Ka Maro Ainei Koe i Toou Uaorai Inangaro?

E RUA nga tamariki e kangakanga ra. Kua rave mai tetai tamaiti i tana apinga kangakanga akaperepere mei ko mai i tetai tamaiti, e kua vaa maata atu e, “Naku tena apinga!” Mei te meangiti anga mai, e akaari ana te au tangata apa i te tu karapii. (Gene. 8:21; Roma 3:23) Pera katoa, te akamaroiroi nei te maataanga o te tangata i roto i teianei ao i te tu karapii. Me ka kopae tatou i teia tu, e tauta pakari tatou i te patoi i te au manako karapii. Me kare tatou e akapera, ka viviki ua tatou i te akaturori i tetai ke e te akaparuparu i to tatou pirianga kia Iehova.​—Roma 7:​21-23.

I te akamaroiroi anga ia tatou kia akamanako i te tu o ta tatou au angaanga ka akatupu ki runga i tetai ke, kua tata mai te apotetoro ko Paulo e: “E tika te au mea katoa iaku, kare ra e tau katoatoa kia rave: e tika te au mea katoa iaku, kare ra te au mea katoa e tamaata i te meitaki.” Kua tuatua katoa a Paulo e: “Auraka kotou kia riro ei turorianga.” (1 Kori. 10:​23, 32) No runga i te au mea te o maira to tatou uaorai inangaro, ko te mataara pakari te reira kia ui kia tatou uaorai e: ‘Te inangaro ra ainei au i te tuku ua atu i toku uaorai inangaro, me ka akakinoia mai te au o te putuputuanga? Kua papa ainei au i te aru i te au kaveinga o te Pipiria, noatu e e ngata i te rave anga i te reira?’

Iki Anga i te Angaanga

Te maataanga o te au tangata te manako ra i ta ratou ikianga no te angaanga e e ikianga na ratou uaorai, e meangiti ua ta te reira ka akatupu ki runga i tetai ke, me kare, kare rava. Ka akamanako ana ra i te tupuanga o tetai tangata pitiniti i roto i tetai taoni meangiti i Marike Apatonga. Kua kiteaia aia e e tangata pere moni e te kai kava. Inara, ko tei tupu i tona  apiianga i te Pipiria ma te Au Kite o Iehova, kua tere aia ki mua i te pae vaerua e kua taui i te tu o tona oraanga. (2 Kori. 7:1) I tona akakite anga i tona inangaro i te tutu aere i te ngai tangata ma te putuputuanga, kua akamaroiroi meitaki tetai tangata pakari iaia kia akamanako i te tu o tana angaanga. No tetai tuatau roa i roto i te taoni, koia te tangata maata e oko aere ana i te kava to​—e maata te au mea e taangaangaia ana teia apinga, inara i roto i taua ngai ra e kairoia ana te reira ki te vai venevene e e inuia ana no te akakoroanga kia kona.

Kua marama taua tangata ra e me ka tutu aere aia i te ngai tangata e te oko ra rai i taua apinga ra, ka akakinoia te ingoa o te putuputuanga, e ka akakinoia tona pirianga ki te Atua. Noatu e e aka ngutuare tangata tana ka akono, kua akamutu aia i te okooko i te kava. Te okooko pepa nei aia ei akono i tona ngutuare tangata. Ko teia tangata, tana vaine, e rua o ta raua nga tamariki e rima, kua papetitoia i teianei. Te tutu maroiroi nei ratou i te tuatua meitaki ma te tapupu mataku kore.

Iki Anga i te Au Oa

Te piri anga ki te aronga kare i te Kerititiano mou, e ikianga uaorai ainei te reira me te o maira ainei te au kaveinga Pipiria? Kua inangaro tetai tuaine i te aere ki tetai pati ma tetai tangata mapu kare i te Kerititiano mou. Noatu e kua akamatakiteia atu no te au kino, kua manako aia e e tikaanga tona kia aere atu, e no reira kua aere ra aia ki te pati. Kare i roa ana i tona tae atu anga, kua orongaia mai kiaia tetai apinga inu tei kairoia ki te vairakau tamoe. Kua ara mai aia i tetai au ora i muri mai e kua kite e kua tauatiia aia e tona oa pikikaa.​—Akaaite ia Genese 34:2.

Noatu e kare te pirianga ki te aronga kare i te Kerititiano mou e akatupu i te tumatetenga mei tera rai, te akamatakite maira ra te Pipiria e: “Ko tei kapiti katoa i tona aerenga ki to te aronga pakari ra, ka pakari katoa ïa: ko tei kapiti ra ki te aronga neneva ra, e mate ïa.” (Mase. 13:20) Kare e ekokoanga no runga i te reira​—te ikianga i te au oa kino te tuku atura ia tatou ki roto i te kino! “E kite mamao te tangata pakari i te kino, e kua pipini iora,” i karanga ai a Maseli 22:3, e “te aere ua atura te kite kore, e mate atura.” Ka akakino to tatou au oa ia tatou e to tatou pirianga ki te Atua.​—1 Kori. 15:33; Iako. 4:4.

