Rekareka i Roto i te Angaanga Akariro i te Tangata ei Pipi
Rekareka i Roto i te Angaanga Akariro i te Tangata ei Pipi
‘Ka aere, e akariro i to te pa enua ei pipi.’—MATA. 28:19.
1-3. (a) Eaa ra te manako o te manganui no runga i te rave anga i te au apii Pipiria? (e) Eaa te au uianga ta tatou ka akamanako?
“I APII mai ana au ki tetai pamiri no Pakitani mai e 11 epetoma i topa,” i tata ai tetai tuaine e tavini ra i roto i te pupu tuatua reo Hindi i Marike. “Inara,” i nana ai, “kua riro mai matou ei au taeake. Kua pururu ua toku roimata i te akamanako anga i teia pamiri te ka oki atu ki Pakitani kare e roa atu ana. Kare toku aue e no te mea kare au e kite akaou ia ratou mari katoa ra, no te rekareka taku i kite i te apii anga ia ratou no runga ia Iehova.”
2 Mei teia tuaine rai, kua kite ana ainei koe i te rekareka o te apii anga i te Pipiria ki tetai tangata? Kua kite ana a Iesu e tana au pipi i te anere mataiti mua i te rekareka maata i roto i te angaanga akariro i te tangata ei pipi. I te oki anga mai te au pipi e 70 ta Iesu i tereni ma te ripoti rekareka, kua “rekareka atura” a Iesu uaorai i te vaerua tapu. (Luka 10:17-21) Pera katoa i teia tuatau, e manganui te kite ana i te rekareka maata i te akariro anga i te tangata ei pipi. Ko te akapapu mai i teia koia oki, i te mataiti 2007, kua rave te au papuritia angaanga pakari e te mataora mei te ono e te apa mirioni au apii Pipiria i te marama okotai!
3 Kareka ra tetai au papuritia, kare i kite ake i taua tu rekareka ra o te rave anga i tetai apii Pipiria. Penei kare etai i rave ake i tetai apii Pipiria i te au mataiti ua akenei. Eaa ra te au akaaoanga ta tatou e aro atura ia tatou e tauta ra kia rave i tetai apii Pipiria? Ka akapeea ra tatou e autu ei i taua au akaaoanga ra? E eaa ra te tutaki ka rauka ia tatou me rave tatou i te ka rauka ia tatou i te akono anga i ta Iesu akauenga e: ‘Ka aere, e akariro i to te pa enua katoa ei pipi’?—Mata. 28:19.
Au Akaaoanga te ka Akangere ia Tatou i te Rekareka
4, 5. (a) E akapeea ana te tangata e manganui i tetai au tuanga o teianei ao me ariu mai? (e) Eaa te au akaaoanga ta te au papuritia e aro atura i tetai au ngai ke mai?
4 I roto i tetai au tuanga o teianei ao, e ariki rekareka ua mai ana te tangata i ta tatou au puka e te inangaro ua i te apii i te Pipiria kia tatou. Kua tata mai tetai tokorua no Autireria e tavini poto ua ra i Tamapia e: “E tika rai taua au tuatua ra. E parataito uua tikai a Tamapia no te tutu aere. E mea umere tikai te akakitekite aere anga i runga i te mataara! E aravei mai ana te tangata ia matou, tetai papaki e pati mai ana i te au itiu tikai o te au makatini e inangaro ra ratou.” I tetai mataiti ua akenei, kua tere atu i te 200,000 apii Pipiria ta te au taeake e te au tuaine o Tamapia i rave—koia oki, tere atu i te okotai apii Pipiria i te papuritia okotai.
5 Inara i tetai au ngai ke mai, penei e ngata ana i tetai au papuritia i te oronga i te au puka e te rave putuputu i te au apii Pipiria. No teaa ra? Te maataanga o te taime, kare te tangata i te kainga me topapa atu te papuritia i to ratou ngutupa, e te aronga tei te kainga ua, penei kare tikai ratou e mareka mai ana i teia mea e akonoanga. Penei i utuutuia mai ratou i roto i tetai ngutuare kare e irinaki ana i roto i te akonoanga me kore kua vinivini ratou i te tu tika kore e kiteaia ra i roto i te akonoanga pikikaa. E manganui te tangata tei mate i te roiroi e tei akapueu rikiriki aereia e te au tiaki pikikaa. (Mata. 9:36) Te marama uaia atura i reira e, ka matakite rai taua aronga ra i te piri mai ki roto i tetai uriurianga Pipiria.
