta tatou i te akatupu i taua tu ra e kia akono marie i to tatou tu apakore Kerititiano. I roto te ao o teia tuatau, e maata te ka pou i roto i te angaanga patu are. (Luka 14:28, 29) Mei te reira katoa te akatupu anga i te tu apakore, e maata te taime e te tautaanga te ka anoanoia, inara ka paunaia rai te taime. No reira ka uriuri ana tatou e toru au uianga: Akapeea ra tatou e riro ei, ei au tangata apakore? Akapeea tatou i te akono marie anga i to tatou tu apakore ei Kerititiano? Eaa te mea tau kia rave, me kare tetai i akono tamou ana i tona tu apakore no tetai tuatau?

Akapeea Tatou e Riro ei ei Au Tangata Apakore?

3, 4. (a) Na roto i teea au mataara e tauturu mai ana a Iehova ia tatou kia akatupu i te tu apakore? (e) Ka akapeea ra tatou i te akatupu anga i te tu apakore mei tei akaariia mai e Iesu?

³ Kua kite tatou mei te atikara i mua ake e kua akangateitei a Iehova ia tatou na te akatika anga ia tatou kia iki e me ka inangaro tatou kia riro ei au tangata apakore. Te mea mataora ra, kare aia e akaruke ua mai ia tatou ko tatou anake ua. Te apii maira aia ia tatou kia tauta i te akatupu i teia tu akaperepereia, e te oronga aroa ua maira aia i tona vaerua tapu, ei tauturu ia tatou kia taangaanga i tana au apiianga. (Luka 11:13) Te oronga katoa maira aia i te paruruanga pae vaerua no te aronga e tauta ra i te aaere ma te apakore ra.​—Mase. 2:7.

⁴ I akapeea ra a Iehova i te apii anga ia tatou kia riro ei aronga akono tamou i te tu apakore? Tei maata atu, na te tono mai anga i tana Tamaiti, ia Iesu, ki te enua nei. Kua noo a Iesu i tetai oraanga kauraro tiama takiri. ‘Kua akono aia e tae ua atu ki te mate.’ (Phili. 2:8) I te au mea ravarai tana i rave, kua kauraro a Iesu ki tona Metua i te rangi, e noatu katoa te tu ngata. “Kia tupu ra toou anoano, auraka toku,” i tuatua ai aia kia Iehova. (Luka 22:42) E mea tau no tatou tataki tai kia ui ki iaia uaorai e, ‘Mei te  reira ainei rai toku tu kauraro?’ Na te aruaru anga i tetai arataa kauraro ma te akakoroanga tau tikai, ka riro tatou ei aronga akono tamou i te tu apakore. Ka akamanako ana i tetai au tuanga o te oraanga tei riro te kauraroanga ei mea puapinga tikai.

5, 6. (a) I akapeea a Davida i te akapakari mai anga i te puapinga o te akono tamou anga i te tu apakore noatu kare e tangata e kite mai ana ia tatou? (e) Eaa ra te au akaaoanga ta te au Kerititiano i teia tuatau e aro atura no runga i te tu apakore me noo ko ratou anake ua?

⁵ Ka anoanoia tatou kia kauraro kia Iehova noatu e ko tatou anake ua. Kua kite rai te tata taramo ko Davida i te puapinga o te tu apakore i te au atianga penei e te noo ra aia koia anake ua. (E tatau ia Salamo 101:2.) Ei ariki, e noo putuputu ua ana aia i rotopu i te tangata. Kare e ekoko e, e maata te taime e anere ua atu, me kore e tauatini ua atu au tangata e uipa mai ana ki mua iaia. (Akaaite ia Salamo 26:12.) E mea puapinga tikai te akono tamou anga i te tu apakore i taua au atianga ra, no te mea ka anoanoia te ariki kia akaari i tetai akaraanga meitaki no tona iti tangata. (Deu. 17:18, 19) Inara, kua kite a Davida e penei i te tuatau koia anake ua​—‘i roto i tona uaorai ngutuare’—​ka anoano katoaia rai aia kia aaere ma te tu apakore. Akapeea ra tatou, kua mou mai aina ia tatou teia apiianga?

