Au Uianga a te Aronga Tatau

Te taiku maira te au Tuatua Tapu i “te buka a Iasera” e “te buka tamaki a Iehova.” (Iosu. 10:13; Nume. 21:14) Kare taua nga puka ra i roto i te papaanga o te Pipiria. E nga tataanga akauruia ainei teia, tei ngaro?

Kare e tumuanga tau kia manako e e mea akauruia mai te tataanga o taua nga puka ra, e i muri mai kua ngaro. E maata rai te au tataanga ta te aronga tata Pipiria akauruia i taiku mai. Tetai papaki penei e tuanga te reira no te Pipiria tei tataia mai i roto i te au tuatua kare te aronga tatau o teia tuatau e ariki ana. Ei akaraanga, te taiku maira a 1 Paraleipomeno 29:29 i “te tuatua a te akara ra a Samuela,” “te tuatua a Natana peroveta,” e “te tuatua a te akara ra a Gada.” Penei e te taiku ra taua au tataanga e toru, i te au puka ta tatou i kite e ko 1 Samuela e ko 2 Samuela, me kore ra i te puka o Te Au Akava.

I tetai tua, penei e te taiku ra tetai au tataanga i te au puka e aiteitei to ratou ingoa ki te au puka o te Pipiria, inara, kare te reira i te tuanga no te Pipiria. Penei ka akara tatou e a au puka taito ei akatutuanga: “te buka, te tuatua no te au rā o te ui ariki i Iuda,” “te tuatua a te au ariki o Iuda e no Iseraela,” “te tuatua a te ui ariki o Iseraela,” e “te tuatua a te au ariki o Iseraela e Iuda.” Noatu e aiteitei te tangi anga o taua au ingoa ra ki nga puka o te Pipiria ta tatou i kite e ko te 1 Ariki e te 2 Ariki, kare ra taua au puka e a i te mea akauruia, e kare katoa taua au puka ra i roto i te papaanga o te Pipiria. (1 Ari. 14:29; 2 Para. 16:11; 20:34; 27:7) Kare e kore e e au tataanga tuatua enua te reira e vai ra i te tuatau i tata ai te peroveta ko Ieremia e Ezera i te au papaanga ta tatou e kite nei i roto i te Pipiria.

Ae, kua taiku ana tetai aronga tata Pipiria me kore kua akara ana i te au tuatua enua me kore i te au rekoti e vai ra inara kare i akauruia. Te taiku ra a Esetera i “te buka, te tuatua no te au rā na te au ariki no Madai e no Peresia.” Mei te reira rai i te tata anga i tana papaanga Evangeria, ‘kua kitea puia e Luka te au tuatua katoa mei muatangana mai, e e mea tika.’ Kare e kore e kua akarakara ana aia i te au tataanga e vai ra tei rauka iaia ei rekoti i te papa tupuna o Iesu te ka rauka ia tatou kia tatau i roto i tana Evangeria. (Luka 1:3; 3:23-38) Noatu kare te au rekoti ta Luka i akarakara i te mea akauruia, ko te Evangeria ra tana i tata, papu e kua akauruia te reira. E te puapinga nei rai taua Evageria ra no tatou.

E no runga i nga puka te taikuia mai i roto i te uianga—“te buka a Iasera” e “te buka tamaki a Iehova”—i te akara anga e au rekoti te reira e vai ua ra kare i akauruia. No taua mea ra, kare a Iehova i akapapu ana e kia vai mai taua nga puka ra. Kua riro te au taikuanga i taua nga puka ra ei arataki i te aronga kite no runga i te Pipiria kia taopenga e e putunga pee me kore e putunga imene taua nga puka ra no runga i te au manamanata i rotopu ia Iseraela e tona au enemi. (2 Samu. 1:17-27) Kua tamanako tetai enetaikoropitia no te Pipiria e ko te au mea i roto i taua puka ra “e putunga pee e te imene matau uaia tei rekotiia e te aronga kite karape i te imene i Iseraela i taito.” Tetai au tangata katoa ta te Atua e taangaanga ana i tetai au taime ei au peroveta me kore ei au akarakara, e maani ana ratou i tetai au rekoti kare a Iehova i akauru ana me kore i iki ana kia kapitiia atu ki roto i te au Tuatua Tapu, tei riro ei “mea meitaki ei apiianga, ei akoanga, ei akakiteanga apa” i to tatou nei tuatau.—2 Timo. 3:16; 2 Para 9:29; 12:15; 13:22.

Noatu e kua taikuia mai tetai au puka i roto i te Pipiria e e au tataanga te reira tei taangaangaia, eiaa ra tatou kia manako e e mea akauruia mai te reira. Inara, kua akapapu te Atua ko Iehova e kia vai mai te au tataanga katoatoa tei roto i “te tuatua a to tatou Atua,” e ka “tu ïa e rimua.” (Isa. 40:8) Ae, ko ta Iehova i iki kia kapitiia mai ki roto i te au puka e 66 o te Pipiria tei rauka ia tatou, ko te reira tikai ta tatou e anoano nei kia “tau tikai i te au angaanga memeitaki katoa ra.”—2 Timo. 3:16, 17.