To Iehova Tavini​—‘Kua Koia no ta Tatou Au Ara’

“Kua koia ra aia no ta tatou au ara ra, kua akaparuparuia aia no to tatou au kino . . . e no tona au puta i oraʼi tatou.”​—ISA. 53:5.

1. Eaa te ka tau kia akamaara tatou me akono tatou i te Akamaaraanga, e eaa te totou te ka tauturu ia tatou kia rave i te reira?

E AKONO ana tatou i te Akamaaraanga ei akamaara i te mate o Karaiti e kia maara ia tatou te au mea ravarai ta tona mate e tona tuakaouanga i akatupu. Te akamaara maira te Akamaaraanga ia tatou no runga i te akatikaanga i ta Iehova tutaraanga ngateitei, te akatapuanga i tona ingoa, e te akatupuanga i tona akakoroanga tei kapiti mai i to te tangata nei ora. Penei kare e totou i roto i te Pipiria tei akatutu meitaki atu i te atinga a Karaiti e ta te reira i akatupu, mei tei totouia e Isaia 53:3-12. Kua totou mai a Isaia i te au tu kino ta te Tavini ka kite e kua oronga mai i tetai au akakiteanga taka meitaki no runga i te mate o Karaiti e no runga i te au akameitakianga ta tona mate ka apai mai no tona au taeake akatainuia e tana “mamoe ke atu.”​—Ioa. 10:16.

2. E akapapuanga te totou a Isaia no teaa, e eaa ta te reira ka akatupu ki runga ia tatou?

² E itu anere mataiti i mua ake i to Iesu anauanga i te enua nei, kua akauru a Iehova ia Isaia kia totou e ka vai akarongo mou rai tona Tavini ikiia e tae ua atu ki te mate. E akapapuanga tikai teia tika no to Iehova irinakianga pu tikai i roto i te tu tiratiratu o tana Tamaiti. Ia tatou e akara matatio nei i teia totou, ka akapumaanaia i to tatou ngakau e ka akaketaketaia to tatou akarongo.

 “Akavaavaaia” e Kare “i Manako Meitakiia”

3. Eaa ra te tumu ka tau ei te ngati Iuda kia ariki atu ia Iesu inara, i akapeea ratou i te ariki atu anga iaia?

³ E tatau ia Isaia 53:3. E akamanako ua ana mei teaa ra te tu no te Tamaiti anau tai a te Atua kia akangere iaia i te rekareka o te tavini anga i te pae i tona Metua e kia aere mai ki te enua nei kia oronga i tona oraanga ei atinga ei akaora i te tangata mei te ara e te mate! (Phili. 2:5-8) Te akakoroanga o tana atinga koia oki kia rauka tikai te akakoreanga ara, tei riro te au atinga manu i raro ake te ture a Mose ei ata ua no te reira. (Ebe. 10:1-4) Kare ainei e ko te mea tau na te ngati Iuda tikai kia rave koia oki kia ariki e kia akangateitei i te Mesia ta ratou i tapapa mai ana? (Ioa. 6:14) Kareka ra kua “akavaavaaia” te Karaiti e te ngati Iuda e “kare aia i manako meitakiia” e ratou, mei ta Isaia i totou mai. Kua tata te apotetoro ko Ioane e: “I aere mai nei aia i ona tikai, kare ra tona iti-tangata tikai i āriki atu iaia.” (Ioa. 1:11) Kua akakite te apotetoro ko Petero ki te ngati Iuda e: “Na te Atua o to tatou ui tupuna ra, i akateitei i [“tona Tavini,” NW] ia Iesu; ko ta kotou i tuku nei, e kua akaruke i mua i te aroaro o Pilato, iaia i māro ra e, e tuku. Akaruke io nei kotou i te Tapu, e te Tuatua-tika.”​—Anga. 3:13, 14.

