E Mea Ora te Tuatua a Iehova

Au Manako Maata mei te Puka o Apokalupo​—⁠II

EAA te vai maira i mua no te aronga e akamori ra i te Atua ko Iehova e no te aronga kare e akamori ana iaia? Eaa ra te turanga o Satani e to tana au temoni no te tuatau ki mua? Eaa te au akameitakianga ta te au tangata kauraro ka kite a te tuatau o te Tutaraanga Tauatini Mataiti a Karaiti? Te akakiteia maira te au pauanga ki teia e etai atu au uianga puapinga i roto ia Apokalupo 13:1–22:21. * Tei roto i teia au pene te au orama openga e 9 o te au orama e 16 tei tae atu ki te apotetoro ko Ioane, vaitata atu ki te openga o te anere mataiti mua T.N.

“E ao tona to tei tatau, e to te aronga e akarongo i teianei tuatua totou,” i tata ai a Ioane, “e tei akono i tei tataia ki roto ra.” (Apo. 1:3; 22:7) Ka riro te tatau anga e te taangaanga anga i ta tatou i kite mei te puka o Apokalupo i te akakeu i to tatou ngakau, akaketaketa i to tatou akarongo i roto i te Atua e tana Tamaiti ko Iesu Karaiti, e i te oronga mai i tetai manakonakoanga manea tikai no tatou i te tuatau ki mua. *​—Ebe. 4:12.

RIRINGIIA NGA KAPU E ITU O TE RIRI O TE ATUA KI VAO

(Apo. 13:1–16:21)

“I riri ana te pa enua,” e akakite ra a Apokalupo 11:18, “e kua kitea mai [to te Atua] riri, e te tuatau . . . e mate ei . . . te aronga i mate ei to te ao ra.” I te akakite mai anga i te tumu i riri ei te Atua, te akaari maira te varu o te orama i te au angaanga a “tetai puaka taae . . . e itu ona mimiti, raungauru oki tara.”​—Apo. 13:1.

I roto i te iva o te orama kua kite a Ioane i “te Punua-mamoe ki runga i te maunga ra i Siona” e tei vaitatao iaia, e “okotai anere e a ngauru ma a i te tausani.” “I okoia ïa aronga no roto i te tangata nei.” (Apo. 14:1, 4) Aru mai e au akakiteanga a te angera. I roto i te orama ka aru mai, kua kite a Ioane i etai “puke angela toko itu, e tei ia ratou nga mate openga e itu ra.” Te papu ua ra e, na Iehova uaorai i akaue i teia au angera kia riringi i “nga kapu [“e itu,” NW] i ki i te riri o te Atua” ki runga i te au tuanga ke ke o to Satani ao. E au akakiteanga e te au akamatakiteanga to roto i te au kapu no te au akavaanga ta te Atua ka rave. (Apo. 15:1; 16:1) Te oronga maira teia nga orama e rua i tetai au akatakaanga, no runga i tetai au akavaanga ke atu a te Patireia e piri atura ki te toru o te mate e te akatangi anga i te itu o te pu.​—Apo. 11:14, 15.

Pauia te Au Uianga Tuatua Tapu:

13:8​—Eaa ra “te buka ora a te Punua-mamoe”? E puka akatutu ua teia, ko te au ingoa i roto, no te aronga ua ka tutara ma Iesu Karaiti i roto i tona Patireia i te rangi. Te kapiti maira te reira i te au ingoa o te au Kerititiano akatainuia e noo ra rai i te enua nei, tei rauka ia ratou te manakonakoanga no te oraanga i te rangi.

13:11-13​—Akapeea ra te puaka taae e rua ona tara i aite ei mei te taae rai, e i akatopa mai ei i te ai no runga i te rangi? Teia puaka taae e rua ona tara ko te Mana Tutara o Peritane e Marike. I te mea kua tuatua mai aia mei te taae rai, te akaari maira te reira e e taangaanga ana aia i te au tamatakuanga, te taomianga, e te ta ua ei maro i te tangata kia ariki i tana tutaraanga. E akatopa mai ana aia i te ai mei runga i te rangi i roto i te tu e kua akapikikaa ua aia e e peroveta mou aia, i te karanga anga e kua autu aia ki rungao i te au tumu o te kino i roto i nga tamaki e rua o te ao, o te 20 anere mataiti e kua upokotu aia ki rungao i te tutaraanga Komuniti.

16:17​—Eaa ra “te mareva” tei riringiia mai te itu o te kapu ki runga? Te akatutu maira “te  mareva” i te aerenga manako o Satani, i “te vaerua [tu manako] e angaanga ririnui nei i roto i te aronga akarongo kore.” Te akaeaia nei teia reva poitini e to Satani akatereanga katoa o te au mea nei.​—Ephe. 2:2.

