Akangateitei a Iobu i te Ingoa o Iehova

“Kia akameitakiia te ingoa o Iehova.”​—IOBU 1:21.

1. I te akara anga naai i tata i te puka o Iobu, e inaea?

MEI tetai 40 mataiti rai a Mose i tona oro anga mei Aiphiti kia kore aia e taiaia e Pharao e kua noo aia ki Midiana. (Anga. 7:23) I tona noo anga i taua enua ra, penei e kua akarongo ana aia no runga i te au timataanga o Iobu, e noo ra vaitata ua mai ki te enua ko Uza. I te au mataiti i muri mai, ia Mose e te iti tangata o Iseraela e vaitata atura ki Uza vaitata ki te openga o to ratou tere na roto i te metepara, penei kua kite a Mose no runga i to Iobu au mataiti openga. Te karanga ra te akonoanga matauia a te ngati Iuda e, na Mose i tata i te puka o Iobu tetai tuatau i muri ake i to Iobu mate anga.

2. Na roto i teea au mataara i riro ei te puka a Iobu ei akamaroiroianga ki te au tavini o Iehova i teia tuatau?

² Te akamatutu maira te puka a Iobu i te akarongo o te au tavini o te Atua i teia tuatau. Na roto i teea au mataara? Te tauturu maira te papaanga ia tatou kia marama i te puapinga e te aiteanga tikai o te au mea tei tupu i te rangi e te akaketaketa mai nei i te maroanga maata rava atu no runga i ta te Atua tutaraanga ngateitei i te ao katoa e pini ua ake. Te akamaata katoa maira te papaanga a Iobu i to tatou marama no runga i te ka anoanoia kia akono marie i te tu apa kore, e te tauturu ia tatou kia kite i te tumu i akatika ai a Iehova kia tupu te mamae ki tona au tavini, i tetai taime. Pera katoa, te akataka maira te puka a Iobu e ko te Tiaporo ko Satani to Iehova Enemi maata roa atu e to te tangata katoa. Te akaari katoa maira te puka e ka rauka i te tangata apa ua mei ia Iobu rai kia vai tiratiratu ua kia Iehova noatu te pakari o te timataanga. Ka makitoro marie ana tatou i tetai au tupuanga tei akatakaia mai i roto i te puka o Iobu.

Timataia a Iobu e Satani

3. Eaa ta tatou i kite no runga ia Iobu, e eaa te tumu i aiai ei a Satani iaia?

³ Ko Iobu tetai tangata apinga nui e te puapinga, e pateriareka meitaki tikai aia. E tumu korero akangateiteiia tikai aia tei tauturu i te aronga ngere. Te mea puapinga maata roa atu ra, kare rava a Iobu e inangaro ana i te akamareka kore i te Atua. Te akatakaia maira a Iobu ei “tangata apa kore, e te tiratiratu, i te mataku anga i te Atua, e te akaruke anga i te kino.” No to Iobu tu akono i te Atua​—kare no tona apinga nui e te puapinga​—i riro ei aia ei aiaianga na te Tiaporo ko Satani kia takinga kino.​—Iobu 1:1; 29:7-16; 31:1.

4. Eaa ra te tu apa kore?

⁴ Te akataka maira te papaanga i te akamataanga o te puka a Iobu, i tetai uipaanga i runga i te rangi i te aere anga mai te au angera ki mua i te aroaro o Iehova. Tei reira katoa a Satani, e kua akaapa atura aia ia Iobu. (E tatau ia Iobu 1:6-11.) Noatu e ko te au apinga a Iobu ta Satani i taiku, kua akanoo ua aia ki runga i te akaao anga i to Iobu tu apa kore. Te tuatua, “tu apa kore,” te oronga maira te reira i te manako no te tu tiratiratu, te tu tarevake kore, te tu tuatua tika, e te tu tiama. Mei tei taangaangaia i roto i te Pipiria, te aiteanga o te tu apa kore koia oki e tu akarongo mou ki katoa kia Iehova.

