Te Akakeu ra Ainei ta Iesu Tuatua i Taau Pure?

“E kia akaoti akerā Iesu i teianei tuatua anga, kua va ua te tangata i tana tuatua.”​—MATA. 7:28.

1, 2. Eaa ra te au urupu i va ua ai i te tu i apii ei a Iesu?

E MEA tau kia ariki tatou i te au tuatua a te Tamaiti anau tai a te Atua, ko Iesu Karaiti, e kia taangaanga i te reira i roto i to tatou oraanga. Papu roa e ko te tu o tana tuatua, kare e tangata e aite mai ki te reira. Ae, kua va ua te tangata i te tu i apii ei aia i roto i te Tuatua i runga i te Maunga!​—E tatau ia Mataio 7:28, 29.

² Kare te Tamaiti a te Atua i apii ana mei ta te au tata tuatua rai, tei akatumu i ta ratou au tuatua rairai ki runga i te au apiianga a te tangata ara ua nei. Kua apii a Karaiti “ma te mana” no te mea ko tana i tuatua no ko mai ia i te Atua. (Ioa. 12:50) Ka akara ana tatou e ka akapeea ta Iesu au tuatua i roto i te Tuatua i runga i te Maunga te ka aru mai, e rauka ai e e tau ei kia akakeu i ta tatou au pure.

Auraka e Pure Mei ta te Au Pikikaa Rai

3. Akakite poto ua mai no runga i ta Iesu au tuatua tei rekotiia i roto ia Mataio 6:5.

³ E tuanga puapinga te pure no te akamorianga mou, e e mea tau kia pure putuputu tatou kia Iehova. Inara e mea tau rai kia akakeuia ta tatou au pure e ta Iesu au tuatua i roto i te Tuatua i runga i te Maunga. Kua akakite aia e: “E kia pure koe, auraka mei ta te aronga pikikaa ra: ko tei inangaro i te pure tu ua i roto i te au sunago, e te pae arataa ra, kia akaraia ratou e te tangata. Koia tika taku e karanga atu kia kotou na, Kua rauka ta ratou tutaki.”​—Mata. 6:5.

4-6. (a) Eaa te tumu e inangaro ei te au Pharisea i te pure “tu ua i roto i te au sunago, e te pae arataa”? (e) I akapeea ra te ‘rauka anga te tutaki’ a taua au pikikaa ra?

⁴ Me pure, eiaa te au pipi a Iesu e aru i taua au “pikikaa ra” mei te au Pharisea ngakau parau rai, tei riro to ratou tu akono atua i mua i te katoatoa ei mea tutu ua. (Mata. 23:13-32) E mea inangaro na taua au pikikaa ra i te pure “tu ua i roto i te au sunago, e te pae arataa.” Eaa te tumu? Kia ‘akaraia e te tangata.’ E mea matau na te ngati Iuda i te anere mataiti mua kia pure kapiti ei putuputuanga i te tuatau o te oronga anga atinga karakaratio i ko i te iero (mei te ora iva i te popongi e te ora toru i te avatea). E maata te au tangata i Ierusalema e pure kapiti ana e tetai urupu tangata akamori i te au ngai tukeke i ko i te iero. I vao ake i taua oire ra, e pure putuputu ana te ngati Iuda e rua taime i te ra, ia ratou e ‘tu ua ra i roto i te au sunago.’​—Akaaite ia Luka 18:11, 13.

⁵ I te mea e kare te maataanga o te tangata i vaitata atu ki te iero me kore, ki te tunako no te pure tei taiku uaia akenei, penei ka pure ratou i te ngai ua atu te reira ratou i taua au taime ra. E akapapu ana tetai pae e tei “te pae arataa” ratou i te au taime o te pure. Kua inangaro ratou kia ‘akaraia e te tangata’ e aere maira na reira. Taua au pikikaa ra ka ‘akaroa ratou i te pure ei pikikaa anga’ kia rekaia e te aronga e akara maira. (Luka 20:47) Kare tatou e aru i te reira tu.

 ⁶ Kua akakite a Iesu e ko taua au pikikaa ra ka “rauka ta ratou tutaki.” E anoano maata tikai to ratou kia kiteaia e kia akapaapaaia e te tangata​—e ko te reira ua rai ta ratou ka rauka. Ko te katoaanga rai ia o ta ratou tutaki, no te mea kare a Iehova e pau mai i ta ratou au pure pikikaa. I tetai tua ra, ka ariu mai te Atua ki te pure a te au pipi mou a Karaiti, mei te ka akaariia mai e ta Iesu tuatua ka aru mai no runga i teia tumu manako.

