Kia Riro ta Iesu Tuatua ei Akatuke i Toou Tu

“Ko ta te Atua i tono maira, ko ta te Atua rai tuatua tana e tuatua ra.”​—IOA. 3:34.

1, 2. Te akaaiteia ra te au tuatua a Iesu i roto i te Tuatua i runga i te Maunga ki teaa, e eaa ka tau ei kia karanga tatou e i akatumuia te reira ki runga i ‘ta te Atua tuatua’?

KO TETAI taimana maatamaata roa atu tei tipuia e tei kiteia i teia tuatau koia oki ko te Star of Africa, e 530 carat te teiaa. E toka oko maata tikai! Inara ko tei puapinga maata rava atu, ko ta Iesu au tuatua i roto i te Tuatua i runga i te Maunga, tei aite rai mei te toka oko maata. Kare i reira i te mea poitirere no te mea ko Iehova te Tumu o te au tuatua a Karaiti! I te tuatua anga no runga ia Iesu, te na ko ra te Pipiria e: “Ko ta te Atua i tono maira, ko ta te Atua rai tuatua tana e tuatua ra.”​—Ioa. 3:34-36.

² Noatu e e apa ora rai tei pou i te oronga anga i te Tuatua i runga i te Maunga, tei roto ra i reira e 21 au taikuanga no roto i e varu au puka o te au Tuatua Tapu Epera. No reira kua akatumu ngaueue koreia te reira ki runga i ‘ta te Atua tuatua.’ Ka akara ana tatou i teianei e ka akapeea e rauka ai ia tatou i te taangaanga i etai o teia au tuatua puapinga ka kiteaia i roto i teia akoanga karape a te Tamaiti akaperepere a te Atua.

E Akaau na Mua ki to Taeake

3. I muri ake i te akamatakite anga i tana au pipi no runga i te au kino o te akamou riri, eaa te akoanga ta Iesu i oronga?

³ Ei au Kerititiano, te mataora nei tatou e te akamoeau nei no te mea kua rauka ia tatou te vaerua tapu o te Atua, e te kapiti maira tona au ua i te rekareka e te au. (Gala. 5:22, 23) Kare a Iesu e inangaro ana i tana au pipi kia ngere i to ratou turanga au e te mataora, no reira kua akamatakite aia ia ratou no runga i te au kino o te akamou riri, te ka taopenga mai ki te mate. (E tatau ia Mataio 5:21, 22.) Aru mai kua akakite aia e: “E teianei, kia  apai koe i taau apinga oronga ua ki te atarau, e kua manako iora koe i reira e, e ara ta to taeake ia koe na: Vaio atu i to apinga i mua i te atarau, e akamata i te aere e ongi i to taeake, ka aere ei ka apai i taau apinga.”​—Mata. 5:23, 24.

4, 5. (a) Eaa ra te “apinga oronga ua” e taikuia ra i roto i ta Iesu tuatua tei rekotiia i roto ia Mataio 5:23, 24? (e) Mei teaa tikai ra te puapinga kia akaau ki tetai taeake tei akaririia?

⁴ Ko te “apinga oronga ua” ta Iesu i taiku mai koia oki ko tetai ua atu atinga tei orongaia i ko i te iero i Ierusalema. Ei akaraanga, e mea puapinga roa te au atinga manu no te mea i taua taime ra e tuanga te reira no te akamorianga e orongaia ra kia Iehova e tona iti tangata. Inara, kua akaketaketa mai a Iesu i tetai apinga puapinga maata rava atu​—ko te akaau anga ki tetai taeake tei akaririia, i mua ake ka oronga ai i tetai apinga aroa ki te Atua.

⁵ No reira, eaa te apiianga ka rauka mai ia tatou mei teia tuatua a Iesu? Kare e ekoko e ko to tatou pirianga ki etai ke, ka akatuke maata te reira i to tatou pirianga kia Iehova. (1 Ioa. 4:20) E tika rava e ko te au atinga e orongaia ana ki te Atua i te au tuatau taito e mea puapinga kore ua te reira me kare te tangata e oronga ra i te reira e takinga meitaki ana i tona au tangata tupu.​—E tatau ia Mika 6:6-8.