⁶ I roto ia Salamo 101:3, ka kite tatou i ta Davida au tuatua e na ko ra e: “Kare au e tuku i tetai mea kino ki mua i toku mata.” I teia tuatau e manganui te au atianga kia tuku ki mua ia tatou, tetai au mea kino, i te tuatau tikai e noo ra tatou ko tatou anake ua. Kua riro te tu ngoie ua i te akara ki runga i te Internet, i te akatuera mai i te au akaaoanga no runga i teia. E mea ngoie ua kia akanauruia kia akara i te au mea tau kore, e te au mea katoa te ka akakeu i te inangaro ainga tau kore. Inara, e tu kauraro ainei te reira ki te Atua, tei akauru ia Davida kia tata i taua au tuatua ra? Ko te au mea e akakeu ana i te inangaro ainga tau kore e mea kino tikai te reira, no te mea ka akapakari roa atu te reira i te au anoano tarevake e te anoano tuauau, ka takino i te akava ngakau, ka akaparuparu i te oraanga akaipoipo, e ka taakama i te katoatoa.​—Mase. 4:23; 2 Kori. 7:1; 1 Tesa. 4:3-5.

7. Eaa te kaveinga te ka tauturu ia tatou kia akono tamou i te tu apakore me ko tatou anake ua e noo ra?

⁷ E tika e kare roa o Iehova tavini e noo tika ana e koia anake ua. Te akara aroa ua maira to tatou Metua ia tatou. (E tatau ia Salamo 11:4.) Kare e kore e te rekareka ua ra a Iehova me kite mai ia koe e patoi ra i te timataanga! Na te rave anga i te reira, te akarongo ra koe i te akamatakiteanga e taka meitaki ua ra i roto i ta Iesu au tuatua te ka kiteaia i roto ia Mataio 5:28. No reira, kia ngaueue kore, eiaa e akara i te au tutu te ka timata ia koe kia rave i te tarevake. Auraka e akaoko i toou tu apakore akaperepereia no te angaanga akama tikai o te akarakara anga me kore o te tatau anga i te au mea ka akakeu i te inangaro ainga tau kore!

8, 9. (a) Eaa te au akaaoanga ta Daniela e tona au oa i aro atu no to ratou tu apakore? (e) Akapeea te au Kerititiano mapu i teia tuatau i te akarekareka anga ia Iehova e to ratou au taeake Kerititiano?

⁸ Na te kauraro anga kia Iehova, ka riro katoa tatou ei aronga akono tamou i te tu apakore ia tatou i rotopu i te aronga irinaki kore. E akamanako ana ia Daniela e tona au oa toko toru. Ia ratou e mapu ra kua apainaia ratou ki Babulonia ei au tuikaa. Ia ratou i reira, kua koropiniia ratou e te aronga irinaki kore e manga ua rai ta ratou i kite me kore kare takiri  a ratou apinga i kite no runga ia Iehova, e kua rokoia teia au tamariki Epera toko a e te taomianga kia kai i te kai tei araiia e te Ture a te Atua. Ka rauka ua i taua au tamariki ra i te manako e te meitaki ua ra te reira. Ina oki e, kare to ratou au metua, te aronga pakari, e te kau taunga e kite mai e eaa ta ratou e rave ra. Koai oki te ka kite? Ko Iehova oki. No reira kua rave ratou i tetai ikianga ngaueue kore e kua kauraro kiaia noatu te taomianga e te kino ka tupu.​—Dani. 1:3-9.