7. Eaa ra te aiteanga o te akoanga kia pure ngaro ua i roto i to tatou “pia”?

⁷ “Kareka kia pure koe, e aere ki roto i toou pia, e topiri marie i te pa, ka pure ei ki toou Metua, e na to Metua, tei kite ua mai i te mea ngaro, kore ua rai aia e kitea, e o mai akakite ua i taau tutaki.” (Mata. 6:6) Ta Iesu akoanga kia pure ngaro ua i roto i te pia i muri ake i te topiri anga i te pa, kare te aiteanga e kare e rauka i tetai tangata kia kauono i tetai putuputuanga i roto i te pure. Ko teia akoanga, i akakoroia kia kore e riro i te pure i te ngai tangata ei akamou i te manako ki runga i te tangata e pure ra, e kia akapaapaaia mai e te tangata. E mea tau kia akamaara rai tatou i teia me tukuia mai tetai angaanga kia tatou ei kauono no te iti tangata o te Atua me pure i te ngai tangata. Kia aru katoa tatou i ta Iesu akoanga ka aru mai no runga i te pure.

8. Kia tau kia Mataio 6:7, eaa te tu e taangaanga tau koreia ana te pure te ka anoanoia tatou kia kopae?

⁸ “E kia pure kotou, auraka e maata te tuatua rikiriki puapinga kore, mei ta te au etene ra: ko tei manako e, tei te rai o te tuatua e kiteia mai ei ratou.” (Mata. 6:7) Te akakite akaou mai nei a Iesu i tetai tu ke mai e taangaanga tau koreia ana te pure koia oki, te taokioki ua rai. Kare aia e karanga maira e auraka rava tatou kia taokioki i te au patianga ngakau tae e te au tuatua akameitaki i roto i te pure. I roto i te aua o Getesemane i te po i mua ake ka mate ei aia, kua ripiti akaou a Iesu i taua au tuatua rai i roto i tana “pure.”​—Mare. 14:32-39.

9, 10. I roto i teea tu e kare tatou e tau kia pure taokioki ua rai?

⁹ E mea tarevake kia aru tatou i te au pure taokioki a “te au etene.” “E maata [ua atu] te tuatua rikiriki puapinga kore” ua ta ratou i tamou ngakau. Kare i puapingaia ana te aronga akamori o Baala i te kapiki anga i te ingoa o taua atua pikikaa ra “mei te popongi mai e avatea atura, i te kapiki ua anga e, E Baala e akarongo mai ia matou.” (1 Ari. 18:26) E mirioni ua atu tangata i teia tuatau e oronga ra i te au pure rairai tuatua e te taokioki, i te manako anga e kia “kiteia mai” ratou. Inara te tauturu maira a Iesu ia tatou kia kite e kare e puapinga o te “rai o te tuatua” i roto i te au pure roroa e te taokioki i mua i te mata o Iehova. Kua akakite katoa mai a Iesu e:

¹⁰ “Auraka kotou e aite kia ratou ra; kua kite ana to kotou Metua i te au mea e tau ia kotou, ou kotou i pati atu ei.” (Mata. 6:8) E maata ua atu te au arataki o te akonoanga ngati Iuda e akariro ana ia ratou mei te au Kenitara rai i te rairai tuatua me pure. E tuanga puapinga tikai te pure ngakau tae no te akamorianga mou, te ka o mai te akapaapaa, te akameitakianga, e te pati akatenga. (Phili. 4:6) Inara, e tarevake kia taokioki ua rai tatou i te tuatua anga i taua apinga rai i te manako anga e ka ngaropoina i te Atua. Me pure, e mea tau kia akamaara e te tuatua nei tatou ki Tei ‘kite i te au mea e tau ia tatou, ou tatou ka pati atu ei’ kiaia.

