Ko Koe Ainei Tetai ‘Tavini o to te Atua Aroa Ua’?
Ko Koe Ainei Tetai ‘Tavini o to te Atua Aroa Ua’?
“Ma te aroa taeake ra e aroa takinga meitaki atu tetai i tetai. I te akaari anga i te akangateitei ki tetai e tetai e oronga i te akaraanga.”—ROMA 12:10, NW.
1. Eaa ta te Tuatua a te Atua e akapapu maira kia tatou?
TE AKAPAPU putuputu ua maira te Tuatua a te Atua ia tatou e ka tauturu mai a Iehova ia tatou me taitaia me kore me mamae ngakau tatou. Ei akatauanga, ka akara ana i teia au tuatua akapumaana: “Te mou rā Iehova i te aronga katoa e inga ra; kua akatu i te aronga katoa e piko ki raro.” “Kua rapakau aia i te aronga ngakau paruparu ra, e kua tākai i to ratou au puta.” (Sala. 145:14; 147:3) Ei runga ravao, te akakite uaorai maira to tatou Metua i te rangi e: ‘Ko au oki to Atua ra, ko Iehova, ko tei akamaroiroi i to rima katau ra; ko tei tuatua ia koe e, Auraka e mataku, naku koe e tauturu.’—Isa. 41:13.
2. E akapeea ana a Iehova i te oronga mai anga i te tauturu ki tona au tavini?
2 Akapeea ra i reira, a Iehova, ko tei noo i runga i te au rangi kitea koreia e te mata, i te ‘akamaroiroi anga i to tatou rima katau’? Akapeea ra aia i te ‘akatu mai anga ia tatou e piko ra ki raro’ no te mamae ngakau? E oronga mai ana te Atua ko Iehova i taua tu tauturu ra na roto i te au mataara tukeke. Ei akaraanga, e oronga ana aia ki tona iti tangata i te “mana maata” atu na roto i tona vaerua tapu. (2 Kori. 4:7; Ioa. 4:16, 17) E akamaroiroi katoaia ana te au tavini o te Atua e te karere e kiteaia ra i roto i te Tuatua akauruia a te Atua, koia te Pipiria. (Ebe. 4:12) E mataara ke atu ainei tetai e akamatutu mai ana a Iehova ia tatou? Ka kite tatou i te pauanga i roto i te puka Mua o Petero.
‘To te Atua Aroa ua tei Akaariia na te Au Mataara Tukeke’
3. (a) Eaa te tuatua ta te apotetoro ko Petero i akakite ei no runga i te au timataanga? (e) Eaa te uriuriia ra i roto i te tuanga openga o ta Petero reta mua?
3 I te tata anga atu ki te aronga irinaki tei akatainuia e te vaerua, kua tata te apotetoro ko Petero e e tumuanga tau tikai to ratou kia rekareka no te mea e tutaki maata te vai maira no ratou. I reira kua karanga katoa atu aia e: “Taitaia poto ua rai kotou i teianei no te mea tika ïa i te au timataanga tu ke ke ra.” (1 Pete. 1:1-6) E akara ana i te kupu “tu ke ke.” Te akakite maira te reira e ka tuke ke te au timataanga. Inara, kare a Petero i akamutu ua i reira, i te akaruke ua anga i tona au taeake kia akamanako e me ka rauka rai ia ratou i te akakoromaki i taua au tu timataanga tukeke ra. Mari ra, kua akakite a Petero e kia papu i te au Kerititiano e ka tauturu a Iehova ia ratou kia akakoromaki i te au timataanga, noatu e eaa te tu o te timataanga ka tupu kia ratou. Kua orongaia taua akapapuanga ra i roto i te tuanga openga o te reta a Petero, i reira te uriuri ra te apotetoro i te au mea e piri atura ki “te openga o te au mea ravarai.”—1 Pete. 4:7.