4. I akapeea a Iesu i te matau anga ki te maki?

⁴ Kua totou katoa a Isaia e kua akakoroia rai a Iesu kia ‘matau oki i te tumatetenga’ koia oki i te maki. I te tuatau o tana angaanga orometua, kua roiroi ana a Iesu i tetai au atianga, kare ra oki e akakiteanga e, i maki ana aia. (Ioa. 4:6) Inara, kua matau rai aia ki te maki o te aronga tana i tutu atu. Kua akaaroa aia ia ratou e kua akaora atura i te manganui. (Mare. 1:32-34) E kua akatupu atura a Iesu i te totou e akakite ra e: “Kua rave tika ra aia i to tatou paruparu, e kua maranga iaia to tatou aue.”​—Isa. 53:4; Mata. 8:16, 17.

Mei te Mea ra e Kua “Pāpāia e te Atua”

5. Eaa ra te manako o te ngati Iuda e manganui no runga i to Iesu mate, e eaa ra teia i akamaata roa atu ei i tona taitaia?

⁵ E tatau ia Isaia 53:4e. Kare te manganui o to Iesu au taeake e marama ana i te tumu no tona taitaia e tona mate. Kua irinaki ratou e te akautunga ra te Atua iaia mei te mea ra e te papaia ra aia ki tetai maki rikarika. (Mata. 27:38-44) Kua akaapa te ngati Iuda ia Iesu i te akakino i te Atua. (Mare. 14:61-64; Ioa. 10:33) Tera ra, kare a Iesu te tangata ara e kare katoa i te tangata akakino i te Atua. Kareka ra i te akamanako anga i tona aroa maata no tona Metua, kare e kore e kua riro tikai te manako e ka mate aia no te akakino i te Atua ei akamaata roa atu i tona taitaia ei Tavini no Iehova. Kua inangaro puareinga ua aia i te kauraro ki to Iehova anoano.​—Mata. 26:39.

6, 7. I roto i teea tu i ‘akaparuparu’ ei a Iehova i tona Tavini akarongo mou, e eaa ra teia i riro ei i te apai mai i te ‘marekaanga’ ki te Atua?

⁶ Kare tatou e poitirere ana i te tatau i te totou a Isaia e karanga ra e ka manako etai ia Karaiti e kua “pāpāia e te Atua” inara penei ka poitirere tatou i ta te totou e akakite ra e: “Kua mareka a Iehova uaorai i te akaparuparu anga iaia.” (Isa. 53:10, NW) I te mea e kua akakite katoa a Iehova e: “Ka akara ana i toku tavini, . . . tei ikiia e au ra, kua rekareka rava toku ngakau iaia,” akapeea ra i rauka ai ia Iehova kia ‘mareka i te akaparuparu anga iaia’? (Isa. 42:1) I roto i teea tu ka tau kia karangaia e kua apai mai teia i te rekareka kia Iehova?

⁷ Kia marama i teia tuanga o te totou, e mea tau kia akamaara tatou e, i te akaao anga i ta Iehova tutaraanga ngateitei, kua akatupu a Satani i te ekoko no runga i te tu tiratiratu o to te Atua  au tavini i te rangi e i te enua nei. (Iobu 1:9-11; 2:3-5) Na te vai akarongo mou ua anga e tae ua atu ki te mate, kua oronga a Iesu i te pauanga meitaki tikai ki te akaaoanga a Satani. No reira, noatu e kua akatika a Iehova ia Satani kia tamate ia Karaiti, kare rava e ekoko e kua taitaia a Iehova i te kite anga i tona Tavini ikiia e tamateia ra. Inara, kua riro te akara anga i te tu akarongo mou pu tikai o tana Tamaiti i te apai mai i te marekaanga maata kia Iehova. Tetai, kua riro katoa te kite anga i te au puapinga ta te mate o tana Tamaiti ka apai mai ki te au tangata tei tataraara, ei akarekareka maata roa atu ia Iehova.​—Luka 15:7.

‘Koia no ta Tatou Au Ara’

8, 9. (a) I akapeea ra a Iesu i te ‘koia anga no ta tatou au ara’? (e) Akapeea ra a Petero i te akapapu mai anga i teia?