Ka Anoanoia te Tu Akaaka

6, 7. Eaa te tumu ka anoanoia ai te tu akaaka i te tauta anga kia akatupu akaou i te pirianga au ki te taeake ta tatou i akariri atu?

⁶ Ko te akaau anga ki tetai taeake tei akaririia, kare e kore e ka riro ei timata i to tatou tu akaaka. Kare te aronga akaaka e taumaro ana me kore e tauetono ana ki to ratou taeake irinaki i te tauta anga kia akanoo i to ratou uaorai tikaanga. Ka akatupu te reira i tetai turanga kino​—tei aite ki tei tupu ana i rotopu i te au Kerititiano i Korinetia i taito. No runga i taua turanga, kua akakite te apotetoro ko Paulo i teia manako akaaraara e: “E teianei, e ara tikai tei roto ia kotou na, i te mea te akava na kotou ia kotou uaorai. Eaa kotou i kore ei i akakoromaki i te kino? eaa kotou i kore ei i akakoromaki kia akangereia?”​—1 Kori. 6:7.

⁷ Kare a Iesu e karanga ana e kia aere tatou ki ko i to tatou taeake kia akapapu ua kiaia e kua tika tatou e koia tei tarevake. To tatou akakoroanga, tikaanga tikai kia akatupu akaou i te pirianga au. Kia akaau, ka anoanoia tatou kia akakite tika e mei teaa tikai to tatou manako. Te anoano katoaia ra tatou kia akamanako e kua mamae rai tetai ao mai tangata. E me kua tarevake tatou, papu ka inangaro tatou kia tataraara na roto i te tu akaaka.

Me ‘te Akapekapeka ra to Mata Katau ia Koe’

8. E akakite poto ua mai no runga i te au tuatua a Iesu tei rekotiia i roto ia Mataio 5:29, 30.

⁸ I roto i tana Tuatua i runga i te Maunga, kua oronga a Iesu i tetai akoanga meitaki tikai no runga i te tu akono tau. Kua kite aia e ka riro te au mero o te kopapa apa ua ei akatupu i te akakeuanga kino ki runga ia tatou. No reira kua tuatua a Iesu e: “E te pekapeka na koe i toou mata katau, e koiti, e akaruke ke atu: e meitaki oki koe me mate tetai oou melo, i to kopapa katoa kia uriia ki roto i te po. E te  pekapeka na koe i toou rima katau, e tipu, e akaruke ke atu: e meitaki oki koe me mate tetai oou melo, i toou kopapa katoa kia uriia ki roto i te po.”​—Mata. 5:29, 30.

9. Akapeea ra to tatou “mata” me kore to tatou “rima” i te ‘akapekapeka anga,’ koia oki i te akaturori anga ia tatou?

⁹ Ko te “mata” ta Iesu i tuatua mai te akatutu maira te reira i te maroiroi me kore i te tu kite kia akamou i to tatou manako ki runga i tetai apinga, e te “rima” te piri atura te reira ki ta tatou e rave ana ki to tatou rima. Me kare tatou e matakite, penei ka ‘akapekapeka’ teia au mero kopapa ia tatou koia oki ka akaturori ia tatou kia akamutu i te ‘aaere anga ma te Atua.’ (Gene. 5:22; 6:9) Me timataia tatou kia akarongo kore ia Iehova i reira ka anoanoia tatou kia rave i tetai ikianga pakari, mei te koiti anga rai i tetai mata me kore i te tipu anga i tetai rima na roto i te tu akatutu ua.

10, 11. Eaa te ka tauturu ia tatou kia kopae i te ainga tau kore?

¹⁰ Ka akapeea ra e rauka ai ia tatou kia tapu i to tatou mata mei te akara ua anga i te au mea akono tau kore? “Kua papau au i te koreromotu i oku nei mata,” i karanga ai te tangata mataku Atua ko Iobu. “Eaa ra au ka akara atu ei ki te paretenia?” (Iobu 31:1) E tangata akaipoipo a Iobu tei akakoro ngaueue kore kia kore e aati i te au ture akono tau a te Atua. Tau anga tikai ko te reira to tatou tu noatu kua akaipoipo tatou e me kare. Kia kopae i te ainga tau kore, ka anoano tatou i te aratakianga a te vaerua tapu o te Atua, te ka akatupu i te tu akono meitaki i roto i te aronga tei inangaro i te Atua.​—Gala. 5:22-25.