Au Apiianga no Tatou:

13:1-4, 18. Te akatutu maira “tetai puaka taae” i te au kavamani tangata e kake maira “mei raro i te moana,” koia oki, mei roto mai i te au urupu tangata oripu ua e manganui. (Isa. 17:12, 13; Dani. 7:2-8, 17) Ko teia puaka taae ta Satani i anga e i akamana, e numero 666 tona, e akaketaketa maira i te maataanga tikai o to te reira tu apa ua. Na te marama anga tikai e eaa teia puaka taae, e tauturu ia tatou kia kore e aru i te reira ma te va ua e kia kore katoa e akamori i te reira mei ta te tangata e manganui e rave nei.​—Ioa. 12:31; 15:19.

13:16, 17. Noatu te au tu ngata e kite nei tatou i te rave anga i taua au angaanga ra o te au ra ravarai, mei te ‘oko atu e te oko mai,’ eiaa tatou e akatika i te puaka taae kia akatere i to tatou oraanga. Te aite ra rai te ariki anga i ‘te akairo o te puaka taae ki roto i to tatou rima katau, e ki runga i to tatou rae’ ki te akatika anga i te puaka taae kia akaaere i ta tatou ka rave me kore kia akakeu i to tatou aerenga manako.

14:6, 7. Te apii maira te akakiteanga a te angera e kia rapurapu tatou i te akakite aere i te tuatua meitaki o te Patireia o te Atua tei akanooia. E mea tau kia tauturu tatou i ta tatou aronga apiipii Pipiria kia akatupu i te mataku akangateitei no te Atua, e kia akakaka ia Iehova.

14:14-20. Me oti ‘te mou o te enua nei’ koia oki te mou o te aronga tei akaoraia, kua tae i reira te taime no te angera kia uri mai i te “vine o te ao nei,” ‘ki roto i te taomianga maata vine ra, o te riri o te Atua.’ Taua vine ra​—to Satani akatereanga o te au kavamani i rungao i te tangata nei e to te reira “au kaui” ua kikino​—ka akapouia te reira e mutu kore ua atu. Kia ngaueue kore rai tatou auraka kia akakeuia e te vine o te ao nei.

16:13-16. Te akatutu maira te “vaerua viivii” i te au tuatua pikikaa a te temoni, ei akapapu e kia kore te au ariki o teianei ao e taruri keia me riringiia mai te au kapu e itu o te riri o te Atua, ei akanauru ia ratou kia patoi atu ia Iehova.​—Mata. 24:42, 44.

16:21. I te openga o teia ao e vaitata maira, ko te akakiteanga i ta Iehova au akavaanga ki runga i to Satani akatereanga kino, penei te kapiti maira te reira i te au tuatua pakari tikai no runga i ta te Atua akavaanga, kare e kore e, tei akatutuia mai e te vai toka. Noatu ra, ka akakino ua atu rai te tangata i te Atua.

TUTARA TE ARIKI UPOKOTU

(Apo. 17:1–22:21)

E tuanga viivii tikai a “Babulonia Maata,” te patireia o te au akonoanga pikikaa o teianei ao, no to Satani ao kino. Te akatutu maira te 11 o te orama iaia ei “vaine akaturi maata”​—ei vaine akono tau kore tikai—​‘e noo ra ki rungao i tetai puaka taae kutekute.’ Ka akapou takiriia aia e “nga tara okotai ngauru” o te puaka taae tikai e apai ra iaia. (Apo. 17:1, 3, 5, 16) I te akaaite anga i te vaine akaturi ki tetai “oire maata,” te akakite maira te orama tei aru mai i tona inga, e te akakite viviki maira ki te iti tangata o te Atua kia ‘aere ke mai ki vao.’ Te aue nei te manganui i te inga o taua oire maata ra. Inara, e rekareka maata to te rangi, no ‘te akaipoipo anga o te Punua-mamoe.’ (Apo. 18:4, 9, 10, 15-19; 19:7) I roto i te 13 o te orama, kua aere atura te akaoro o tetai “oroenua teatea” e tamaki atu ki to te pa enua. E kua akapou atura aia i to Satani ao kino.​—Apo. 19:11-16.

Peea i reira no runga “i taua ovi taito ra, koia oki te diabolo ra, ko Satani”? Aea ra aia e ‘uriia ai ki roto i te roto ai’? Ko tetai tumu manako te reira o te 14 o te orama. (Apo. 20:2, 10) Te akaari maira nga orama openga e rua i te tu o te oraanga i te tuatau o te Tauatini Mataiti. I te “eeuanga” e akaopenga atura, kua kite atura a Ioane i ‘tetai vai ora, e vai taʼe oki i rotopu i te arataa i taua oire ra,’ e kua orongaia mai tetai patianga umere tikai ki “tei kaki” i taua vai ra.​—Apo. 1:1; 22:1, 2, 17.