⁹ Takapini i teianei ao, te aru nei rai te Au Kite mapu o Iehova i taua turanga ngaueue kore ra, i te akono anga i to te Atua au turanga no te au Kerititiano e kare i tuku ua atu ki te taomianga kino a to ratou au oa. Me patoi kotou e te au mapu kia kore e o atu ki roto i te kai apinga akakona, te ta ua, te tuatua viivii, te tu tau kore, e tetai atu au angaanga tarevake, te kauraro ra i reira koe kia Iehova. Me akapera koe, te akono tamou ra koe i toou tu apakore. Ka puapingaia koe, e ka akarekareka koe ia Iehova e toou au taeake Kerititiano!​—Sala. 110:3.

10. (a) Eaa ra te au manako tarevake no runga i te moeaana tei taki atu i tetai au mapu kia akaoko i to ratou tu apakore? (e) Akapeea ra te tu apakore i te akakeu anga i to tatou tu no runga i te kino o te moeaana?

¹⁰ Ka anoano katoaia tatou kia kauraro, me piri atu tatou ki te au vaine me kore ki te au tane. Kua kite tatou e te ture maira te Tuatua a te Atua i te moeaana. Inara, e mea mama ua i te tuku ua atu i to tatou tu kauraro kia topa ki roto i te turanga e akatika ua ra i te tu tau kore. Ei akatauanga, kua piri ana tetai au mapu ki te rave anga i te ainga ki te vaa me kore i te ainga ki te ara repo me kore te mirimiri i te mero ainga, i te manako anga e kare e kino roa ana teia au peu no te mea te manako ra ratou e kare tikai ratou e “rave ra i te ainga.” Kua akangaropoina ra taua au mapu ra​—me kore penei ka iki ratou kia patoi—​e ko te kupu a te Pipiria no te moeaana te o maira taua au peu ra, te tu tarevake te ka riro ei tumu no te akaateaia anga tetai mei roto i te putuputuanga. * Inara, ko te mea kino roa atu, kua kopae ratou i te anoano no te tu apakore. I te mea e te tauta nei tatou i te akono tamou i to tatou tu apakore, kare tatou e kimi i tetai kotoeanga. Auraka tatou kia manako e kare tatou e akautungaia me kua vaitata roa tatou i te rave i te ara. Kare tatou e akamanako ua no runga i te akoanga ta te putuputuanga ka oronga mai no tetai angaanga tarevake tei raveia. Mari ra, ka akamanako tatou no runga i te rave anga i te mea ka akamareka ia Iehova, i te kopae anga i te mea ka akamamae i tona ngakau. I to te akamanako ua anga e mei teaa ra te vaitata ka rauka ia tatou ki te rave anga i te ara, e akamamao takiri mai mei te reira e, e “rere ke mei te moeaana.” (1 Kori. 6:18, NW) Te akaari ra tatou i reira e, e iti tangata apakore tikai tatou.

Akapeea Tatou i te Akono Marie Anga i to Tatou Tu Apakore?

11. Eaa ra i puapinga ai te au angaanga kauraro ravarai? E akatutu mai.

¹¹ Ka tauta tatou i te akatupu i te tu apakore na roto i te kauraro anga, no reira ka akono marie tatou i te tu apakore na te aru ua anga i tetai arataa kauraro. Penei ka akaraanga puapinga kore ua te au angaanga kauraro​—e mea meangiti ua. Kareka ra, na taua au angaanga kauraro ra e akanoo i tetai rekoti no te tu apakore i te tuatau ka aereia. Kia akatutu atu: Penei ka akaraanga puapinga kore ua tetai piriki okotai, inara me e maata ta tatou ka akanoo meitaki ki te ngai okotai, ka rauka ia tatou i te patu i tetai are meitaki tikai. No reira na te kapitipiti ua atu anga rai ki ta tatou au angaanga kauraro, te akono  marie ra i reira tatou i to tatou tu apakore.​—Luka 16:10.

12. I akapeea a Davida i te akanoo anga i tetai akaraanga o te akono marie anga i te tu apakore i te aro atu anga i te takingakino e te tu tika kore?