6. Eaa ra te au tu ngata ta tetai au papuritia e kite ana?
6 E tuke te akaaoanga a tetai au papuritia akarongo mou e aro atu ana te ka riro ei akangere ia ratou i te rekareka. Noatu e i maroiroi ana ratou i roto i te angaanga akariro i te tangata ei pipi, te riro nei ra te tu makimaki me kore te au tu ngata o te ruaineanga ei arai ia ratou. Ka akamanako katoa ana i te au tu ngata ta tatou ka apai mai ki runga ia tatou uaorai. Ei akaraanga, e manako tukatau kore ana rai koe i te rave i tetai apii Pipiria? Penei e te manako ra koe mei ia Mose rai i te akaue anga a Iehova iaia kia tuatua kia Pharao. Kua tuatua atura a Mose e: ‘E Iehova, kare au i te tangata vaa tukatau, mei muatangana mairai.’ (Exo. 4:10) Ko te mea tei piri vaitata atu ki te manako tukatau kore koia oki ko te mataku e kare e puapingaia. Penei ka manamanata tatou e ko te kore tetai tangata e riro mai ei pipi no te mea kare tatou i te puapii tukatau. Kia kore te reira e tupu mai, penei ka iki tatou eiaa e rave i tetai apii. Ka akapeea ra tatou e autu ei i taua au akaaoanga tei taikuia akenei?
Akapapa i Toou Ngakau
7. Eaa tei akakeu ia Iesu i roto i tana angaanga orometua?
7 Te takainga mua koia oki kia akapapa i to tatou uaorai ngakau. Kua akakite a Iesu e: “No te ki oki o te ngakau i tuatuaʼi te vaa.” (Luka 6:45) I roto i tana angaanga orometua na te inangaro ngakau tae i roto i te turanga o etai ke i akakeu ia Iesu. Ei akaraanga, i tona kite anga i te turanga pae vaerua kino o te au taeake ngati Iuda, “aroa atura aia ia ratou.” Kua karanga atura aia ki tana au pipi e: “Te maata ua nei te mou, . . . e pure kotou i te Atu o te mou, kia unga mai aia i tetai aronga ei rave i taua mou nana ra.”—Mata. 9:36-38.
8. (a) Eaa ta tatou ka akamanako meitaki? (e) Eaa ta tatou ka mou mai mei te tuatua a tetai vaine apiipii Pipiria?
8 Ia tatou e piri ra ki roto i te angaanga akariro i te tangata ei pipi, e mea meitaki rava kia akamanako oonu tikai tatou i te puapinga tei rauka ia tatou no te mea kua akapou tetai tangata i tona taime i te apii anga i te Pipiria kia tatou. E akamanako katoa i te tangata ta tatou ka aravei i roto i te angaanga orometua e te puapinga ka rauka ia ratou i te akarongo mai i te karere ta tatou e akakite ra. Kua tata tetai vaine ki te opati manga o te enua e noo ra aia e: “Te inangaro nei au i te akakite atu i toku rekareka maata i te Au Kite e apii nei iaku i toku kainga. Kua kite au e i tetai taime kare ratou e mareka roa ana iaku no te mea e maata roa taku au uianga e e taroaroa ana au ia ratou. Inara e akakoromaki tikai to ratou iaku e te inangaro i te apii mai iaku i ta ratou i kite. Te akameitaki nei au ia Iehova e ia Iesu e kua aere mai teia aronga ki roto i toku oraanga.”
9. I akara tamou a Iesu ki runga i teaa, e ka akapeea ra tatou i te aru anga iaia?
9 Te tika ua ra e, kare te katoatoa i ariki ana i ta Iesu au apiianga. (Mata. 23:37) Kua aru tetai papaki iaia no tetai tuatau poto ua e oti kua patoi i tana au apiianga e ‘kare i aru akaou iaia.’ (Ioa. 6:66) Inara, kare a Iesu i akatika ana i te tu mareka kore o tetai aronga kia akatupu mai i te manako e e puapinga kore ua tana karere. Noatu kare i ua mai ana te maataanga o te ua tana i ruru, kua akara tamou rai a Iesu ki runga i te meitaki tana e rave ra. Te kite ra aia e kua tau te mou no te kokoti e e rekareka maata tikai tei rauka iaia i te tauturu anga i taua kokotianga ra. (E tatau ia Ioane 4:35, 36.) I to te akara ua ki te turanga uua kore i roto i tetai au ngai, ka rauka ainei ia tatou kia akara tamou atu ki te mou te ka rauka mai i roto i te au ngai i tukuia mai kia tatou? Ka makitoro marie ana tatou e ka akapeea tatou i te akono marie anga i taua tu papu ra.