11. Eaa te ka tau no tatou kia akamaara me tukuia mai tetai tikaanga kia tatou kia rave i tetai pure i te ngai tangata?

¹¹ Ta Iesu au tuatua no runga i te au pure kare e tau ana, tikaanga ka akamaara mai te reira ia tatou e kare te Atua e mareka ana i te au tuatua akareka e te au tuatua puapinga kore ua. E mea tau katoa kia kite tatou e kare te pure i te ngai tangata i te taime no te akareka i te aronga e akarongo maira, me kore kia manako ratou e, te roa i te pure a teia tangata i te “Amene.” Te akariro anga i te pure ei rave i tetai au akakiteanga me kore kia ako i te aronga e akarongo maira, kare te reira e rotai ana ki te tu o ta Iesu au tuatua i roto i te Tuatua i runga i te Maunga.

Apii a Iesu ia Tatou i te Pure

12. Ka akapeea koe me akamarama mai i te puapinga o te patianga “kia tapu toou ingoa”?

¹² Noatu kua akamatakite mai a Iesu ia tatou no runga i te taangaanga tau kore anga i te tikaanga manea o te pure, kua apii ra aia i tana au pipi e akapeea me pure. (E tatau ia Mataio 6:9-13.) Te pure tana i oronga ei apii ia ratou, eiaa te  reira kia tamou ngakauia kia rauka i te tuatua taokioki ua rai i te reira. Mari ra, te oronga maira te reira i tetai akaraanga no ta tatou uaorai au pure. Ei akatauanga, i roto i tana au tuatua mua kua taiku a Iesu i te Atua na mua: “E to matou Metua i te ao ra, Kia tapu toou ingoa.” (Mata. 6:9) Ka tuatua meitaki tatou kia Iehova e, “e to matou Metua” no te mea koia Tei Anga mai ia tatou, e tei noo “i te ao” mamao rava atu mei te enua nei. (Deu. 32:6; 2 Para. 6:21; Anga. 17:24, 28) Ka tau te tuatua anga i te kupu “matou” ei akamaara kia tatou e ko to tatou au oa irinaki, e pirianga vaitata katoa to ratou ki te Atua. “Kia tapu toou ingoa,” e patianga te reira kia akatapu a Iehova iaia uaorai na te takore anga i te au akakino tei akairiia mai ki runga i tona ingoa mei te akamataanga mai o te meameaau i Edene. Te pauanga i taua pure ra, ka takore a Iehova i te kino mei te enua nei, i te akatapuanga iaia uaorai.​—Eze. 36:23.

13. (a) Ka akapeea ra te patianga “kia tae toou basileia” me akatupuia? (e) Eaa te o maira ki te rave anga i to te Atua anoano i te enua nei?

¹³ “Kia tae toou basileia. Kia akonoia toou anoano i te enua nei, mei tei te ao katoa na.” (Mata. 6:10) Ko teia patianga i roto i te pure ta Iesu i oronga ei akaraanga, e mea tau kia akamaara tatou e ko te “basileia” koia oki ko te kavamani o te Mesia i te rangi, i roto i te rima o Karaiti e te “aronga tapu” tei akatuia mai e tei kapitiia atu kiaia. (Dani. 7:13, 14, 18; Isa. 9:5, 6) Ko te pure no te reira kia “tae” mai, e patianga te reira kia tae mai te Patireia o te Atua i te tamaki atu i te aronga pouroa tei patoi i te tutaraanga a te Atua i te enua nei. Kare e roa atu ana ka tupu te reira, i te akateateamamao anga i te mataara no te parataito tuatua tika, te au, e te puapinga, i te ao katoa nei. (Sala. 72:1-15; Dani. 2:44; 2 Pete. 3:13) Te raveia nei to Iehova anoano i te rangi, e ko te patianga kia akatupuia te reira i te enua nei, e pati akatenga te reira ki te Atua kia akatupu i tona au akakoroanga no to tatou paraneta, kapiti mai i te takore anga i tona aronga patoi i teia tuatau mei tana rai i rave i te au tuatau taito.​—E tatau ia Salamo 83:1, 2, 13-18.

14. Eaa ra i tau ei kia pati no “te kai e tau ia matou i teianei rā”?

¹⁴ “O mai i te kai e tau ia matou i teianei rā.” (Mata. 6:11; Luka 11:3) Me pati tatou i teia na roto i te pure, te pati ra tatou ki te Atua kia oronga mai i te kai e tau no “teianei rā.” Te akaari maira teia e, e akarongo to tatou i roto i to Iehova tu kite kia akono i to tatou anoano i te au ra ravarai. Kare te reira i te pure no te au apinga kare e anoanoia. Penei ka riro teia patianga no to tatou anoano i te au ra ei akamaara kia tatou e kua akaue te Atua i te ngati Iseraela kia koi mai i te mana “te ka rava i taua rā ra.”

