Marama Akangateitei ta Iesu Angaanga Aitekoreia i to te Atua Akakoroanga

“Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku.”​—IOA. 14:6.

1, 2. Eaa ra tatou ka inangaro ei kia makitoro marie i ta Iesu angaanga aitekoreia i roto i to te Atua akakoroanga?

I ROTO i te au tuatau i aereia, e maata ua atu tei tauta pakari ana kia tuke mei te au tangata takapini ia ratou, inara e tokoiti ua tei manuia. E e tokoiti roa atu te ka tau kia karanga e e au tu puapinga aitekoreia rai to ratou. E oti akera, e maata atu rai to Iesu Karaiti te Tamaiti a te Atua au tu aitekoreia i roto i te au tu e manganui.

² Eaa ra tatou ka inangaro ei kia kite i ta Iesu angaanga aitekoreia? No te mea te o maira to tatou pirianga ki to tatou Metua i te rangi, ko Iehova! Kua akakite a Iesu e: “Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku.” (Ioa. 14:6; 17:3) Ka makitoro marie ana tatou i tetai au mataara o to Iesu tu aitekoreia. Ka riro te rave anga i te reira ei akamaata atu i to tatou marama e te akangateitei no tana angaanga i roto i to te Atua akakoroanga.

“Te Tamaiti Anau Tai”

3, 4. (a) Eaa ka tau ei kia karanga e e tu aitekoreia to Iesu i roto i tana angaanga ei Tamaiti anau tai? (e) Akapeea i aitekore ei ta Iesu angaanga i roto i te au mea tei angaia?

³ Kare a Iesu i te ‘Tamaiti ua na te Atua.’ I akapera oki a Satani i te tuatua anga kia Iesu i tona timata anga iaia. (Mata. 4:3, 6) Kua tau tika rai a Iesu kia kapikiia e ko “te Tamaiti anau tai a te Atua.” (Ioa. 3:16, 18) Ko te kupu Ereni tei uriia ei “anau tai” kua akatakaia mai te reira ei “okotai ua rai o te reira tu, ko te reira ua rai,” “te mema okotai ua rai o tetai katiri tangata me kore o tetai tu apinga,” me kore e “tu aitekoreia.” E anere ua atu au mirioni a Iehova au tamariki vaerua. I roto i teea tu i reira, e ko Iesu anake “te mema okotai ua rai o tetai katiri tangata me kore o tetai tu apinga”?

⁴ E tu aitekore tikai to Iesu i roto i te mea e koia okotai ua rai tei anga tikaia e tona Metua. Koia te Tama mua. Ko te tika, koia ‘te tama mua o te au mea ravarai i angaia.’ (Kolo. 1:15) Koia “te tumu o te au mea ravarai a te Atua i angaia ra.” (Apo. 3:14) E aitekore katoa te angaanga a te Tamaiti anau tai i roto i te au mea tei angaia. Kare koia Tei Anga mai, me kore Tei Akamata mai i te au mea tei angaia. Inara kua taangaanga a Iehova iaia ei rima rave, me kore ei ravenga, no te anga mai i te au mea katoatoa. (E tatau ia Ioane 1:3.) Kua tata te apotetoro ko Paulo e: “Kareka ia tatou nei, okotai rava ïa Atua, ko te Metua, no reira mai te au mea katoa nei, e nona oki tatou; okotai oki Atu ko Iesu Mesia, nana te au mea katoa nei, e nana katoa oki tatou.”​—1 Kori. 8:6.

5. Akapeea ra te au Tuatua Tapu i te akataka mai anga i to Iesu tu aitekoreia?

⁵ Kareka ra, e maata roa atu te o maira ki roto i to Iesu tu aitekoreia. E manganui ta te au Tuatua Tapu au taoonga me kore au ingoa e taiku maira nona tei akataka mai i tana angaanga aitekoreia i roto i to te Atua akakoroanga. Ka makitoro marie ana tatou i teianei e rima akaou mai o teia au taoonga tei tukuia ki runga ia Iesu i roto i te au Tuatua Tapu Kerititiano Ereni. *

“Te Logo”