¹² E kitea papuia ana tikai to tatou tu apakore me akakoromaki tatou i roto i te au turanga ngata, te takinga kinoanga me kore i te turanga tika kore. Ka akamanako ana i te akaraanga o Davida i roto i te Pipiria. Ei tangata mapu ua, kua akakoromaki aia i te takinokinoanga a tetai ariki, tei ikiia ei mata no ta Iehova akatereanga. Inara, kua ngere te Ariki ko Saula i te akaperepereanga a Iehova e kua kiia aia e te vareae maata ia Davida, ta te Atua i ariki. Inara, kua vai rai ko Saula te akatere no tetai tuatau, e kua taangaanga aia i te nuku vaeau o Iseraela ei arumaki aere e ei tamatakutaku ia Davida. Kua akatika ua a Iehova i teia tu tika kore kia tupu ua atu rai no tetai au mataiti. Kua akamou riri ainei a Davida i te Atua? Kua manako ainei aia e kare e puapinga i te akakoromaki? Kare. Kua akono marie rai aia i te akangateiteianga maata no to Saula taoonga ei tangata akatainuia e te Atua, e kare aia i ta ia Saula i te rauka anga tetai atianga nona kia akapera.​—1 Samu. 24:2-7.

13. Ka akapeea ra tatou i te akono marie anga i to tatou tu apakore me tamamaeia mai tatou me kore me akaririia mai?

¹³ E akakeuanga ririnui tikai ta te akaraanga a Davida i akanoo no tatou i teia tuatau! E tuanga tatou no tetai putuputuanga i te ao katoa nei tei ki i te au tangata apa ua, penei ka takinga kinoia mai tatou e tetai ua atu ia ratou me kore kare tetai e vai akarongo mou ua. E tika oki e, e akameitakianga tikai no tatou kia noo i roto i te tuatau kare rava to Iehova au tangata e takinoia ana ei iti tangata katoa. (Isa. 54:17) Noatu rai, ka akapeea ra tatou i te ariu atu anga me akataitaiaia mai tatou me kore, me tamamaeia mai to tatou ngakau e tetai tangata? Me ka akatika tatou i te akamou riri no tetai taeake akamori kia poitini i to tatou ngakau, penei ka akakinoia to tatou tu apakore ki te Atua. Auraka rava te tu o etai ke kia riro ei kotoeanga no tatou kia riri atu i te Atua me kore kia akaruke i tetai arataa akarongo mou. (Sala. 119:165) Na roto i te akakoromaki anga i te au timataanga, e tauturu ia tatou kia akono marie i to tatou tu apakore.

14. Na teea mataara te aronga akono tamou i te tu apakore me ariu atu ki te au tauianga a te akaaerenga e te au akatikatikaanga i roto i te apiianga?

¹⁴ Ka rauka katoa ia tatou i te akono marie i te tu apakore na te kopae atu anga i te tu akaapaapa, e te kimi apa. Tera i reira te aiteanga koia oki kia vai tiratiratu ua rai kia Iehova. Te akameitaki nei aia i tona iti tangata i teianei tikai. Kare rava te akamorianga mou i akateiteiia ana i roto i te tuatua enua o te tangata, i te enua nei. (Isa. 2:2-4) Me raveia tetai au akatikatikaanga i roto i te akamarama anga i te au irava Pipiria me kore i roto i te tu e raveia ana tetai au mea, ka anoanoia tatou kia ariki ua i te reira. E mea rekareka rava na tatou kia kite i te akapapuanga e te maata ua atura rai te marama pae vaerua. (Mase. 4:18) Me ngata ia tatou kia marama i tetai tauianga, e pati tatou kia Iehova kia tauturu mai ia tatou kia marama i taua manako ra. I taua taime rai, kia akakoromaki tatou i te aru i tetai arataa kauraro, i te akono marie anga i to tatou tu apakore.

Peea me Kare Tetai e Akono Tamou i te Tu Apakore?