15. Akamarama mai i te aiteanga o te patianga kia “akakore mai i ta matou ara, mei ia matou i akakore i ta tei ara ia matou nei.”

¹⁵ Te patianga tei aru mai i roto i te pure akaraanga, te akamanako ra te reira i tetai apinga ka anoanoia tatou kia rave. Kua akakite a Iesu e: “E akakore mai i ta matou ara, mei ia matou i akakore i ta tei ara ia matou nei.” (Mata. 6:12)  Ka rauka ia tatou kia tapapa atu i te akakoreanga ara mei ia Iehova, mei te mea ua e kua “akakore” takere tatou i te ara a te aronga tei ara kia tatou. (E tatau ia Mataio 6:14, 15.) E mea tau kia akakore ua tatou ma te ngakau tae i te ara a etai ke.​—Ephe. 4:32; Kolo. 3:13.

16. Akapeea tatou i te marama anga i nga patianga no runga i te timataanga e te akaoraanga ia tatou mei tei kino ra?

¹⁶ “Auraka e akaruke ia matou kia timataia mai, e akaora ra ia matou [“mei tei kino ra,” NW].” (Mata. 6:13) Akapeea ra tatou i te marama anga i teia nga patianga i roto i ta Iesu pure akaraanga? E tai mea i papu: Kare a Iehova e timata ana ia tatou kia rave i te ara. (E tatau ia Iakobo 1:13.) Ko Satani​—“tei kino ra”​—koia tikai te “Timata.” (Mata. 4:3) Inara, te tuatua ra te Pipiria e te rave ra te Atua i tetai au mea no te mea kua akatika ua aia i te reira. (Ruta 1:20, 21; Kohe. 11:5) No reira, ko te tuatua e “auraka e akaruke ia matou kia timataia mai,” e patianga te reira e eiaa a Iehova kia akatika ia tatou kia tuku ua atu me timataia tatou kia akarongo kore iaia. Te mea openga, ko te patianga kia ‘akaora ra ia matou mei tei kino ra,’ e patianga te reira e eiaa a Iehova e akatika ia Satani kia akaturori ia tatou. E ka rauka ia tatou kia irinaki papu e ‘kare te Atua e vaoo ia tatou kia timataia, mari ra ko te tika ia tatou kia akakoromaki.’​—E tatau ia 1 Korinetia 10:13.

‘E Pati, e Kimi, e Topāpā Atu’

17, 18. Eaa ra te aiteanga e kia ‘pati, kia kimi e kia topāpā’ ua rai?

¹⁷ Kua raurau atu te apotetoro ko Paulo i te au taeake irinaki e: ‘E tamou marie tikai i te pure.’ (Roma 12:12) Kua oronga a Iesu i tetai manako pakari tikai mei te reira rai i tona akakite anga e: “E pati, e e orongaia mai ta kotou; e kimi, e kitea ïa ia kotou; e topāpā atu, e kiritiia mai ïa te pa ia kotou: Ko te aronga katoa oki i pati ra, kua rauka ïa: e ko tei kimi ra, kua kitea ïa; e tei topāpā ra, e kiritiia mai ïa te pa iaia.” (Mata. 7:7, 8) E mea tau kia “pati” ua rai no tetai ua atu apinga e rotai ra ki te anoano o te Atua. I te aru anga i ta Iesu au tuatua, kua tata te apotetoro ko Ioane e: “Teia taua taitaia kore no tatou i rauka [i te Atua], kia pati ua atu tatou i te au mea ravarai i tau iaia ra, te akarongo maira aia ia tatou.”​—1 Ioa. 5:14.