5. Eaa ta Satani akaapaanga no runga ia Iobu?

⁵ Kua karanga a Satani e kua akatumuia ta Iobu akamorianga i te Atua ki runga i te tu noinoi, kare ki runga i te tu apa kore. Kua akakite a Satani e ka tiratiratu a Iobu kia Iehova me ka tutaki ua rai te Atua iaia e me ka paruru iaia. Ei pau i ta Satani akaapaanga, kua akatika a Iehova ia Satani kia takinga kino i taua tangata akarongo mou ra. Tei tupu mai, i roto ua i te okotai ra, kua akakiteia mai kia Iobu e kua keiaia tana au manu me kore kua pou i te mate, kua matemate tona au tavini, e kua mate tana au tamariki e taingauru. (Iobu 1:13-19) Kua riro ainei ta Satani takinga kino ei akakore i to Iobu tu apa kore? Te akataka maira te rekoti tei akauruia mai, i to Iobu tu i te ariu atu anga ki tona  tumatetenga: “Na Iehova i oronga mai, e na Iehova i rave mai; kia akameitakiia te ingoa o Iehova.”​—Iobu 1:21.

6. (a) Eaa tei tupu i roto i tetai uipaanga i runga i te rangi? (e) Koai ta Satani e manako ra i te akaao anga aia i to Iobu tu apa kore kia Iehova?

⁶ I muri mai, kua rave akaouia tetai uipaanga i runga i te rangi. Akaou, kua akaapa a Satani ia Iobu, i te karanga anga e: “Ei kiri no te kiri, e riro oki ta te tangata katoa ra ei oko i tona ora. Kia akatika ua atura koe i to rima i tenana, ka rave atu ei i tona ivi e tona kiko, kare aia e kore i te akakino ia koe ki mua i to mata.” E akara ana e kua kapiti mai a Satani i tetai ke ki roto i tana akaapaanga. Na te karanga anga e, “E riro oki ta te tangata katoa ra ei oko i tona ora,” te akaao ra te Tiaporo i te tu apa kore o Iobu e to etai ua atu “tangata” e akamori ra ia Iehova. I muri ake i te reira, kua akatika te Atua ia Satani kia akatupu i tetai maki mamae kia Iobu. (Iobu 2:1-8) Inara kare ko te reira ua te katoaanga o to Iobu au timataanga.

Apiianga no Runga i to Iobu Turanga

7. Na roto i teea au mataara i tuku ei te vaine a Iobu, e tona au oa i te taomianga ki runga ia Iobu?

⁷ I te akamataanga, kua mamae rai te vaine a Iobu mei iaia rai. Kare e kore e kua riro ei tumatetenga kiaia te mate anga tana tamariki e te pou anga te puapinga o te pamiri. Kare e kore kua mamae aia i te kite anga i tana tane tei rokoia e te maki mamae. Kua karanga atura aia kia Iobu e: “Te tamou marie nei rai koe i toou tu apa kore? Akakinoia atu te Atua ka mate atu ei!” E oti i reira, kua tae mai e toru tangata​—ko Eliphaza, ko Biladada, e ko Zophara​—i te akara anga ei akapumaana ia Iobu. Kareka ra, kua tuatua pikikaa ua ratou e kua riro ei “aronga akapumaana manamanata.” Ei akaraanga, kua karanga a Biladada e kua rave ana te tamariki a Iobu i tetai angaanga tarevake e kua tau rai tei tupu kia ratou. Kua karanga a Eliphaza e ko te mamae e tupu ra kia Iobu koia oki no tana au ara i rave ana. Kua ekoko katoa aia e me e puapinga rai to te aronga e akono ra i to ratou tu apa kore, ki te Atua! (Iobu 2:9 NW, 11; 4:8; 8:4; 16:2; 22:2, 3) I raro ake i taua taomianga pakari ra, kua akono rai a Iobu i tona tu apa kore. E tika e, kua tarevake rai aia no te mea “kua akatika aia iaia uaorai kare te Atua.” (Iobu 32:2) Noatu rai, kua vai akarongo mou rai aia.