Ruru ma te Akakoro kia Kokoti
10, 11. Eaa ra taau ka rave i te akono marie anga i toou rekareka?
10 Te akakoroanga o te tangata tanutanu me ruru i te ua, koia oki kia kokoti i te mou. To tatou akakoroanga rai ia me tutu aere koia oki, kia akamata i tetai au apii Pipiria. Peea i reira me e akapou putuputu ana koe i te taime i roto i te angaanga orometua inara, e tokoiti ua rai tangata taau e aravei ana i te kainga me kore, kare te aronga e oki ra koe i te atoro, i te kainga? Ka riro teia ei mea mareka kore. Ka tuku ainei koe i te au no te angaanga orometua? Kare! E manganui te tangata e araveiia nei rai no te taime mua na roto i teia mataara tei raveia mai ana no tetai tuatau roa.
11 Inara, kia rauka i te akono marie i toou rekareka, ka rauka ainei ia koe kia akamaata atu i taau au ravenga no te tutu aere, penei te ka kapiti mai i tetai au mataara ke atu e taeria ai te tangata? Ei akaraanga, kua tamata ana ainei koe i te akakitekite aere ki te tangata i runga i te mataara me kore i ko i ta ratou ngai angaanga? Ka rauka ainei ia koe i te ringi i te tangata me kore kia pati atu i te numero terepaoni o te aronga taau i tutu atu ana i te karere o te Patireia kia rauka ia koe i te tuatua akaou atu kia ratou? Na te tauta ua atu anga rai e te rave anga i tetai au akatanotanoanga i roto i taau angaanga orometua, ka kite koe i reira i te rekareka me kitea ia koe tetai tangata te ka ariu mai ki te karere o te Patireia.
Akakoromaki i te Tu Mareka Kore
12. Eaa ra ta tatou ka rave me kare te maataanga o te tangata i roto i te ngai e angaanga ra tatou e mareka mai ana?
12 Peea me kare te maataanga o te tangata i taau ngai e angaanga ra e mareka mai ana i teia mea e akonoanga? Ka rauka ainei ia koe i te akatano i taau tuatua ki tetai manako te ka mareka mai ratou? Kua tata atu te apotetoro ko Paulo ki te au taeake irinaki i Korinetia e: “I te ngati Iuda ra, kua akangati Iuda katoa au . . . I te aronga ture kore ra, mei te mea e kare aku ture, kare ra mei te mea kare aku e ture i te Atua.” Eaa ra to Paulo akakoroanga? “Kua akaarite au iaku uaorai i te au mea katoa i te tangata ravarai nei,” i tuatua ai aia, “kia ora iaku tetai papaki i taua au ravenga katoa nei.” (1 Kori. 9:20-22) Ka rauka ainei ia tatou kia tuatua atu i tetai au tumu manako, ta te tangata i roto i ta tatou ngai e angaanga ra ka inangaro i te akarongo mai? E maata te aronga kare a ratou akonoanga, te inangaro ra i te akameitaki atu i te turanga o to ratou pirianga i roto i te pamiri. Penei e te kimi katoa ra ratou e eaa tikai te akakoroanga o te oraanga. Ka rauka ainei ia tatou kia oronga atu i te karere o te Patireia na roto i te mataara ka mareka mai ratou?
13, 14. Ka akapeea ra e rauka ai ia tatou i te akamaata atu i te rekareka e rauka mai ana ia tatou mei roto i te angaanga akariro i te tangata ei pipi?
13 E maata ua atu te au papuritia tei akamaata atu i te rekareka i rauka ia ratou mei te angaanga akariro i te tangata ei pipi, i roto i te au ngai kare te maataanga o te tangata e mareka mai ana. Akapeea ra? Na te apii anga i tetai reo ke. Kua kitea mai e tetai tokorua e 60 tuma o raua mataiti e, e tauatini ua atu au tamariki apii Tinito e to ratou au pamiri e noo ra i roto i te ngai e angaanga ra te putuputuanga. “No teia tumu nei, kua akamaroiroiia maua kia apii i te reo Tinito,” i karanga ai te tane. “Noatu e maata te taime ka pou i te au ra i te apii i taua reo ra,” inara i nana ai, “e maata te au apii Pipiria tei rauka mai ki te au tangata Tinito i roto i ta maua ngai e angaanga ra.”