⁸ E tatau ia Isaia 53:6. Mei te mamoe ngaro, kua ori aere ua te tangata ara nei, i te kimi anga kia akaoraia mei te maki e te mate no te ara a Adamu. (1 Pete. 2:25) No te tu apa ua kare okotai o ta Adamu uanga e rauka kia oko akaou mai i tei ngaro ia Adamu. (Sala. 49:7) Inara no tona aroa maata, “kua akairi a Iehova ki runga iaia i te utunga o ta tatou katoa nei au ara,” koia oki tana Tamaiti akaperepere e tona Tavini ikiia. Na te akatika anga kia ‘koia aia no ta tatou au ara’ e kia “akaparuparuia aia no to tatou au kino,” kua apai a Karaiti i ta tatou au ara ki runga i te rakau tamamae e kua mate iora no tatou.

⁹ Kua tata te apotetoro ko Petero e: “I kapikiiaʼi oki kotou; i mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae: Ko tei maranga iaia uaorai ta tatou ara i tona uaorai kopapa ki runga i te [“rakau,” NW], kia akono tatou, ko tei matara mai i te ara ra, i te tuatua-tika.” I reira, i te taiku mai anga i te totou a Isaia, kua karanga katoa mai a Petero e: “‘No tona oki karavarava i oraʼi’ kotou.” (1 Pete. 2:21, 24; Isa. 53:5) Kua akatuera teia i te mataara no te aronga ara kia akaongi akaouia ki te Atua, mei ta Petero i akakite akaou atu rai e: “I mate na oki te Mesia uaorai i te matenga okotai no te ara, te tangata tuatua-tika no te aronga tuatua-tika kore, kia tae tatou iaia i te Atua ra.”​—1 Pete. 3:18.

‘Aratakiia Mei te Punua Mamoe ki te Tainga’

10. (a) I akapeea a Ioane Papetito i te akataka mai anga ia Iesu? (e) Eaa ra i tau meitaki ei te au tuatua a Ioane?

¹⁰ E tatau ia Isaia 53:7, 8. I te kite anga a Ioane Papetito ia Iesu e aere maira, kua karanga atura aia e: “Ka akara na i te Punua-mamoe a te Atua, ko tei apai ke atu i te ara a to te ao!” (Ioa. 1:29) I te tuatua anga no runga ia Iesu ei Punua Mamoe, penei te manako ra a Ioane i te au tuatua a Isaia e: “I aratakiia aia mei te punua mamoe ki te tainga.” (Isa. 53:7) “Kua oronga aia i tona oraanga e tae ua atu ki te mate,” i tata ei a Isaia. (Isa. 53:12, NW) Te mea umere, i te po i akanoo ei a Iesu i te Akamaaraanga no tona mate, kua oronga atura aia i tetai kapu uaina ki te au apotetoro e 11 e kua tuatua atura e: “Ko toku ïa toto teia, no te koreromotu ou ra, tei akamaringiia no te tangata e manganui, kia matara te ara.”​—Mata. 26:28.

11, 12. (a) Eaa ta te tu inangaro puareinga ua o Isaaka kia orongaia iaia ei atinga, e akatutu maira no runga i te atinga a Karaiti? (e) Eaa te ka tau kia akamaara tatou no runga ia Aberahama Maata, koia a Iehova, me akono tatou i te Akamaaraanga?

¹¹ Mei ia Isaaka i taito, kua inangaro puareinga ua a Iesu i te oronga i tetai atinga nana ki runga i te atarau a Iehova. (Gene. 22:1, 2, 9-13; Ebe. 10:5-10) Noatu kua akatika puareinga ua a Isaaka kia akaatingaia aia, ko Aberahama ra oki tei titau kia oronga i te atinga. (Ebe. 11:17) Mei te reira katoa, kua ariki puareinga ua a Iesu e ka mate aia, inara ko Iehova tikai te Tumu o te akanoonooanga no te oko. Ko te atinga a tana Tamaiti, e akakiteanga te reira i to te Atua aroa oonu no te tangata nei.

¹² Kua akakite a Iesu uaorai e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioa. 3:16) Kua tata te apotetoro ko Paulo e: “Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.” (Roma 5:8) No reira, ia tatou e akangateitei ra ia Karaiti na te akamaara anga i tona mate, auraka rava tatou kia akangaropoina e naai i akatupu i teia akanoonooanga koia oki na te Aberahama Maata,  ko Iehova. Te akono nei tatou i te Akamaaraanga kia apai mai i te akapaapaaanga kiaia.