Pauia te Au Uianga Tuatua Tapu:

17:16; 18:9, 10​—Eaa ra “te au ariki o te ao nei” i aue ei i te vaine ta ratou uaorai i aru ei? Ko te tumu o ta ratou aue koia oki no to  ratou uaorai noinoi. No muri ake i te pou o Babulonia Maata, i kite ei te au ariki o te ao e mei teaa tikai tona puapinga maata kia ratou. Kua oronga aia i tetai kotoeanga kia akaraanga e te tau ua ra ta ratou au angaanga kino. Kua tauturu katoa a Babulonia Maata ia ratou i te akakeu i te au mapu kia aere ki te tamaki. Ei runga ravao, e tuanga maata tikai tana i roto i te akavarenga anga i te tangata kia kauraro.

19:12​—Akapeea ake e kare atu e tangata mari ua ko Iesu uaorai tei kite i tona ingoa tei kore i akakiteia mai? Te akaraanga, ko te aiteanga o teia ingoa, no runga te reira i te taoonga e te au tikaanga ngateitei mei tei akakiteia i roto ia Isaia 9:5, ta Iesu e taangaanga nei i te ra o te Atu. Kare e tangata i kite i teia ingoa mari ua, koia uaorai, no te mea e mea takake rava tona au tikaanga ngateitei e koia anake ua te ka marama i te aiteanga o taua tu taoonga teitei ra. Inara, te oronga ra a Iesu i tetai o teia au tikaanga ngateitei nei ki te au mema o tona pupu vaine akaipoipo, i te ‘tataanga ki rungao ia ratou i taua ingoa ou nona ra.’​—Apo. 3:12.

19:14—Koai te ka aru ia Iesu i te tuatau o Aramakito? Kapitiia mai ki roto i “te au nuku o te rangi” te ka piri atu kia Iesu i roto i te tamaki a te Atua koia oki, ko te au angera e pera katoa te aronga akatainuia tei autu e tei rauka ke ana to ratou tutaki i te rangi.​—Mata. 25:31, 32; Apo. 2:26, 27.

20:​11-15​—Noai ma te au ingoa tei tataia i roto i “te buka ora”? Ko teia puka tei roto te au ingoa o te aronga katoatoa te ka rauka te ora mutu kore​—te au Kerititiano akatainuia, te au mema o te aronga maata rava, e te au tavini akarongo mou o te Atua te ka kite i te ‘tuakaouanga o te aronga tuatua-tika.’ (Anga. 24:15; Apo. 2:10; 7:9) Te aronga te ka ora mai i roto i te ‘tuakaouanga o te aronga tuatua-tika kore’ ka tataia to ratou ingoa ki roto i “te buka ora” mei te mea ua ra e ka aru ratou i te “au tuatua i tataia ki roto i taua nga buka” ikuikuanga ra te ka akatueraia i te tuatau o te Tauatini Mataiti. Inara, kare te au ingoa i tataia ki roto i te mea tinamou. Ka tinamou ra te au ingoa o te aronga akatainuia me akapapu ratou i to ratou turanga akarongo mou e tae ua atu ki te mate. (Apo. 3:5) Te au ingoa o te aronga te ka noo i te enua nei ka tinamou te reira me autu ratou i te timataanga openga me tae ki te openga o te Tauatini Mataiti.​—Apo. 20:7, 8.

Au Apiianga no Tatou:

17:3, 5, 7, 16. “Te pakari no runga maira” ka tauturu te reira ia tatou kia marama i “te tuatua ngaro o teianei vaine, e no te puaka taae [kutekute] e apai iaia ra.” (Iako. 3:17) Kua akamata mai teia puaka taae akatutu ua ei League of Nations e i muri mai kua akaora akaouia mai ei United Nations. Kare ainei e riro te akamaramaanga o teia tuatua ngaro ei akakeu ia tatou kia tutu aere i te tuatua meitaki o te Patireia o te Atua e kia akakitekite aere i te ra akavaanga a Iehova ma te toto mapu?

21:1-6. Ka rauka ia tatou kia papu tikai e ka riro mai te au akameitakianga tei totouia no te tutaraanga o te Patireia ei mea tika tikai. No teaa ra? No te mea te karangaia ra no runga i te reira au akameitakianga e: “Kua tupu.”

22:1, 17. Te akatutu maira te “vai ora, e vai taʼe oki” i ta Iehova au akanoonooanga no te akaora akaou mai anga i te au tangata kauraro mei te ara e te mate. Ka rauka tetai tuanga o taua vai ra i teianei. Eiaa tatou kia ariki anake ua i te patianga kia ‘rave mai i te vai ora’ mari ra kia oronga maroiroi katoa atu tatou i te reira ki etai ke!

[Au Tataanga Rikiriki i Raro]

[Tutu i te kapi 5]

E au akameitakianga umeremere tikai ta te au tangata kauraro ka kite i raro i te tutaraanga a te Patireia!