14 Noatu e kare e rauka ia koe i te apii i tetai reo ke, ka rauka ra ia koe i te taangaanga meitaki i te puka Good News for People of All Nations me aravei koe i te aronga e reo ke to ratou. Ka rauka katoa rai ia koe tetai au puka ke mai i roto i te reo o te au tangata taau ka aravei. E tika e e maata atu te taime e te tautaanga ka anoanoia i te tuatua atu anga ki te aronga e reo ke to ratou e te peu ke. Inara e akamaara i te kaveinga ka kiteaia i roto i te Tuatua a te Atua e: “Ko te ruru ma te akaperepere kore ra, e kokoti ïa ma te maata.”—2 Kori. 9:6.
Te O Maira te Putuputuanga Katoa
15, 16. (a) Eaa ra te putuputuanga katoa i o mai ei ki te angaanga akariro i te tangata ei pipi? (e) Eaa ra te tuanga a te aronga ruaine?
15 Inara, kare te akariro anga i te tangata ei pipi i akanooia ki runga i te au tautaanga a tetai tangata okotai ua. Mari ra, te o maira te putuputuanga katoa. Eaa ra te tumu? Kua akakite a Iesu e: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioa. 13:35) E tika rava e, me aere mai te aronga apiipii Pipiria ki te au uipaanga, e umere ua ana ratou i te tu aroa o ta tatou au akaputuputu anga. Kua tata tetai vaine apiipii Pipiria e: “E rekareka ua atu ana au i te aere ki te au uipaanga. E ariki ua mai ana te tangata iaku!” Kua akakite a Iesu e ko te aronga ka riro ei pipi nana ka patoiia e to ratou uaorai pamiri. (E tatau ia Mataio 10:35-37.) Inara, kua taputou mai aia e i roto i te putuputuanga, e maata to ratou au “taeake, e te tuaine, te metua vaine, e te tamariki” pae vaerua ka rauka.—Mare. 10:30.
16 To tatou au taeake e te au tuaine ruaine tikai, e tuanga puapinga ta ratou i roto i te tauturu anga i te aronga apiipii Pipiria kia tere ki mua i te pae vaerua. I roto i teea tu? Noatu kare e rauka ana i tetai aronga ruaine i te rave i tetai apii Pipiria, na roto i ta ratou tuatua akamaroiroi i ko i te au uipaanga putuputuanga, ka akamatutuia te akarongo o te aronga katoatoa e akarongo maira ia ratou. Na to ratou rekoti o te aaere anga na “te arataa tuatua-tika” e akamaata atu i te manea o te putuputuanga e te akavaitata mai i te aronga ngakau tika ki to te Atua akaaerenga.—Mase. 16:31.
Autu Anga i to Tatou Tu Mataku
17. Eaa ra ta tatou ka rave kia autu i te au manako tukatau kore?
17 Peea me te manako ra koe e kare koe e tukatau ana i te rave i tetai apii Pipiria? E akamaara e kua tauturu a Iehova ia Mose na te oronga anga i te vaerua tapu e tetai tokorua nona, koia oki i tona tuakana ko Aarona. (Exo. 4:10-17) Kua taputou a Iesu e ka tauturu te vaerua o te Atua i ta tatou angaanga tutu aere. (Anga. 1:8) Tetai, kua tataki rua a Iesu i te tono anga i te aronga angaanga kia tutu aere. (Luka 10:1) No reira, me te ngata ra ia koe i te rave i tetai apii Pipiria, e pure no te vaerua o te Atua kia oronga mai i te pakari e oti ka angaanga kapiti atu ei ki tetai tokorua te ka akamatutu ia koe e te ka riro te au mea tana i kite, ei tauturu ia koe. Ka akamaroiroiia to tatou akarongo kia akamaara e kua iki a Iehova i te tangata noa ua nei—“te mea parukaua o teianei ao”—kia akatupu i teia angaanga umere tikai.—1 Kori. 1:26-29.