Apai mai te Tavini i “te Turanga Tuatua Tika ki te Tangata e Manganui”

13, 14. I akapeea ra to Iehova Tavini i te apai mai anga “i te turanga tuatua tika ki te tangata e manganui”?

¹³ E tatau ia Isaia 53:11, 12. * No runga i tona Tavini ikiia, kua akakite a Iehova e: “Ka riro aia, toku tavini tuatua tika, ei apai mai i te turanga tuatua tika ki te tangata e manganui.” Na roto i teea mataara? Te oronga maira te irava 12 i tetai tamanakoanga ki taua pauanga ra. “E no te aronga ara kua akariro aia [te Tavini] iaia ei arai.” I anau pouroaia mai te uanga o Adamu ei “aronga ara,” e no reira kua rauka maira te ‘utunga no te ara,’ koia oki, ko te mate. (Roma 5:12; 6:23) Ka anoanoia te akaongianga i rotopu ia Iehova e te au tangata ara. Manea tikai te akataka mai anga te totou a Isaia pene 53 e i akapeea a Iesu i te riro anga ei ‘arai’ no te tangata ara nei, i te na ko anga e: “E te pāpā i auiaʼi to tatou, tei runga ïa iaia; e no tona au puta i oraʼi tatou.”​—Isa. 53:5.

¹⁴ Na te apai anga i ta tatou ara ki runga iaia uaorai e na te mate anga no tatou, kua apai mai a Karaiti “i te turanga tuatua tika ki te tangata e manganui.” Kua tata a Paulo e: “E mea meitaki oki i te Metua e, ei roto iaia [Karaiti] te ki o te au mea katoa nei e vai atu ei; E kia ongi oki iaia te au mea katoa i roto iaia uaorai i te au i rauka i te toto o tona [“rakau tamamae anga,” NW]; ko to te rangi, e to te enua nei oki, kia ongi rai iaia.”​—Kolo. 1:19, 20.

15. (a) Koai ma ra “to te rangi” au mea tei taikuia mai e Paulo? (e) Koai anake ua tei tikaia kia kai i te oroa o te Akamaaraanga, e no teaa ra?

¹⁵ Ko “to te rangi” au mea tei akaongiia kia Iehova na roto i te toto akamaringiia o Karaiti koia oki ko te au Kerititiano akatainuia tei kapikiia kia tutara e Karaiti i te rangi. Ko te au Kerititiano tei “rauka katoa te kapiki anga no te rangi maira” kua akatikaia ratou “kia ora, i te tuatua-tika.” (Ebe. 3:1; Roma 5:1, 18) I reira a Iehova e ariki ei ia ratou ei au tamariki vaerua nana. Na te vaerua tapu e akakite kia ratou e ‘e aronga tuanga ratou e te Mesia,’ tei kapikiia kia riro mai ei ui ariki e ei kau taunga i roto i tona Patireia i te rangi. (Roma 8:15-17; Apo. 5:9, 10) Ka riro mai ratou ei tuanga no te Iseraela vaerua, te “Iseraela o te Atua” e ka apaiia ratou ki roto i te “koreromotu ou.” (Iere. 31:31-34; Gala. 6:16) Ei au mema no te koreromotu ou, e tikaanga to ratou kia kai i te oroa o te Akamaaraanga, kapiti mai i te kapu uaina muramura, ta Iesu i akakite e: “Teianei kapu, ko te koreromotu ïa i toku nei toto, e akamaringiia no kotou nei.”​—Luka 22:20.

16. Eaa ra “to te enua nei” au mea, e na roto i teea mataara i orongaia ai tetai turanga tuatua tika kia ratou i mua ia Iehova?

¹⁶ Ko “to te enua nei” au mea koia oki ko te au mamoe ke atu a Karaiti, tei rauka te manakonakoanga no te oraanga mutu kore i te enua nei. Ka apai katoa mai to Iehova Tavini ikiia i tetai turanga tuatua tika no teia aronga, i mua i te aroaro  o Iehova. No to ratou akarongo i roto i te atinga oko o Karaiti no reira ‘kua oreiia to ratou kakau, e kua akateateaia i te toto o te Punua-mamoe,’ e ka akatika a Iehova ia ratou ei aronga tuatua tika, eiaa ei au tamariki vaerua, mari ra ei au taeake nona, i te oronga anga i te manakonakoanga umere tikai o te ora atu anga mei roto i “te mate maata.” (Apo. 7:9, 10, 14; Iako. 2:23) No te mea kare ratou i roto i te koreromotu ou e no tei kore i rauka te manakonakoanga no te rangi kare teia au mamoe nei e kai i te oroa Akamaaraanga inara, ka aere ratou ei aronga akarakara ua ma te tu akangateitei.

