Akapeea Koe Me Akakoromaki i te Angaanga Orometua?

KUA kite ana ainei koe i te tu paruparu e kua inangaro i te akaruke i te angaanga tutuanga? Penei kua timataia to tatou tu akakoromaki e te patoianga pakari, te taitaia, te tu makimaki, te taomianga a te au taeake, me kore kare te tangata e akarongo mai ana. Inara, e akamanako ana i te akaraanga o Iesu. Kua akakoromaki aia i te au timataanga pakari tikai no “te meitaki i tukuia mai ki mua i tona aroaro.” (Ebe. 12:2) Kua kite aia e na te akapapuanga e kare takiri e tumu no te au akaapaanga i te Atua, te akarekareka ra aia i te ngakau o Iehova.—Mase. 27:11.

Na te akakoromaki anga i roto i te angaanga orometua, ka rauka katoa ia koe i te akarekareka i te ngakau o Iehova. Inara, akapeea me te riro ra tetai au tu ngata i te akapou i toou maroiroi i te pae vaerua? Kua akakite mai a Krystyna, kua pakari aia e e makimaki ua ana e: “Kare i te mea umere kiaku te tu roiroi e te apikepike. Ko te au manamanata no toku turanga pakari, mei te makimaki e te au taitaia o te oraanga i te au ra, e akaparuparu poto ana te reira i toku maroiroi.” Akapeea koe me akakoromaki i roto i te angaanga orometua noatu te au tu ngata?

Aru i te Au Peroveta

Kia akakoromaki ua atu rai i roto i te angaanga tutuanga, ka tauta te au papuritia Patireia tiratiratu kia aite to ratou manako mei to te au peroveta i taito. E akara ana i te akaraanga o Ieremia. I te ikiangaia kia tavini ei peroveta, kua emiemi aia i te akamataanga. Inara, kua rauka ia Ieremia i te akakoromaki i roto i tana tukuanga angaanga ngata no tetai 40 tuma mataiti no te mea kua kite aia i te irinaki pu tikai i te Atua.—Iere. 1:6; 20:7-11.

E akariro ana a Henryk i te akaraanga o Ieremia ei akamaroiroi iaia. Kua karanga aia e: “I te au 70 tuma mataiti iaku i roto i te angaanga orometua, i tetai au taime e akaparuparuia ana au e te au tu o te tangata me ariu mai—to ratou tu riri me kore e to ratou tu manako kore. I taua au taime ra, e maara ana iaku te akaraanga o Ieremia. Tona aroa e tona irinaki ngaueue kore ia Iehova tei akamaroiroi iaia kia rave ua atu i tana angaanga totouanga.” (Iere. 1:17) Kua akamaroiroi katoaia a Rafał e te akaraanga o Ieremia. Kua karanga aia e: “Kare i tamou i te manako ki runga iaia uaorai e tona au tu, kua irinaki a Ieremia ki runga i te Atua. Kua rave ua atu aia ma te mataku kore noatu te tu makitakita maata o te tangata. E tauta ana au i te akamanako i te reira.”

Ko te akaraanga katoa tetai o te peroveta ko Isaia te tauturu ana i te manganui i te akakoromaki i roto i te angaanga orometua. Kua akakite te Atua kiaia e kare tona enua tangata e akarongo iaia. “E akamatorutoru i te ngakau o teianei aronga; e akateimaa i o ratou taringa,” i tuatua ai a Iehova. Kua papu ainei e ka puapinga kore a Isaia? Kare i te akaraanga a te Atua! I tona ikiangaia ei peroveta, kua tuatua aia e: “I na, teia au; ko au taau e tono.” (Isa. 6:8-10) Kua rave maroiroi a Isaia i tana angaanga. Te pera ra ainei koe i te rave anga i te akaueanga kia tutu aere?

Kia akakoromaki i roto i te angaanga orometua noatu te tu manako kore o te aronga e akarongo maira, mei ta Isaia i rave, ka anoanoia tatou kia kopae i te tamou i te manako ki runga i te au ariuanga papu kore ta tatou ka kite mai. E akakoromaki ana a Rafał i te tu akamaroiroi kore na roto i teia mataara: “E tauta ana au kia kore au e manako maata i te au tuatua akakino. E tikaanga to te tangata i roto i taku ngai tutuanga kia tuatua mai i ta ratou ua ka inangaro.” Kua karanga katoa a Anna e: “Kare au e akamanako atu ana i te au apinga mareka kore me i te au mea kore akamaroiroi kore. E rauka ana iaku i te rave i tera na roto i te pure e te akamanakoanga i te tia no te ra, i mua ake ka aere ei au ki te angaanga tutuanga. Ka viviki i reira te au manako papu kore i te ngaro ke.”