18. Ka akapeea tatou e autu ei i te mataku e kare e rauka ia tatou i te tauturu i tetai tangata apiipii Pipiria?
18 Ka akapeea tatou e autu ei i te mataku e kare e rauka ia tatou i te tauturu i tetai tangata apiipii Pipiria? E mea meitaki kia akamaara tatou e kare te akariro anga i te tangata ei pipi i aite mei te tunu kai rai, e tei runga ua te puapinga e te puapinga kore o te reira i tetai tangata okotai ua—koia oki i te kuki. Mari ra, e maata atu i ta tatou uaorai au tautaanga te o maira. Na Iehova te tuanga puapinga maata rava atu, koia oki i te akavaitata mai anga i te tangata kiaia. (Ioa. 6:44) Ka rave tatou e etai atu i roto i te putuputuanga i ta tatou ka rauka, i te taangaanga anga i te ravenga karape o te apiianga, ei tauturu i te tangata apiipii kia tere ki mua. (E tatau ia 2 Timoteo 2:15.) E ka anoanoia te tangata apiipii kia taangaanga i tana i apii ei. (Mata. 7:24-27) Me akamutu tetai tangata i tana apii Pipiria, penei ka taitaia tatou. Te inangaro nei tatou e kia rave te tangata apiipii Pipiria i te ikianga tau, inara tei runga i te tangata tataki tai uaorai te “aaki i te tuatua iaia uaorai i te Atua ra.”—Roma 14:12.
Eaa ra te Tutaki?
19-21. (a) Eaa te au puapinga ka rauka ia tatou no te rave anga i te au apii Pipiria? (e) Eaa to Iehova manako no runga i te aronga pouroa e piri ra ki roto i te angaanga tutu aere?
19 Na te rave anga i te au apii Pipiria e tauturu ia tatou kia akamou i te manako ki runga i te kimi anga i te Patireia na mua. Ka akaoonu katoa atu te reira i te au tuatua mou o te Tuatua a te Atua ki roto i to tatou manako e to tatou ngakau. Eaa ra te apii Pipiria ka akatupu ei i teia? Te akamarama maira tetai painia ko Barak tona ingoa e: “Ka riro te rave anga i te au apii Pipiria ei akakeu ia koe kia riro ei tangata apiipii meitaki atu no te Tuatua a te Atua. Te kite nei au e ka anoanoia au kia akamatutu i toku uaorai irinakianga i mua ake ka tau ei au i te apii atu i tetai ke.”
20 Me kare koe e rave ana i tetai apii Pipiria, ko te aiteanga ainei i reira e kare taau tavinianga i te mea puapinga ki te Atua? Kare! E puapinga maata tikai kia Iehova ta tatou au tautaanga kia akapaapaa iaia. Pouroa te aronga e piri ra ki roto i te angaanga tutu aere anga e ‘oa rave angaanga no te Atua.’ Inara, ka apai mai te rave anga i tetai apii Pipiria i te rekareka maata ia tatou e kite ra e akapeea te Atua i te akatupu anga i te ua ta tatou i ruru. (1 Kori. 3:6, 9) “Ia koe e kite ra i tetai tangata apiipii Pipiria e tere ra ki mua i te pae vaerua,” i karanga ai tetai painia ko Amy tona ingoa, “ka ki ua toou ngakau i te akameitakianga maata no Iehova koia i akatika kia taangaangaia koe i te oronga anga i tetai apinga aroa umere tikai no taua tangata ra—te tikaanga kia kite ia Iehova e kia rauka te ora mutu kore.”
21 Ka riro te rave anga i ta tatou ka rauka i te akamata e i te rave i te au apii Pipiria, ei tauturu ia tatou kia akamou i te manako ki runga i te tavini anga i te Atua i teianei e ka akamatutu i to tatou manakonakoanga kia ora atu ki roto i te ao ou. Ma te tauturu a Iehova, penei ka rauka katoa ia tatou i te tauturu atu i te aronga e akarongo maira kia tatou. (E tatau ia 1 Timoteo 4:16.) E tumuanga tau tikai te reira no te rekareka!
Maara Ainei ia Koe?
• Eaa te au akaaoanga penei te ka arai i tetai papaki mei te rave anga i te au apii Pipiria?
• Eaa ra ta tatou ka rave me kare te maataanga o te tangata i roto i te ngai e angaanga ra tatou e mareka mai ana?
• Eaa te tutaki ka rauka ia tatou no te rave anga i tetai apii Pipiria?
[Au Uianga Apii]
[Au Tutu i te kapi 9]
Te akamaata atura ainei koe i taau au ravenga no te tutu aere, kia kitea mai te aronga ngakau tika?