Kia Akameitakiia a Iehova e Tona Tavini Rekarekaia!

17. Akapeea te apiianga o te au totou a Isaia tei akamouia ki runga i te Tavini, i te tauturu anga ia tatou kia akapapa i to tatou manako no te Akamaaraanga?

¹⁷ Kua riro te akara matatio anga i te au totou a Isaia tei akamouia ki runga i te Tavini ei mataara meitaki tikai i te akapapa i to tatou manako no te Akamaaraanga o te mate o Karaiti. Kua tauturu te reira ia tatou kia “akara tamou kia Iesu i te tumu e te akaoti i to tatou akarongo.” (Ebe. 12:2) Kua apii tatou e kare te Tamaiti a te Atua e meameaau ana. Kare i aite mei Satani, e mea mareka roa nana kia apiiia e Iehova, i te ariki anga iaia ei Atu Ngateitei. No reira kua akatutu mai aia e eaa tana ka rave i roto i te akatereanga ou o te au mea nei me ‘akatinamou aia i te tuatua-tika i te enua nei.’ (Isa. 42:4) Te tu toto mapu tana i akaari i roto i te angaanga tutu aere o te Patireia, ei “turama no te etene,” e akamaara anga te reira ki tana au pipi kia tutu aere i te tuatua meitaki ma te maroiroi ki to te pa enua.​—Isa. 42:6.

18. Eaa ra te totou a Isaia ka akaki ei i to tatou ngakau ki te akameitakianga no Iehova e no tona Tavini akarongo mou?

¹⁸ Kua riro katoa te totou a Isaia ei akaoonu atu i to tatou marama no te akaatingaanga maata ta Iehova i rave i tona tono mai anga i tana Tamaiti ki te enua nei kia tamamaeia e kia mate no tatou. Kua mareka rava a Iehova, eiaa i te kite anga i tana Tamaiti e tamamaeia ra, mari ra, i te akara anga i to Iesu tu akarongo mou pu tikai e tae ua atu ki te mate. E mea tau e kia mareka rai tatou mei ia Iehova, i te ariki pouroa anga i ta Iesu i rave i te akapapu anga e e pikikaa a Satani, e i te akatapu anga i te ingoa o Iehova, i te akatika anga i reira i te tikaanga tikai o Tana tutaraanga ngateitei. Tetai katoa, kua apai a Karaiti i te au ara ravarai ki runga iaia uaorai e kua mate no tatou. Na taua mataara ra, kua akatuera mai aia i tetai tikaanga no te anana iti o tona au taeake akatainuia e no te mamoe ke atu kia rauka tetai turanga tuatua tika i mua ia Iehova. Ia tatou e akaputuputu maira no te Akamaaraanga, kia ki rava to tatou ngakau i te akameitakianga no Iehova e no tona Tavini akarongo mou.

[Tataanga Rikiriki i Raro]

Na te Akamanako Akaou Anga

• I roto i teea tu i ‘mareka ai’ a Iehova i te ‘akaparuparuia anga’ tana Tamaiti?

• I akapeea a Iesu i te ‘koia anga no ta tatou ara’?

• I akapeea te Tavini i te ‘apai mai anga i te turanga tuatua tika ki te tangata e manganui’?

• Akapeea ra te apiianga i te au totou no runga i te Tavini i te akapapa anga i toou manako e toou ngakau no te Akamaaraanga?

[Au Uianga Apii]

[Tutu i te kapi 26]

“I akavaavaaia aia, e kare aia i manako meitakiia e tatou”

[Tutu i te kapi 28]

“Kua oronga aia i tona oraanga e tae ua atu ki te mate”

[Tutu i te kapi 29]

Aere te “mamoe ke atu” ki te Akamaaraanga ei aronga akarakara ua ma te tu akangateitei