6. Eaa ra i tau ei kia kapikiia a Iesu e ko “te Logo”?

⁶ E tatau ia Ioane 1:14. Eaa a Iesu i kapikiia ai e ko te “Logo”? Te akataka maira teia taoonga i te tuanga angaanga tana i akamata mai i te rave i te oti anga tetai au mea ora kite i te angaia mai. Kua taangaanga a Iehova i tana Tamaiti ei akakite i  tana au tuatua e te au ikuikuanga ki tetai atu au tamariki vaerua, mei ta te Atua katoa rai e taangaanga ana i taua Tamaiti ra kia oronga i Tana karere ki te tangata i runga nei i te enua. Kua akapapuia mai te tika e ko Iesu te Logo, me kore te Vaa Tuatua o te Atua, i roto i ta Karaiti i tuatua ki te au ngati Iuda e akarongo maira iaia e: “Kare taku uaorai i taku e apii nei, nana ra, na tei tono mai iaku nei. Ko tei anoano marie i te akono i tona inangaro, ka kite aia i taku e apii nei, e na te Atua ainei, e naku uaorai ainei.” (Ioa. 7:16, 17) Kua apai ua atu rai a Iesu i te taoonga koia oki ‘te Logo a te Atua’ i muri katoa ake i tona oki anga ki te turanga kaka i te rangi.​—Apo. 19:11, 13, 16.

7. Ka akapeea tatou i te aru anga i te tu akaaka ta Iesu i akaari mai i roto i tana angaanga koia oki ko “te Logo”?

⁷ E akamanako ua ana e eaa ta teia taoonga e akakite maira. Noatu e ko Iesu tei pakari roa atu i te au mea ora ravarai ta Iehova i anga mai, kare aia e irinaki ana ki tona uaorai pakari. Ka tuatua aia i ta tona Metua e ikuiku maira. E akaoki ua ana rai aia i te manako ki runga ia Iehova kare kiaia uaorai. (Ioa. 12:50) E akaraanga meitaki tikai no tatou kia aru! Kua oronga katoaia mai teia angaanga ngateitei kia tatou kia ‘apai i te evangelia o te meitaki.’ (Roma 10:15) Na te ariki anga i te akaraanga o to Iesu tu akaaka e akakeu ia tatou kia kopae i te tuatua i to tatou uaorai manako. No runga i te akakite anga i te karere o te ora i roto i te au Tuatua Tapu, kare tatou e inangaro ‘kia rai te manako i tei tataia ra.’​—1 Kori. 4:6.

“Te Amene”

8, 9. (a) Eaa ra te aiteanga o te kupu “amene,” e eaa ra a Iesu i kapikiia ai e ko “te Amene”? (e) I akapeea a Iesu i te akatupu anga i tana angaanga koia oki ko “te Amene”?

⁸ E tatau ia Apokalupo 3:14. Eaa ra a Iesu i kapikiia ai e ko “te Amene”? Ko te kupu tei uriia ei “amene” e urianga te reira no tetai kupu Epera ko tona aiteanga “koia tika rai,” me kore “papu tikai.” Te kupu Epera tumu tikai i rauka mai ei teia, te aiteanga “pikikaa kore” me kore “irinakiia.” Kua taangaanga katoaia teia tuatua ei akataka mai i to Iehova tu tiratiratu. (Deu. 7:9; Isa. 49:7) No reira i roto i teea tu i aitekore ei a Iesu me karangaia aia e ko “te Amene”? E akara ana e akapeea a 2 Korinetia 1:19, 20 i te pau mai anga e: “Kare oki te Tamaiti a te Atua ra, ko Iesu Mesia, i tuatua aereia . . . , ki o kotou na, i te koia e te kare, tei iaia ra te koia. Te au mea katoa ta te Atua i tuatua mai, e koia anake ïa i roto iaia, e . . . i roto iaia [“te Amene,” NW], kia kakā te Atua.”

⁹ Ko Iesu oki “te Amene” ki te au taputou katoatoa ravarai a te Atua. Kua riro tona oraanga tiama i runga nei i te enua, tei kapiti mai i tona mate akaatinga, ei akapapu e ei akatupu i te au taputou katoatoa ravarai a te Atua ko Iehova. Na te vai akarongo mou ua anga, kua rauka katoa ia Iesu i te akapapu mai i te pikikaa o ta Satani akaapaanga tei rekotiia i roto i te puka a Iobu, e i raro i te turanga ngere, te mamae e te timataanga, ka akaruke te au tavini o te Atua Iaia. (Iobu 1:6-12; 2:2-7) I te au mea katoatoa ravarai ta te Atua i anga, ka rauka i te Tama mua i te oronga i te pauanga papu tikai ki taua akaapaanga ra. Tetai katoa, kua oronga mai a Iesu i te akapapuanga meitaki rava atu i te turuturu anga i tona Metua i roto i te maroanga maata atu no runga i te tikaanga tikai o to Iehova turanga ngateitei o te ao e pini ua ake.