4. Eaa ra te au tuatua a 1 Petero 4:10 i riro ei ei akapumaanaanga no tatou?
4 Te akakite ra a Petero e: ‘Kia tau ki te au tu o te apinga aroa tei rauka i te tangata ravarai, e taangaanga i te reira i te matuapuru anga i tetai e tetai mei te tavini meitaki o to te Atua aroa ua tei akaariia na te au mataara tukeke.’ (1 Pete. 4:10, NW) Kua taangaanga akaou a Petero i te kupu “tukeke.” Tera i reira te aiteanga te karanga ra aia e, ‘E na roto mai ana te au timataanga i te au tu tukeke, inara e akaari katoaia mai ana rai to te Atua aroa ua na roto i te au mataara tukeke e manganui.’ Eaa ra tera tuatua i riro ei ei akapumaanaanga? Te akakite maira te reira e noatu e eaa te tu o to tatou au timataanga, ka akaari ua mai rai te Atua i tona aroa ua ei tauturu ia tatou kia akakoromaki. Inara i roto i te tuatua a Petero, te kite ra ainei koe e akapeea to Iehova aroa ua i te akaariia mai anga kia tatou? I na roto mai i te au taeake Kerititiano.
‘Matuapuru Anga i Tetai e Tetai’
5. (a) Eaa ta te au Kerititiano ravarai ka anoanoia kia rave? (e) Eaa te au uianga tei uiia?
5 I te tuatua anga ki te au mema pouroa o te putuputuanga Kerititiano, kua karanga atu a Petero 1 Pete. 4:8, 10) No reira, ka anoanoia te aronga ravarai i roto i te putuputuanga kia akamatutu i te au taeake Kerititiano. Kua tukunaia tatou kia akaaere i tetai apinga puapinga roa na Iehova, e tei runga ia tatou te apainga no te tua anga atu i te reira ki etai ke. Eaa i reira, teia au apinga puapinga tei orongaia mai kia akaaere tatou? Te na ko maira a Petero e e ‘apinga aroa’ te reira. Eaa ra taua apinga aroa ra? Ka akapeea tatou me ‘taangaanga i te reira i te matuapuru anga i tetai e tetai’?
e: “Ko te aroa rai, kia maata tikaia ïa ia kotou uaorai.” I reira kua kapiti atu aia e: ‘Kia tau ki te au tu o te apinga aroa tei rauka i te tangata ravarai, e taangaanga i te reira i te matuapuru anga i tetai e tetai.’ (6. Eaa ua ai tetai au apinga aroa tei orongaia mai ki te au Kerititiano?
6 Te karanga ra te Tuatua a te Atua e: “Te au mea memeitaki i o maiia ra, e te au mea tika ravarai, no runga ïa.” (Iako. 1:17) E tika rava e, ko te au apinga aroa pouroa ta Iehova i oronga mai ki tona iti tangata, e akaarianga anake ia no tona aroa ua. E tai apinga aroa takake roa ta Iehova i oronga mai kia tatou koia oki ko te vaerua tapu. Na taua apinga aroa ra e tauturu ana ia tatou i te akatupu i te au tu atua mei te inangaro, te meitaki, e te maru. Na taua au tu ra e akakeu ana ia tatou kia akaari i te ngakau aroa ki te au taeake irinaki e kia inangaro tikai i te tauturu ia ratou. Tei roto katoa te tu pakari mou tikai e te kite i te au apinga aroa meitaki tei rauka ia tatou ma te tauturu a te vaerua tapu. (1 Kori. 2:10-16; Gala. 5:22, 23) E tika katoa e, ka tau kia karangaia to tatou maroiroi katoa, to tatou kite karape, e to tatou au tareni e e au apinga aroa kia taangaangaia ei apai mai i te akapaapaa e te akangateitei ki to tatou Metua i te rangi. Tei runga ia tatou te apainga no ko mai i te Atua, kia taangaanga i to tatou kite karape e te au tu, ei au mataara no te akaari anga i to te Atua aroa ua ki to tatou au taeake irinaki.
‘E Taangaanga i te Reira i te Matuapuru Anga’—Akapeea?
7. (a) Eaa ta te tuatua ‘kia tau ki te au tu’ e akakite maira? (e) Eaa te nga uianga ka tau tatou kia ui kia tatou uaorai, e no teaa ra?