8. Eaa te akaraanga meitaki ta Eliu i oronga mai no te aronga te oronga ra i te akoanga i teia tuatau?

⁸ Aru mai, ka tatau tatou no runga ia Eliu, tei aere katoa mai i te atoro ia Iobu. Kua akarongo a Eliu na mua i te au tumu manako tei orongaia mai e Iobu e tona au oa toko toru. Noatu e e mapu atu aia i taua au tangata toko a ra, kua akaari a Eliu i te pakari maata atu. Kua tuatua aia kia Iobu ma te akamanako meitaki, i te taangaanga anga i to Iobu uaorai ingoa. Kua akameitaki a Eliu ia Iobu no tona arataa tiratiratu. Inara kua karanga katoa aia e kua maata roa ta Iobu akamou anga i tona manako ki runga i tona uaorai tu tiama. E oti i reira kua akapapu atu a Eliu kia Iobu e ka puapinga uaia rai te tavini i te Atua ma te akarongo mou. (E tatau ia Iobu 36:1, 11.) E akaraanga meitaki tikai no te aronga te ka anoanoia kia oronga i te akoanga i teia tuatau! Kua akaari a Eliu i te tu akakoromaki, kua akarongo  meitaki, i te ngai tei anoanoia kua akameitaki atu aia, e kua oronga i te akoanga.​—Iobu 32:6; 33:32.

9. Akapeea a Iehova i te tauturu anga ia Iobu?

⁹ I te openga iora, kua tupu tetai mea umere tikai kia Iobu i te tuatua anga a Iehova kiaia! Te akakite ra te rekoti e: “Kua tuatua mairā Iehova kia Iobu na roto i te puaioio.” Na roto i te taangaanga anga i tetai au uianga, kua ako atu a Iehova ia Iobu na roto i te tu takinga meitaki kia rauka iaia i te akatikatika i tona manako. Kua ariki puareinga ua a Iobu i te akoanga, i te na ko anga e: “E viivii toku! . . . te tataraara nei au i raro i te one-pueu e te reu.” I muri ake i to Iehova tuatua anga kia Iobu, kua ako atu Aia i te au oa toko toru no te mea “kare oki i tau” ta ratou tuatua. Kua anoanoia a Iobu kia pure no ratou. E oti akera, “Kua ruri ke akerā Iehova i taua eketumu anga o Iobu ra, kia oti ake tana pure i nga oa nona ra: e kua tataki rua mairā Iehova i ta Iobu apinga i tei rauka iaia i muatangana ra.”​—Iobu 38:1; 40:4; 42:6-10.

Mei Teaa ra te Maata o to Tatou Inangaro ia Iehova?

10. Eaa te tumu i kore ei a Iehova i kopae me kore i takore atu ia Satani?

¹⁰ Ko Iehova Tei Anga mai e koia te Tutara Ngateitei o te au mea katoatoa i angaia. Eaa te tumu i kore ei aia i kopae i te akaaoanga a te Tiaporo? Kua kite te Atua e me kopae aia ia Satani me kore me takore atu aia iaia, kare te reira e pau atu i te maroanga. Kua karanga te Tiaporo e kare roa a Iobu, e tangata tu apa kore no Iehova, e vai tiratiratu me apai keia tona au apinga nui. Kua vai tiratiratu ua atu rai a Iobu noatu te timataanga. E oti kua karanga a Satani e ka uri ke tetai ua atu tangata mei te Atua me rokoia aia i te mamae i te pae kopapa. Kua mamae a Iobu, inara kare tona tu apa kore i ngaro ana. No reira, kua akapapuia e e pikikaa a Satani i roto i te tu o taua tangata akarongo mou noatu tona tu apa ua. Akapeea ra tetai aronga ke atu e akamori ra i te Atua?