15. Koai anake ua rai te ka rauka kia apai ke i toou tu apakore?

¹⁵ E uianga meitaki tikai te reira, me kare ainei? Mei ta tatou i kite i roto i te atikara i mua ake, e mea  puapinga maata tikai te tu apakore. Me kare o tatou tu apakore, kare o tatou pirianga kia Iehova e kare o tatou manakonakoanga tikai. E akamanako meitaki tikai i teia: Okotai ua rai tangata i roto i te ao katoa nei te ka rauka i te apai ke i toou tu apakore. Ko koe rai taua tangata ra. Kua marama meitaki a Iobu i taua tuatua tika ra. Kua karanga aia e: “E mate ua atu au, kare rava au e pa i toku nei apakore!” (Iobu 27:5, NW) Me te aite ra rai toou manako ngaueue kore mei te reira e me piri vaitata ua koe kia Iehova, kare rava koe e pa i toou tu apakore.​—Iako. 4:8.

16, 17. (a) Me rave tetai tangata i te ara, eaa ra te arataa tarevake i te aru? (e) Eaa ra te arataa tau kia aru?

¹⁶ Noatu rai, kare e rauka ana i tetai aronga i te akono marie i to ratou tu apakore. Mei tei tupu ana rai i te tuatau te ora ra te au apotetoro, te rave putuputu nei rai tetai pae i te ara kino. Me kua tupu ana te reira kia koe, ko te aiteanga ainei e kare o teia turanga manakonakoanga? Kare. Eaa ra i reira te ka rauka kia raveia? Ka akamanako ana tatou na mua e eaa te mea kare e tau kia rave. Ko te mea matau e raveia ana koia oki kia uuna i te tarevake mei nga metua, mei te au taeake Kerititiano, me kore mei te aronga pakari. Inara, te akamaara maira te Pipiria ia tatou e: “Ko tei tapoki i tana ara, kare ïa e manuia: ko tei aaki ra e kua akaruke, e aroaia ïa.” (Mase. 28:13) Te aronga ka uuna i te ara e aka tarevake tikai ta ratou e rave ra, no te mea kare rava e mea e rauka kia uunaia mei te Atua. (E tatau ia Ebera 4:13.) E timata ana tetai pae i te noo e rua tu oraanga, i te akapikikaa ua anga e te tavini ra Iehova ia ratou e rave ra rai i te ara. Ko te tangata e noo ra e rua tu oraanga kare ona tu apakore​—ko tetai tua takiri te reira o te tu apakore. Kare a Iehova e mareka mai ana i te au angaanga akamori e raveia ra e te aronga e uuna ra i ta ratou au ara. Kareka ra te akariri ra taua tu pikikaa ra iaia.​—Mase. 21:27; Isa. 1:11-16.

¹⁷ Me o atu tetai Kerititiano ki roto i te au angaanga tarevake, te taka meitaki ua ra e eaa te arataa tau nona kia aru. Ko te taime tikai te reira kia umuumu atu i te tauturu a te aronga pakari Kerititiano. Kua oti ia Iehova i te iki i te aronga pakari kia tauturu i te aronga tei rokoia e te maki pae vaerua. (E tatau ia Iakobo 5:14.) Auraka e akatika i te mataku e penei e ka akoia mai koe me kore ka akautungaia koe, kia tapu ia koe mei te aruaru anga kia meitaki toou oraanga pae vaerua. Tetai katoa, ka akatika ainei tetai tangata i te mamae o te patia me kore i te mamae o tetai maki vavai kia tapu iaia mei te akono atu anga i tetai maki te ka takino i tona oraanga?​—Ebe. 12:11.

18, 19. (a) Akapeea ra te akaraanga o Davida i te akaari mai anga e ka rauka akaou mai rai te tu apakore? (e) Eaa ra toou manako ngaueue kore no runga i toou tu apakore?