10. Ka akapeea tatou i te aru anga ia Iesu i roto i tana angaanga aitekoreia koia oki ko “te Amene”?

¹⁰ Ka akapeea tatou i te aru anga ia Iesu i roto i tana angaanga aitekoreia koia oki ko “te Amene”? Na te vai akarongo mou ua anga kia Iehova e te turuturu anga i tona turanga ngateitei i te ao e pini ua ake. Na te rave anga i te reira, te ariu papu atura tatou ki te patianga tei rekotiia i roto ia Maseli 27:11 e: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.”

“Te Arai o te Koreromotu Ou”

11, 12. I akapeea ra ta Iesu angaanga ei Arai i aitekore ei?

¹¹ E tatau ia 1 Timoteo 2:5, 6. Ko Iesu oki te ‘arai okotai i rotopu i te Atua e te tangata.’ Koia oki “te arai o te koreromotu ou.” (Ebe. 9:15; 12:24) Inara, kua karanga katoaia a Mose e e arai​—te arai o te Ture koreromotu. (Gala. 3:19) I akapeea i reira ta Iesu angaanga ei Arai i aitekore ei?

¹² Ko te kupu i roto i te reo mua tei uriia ei “arai” e tuatua tikaia te reira e te ture. Te tou ra te reira kia Iesu ei Arai tikaia e te ture (me kore, ei roia) no te koreromotu ou i kapuaia mai ei tetai iti tangata ou, ko “te Iseraela o te Atua.” (Gala. 6:16) E au Kerititiano akatainuia e te vaerua to roto i teia iti tangata, tei riro ei “kau taunga ariki” i runga i te rangi. (1 Pete. 2:9; Exo. 19:6) Kare i rauka ana i te Ture koreromotu tei riro ko Mose te arai, i te akatupu mai i tetai iti tangata mei te reira te tu.

13. Eaa ra te o maira ki roto i ta Iesu angaanga ei Arai?

 ¹³ Eaa te o maira ki roto i ta Iesu angaanga ei Arai? Kua taangaanga a Iehova i te puapinga o to Iesu toto ki runga i te aronga tei apaina mai ki roto i te koreromotu ou. Na roto i teia tu, kua akatika a Iehova ia ratou i raro i te ture, kia riro ei aronga tuatua tika. (Roma 3:24; Ebe. 9:15) Ei reira te Atua ka apai ei ia ratou ki roto i te koreromotu ou ma te manakonakoanga kia riro mai ratou ei kau taunga ariki i te rangi! Ei Arai no ratou, ka tauturu a Iesu ia ratou kia tamou marie i tetai turanga ma ki mua i te aroaro o te Atua.​—Ebe. 2:16.

14. Eaa ra te au Kerititiano katoatoa ka tau ei kia akangateitei tikai i ta Iesu angaanga ei Arai noatu eaa to ratou manakonakoanga?

¹⁴ Peea i reira te aronga kare i roto i te koreromotu ou, te aronga e manakonako ra kia noo e mutu kore ua atu i runga i te enua, eiaa i te rangi? Noatu e kare ratou i te tuanga no te koreromotu ou, ka puapingaia ra ratou. Ka rauka te akakore anga no ta ratou ara e ka akatikaia ratou ei au oa tuatua tika no te Atua. (Iako. 2:23; 1 Ioa. 2:1, 2) Noatu me e manakonakoanga to tatou no te rangi me kore no te enua nei, e tumuanga tau tikai to tatou ravarai kia akangateitei i ta Iesu angaanga ei Arai no te koreromotu ou.

“Taunga Maata”

15. I akapeea ta Iesu angaanga ei Taunga Maata i tuke ei mei ta te au tangata katoatoa tei tavini ana ei kau taunga nunui?

