Maara Ainei ia Koe?

Kua rekareka ainei koe i te tatau anga i te au itiu ou o Te Punanga Tiaki? Akara ana ra, me ka rauka ia koe i te pau i te au uianga ka aru mai:

• Akapeea e rauka ai ia tatou i te tuatua taka meitaki i te “reo ma,” koia oki te tuatua mou no runga i te Atua e tona au akakoroanga? (Zepha. 3:9, NW)

Mei tetai reo rai e tuatuaia ana, e rauka ai i te tuatua taka meitaki i te “reo ma,” ka anoanoia tatou kia akarongo meitaki tikai, e kia aru i te au vaa tuatua taka meitaki i te tuatua anga, e kia tamou ngakau i te au ingoa o te au puka o te Pipiria e tetai au irava Pipiria, kia ripiti putuputu ua rai i te au mea ta tatou i apii mai, kia tatau maata, kia akamanako meitaki i te karama, me kore i te tu o te tuatua mou, kia tauta kia tere ua rai ki mua, kia akataka i te au taime apii, e kia apiipii i te “tuatua anga” i te reo ma.​—8/15, kapi 21-25.

• Akapeea te manako o te “taura e toru enui” i tau ei ki te akaipoipo?

E tuatua akatutuanga te “taura e toru enui.” (Kohe. 4:12) Me taangaangaia teia ki te akaipoipo, te kapiti maira te reira i te tane e te vaine akaipoipo, te nga enui e rua, tei iri kapitiia ki te enui maata, koia oki ko te Atua. Na te taokotai anga ki te Atua, e oronga i te maroiroi pae vaerua ki te nga tokorua i te akono anga i te au manamanata e kia rauka te mataora.​—9/15, kapi 16.

• Eaa te tou ra ki “te tuku anga rima” i roto ia Ebera 6:2?

Kare te reira e tuatua ra no runga i te akamana anga i te aronga pakari Kerititiano, kare ra e kore e te tou ra te reira ki te tuku anga rima i te oronga anga i te au mea temeio o te vaerua tapu. (Anga. 8:14-17; 19:6)​—9/15, kapi 32.

• Eaa tetai au mataara ka rauka ia tatou i te akakoromaki i te mamae ngakau?

E manganui tei kite mai e e riro ana te tuatuaanga ei tauturu maata i te akamaru mai i te mamae ngakau. Ia Iobu e tumatetenga ra i te mate o tana au tamariki e tai ngauru kua tuatua aia e, “ka tuku au iaku uaorai kia aue ua na; e tuatua rai au.” (Iobu 10:1) Ko tetai aronga tei ngata i te tuatua no runga i to ratou au manako ngakau, penei e ka riro te tataanga i to ratou manako ei tauturu i te akamaru i to ratou mamae ngakau. Kua tata te tangata akarongo mou ko Davida i tetai pee akaevaeva oonu i te akakite mai anga i tona mamae ngakau i te mate anga a Ionatana. Penei ka riro katoa te aueanga ei tauturu i te akamaru mai i te mamae ngakau. “E atianga to te au mea katoa nei, e e . . . tuatau to te aue,” i karanga ai te Pipiria. (Kohe. 3:1, 4) Kia papu e, me mate tetai tangata ta tatou e akaperepere ra, e “tuatau” te reira no “te aue.”​—10/1, kapi 5, 6.

• Akapeea te au metua i te tauturu anga i ta ratou tamariki kia akaari i te arikianga rekareka?

Te mea mua, ka anoanoia ratou kia akanoo i tetai akaraanga meitaki. Na te akaari anga i te tu arikianga rekareka ki tetai e tetai, te akaari ra ratou ki ta ratou tamariki e ko taua au tu ra te akamareka ra i te tangata tei orongaia atu te reira, ka akameitaki mai i te au pirianga o te ngutuare, e e akairo te reira no te tu pakari. Te rua, ka rauka ia ratou i te tereni i te tamariki kia akamanako no runga i te angaanga pakari e te aroa i pou no te au apinga tei orongaia atu kia ratou. Ka rauka ia ratou kia uriuri ki ta ratou tamariki, kare anake ua i ta ratou ka tuatua, mari katoa ra eaa te tumu ka tuatua ai ratou i te reira, i te akaari anga i to ratou ariki rekareka. E te toru, ka anoanoia ratou kia akakoromaki. Kua tu pouroa tatou i te manako karapii. No reira ka anoanoia te au metua kia aruaru ua atu rai i te apii i ta ratou tamariki kia ariki rekareka mai e kia akaari i to ratou ariki rekareka. Ka rauka ia ratou i te tauturu atu i ta ratou tamariki “kia akatangata ou oki ko tei angaia kia tau i te Atua ra.” (Ephe. 4:24)​—10/1, kapi 21, 22.

• Akapeea te au akaaere i te akaari anga i te tu akangateitei ki etai ke?

E tai mataara ka rauka i tetai tangata pakari kia akapera, koia oki kare rava aia e pati i etai ke kia rave i tetai angaanga kare aia uaorai e inangaro i te rave. Pera katoa ka akaari aia i te akangateitei na te akakite anga kia ratou e eaa te tumu no tana au patianga me kore no tana au aratakianga e oronga ra.​—10/15, kapi 22.

• Eaa ra ta te tangata pakari Kerititiano ka kite mei te tu e taangaanga ana te au tiaki o Iseraela i te tokotoko tei amingiia a mua?

E taangaanga ana te tiaki i tetai tokotoko tei amingiia a mua ei arataki i te anana. I te mamoe e tomo atura e e aere maira ki vao i te aua, ka na raro ratou i te tokotoko kia rauka i te tiaki i te tatau ia ratou. (Levi. 27:32) Ka anoano katoaia tetai tiaki Kerititiano kia kite meitaki i te anana a te Atua e kia kite e te akapeea ra ratou.​—11/15, kapi 9.