¹¹ E rauka ai i te kopae i te ainga tau kore, penei e mea meitaki kia ui kia tatou uaorai e, ‘Te akatika ra ainei au i toku mata kia akatupu i te anoano no te au mea tau kore ka kitea vave uaia i roto i te au puka, i runga i te tivi, me kore i te Internet?’ Kia akamanako katoa tatou i teia au tuatua a te pipi ko Iakobo e: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara; e kia rave akaopeia te ara ra, anau maira tana ko te mate.” (Iako. 1:14, 15) Tera te aiteanga, mei te mea e ka “akara ua atu” tetai tei akatapuia ki te Atua ma te akakoroanga tau kore i tetai tane me kore i tetai vaine, ka anoanoia aia kia rave i tetai au tauianga pakari mei te mea rai e te koiti ra aia i tona mata e te titiri ra i te reira.​—E tatau ia Mataio 5:27, 28.

12. Eaa te akoanga a Paulo te ka riro ei tauturu ia tatou kia tamaki atu i te au anoano tau kore?

¹² No te mea e ka riro te taangaanga tau kore anga i to tatou rima ei aati i to Iehova au turanga tau, ka anoanoia tatou kia vai viivii kore ua ma te ngaueue kore. No reira e mea tau kia akarongo tatou ki te akoanga a Paulo e: “Ka tamate i to kotou au melo i te au mea o teianei ao; te akaturi, te tuatua viivii, te anoano viivii ra, te inangaro tika kore, e te noinoi apinga, e akamori idolo oki te reira.” (Kolo. 3:5) Ko te kupu “tamate” te akaketaketa maira kia tauta pakari i te tamaki atu i te au anoano tau kore o te kopapa.

13, 14. Eaa ra i puapinga ai kia kopae i te au manako e te au angaanga tau kore?

¹³ E rauka ai i te akaora i tona oraanga, kare e kore e ka akatika ua tetai tangata kia tipuia tetai mero ona. E mea puapinga rava kia ‘akaruke atu’ i te mata e te rima na roto i te tu akatutu ua, kia rauka ia tatou te kopae i te au aerenga manako e te au angaanga tau kore te ka akangere ia tatou i te akaperepereanga a Iehova. Ko te mataara okotai ua rai e ora mai ei i te akapouanga mutu kore tei akatutuia mai e Keena koia oki, kia vai viivii kore ua i te pae manako, i te pae akono tau e te pae vaerua.

¹⁴ No tei anau araia mai e no te apa ua, ka anoanoia te tautaanga pakari i te akono marie anga i te tu viivii kore. “Te moto nei ra au i taku kopapa kia vi,” i karanga ai a Paulo, “ko te riro ua aea oki au, ko tei ako ia etai ke ra, ei tangata kite koreia mai.” (1 Kori. 9:27) No reira kia ngaueue kore tatou i te akono anga i ta Iesu ako no runga i te tu akono tau, e kia kore rava e akatika ia tatou uaorai kia rave i tetai ua atu au tu e akaari maira i te tu mareka kore no tana atinga oko.​—Mata. 20:28; Ebe. 6:4-6.

 “Ka Oronga”

15, 16. (a) I akapeea a Iesu i te akanoo anga i tetai akaraanga no te tu oronga? (e) Eaa tikai te aiteanga o ta Iesu au tuatua i rekotiia i roto ia Luka 6:38?