¹⁵ E manganui ua atu te tangata tei tavini ana ei kau taunga nunui i te tuatau i topa, kareka ra ko ta Iesu angaanga ei Taunga Maata, e tu aitekoreia tikai. Na teea tu? Kua akamarama mai a Paulo e: “Kare oki e tau iaia, kia na mua i te tuku i te atinga i tana uaorai ara, ka tuku ei i ta te tangata katoa, mei ta taua kau taunga nunui ra, i te au rā katoa ra; okotai rava ana tuku anga i ta te tangata ravarai, iaia i tuku iaia uaorai. Ko te tangata paruparu nei oki ta te ture e akariro ei taunga mamaata, kareka te tuatua ra ko te taputou, i muri ake i taua ture ra; ko te Tamaiti ïa ia te reira i akataunga, ko tei akatapuia e tuatau ua atu.”​—Ebe. 7:27, 28. *

16. Eaa ra ta Iesu atinga i riro ei ei mea aitekore tikai?

¹⁶ E tangata apa kore a Iesu, aiteite tikai kia Adamu i mua ake ka ara ai a Adamu. (1 Kori. 15:45) I roto i taua turanga ra, ko Iesu ua rai te tangata tei tau kia oronga i tetai atinga apa kore e te iro koreia​—te tu o te atinga kare e anoanoia kia rave akaouia. I raro i te Ture a Mose, e orongaia ana te au atinga i te au ra ravarai. Inara, pouroa taua au atinga ra, e te au angaanga a te kau taunga, e ata anake ia no ta Iesu ka akatupu. (Ebe. 8:5; 10:1) No te mea e e maata atu ta Iesu i akatupu i ta te kau taunga maata e ka tavini tinamou ua atu rai aia i roto i tana angaanga ei Taunga Maata, e tu aitekore tikai te reira.

17. Eaa ra tatou ka ariki rekareka ai i ta Iesu angaanga ei Taunga Maata no tatou, e ka akapeea tatou me rave i te reira?

¹⁷ Ka anoano tatou i ta Iesu au angaanga ei Taunga Maata ei tauturu ia tatou kia rauka tetai turanga meitaki i mua i te aroaro o te Atua. E Taunga Maata umeremere tikai to tatou! “Kare oki to tatou i te taunga maata e kore e tika kia aroa mai ia tatou i to tatou au paruparu nei,” i tata ai a Paulo, “i rokoia katoa oki aia i te au timataanga katoa, mei ia tatou katoa nei rai, kare rava ra e ara.” (Ebe. 4:15) Tikaanga tikai, ka riro te arikianga rekareka i teia tika i te akakeu ia tatou kia ‘ora kare no tatou uaorai, mari ra nona tei mate ra no tatou.’​—2 Kori. 5:14, 15, NW; Luka 9:23.

Te “Uanga” Taputouia

18. Eaa te totou tei akakiteia i muri ake i to Adamu ara anga, e eaa tei akakiteia mai i muri mai no runga i teia totou?

¹⁸ I roto i Edene, i te akara anga e kua ngere te tangata nei i te au mea ravarai​—koia oki te turanga ma ki mua i te aroaro o te Atua, te oraanga mutu kore, te turanga mataora, e te Parataito​—kua totou maira te Atua ko Iehova i tetai Akaora. Kua taikuia mai aia e ko te “uanga.” (Gene.  3:15) Kua riro mai teia Uanga kare i akatakaia mai ei tumu manako maata no te au totou Pipiria e manganui i te au tuatau tei aereia. Ka na roto mai aia i te uanga o Aberahama, o Isaaka, e o Iakoba. Ka na roto katoa mai aia i te uanga o te Ariki ko Davida.​—Gene. 21:12; 22:16-18; 28:14; 2 Samu. 7:12-16.

19, 20. (a) Koai ra te Uanga taputouia? (e) Eaa ka tau ei kia karangaia e e maata atu te kapitiia maira kia Iesu i roto i te uanga totouia?

¹⁹ Koai ra teia Uanga tei taputouia mai? Ka kitea mai te pauanga o teia uianga i roto ia Galatia 3:16. (E tatau.) Inara, i muri mai i roto i taua pene ra, kua na ko atura te apotetoro ko Paulo ki te au Kerititiano akatainuia e: “E no te Mesia oki kotou ra, e uanga ïa kotou no Aberahama, e e tangata kainga ïa i tei tuatuaia.” (Gala. 3:29) I akapeea i riro ei e ko Karaiti te Uanga taputouia, e oti akera e aronga ke atu tetai i kapitiia mai?