¹⁸ E manakonakoanga ainei tetai kia meitaki akaou mai? Ka rauka akaou mai ainei te tu apakore me ngaro te reira? Ka akamanako akaou ana i te akaraanga o Davida. Kua rave aia i tetai ara kino. Kua morimori aia i te vaine a tetai ke, kua akaturi, e kua kimi aia i tetai ravenga kia mate te tokorua ara kore o taua vaine ra. E ngata tikai i te akamanako ia Davida i taua taime ra ei tangata apakore, me kare ainei? Ko te aiteanga ainei i reira e kare ona manakonakoanga? Kua anoanoia te akoanga pakari no Davida e kua ariki aia i te reira. I reira, kua aroa mai a Iehova iaia no tona tu tataraara ngakau tae. Kua mou mai ia Davida te apiianga mei taua ako ra e kua rauka akaou mai tona tu apakore na te kauraro anga ki te Atua e te akakoromaki anga i taua arataa ra. Te akaari maira te oraanga o Davida i te akaraanga ta tatou ka tatau i roto ia Maseli 24:16 e: “Kia taki itu ua atu te inga anga o te tangata tuatua-tika, e tu akaou mai aia.” Tei tupu mai? Ka akamanako ana i ta Iehova i akakite kia Solomona no runga ia Davida i muri ake i tona mate anga. (E tatau ia 1 Ariki 9:4. *) Kua akamaara iora te Atua e e tangata apakore oki a Davida. E tika rava e ka rauka ua ia Iehova i te orei i te ara a te aronga tei tataraara.​—Isa. 1:18.

¹⁹ Ae, ka riro koe ei tangata apakore na te kauraro anga ki te Atua ma te aroa. E akono marie i te akakoromakianga tiratiratu, e me ka tupu tetai ara kino, e akaari i te tu tataraara tika tikai. E mea puapinga maata tikai to tatou tu apakore! Kia aru tatou tatakitai i te manako ngaueue kore o Davida e: “Kareka au nei, te aere nei au ma te apa kore.”​—Sala. 26:11.

[Au Tataanga Rikiriki i Raro]

Akapeea Koe me Pau?

• Ka akapeea ra koe e riro ei ei tangata apakore?

• Na roto i teea au mataara e rauka ai ia koe te akono marie i toou tu apakore?

• Ka akapeea ra e rauka akaou mai ei te tu apakore?

[Au Uianga Apii]

[Pia i te kapi 8]

‘E ANGAANGA METAKI TIKAI TE REIRA’

Na tetai vaine nui e rima marama i tuatua i teia au tuatua no runga i te tu meitaki e te tu apakore o tetai vaine ke ua. No roto ana aia i tetai toa oko kaope, e i muri mai kua kite mai aia e kua akaruke aia i tana kiri moni ki roto i taua toa ra. Mei tetai $2,000 i roto i te kiri moni, e maata atu i tana e matau ana i te apai aere. “Kua taitaia tikai au,” i akakite ei aia ki tetai tangata o te nuti pepa i tona ngai. Inara, kua kiteaia mai te kiri moni e tetai vaine mapu e kua kimi viviki atu aia i te tangata nana te reira. No te kare i kitea iaia te tangata nana te kiri moni, kua apai atu aia i reira ki ko i te opati o te akava, e kua kitea mai e te akava taua vaine nui ra. “E angaanga meitaki tikai te reira tei raveia,” i karanga ai te vaine ngakau akameitaki nana te kiri moni. No teaa ra teia vaine mapu i tauta pakari ei i te akaoki i te moni? Kua akakite te nuti pepa, e ei Kite no Iehova kua “oronga aia i te akameitakianga no tona tu apakore, ki te akonoanga i utuutuia mai ei aia.”

[Tutu i te kapi 9]

Ka rauka i te au mapu i te akono tamou i to ratou tu apakore me rokoia e te timataanga

[Tutu i te kapi 10]

Kare i rauka ana ia Davida i te akono tamou i tona tu apakore no tetai taime, inara kua meitaki akaou aia