Kua tavini te peroveta a Ezekiela i rotopu i te iti tangata ngati Iuda marokiakia e tuikaa ra i Babulonia. (Eze. 2:6) Naringa kare te peroveta i akakite i te tuatua a te Atua ki te tangata e kua mate te  tangata kino, kare i akamatakiteia ana, ka apa a Ezekiela uaorai i te mate o te tangata. Kua akakite a Iehova kia Ezekiela e: “E umuumu maira au i tona toto ia koe ra.”—Eze. 3:17, 18.

E tauta ana a Henryk kia aiteite tona tu ki to Ezekiela: “Ka inangaro au kia ma au mei te toto o te au tangata ravarai. Tei roto te oraanga tangata akaperepereia i te kino.” (Anga. 20:26, 27) Ko te manako rai ia o Zbigniew: “Kua tauta ua atu rai a Ezekiela noatu te manako o tetai aronga. Kua tauturu teia iaku kia kite i te angaanga tutuanga mei ta Tei Anga mai rai e akara ra.”

Kare e ko Koe Anake Ua

I roto i te angaanga tutu aere kare koe e angaanga ana ko koe anake ua. Mei te apotetoro rai ko Paulo, ka rauka ia tatou kia karanga e: “E oa rave angaanga oki matou no te Atua.” (1 Kori. 3:9) A Krystyna, tei akakite mai e e apikepike ana aia i tetai au taime kua karanga e: “No reira au e pati akatenga ua ai kia Iehova i te maroiroi. E oronga ua mai ana rai aia i te reira.” Ae, ka anoano tatou i te vaerua o te Atua kia turuturu ia tatou i roto i ta tatou angaanga orometua!—Zeka. 4:6.

Me te tutu aere ra tatou, ka tauturu katoa te vaerua tapu ia tatou kia akaari i te au tu o “te ua o te vaerua.” (Gala. 5:22, 23, NW) Na te reira, e tauturu ia tatou kia akamaroiroi i te angaanga tutu aere noatu e eaa te ka tupu. Kua kite mai a Henryk e: “E tauturu ana te angaanga tutuanga iaku kia akameitaki mai i toku tu. E apii ana au kia rauka te akakoromaki e te akamanako atu e kia kore e tuku ngoie ua i te au.” Na te akakoromaki anga i roto i te angaanga orometua noatu te au tu ngata tukeke, ka tauturuia koe kia akatupu i te ua o te vaerua kia maata rava atu.

I te akaaere anga i teia angaanga puapinga, e taangaanga ana a Iehova i tana au angera. (Apo. 14:6) Te akaari maira te Pipiria e “kua mano tini i te mano anga, e kua tausani i te tausani anga” taua au angera ra. (Apo. 5:11) I raro ake i te akaaereanga a Iesu, te turuturu ra te au angera i te au tavini o te Atua i runga nei i te enua. E akamanako ana koe i te reira ia koe e tutu aere ra?

“Na te akamanako oonu anga no te tika e tei ia tatou te au angera i roto i te angaanga orometua, e tumu no te akamaroiroianga kiaku,” i karanga ai a Anna. “E akaperepere ana au i te tauturu ta ratou e oronga maira i raro ake i te akaaereanga a Iehova e Iesu.” E tikaanga ngateitei maata tikai i te angaanga ma te au angera tiratiratu!

Akapeea te au taeake papuritia o te Patireia? Kua akameitakiia tikai tatou no te pirianga atu ki tetai urupu maata o te au Kite tiratiratu. Kare e ekoko e kua kite ana koe i te tupuanga i te tika o te materi a te Pipiria e: “Na te auri i akakina i te auri; e na te tangata e akakina i te mata o tona taunga.”—Mase. 27:17.

Na te angaanga kapiti anga ki tetai ke atu i roto i te angaanga orometua e oronga maira kia tatou i te atianga meitaki kia kite i te au ravenga puapinga, penei e e mea ou kia tatou. Kua karanga a Elżbieta e, “Na te angaanga anga ki te au papuritia tukeke, e oronga maira kiaku i te au atianga kia akaari i te aroa ki toku au taeake irinaki e te au tangata ta matou e aravei atura.” E tauta i te rave i te angaanga orometua ma te au papuritia tukeke. Ka riro te reira ei akareka roa atu i taau angaanga orometua.