7 No runga i te au apinga aroa tei rauka ia tatou, te akakite katoa maira a Petero e: ‘Kia tau ki te au tu o te apinga aroa tei rauka i te tangata ravarai, e taangaanga i te reira.’ Ko te tuatua ‘kia tau ki te au tu,’ te akaari maira te reira e penei, ka tukeke te turanga e te maroiroi o te au tu e te kite karape o te tangata tataki tai. Noatu ra e eaa te apinga aroa, te raurauia mai nei te katoatoa rava kia ‘taangaanga i te reira [koia oki, i tetai ua atu apinga aroa tei rauka iaia] i te matuapuru anga i tetai e tetai.’ Ei runga ravao, ko te tuatua ‘e taangaanga i te reira . . . mei te tavini meitaki,’ e akauenga te reira. No reira, ka tau tatou kia ui kia tatou uaorai e: ‘Te taangaanga tika ra ainei au i te au apinga aroa tei orongaia mai kiaku ei akamatutu i toku au taeake irinaki?’ (Akaaite ia 1 Timoteo 5:9, 10.) ‘Me, te taangaanga ra ainei au i te au tu kite karape tei rauka iaku no ko ia Iehova ei akapuapinga iaku uaorai—penei e kia rauka te apinga nui me kore kia rauka tetai turanga teitei i mua i te tangata?’ (1 Kori. 4:7) Me taangaanga tatou i ta tatou au apinga aroa ‘i te matuapuru anga i tetai e tetai,’ ka akamareka roa tatou ia Iehova.—Mase. 19:17; tatau ia Ebera 13:16.
8, 9. (a) Eaa tetai au mataara e tavini ra te au Kerititiano i te ao katoa nei i te tauturu anga i te au taeake irinaki? (e) E akapeea ana te au taeake e te au tuaine i roto i toou putuputuanga i te tauturu anga i tetai e tetai?
8 Te taiku maira te Tuatua a te Atua i te au mataara tukeke e matuapuru ana te au Kerititiano i te anere mataiti mua i tetai e tetai. (E tatau ia Roma 15:25, 26; 2 Timoteo 1:16-18.) Mei te reira katoa i teia tuatau, te akono nei rai te au Kerititiano mou i te akauenga kia taangaanga i ta ratou apinga aroa ei tauturu i te au taeake irinaki. Ka akamanako ana i tetai au mataara e raveia ana te reira.
9 E manganui te au taeake e akapou ana i to ratou taime i te au marama ravarai i te akapapa i ta ratou au tuanga no te au uipaanga. I ko i te au uipaanga, me oronga mai ratou i te au akoanga puapinga tei rauka ia ratou i roto i ta ratou apii Pipiria, e riro ana ta ratou au tuatua akamarama ei akakeu i te katoatoa i roto i te putuputuanga kia akakoromaki. (1 Timo. 5:17) E maata ua atu te au taeake e te au tuaine tei kite uaia no to ratou tu pumaana e te ngakau aroa ki te au taeake irinaki. (Roma 12:15) E atoro putuputu ana tetai papaki i te aronga ngakau taitaia e e pure kapiti ana kia ratou. (1 Tesa. 5:14) Ko etai e tata atu ana i tetai au reta akamaroiroi ki te au taeake Kerititiano e tauta ra i te akakoromaki i te timataanga. E ko etai e tauturu ana ratou i te aronga apikepike te kopapa kia tae atu ki te au uipaanga a te putuputuanga. E tauatini ua atu te Au Kite e piri ana ki roto i te angaanga tauturu, i te tauturu atu i te au taeake irinaki i te akatu akaou i to ratou au kainga tei takinoia e te tumatetenga natura. Te aroa takinga meitaki e te tauturu tei orongaia e taua au taeake e te au tuaine, e akaarianga pouroa te reira no ‘to te Atua aroa ua tei akaariia na te au mataara tukeke.’—E tatau ia 1 Petero 4:11.
Eaa Tei Puapinga Maata Atu?
10. (a) Te manako ra a Paulo no runga i teea nga tuanga e rua o tana angaanga na te Atua? (e) Ka akapeea tatou i te aru anga ia Paulo i teia tuatau?
10 Kare ko te apinga aroa ua tei orongaia ki te au tavini o te Atua kia taangaanga ei tauturu i to ratou au taeake irinaki, kua oronga katoaia ra tetai karere kia akakite aere ratou ki to ratou au tangata tupu. Kua kite te apotetoro ko Paulo i teia nga tuanga e rua o tana angaanga na Iehova. Kua tata aia ki te putuputuanga i Ephesia no runga i “te akaaerenga i te aroa ua o te Atua” tei orongaia kiaia kia puapingaia ratou. (Ephe. 3:2) E kua karanga katoa aia e: “Ko matou ra i akatikaia e te Atua kia tuku mai i te evangelia ia matou nei.” (1 Tesa. 2:4) Mei ia Paulo rai, kua kite katoa tatou e kua orongaia mai kia tatou te tukuanga angaanga kia tavini ei aronga tutu aere i te Patireia o te Atua. Na te piri maroiroi anga ki roto i te angaanga tutu aere, te tauta ra tatou i te aru i te akaraanga ta Paulo i akanoo, ei tangata akakitekite aere i te tuatua meitaki ma te roiroi kore. (Anga. 20:20, 21; 1 Kori. 11:1) Kua kite tatou e ka riro te tutu aere anga i te karere o te Patireia ei akaora i te tangata. Inara i taua taime rai, ka tauta katoa tatou i te aru ia Paulo na te kimi anga i tetai au atianga kia ‘tuku i ta te vaerua’ ki te au taeake irinaki.—E tatau ia Roma 1:11, 12; 10:13-15.