Te Kakau e te Akamanea

E taui putuputu ana te au tu akaraanga o te kakau. Inara, kare e taui ana te au kaveinga o te Pipiria no runga i te kakau e te akamanea anga. Kua raurau a Paulo ki te au vaine Kerititiano e “kia akamanea ia ratou uaorai i te kakau e tau ra, ma te akatietie kore, e te akono meitaki”​—e kaveinga tau katoa rai no te au tane. (1 Timo. 2:9) Kare a Paulo e tuatua nei e eiaa roa kia manea te tu o te kakau, kare katoa aia e karanga nei e kia aiteite ua te tu o te kakau ta te au Kerititiano  ka inangaro. Akapeea ra te tu tau ua? Kua akataka mai e tai tikitinari i te tu tau ua e e “tu rangatira mei te tu akatietie e te akaparau . . . te tu tau o te kakau, te tuatua, me kore te tu o te tangata.”

Ka anoanoia tatou kia ui kia tatou uaorai e: ‘Ka rauka ainei iaku i te karanga e e tu tau toku me te maro nei au i toku tikaanga kia akamanea na roto i tetai tu te akara matariki maira te au tangata iaku? Te akatupu ra ainei te tu o toku akamanea i te manako ekoko ki te tangata no runga iaku me kore i te au tu tau taku e aru ra?’ Ka rauka ia tatou i te kopae ‘i te akaturorianga’ i roto i teia turanga na te ‘akono anga i ta tatou uaorai au mea, e kia akono katoa ra i to etai ke ra au mea.’​—2 Kori. 6:3; Phili. 2:4.

Au Manamanata i te Pae Pitiniti

Te tupu mai anga tetai au manamanata no runga i tetai angaanga kino me kore pikikaa i roto i te putuputuanga i Korinetia, kua tata a Paulo e: “Eaa kotou i kore ei i akakoromaki i te kino? eaa kotou i kore ei i akakoromaki kia akangereia?” Kua ako a Paulo i te au Kerititiano kia tuku puareinga ua atu i te manamanata, e auraka e apai i tetai taeake ki te akavaanga. (1 Kori. 6:​1-7) Kua aru pakari tetai taeake i Marike i teia akoanga. Kua tupu te pekapeka i rotopu ia raua ko tona pu Kerititiano no runga i te moni ka tutakiia mai kiaia. I te aru anga i te au aratakianga a te Tuatua Tapu, kua aravei te nga taeake no tetai au atianga, inara kare te manamanata i rauka ana i te akatikatikaia. I te openga ra, kua apai raua i te manamanata “ki te putuputuanga,” tei komonoia e te aronga pakari Kerititiano.​—Mata. 18:​15-17, NW.

Te mea tangi ra, kare rai te manamanata i rauka ana i te akatikatikaia. I muri ake i te au pure, kua iki te tangata angaanga i te akangaropoina atu i te maataanga o te moni tana i manako ka tutakiia mai kiaia. No teaa ra? Kua karanga aia i muri mai e, “Te keia nei teia pekapeka anga i toku mataora e te kaimoumou nei i te taime puapinga te ka rauka i te taangaangaia i roto i te au angaanga pae vaerua.” I muri ake i te rave anga i taua ikianga ra, kua mataora akaou te taeake, e kua kite mai aia i ta Iehova akameitakianga no runga i tana tavini anga.

Roto Katoa i te Au Mea Rikiriki

Na te kore anga e maro i to tatou uaorai inangaro, ka apai katoa mai te reira i te au akameitakianga i roto i te au mea rikiriki. I te ra mua o tetai uruoaanga tapere, kua tae vave mai tetai nga tokorua painia e kua tapao i te nga nooanga ta raua e inangaro tikai ra. I te akamataanga te porokaramu, kua aere rapurapu mai tetai aka pamiri e maata te tamariki, ki roto i te ngai uruoaanga tei ki i te tangata. I te kite atu anga raua i te pamiri e kimi aere ra i tetai ngai nooanga, kua oronga atu te nga tokorua i to raua nooanga. Kua rauka i reira i te pamiri i te noo kapiti. I tetai nga mea ra i muri mai i te uruoaanga, kua tae mai ki nga painia tetai reta akameitakianga no ko mai i taua pamiri ra. Kua akamarama mai te reta i to ratou maromaroa i to ratou tae reiti mai anga ki te uruoaanga. Kua taui vave te manako ki te mataora e te ngakau akameitaki no te tu takinga meitaki o nga tokorua painia.

Me rauka ia tatou te atianga, kia tuku puareinga ua atu tatou i to tatou uaorai inangaro kia tauturu atu i tetai ke. Na te akaari anga i te aroa “kare i kimi i te meitaki nona uaorai,” te tauturu ra tatou i te akamou i te au i roto i te putuputuanga e ki to tatou au tangata tupu. (1 Kori. 13:5) Te mea puapinga rava atu ra, te akono ra tatou i to tatou pirianga oa kia Iehova.

[Tutu i te kapi 20]

Te tuku puareinga ua ra ainei koe i toou uaorai inangaro me iki koe i toou kakau?

[Tutu i te kapi 20, 21]

Ka oronga puareinga ua ainei koe i toou nooanga no toou au taeake?