Akono Meitaki ia Koe

Kia vai ua rai to tatou tu oraora i roto i te angaanga orometua, ka anoanoia tatou kia parani meitaki, kia akanoo i tetai papaanga meitaki no te apii naau uaorai, e kia rava te akangaroi anga. Te aiteanga, ka anoanoia tatou kia akono meitaki ia tatou uaorai i te pae vaerua e te pae kopapa.

Te karanga ra te Pipiria e: “Te kimianga o te aronga maroiroi ra, tei runga ïa i te apinga maata.” (Mase. 21:5) Te karanga ra a Zygmunt, e 88 ona mataiti i teianei e: “Na te akapapa meitaki anga i roto i taku angaanga tutuanga e tauturu mai ana iaku kia puapingaia. E akatere meitaki ana au i toku taime kia rava no te akakitekite aere anga.”

E riro ana te kite tika tikai i te au Tuatua Tapu i te akamaroiroi e te tauturu ia tatou i roto i te angaanga orometua. Mei ia tatou rai e anoano ra i te kai i te pae kopapa kia maroiroi ua atu, ka anoano katoaia tatou kia angai putuputuia ki te kai vaerua kia rauka i te rave ua atu i te angaanga tutu aere. I te angai angaia ki te Tuatua a te Atua i te au ra ravarai e te raveanga ‘i te kai i te ora mou’ ka akamaroiroiia tatou no te angaanga orometua.—Mata. 24:45-47.

Kua rave a Elżbieta i te au tauianga puapinga i roto i tona oraanga kia rauka i te akameitaki atu i tana angaanga orometua. Kua karanga aia e: “Kua akaiti maata mai au i te ora e akapou ana au i te  akarakara tivi kia maata atu toku taime i te akapapa no te angaanga orometua. Me tatau au i te Pipiria i te au aiai tataki tai, e akamanako ana au i te au tangata taku i aravei atu i roto i te ngai tutuanga. E akara ana au i te au irava e te au atikara penei e ka tauturu ia ratou.”

Na te akangaroi meitaki anga e tauturu ia koe kia maata atu toou maroiroi e kia rauka ia koe i te angaanga pu tikai i roto i te angaanga orometua. I tetai tua ra, me maata rava te tuatau tamataora ka akakino te reira i te tu meitaki o taau angaanga. Ko Andrzej, e papuritia maroiroi, kua kitea mai iaia e: “Me kare e rava te akangaroi anga ka roiroi kino, e mei reira atu, e mama ua te akatupu i te manako akaparuparu. E rave ana au i tetai ua atu ravenga kia kopae i te reira.”—Kohe. 4:6.

Noatu ta tatou au tauta anga pakari, kare e maata te aronga ka akarongo mai i te tuatua meitaki. Inara, kare rava e ngaropoina ia Iehova ta tatou angaanga. (Ebe. 6:10) Noatu e kare te manganui e inangaro i te tuatua mai kia tatou, penei ka tuatua ratou i ta tatou atoroanga i muri ake me akaruke tatou i to ratou kainga. Ka aite te reira akakeu anga ki ta tatou ka tatau no runga ia Ezekiela e: Ko te tangata ka “kite rai . . . e e peroveta tei noo ana i rotopu ia ratou.” (Eze. 2:5) E tika rai, kare ta tatou angaanga orometua e ngoie ana, inara e rauka ana ia tatou te au puapinga no te reira e te aronga katoa e akarongo maira ia tatou.

Kua kitea mai ia Zygmunt e “Na te rave anga i te angaanga orometua e tauturu ana ia tatou kia akatangata ouia e kia akaari i te aroa no te Atua e no to tatou tangata tupu.” “E tikaanga ngateitei tikai i te rave i ta tatou tuanga i roto i teia angaanga akaora anga. Kare rava te reira e rave akaouia mei teia te tu me kore i raro ake i teia au tu mei teia,” i karanga katoa ai a Andrzej. Ka rauka katoa ia koe i te kokoti i te au akameitaki anga maata na te akakoromaki anga i roto i te angaanga orometua i teia tuatau.—2 Kori. 4:1, 2.

[Au Tutu i te kapi 31]

Me akono tatou i te anoano pae vaerua e te pae kopapa ka rauka te akakoromaki i te angaanga orometua