11. Ka akapeea ra tatou i te akamanako anga i ta tatou tukuanga angaanga kia tutu aere e kia akamaroiroi i to tatou au taeake?
11 Ko teea o teia nga tuanga angaanga Kerititiano e rua tei puapinga rava atu? Ko te ui anga i tetai uianga mei te reira te tu, te aite ra rai ki te ui anga no runga i tetai manu, Ko teea ra i tona nga peau e rua tei puapinga rava atu? Te taka ua ra e eaa te pauanga. Ka anoanoia te manu kia taangaanga i nga peau roa ai, kia rauka i te rere. Ka anoano katoaia rai tatou kia piri ki roto i nga tuanga roa ai o ta tatou angaanga na te Atua kia rauka ia tatou i te akono i te au mea ravarai e umuumuia maira mei ia tatou ei au Kerititiano. No reira, i to te manako atu i ta tatou nga tukuanga angaanga kia tutu aere i te tuatua meitaki, e te akamaroiroi anga i te au taeake irinaki ei nga tuanga angaanga takake mei tetai e tetai, kia akamanako ra tatou i te reira mei nga apotetoro rai ko Petero raua ko Paulo—koia oki, ei nga apainga taokotaiia. Na roto i teea mataara?
12. Akapeea ra tatou i te tavini anga ei rima rave no Iehova?
12 Ei aronga tutu evangeria, ka taangaanga tatou i tetai ua atu tu karape o te apiianga tei rauka ia tatou ei akakeu i te ngakau o to tatou au Mase. 3:27; 12:25) Na roto i taua mataara ra, te irinaki nei tatou e ka tauturu te reira ia ratou kia vai ua rai ei au pipi na Karaiti. I roto i nga angaanga roa ai e rua—te tutu aere anga ki te tangata e ‘te matuapuru anga i tetai e tetai’—e akangateiteianga manea tikai to tatou kia tavini ei rima rave no Iehova.—Gala. 6:10.
tangata tupu ki te karere akamaroiroi no runga i te Patireia o te Atua. Na roto i taua mataara ra, te irinaki nei tatou e ka tauturu te reira ia ratou kia riro mai ei au pipi na Karaiti. Inara, ka taangaanga katoa tatou i tetai ua atu tu kite karape e tetai atu au apinga aroa tei rauka ia tatou i te tauta anga kia akamaroiroi atu i to tatou au taeake irinaki ki te au tuatua meitaki e te au angaanga ka tauturu ia ratou—te akaarianga i to te Atua aroa ua. (“E Aroa Takinga Meitaki atu i Tetai e Tetai”
13. Eaa ra te ka tupu me unui tatou ki muri i ‘te matuapuru anga i tetai e tetai’?
13 Kua raurau atu a Paulo i tona au taeake irinaki e: “Ma te aroa taeake ra e aroa takinga meitaki atu tetai i tetai. I te akaari anga i te akangateitei ki tetai e tetai e oronga i te akaraanga.” (Roma 12:10) E tika rava e, e riro ana te aroa takinga meitaki no to tatou au taeake ei akamaroiroi ia tatou kia rave i te angaanga ma te ngakau katoa ei au tavini no to te Atua aroa ua. Kua kite tatou e me puapingaia a Satani i te tapu ia tatou mei ‘te matuapuru anga i tetai e tetai,’ ka rauka iaia i te akaapikepike i to tatou turanga taokotai. (Kolo. 3:14) Te ka aru mai, me kare tatou e taokotai, ka taki atu te reira ki te maroiroi kore i roto i te angaanga tutu aere. Kua kite meitaki a Satani e e tai ua tuanga o ta tatou angaanga ka anoanoia aia kia takino, mei te takino anga rai e tai ua peau o tetai manu i na te reira tuatua ai, kia tapu ia tatou mei te akatupu anga i ta tatou angaanga.