¹⁸ Ta Iesu akoanga kia ‘pati e kia kimi’ ua rai, ko te aiteanga koia oki e mea tau kia pure akatenga tatou eiaa e tuku i te au. Ka anoano katoaia tatou kia “topāpā” ua rai kia rauka tetai tikaanga ki te Patireia e kia rekareka i ta te reira au akameitakianga, au puapinga, e te au tutaki. Inara ka rauka ainei ia tatou kia irinaki papu e ka pau mai te Atua i ta tatou pure? Ae, me vai tiratiratu ua tatou kia Iehova no te mea kua akakite a Karaiti e: “Ko te aronga katoa oki i pati ra, kua rauka ïa: e ko tei kimi ra, kua kitea ïa; e tei topāpā ra, e kiritiia mai ïa te pa iaia.” E manganui ua atu te au tupuanga ta te au tavini o Iehova i kite ana i te akapapu mai e ko te Atua tikai ‘Tei akarongo mai i te pure.’​—Sala. 65:2.

19, 20. I te akamanako anga i ta Iesu au tuatua tei rekotiia i roto ia Mataio 7:9-11, i akapeea ra a Iehova i riro ei, ei metua aroa?

¹⁹ Kua akaaite a Iesu i te Atua ki tetai metua aroa tei oronga mai i te au apinga memeitaki no tana tamariki. Ka akamanako ua ana e naringa ko koe tetai e akarongo ra i te Tuatua i runga i te Maunga e kua rongo ia Iesu e akakite ra e: “Koai ïa i roto ia kotou i te tangata nei, e apai i te toka na tana tamaiti kia pati mai aia i te manga? E kia pati mai i te ika ka apai atu ainei i te ovi nana? E te tika na ia kotou, kino ua rai, kia oronga i te mea meitaki na ta kotou au tamariki, ka tangaʼi oki i to kotou Metua i te ao ra, i te oronga i te mea meitaki i te aronga i pati atu iaia ra?”​—Mata. 7:9-11.

²⁰ Ko tetai metua tangata ua nei, noatu te tu  “kino” no te mea i anau araia mai, e ngakau aroa natura tona no tana tamariki. Kare aia e akavare i tana tamaiti mari ra ka tauta pakari aia i te oronga i te au “mea meitaki” nana. Mei te tu o te metua kia tatou, te oronga ua mai nei to tatou Metua aroa i te rangi i te au “mea meitaki,” mei tona vaerua tapu rai. (Luka 11:13) Ka akaketaketa te reira ia tatou kia oronga i te akamorianga tau kia Iehova, koia oki Tei Oronga mai i ‘te au mea memeitaki, e te au mea tika ravarai.’​—Iako. 1:17.

Kia Puapinga Atu Rai mei ta Iesu Au Tuatua

21, 22. Eaa te mea umere roa atu no runga i te Tuatua i runga i te Maunga, e eaa ra toou manako no runga i teia au tuatua a Iesu?

²¹ E tika rava, e ko te Tuatua i runga i te Maunga te akoanga rongonui rava atu tei orongaia ana i te enua nei. E mea umere tikai te au mea ta te reira i apii mai ia tatou no runga i te Atua e to te reira tu taka meitaki ua. Mei tei akaariia mai e te au manako i roto i teia au atikara nei, ka puapinga maata roaia tatou me taangaanga tatou i te akoanga i roto i teia Tuatua i runga i te Maunga. Ka akameitaki roa atu teia au tuatua na Iesu i to tatou oraanga i teianei e te oronga maira i te manakonakoanga no tetai oraanga mataora i te tuatau ki mua.

²² I roto i teia au atikara nei, kua akara matatio tatou i etai ua o te au mea puapinga pae vaerua i roto i ta Iesu Tuatua i runga i te Maunga. No reira rai te aronga tei akarongo i tana akoanga i ‘va ua ai i tana tuatua.’ (Mata. 7:28) Kare e ekoko e mei te reira katoa rai to tatou tu me akaki tatou i to tatou manako e to tatou ngakau ki teia e ki etai atu au tuatua puapinga maata a te Puapii Maata, ko Iesu Karaiti.

Eaa Taau Au Pauanga?

• Eaa ta Iesu i tuatua no runga i te pure pikikaa ua?

• Eaa ra tatou ka kopae ei i te tuatua taokioki me pure tatou?

• Eaa te au patianga i roto i ta Iesu pure akaraanga?

• Ka akapeea tatou me ‘pati, kimi, e me topāpā’ ua rai?

[Au Uianga Apii]

[Tutu i te kapi 15]

Kua akaapa a Iesu i te au pikikaa tei pure ua kia akaraia mai ratou e kia akarongoia mai

[Tutu i te kapi 17]

Kua kite ainei koe e eaa i tau ei kia pure no ta tatou kai i te au ra?