¹⁵ Te akatupu ra ta Iesu au tuatua e tana akaraanga meitaki rava i te tu oronga ua. Kua akatutu mai aia i te tu oronga ua i te aere mai anga ki te enua nei kia puapingaia te tangata apa ua nei. (E tatau ia 2 Korinetia 8:9.) Kua akangere puareinga ua a Iesu iaia uaorai i te turanga kaka i te rangi kia riro mai ei tangata e kia oronga i tona oraanga no te au tangata ara nei, tetai papaki o ratou ka rauka te apinga nui i te rangi ei aronga tuanga i roto i te Patireia. (Roma 8:16, 17) E kua akamaroiroi tika atura a Iesu i te tu oronga ua i te na ko anga e:

¹⁶ “Ka oronga, e ka rauka ta kotou; e ki te aite, e taomiia, e ruruia, e maringi ua atu, na te tangata e riringi mai ki roto i to kotou kakau. Ko te aite ta kotou e aite atu, ko ta kotou rai ïa kia akaaiteia mai.” (Luka 6:38) Te ‘riringi ki roto i te kakau’ te tou ra te reira ki te peu matauia a te aronga okooko kia akaki i te kakau o te aronga ka oko, tei ruruia ei vairanga no te au apinga ta ratou ka apai. Penei ka riro to tatou uaorai tu oronga ua i te apai mai i tetai tutaki meitaki, penei i te taime e ngere ra tatou.​—Kohe. 11:2.

17. I akapeea a Iehova i te akanoo anga i te akaraanga meitaki roa atu no te oronga, e eaa te tu orongaanga te ka apai mai i te rekareka no tatou?

¹⁷ E inangaro ana a Iehova, e e tutaki ana aia i te aronga tei oronga ma te rekareka. Kua akanoo aia uaorai i te akaraanga meitaki roa atu, na te oronga mai anga i tana Tamaiti anau tai “kia kore e mate te akarongo iaia, kia rauka ra te ora mutu kore.” (Ioa. 3:16) Kua tata a Paulo e: “Ko te ruru ma te akaperepere kore ra, e kokoti ïa ma te maata, E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Kori. 9:6, 7) Te oronga anga i to tatou taime, to tatou maroiroi, e ta tatou au apinga materia ei turuturu i te akamorianga mou, e mea papu roa e ka apai mai te reira i te rekareka e te au tutakianga maata no tatou.​—E tatau ia Maseli 19:17; Luka 16:9.

“Auraka e na Mua i te Akatangi i te Pu”

18. I raro i teea au turanga i riro ei e ‘kare a tatou tutaki’ mei to tatou Metua i te rangi?

¹⁸ “Kia matakite eiaa e rave ua rai i ta kotou tuatua tika ki mua i te tangata kia kiteaia mai e ratou; te openga kare a kotou tutaki mei to kotou Metua i runga i te rangi.” (Mata. 6:1, NW) Te aiteanga o te “tuatua tika” ta Iesu e karanga ra koia oki ko te tu e aru ra ki te anoano o te Atua. Kare aia e karanga ra e eiaa rava te au angaanga akono Atua kia raveia i te ngai tangata, no te mea kua akakite aia ki tana au pipi e ko “to [ratou] mārama, kia kakā ïa ki mua i te aroaro o te tangata nei.” (Mata. 5:14-16) Inara ‘kare a tatou tutaki’ mei to tatou Metua i te rangi me rave tatou i te au mea “kia kiteaia mai” e kia umereia mei te aronga akatutu teata rai. Me ko to tatou  akakoroanga ia, kare e rauka ia tatou tetai pirianga vaitata ki te Atua me kore te au akameitakianga mutu kore o te tutaraanga Patireia.

19, 20. (a) Eaa te aiteanga o ta Iesu tuatua kia kore e “akatangi i te pu” me oronga i te “apinga aroa”? (e) Akapeea tatou i te kore anga e akatika kia kite to tatou rima kaui i ta to tatou rima katau e rave ra?