14. Koai ma te ka puapingaia mei ta tatou ‘matuapuru anga i tetai e tetai’? Oronga mai i tetai akaraanga.
14 Ka riro te ‘matuapuru anga i tetai e tetai’ ei puapinga, kare anake ua e no te aronga tei rauka ia ratou to te Atua aroa ua, mari ra e te aronga katoa e oronga ra i te reira. (Mase. 11:25) Ka akamanako ana ei akaraanga, ia Ryan raua ko Roni, e nga tokorua i Illinois, i Marike. I to raua kite anga e e au anere ua atu au kainga o te au taeake Kite tei takoreia e te Uriia Katrina, no te aroa taeake kua akakeuia raua kia akaruke i ta raua ngai angaanga, kia akaatea mei roto i to raua apatimani, kia oko i tetai terera takere, maani akaou i te reira kia tau ei ngai nooanga no raua, e kua aere atu raua ki Louisiana e 1,400 kiromita te mamao. Kua tere atu i te okotai mataiti to raua noo anga i reira i te akapou i to raua taime, to raua maroiroi, e ta raua au apinga ei tauturu i to raua au taeake. “Na te piri anga ki roto i teia angaanga i akapiri vaitata atu iaku ki te Atua,” i na Ryan ei, e 29 ona mataiti. “Kua kite tikai au i to Iehova akono anga i tona iti tangata.” Kua karanga katoa rai a Ryan e: “Na te angaanga kapiti anga ki te au taeake pakari atu, e maata ua atu taku i kite no runga i te akono anga i te au taeake. Kua kite katoa au e e maata te angaanga na matou te au mapu i roto i to Iehova akaaerenga.” Kua karanga katoa a Roni, e 25 ona mataiti e: “Rekareka tikai au e kua rauka iaku te tauturu atu i etai ke. I mataora roa atu au i teianei mei taku i kite ana i roto i toku oraanga. Kua kite au e i te au mataiti ka aereia, ka puapinga ua atu rai au mei teia tupuanga meitaki tikai.”
15. Eaa te au tumuanga tau no tatou kia angaanga ua atu rai ei au tavini no to te Atua aroa ua?
15 E tika rava e, ka apai mai te akono anga i te au akauenga a te Atua kia tutu aere i te tuatua meitaki e te akamaroiroi anga i te au taeake irinaki, i te au akameitakianga ki te katoatoa rava. Te aronga ta tatou e tauturu ra ka akamatutuia ratou i te pae vaerua, e ka rekareka to tatou ngakau no tei oronga tatou i te tauturu. (Anga. 20:35) Ka maata roa atu te pumaana o te putuputuanga katoa, i te au mema tataki tai e akaari ra i to ratou inangaro i roto i etai ke. Tetai katoa, ka riro te aroa e te takinga meitaki e akaari ra tatou no tetai e tetai ei akataka meitaki ia tatou ei au Kerititiano mou. Kua akakite a Iesu e: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioa. 13:35) Ei runga ravao, ka akangateiteiia to tatou Metua aroa, ko Iehova, i te mea e te akaataia maira tona anoano kia akamatutu i te aronga tei anoano i te reira, na roto i tona au tavini i te enua nei. No reira, e au tumuanga tau tikai no tatou, kia taangaanga i ta tatou apinga aroa ‘i te matuapuru anga i tetai e tetai mei te tavini meitaki o to te Atua aroa ua’! Ka akapera ua atu ainei rai koe i te rave anga i te reira?—E tatau ia Ebera 6:10.
Maara Ainei ia Koe?
• Na roto i teea au mataara e akamatutu ana a Iehova i tona au tavini?
• Eaa te au mea tei orongaia mai kia tatou?
• Eaa tetai au mataara ka rauka ia tatou i te tauturu i to tatou au taeake irinaki?
• Eaa te ka akakeu ia tatou kia taangaanga ua atu rai i ta tatou apinga aroa ‘i te matuapuru anga i tetai e tetai’?
[Au Uianga Apii]
[Au Tutu i te kapi 13]
Te taangaanga ra ainei koe i taau ‘apinga aroa’ ei tavini i etai ke atu me, ei akamareka ua ia koe uaorai?
[Au Tutu i te kapi 15]
E tutu aere ana tatou i te tuatua meitaki ki etai ke e te tauturu i te au taeake Kerititiano
[Tutu i te kapi 16]
Kua tau kia akameitakiia te aronga angaanga tauturu no to ratou tu akaatinga uaorai