²⁰ E mirioni ua atu tei karanga e no roto mai ratou i te uanga o Aberahama, e kua akariro katoa tetai pae ia ratou ei au peroveta. E akanoo maata ana tetai au akonoanga i te puapinga ki runga i ta ratou e karanga ra e i uangaia mai to ratou au peroveta na roto ia Aberahama. Inara ko ratou katoatoa ainei te Uanga taputouia? Kare. Mei ta te apotetoro ko Paulo e akakite maira i te akauruia anga e, kare e rauka i te au uanga katoatoa o Aberahama kia karanga e ko ratou te Uanga taputouia. Kare te uanga o ta Aberahama au tamariki ke atu i taangaangaia ana ei akameitaki i te tangata nei. Ko te uanga no te akameitaki anga ka na roto anake ua mai ia Isaaka. (Ebe. 11:18) I te openga ra, okotai ua rai tangata, ko Iesu Karaiti, tei tataia tona papaanga i roto i te Pipiria mei ia Aberahama mai, koia te tuanga maata o taua uanga ra i taputouia mai. * Pouroa te aronga tei riro mai ei tuanga rua no to Aberahama uanga i muri mai, i rauka ai te reira turanga ia ratou no te mea “no te Mesia oki” ratou. Ae, e aitekoreia tikai ta Iesu tuanga i roto i te akatupuanga i teia totou.

21. Eaa taau i mareka no runga i te tu i akatupu ei a Iesu i tana angaanga aitekoreia i roto i to Iehova akakoroanga?

 ²¹ Eaa ta tatou i mou mai mei teia uriurianga poto ua o ta Iesu angaanga aitekoreia i roto i to Iehova akakoroanga? Mei te taime mai o tona angaia mai anga e aere ua atu, e tu aitekoreia tikai to te Tamaiti anau tai a te Atua, okotai ua rai o te reira tu. Inara, ko teia Tamaiti aitekoreia a te Atua tei riro mai e ko Iesu, e tavini akaaka ua ana rai aia kia rotai ki te anoano o tona Metua, kare roa aia e kimi ana i te kaka nona uaorai. (Ioa. 5:41; 8:50) E akaraanga takake tikai teia no tatou i teia tuatau! Mei ia Iesu rai, kia akanoo tatou i tetai akakoroanga no tatou kia ‘rave anake i te akakakā i te Atua.’​—1 Kori. 10:31.

[Au Tataanga Rikiriki i Raro]

Maara Ainei ia Koe?

• Eaa taau i mou mai no runga i te angaanga aitekoreia a Iesu mei tona au taoonga me kore mei tona au ingoa? (Akara i te pia.)

• Ka akapeea koe i te aru anga i te akaraanga o ta Iehova Tamaiti aitekoreia?

[Au Uianga Apii]

[Pia/​Tutu i te kapi 15]

Tetai Au Taoonga e Akaata Maira i ta Iesu Angaanga Aitekoreia i to te Atua Akakoroanga

▪ Te Tamaiti Anau Tai. (Ioa. 1:3) Ko Iesu okotai ua rai tei anga tikaia e tona Metua.

▪ Te Logo. (Ioa. 1:14) E taangaanga ana a Iehova i tana Tamaiti ei Vaa Tuatua i te akakite i te au tuatua e te au ikuikuanga ki tetai au mea ora ke atu.

▪ Te Amene. (Apo. 3:14) Kua riro to Iesu oraanga tiama i runga nei i te enua, tei kapiti mai i tona mate akaatinga, ei akapapu e ei akatupu i te au taputou a te Atua ko Iehova.

▪ Te Arai o te Koreromotu Ou. (1 Timo. 2:5, 6) Ei Arai tikaia e te ture, na Iesu i kapuaia mai ei tetai iti tangata ou, ko “te Iseraela o te Atua,” tei o mai te au Kerititiano te ka riro mai ei “kau taunga ariki” i runga i te rangi.​—Gala. 6:16; 1 Pete. 2:9.

▪ Te Taunga Maata. (Ebe. 7:27, 28) Ko Iesu ua rai te tangata tei tau kia oronga i tetai atinga apa kore, te kare e anoanoia kia rave akaouia. Ka rauka iaia i te tama i ta tatou ara e te akarangatira ia tatou mei te mate.

▪ Te Uanga Taputouia. (Gene. 3:15) Okotai ua rai tangata, ko Iesu Karaiti, te tuanga maata o taua uanga ra i taputouia mai. Pouroa te aronga tei riro mai ei tuanga rua no to Aberahama uanga i muri mai “no te Mesia oki” ratou.​—Gala. 3:29.