¹⁹ Me e tu tau tikai to tatou, ka aru tatou i te akoanga a Iesu e: “Kia oronga ra koe i taau apinga aroa, auraka e na mua i te akatangi i te pu, mei ta te aronga pikikaa, i roto i te au sunago, e i te au arataa ra, kia akameitakiia ratou e te tangata. Koia tika taku e karanga atu kia kotou na, Kua rauka ta ratou tutaki.” (Mata. 6:2) Ko te au “apinga aroa” e au tauturu oronga ua te reira ei turu i te aronga ngere. (E tatau ia Isaia 58:6, 7.) E moni akaputu ta Iesu e tana au apotetoro tei akatakaia ei tauturu i te putaua. (Ioa. 12:5-8; 13:29) I te mea e kare e akatangiia ana te pu na mua ake ka oronga ai i te apinga aroa ki te putaua, te papu ua ra e te taangaanga ra a Iesu i te tuatua akarava i tona akakite anga e auraka tatou e “akatangi i te pu” i mua ake ka oronga atu ei i te “apinga aroa.” Kare tatou e akakite aere i taua tu orongaanga ki te katoatoa, mei ta te au Pharisea ngati Iuda rai. Kua kapiki a Iesu ia ratou ei au pikikaa no te mea te akakite aere ra ratou i ta ratou au apinga oronga ua “i roto i te au sunago, e i te au arataa.” Ko taua au pikikaa ra “kua rauka ta ratou tutaki.” Te akapaapaa a te tangata e penei te nooanga memeitaki i te pae i te au rapi rongonui i roto i te tunako, ko te reira ua rai ta ratou tutaki, no te mea kare a ratou tutaki mei ko mai ia Iehova. (Mata. 23:6) Mei teaa ra te tu o te au pipi a Karaiti? Kua akakite a Iesu kia ratou​—e kia tatou katoa e:

²⁰ “Kareka kia oronga koe i taau apinga aroa, auraka toou rima kaui e kite i ta toou rima katau e rave ra: Kia munangaro taau oronga anga apinga aroa, e na to Metua, tei kite ua mai i te mea ngaro, e o mai akakite ua i taau tutaki.” (Mata. 6:3, 4) Tei matauia e angaanga kapiti ana to tatou nga rima. No reira, ko te aiteanga kia kore to tatou rima kaui e kite i ta te rima katau e rave ra, koia oki kare tatou e akakitekite aere i ta tatou angaanga tauturu ua, kare katoa rai ki te aronga tei piri vaitata mai kia tatou mei to tatou rima kaui rai ki to tatou rima katau.

21. Te tutaki mei Tei “kite ua mai i te mea ngaro” te kapiti maira te reira i teaa?

²¹ Me kare tatou e akapaapaa i ta tatou au orongaanga ki etai ke, ka riro ta tatou au “apinga aroa” ei mea muna. I reira to tatou Metua, ko “tei kite ua mai i te mea ngaro,” e tutaki mai ei ia tatou. Te kapiti maira te tutaki mei tei “kite ua mai i te mea ngaro” i te apai mai anga a Iehova ia tatou ki roto i tetai pirianga tumanava e ia, te akakore anga i ta tatou ara, e te oronga mai anga i te ora mutu kore no tatou. E meitaki roa atu te reira i te akapaapaaanga a te tangata!

Au Tuatua Puapinga kia Akaperepereia

22, 23. Eaa tatou ka akaperepere ei i ta Iesu au tuatua?

²² Mea papu roa e kua ki ua te Tuatua i runga i te Maunga i te au mea puapinga pae vaerua, mei te toka oko maata rai e tona au tu manea e manganui. Kare ekoko e tei roto i reira te au tuatua puapinga tikai te ka apai mai i te rekareka, noatu i roto i teia ao manamanata. Ae, ka mataora tatou me akaperepere tatou i ta Iesu au tuatua e me ka akatika i te reira kia akatuke i to tatou tu e to tatou oraanga.

²³ Te aronga ravarai tei “akarongo” e tei “akono” i ta Iesu i apii, ka akameitakiia ratou. (E tatau ia Mataio 7:24, 25.) No reira kia ngaueue kore tikai tatou i te aru anga i ta Iesu akoanga. E maata tana au tuatua i roto i te Tuatua i runga i te Maunga te ka akamanakoia i roto i te atikara openga o teia au atikara nei.

Akapeea Koe me Pau?

• Eaa i puapinga ai te akaau ki tetai taeake tei akaririia?

• Ka akapeea tatou me kopae i te akapekapeka anga koia oki i te akaturori anga i to tatou “mata katau”?

• Mei teaa tikai ra to tatou tu no runga i te orongaanga?

[Au Uianga Apii]

[Tutu i te kapi 11]

Kare e aiteia te meitaki kia akaau ki tetai taeake tei akaririia!

[Au Tutu i te kapi 12, 13]

E akameitaki ana a Iehova i te aronga tei oronga ma te rekareka