11. Akapeea a Iesu i te akaari taka meitaki mai anga e e pikikaa a Satani?

¹¹ Tei tupu mai, ko te au tavini tataki tai o te Atua tei akono i tona tu apa kore noatu eaa ta Satani ka tuku ki runga iaia te akatutu ra e i roto i tona uaorai tu, e pikikaa te au akaapaanga a taua enemi kino ra. Kua aere mai a Iesu ki te enua nei e kua akaari taka meitaki e e pikikaa a Satani. E tangata ara kore a Iesu mei to tatou metua mua rai, ko Adamu. Kua riro to Iesu tu akarongo mou e tae ua atu ki tona mate ei akatutu taka meitaki mai e e pikikaa a Satani e ko tana au akaapaanga e au mea pikikaa katoa.​—Apo. 12:10.

12. Eaa te atianga e te apainga a te au tavini tataki tai o Iehova?

¹² Noatu ra, te timata ua nei rai a Satani i to Iehova aronga akamori. Tei ia tatou tataki tai te atianga e te apainga kia akatutu i to tatou uaorai tu apa kore e te tavini nei tatou ia Iehova no to tatou inangaro iaia​—kare e no te au tumu noinoi. Eaa ra to tatou manako no runga i taua apainga ra? E tikaanga ngateitei te reira kia tiratiratu kia Iehova. E akapumaanaanga katoa kia tatou kia kite e te oronga maira a Iehova i te maroiroi kia tatou kia akakoromaki e, mei to Iobu turanga rai, e akanoo ana aia i tetai au kotinga ki te au timataanga ta tatou e aro atura.​—1 Kori. 10:13.

Satani​—E Enemi Taitoito e te Apoteiti

13. Eaa te au akakiteanga ta te puka a Iobu e akakite maira no runga ia Satani?

¹³ Te oronga maira te au Tuatua Tapu Epera i te au akakiteanga no runga i to Satani turanga akama i te akaao anga ia Iehova e te akatatipake anga i te tangata ravarai. I roto i te au Tuatua Tapu Ereni Kerititiano, e maata atu ta tatou ka kite no runga i ta Satani patoianga ia Iehova, e i roto i te puka o Apokalupo, ka kite tatou no runga i te akapapuia anga te tikaanga o ta Iehova tutaraanga ngateitei e to Satani akapouanga. Ka maata  atu ta tatou ka kite no runga i to Satani arataa meameaau i roto i te puka a Iobu. I to Satani tae anga ki te au uipaanga i runga i te rangi, kare tona akakoroanga e kia akapaapaa ia Iehova. E tu makitakita tikai to te Tiaporo e te akakoroanga kino. I muri ake i tona akaapa anga ia Iobu e te akatikaia anga kia timata iaia, “aere aturā Satani mei te aroaro atu o Iehova.”​—Iobu 1:12; 2:7.

14. Eaa te tu o Satani tei akaariia kia Iobu?

¹⁴ No reira, te akataka maira te puka a Iobu e ko Satani te enemi kino rava atu o te tangata ravarai. I te tuatau i rotopu i te uipaanga i runga i te rangi tei taikuia mai i roto ia Iobu 1:6 e te uipaanga tei akakiteia mai i roto ia Iobu 2:1, e tuatau teia kare i akatakaia, i tupu ei te timataanga pakari kia Iobu. Na roto i to Iobu tu akarongo mou i rauka ai ia Iehova kia akakite kia Satani e: “E oti akera te tamou marie nei rai [a Iobu] i tona tu apa kore, noatu taau akakoko mai iaku kia apuku iaia ma te kore e tumu.” Inara kare a Satani i akakite ana e kua tarevake tana au akaapaanga no runga ia Iobu. I tetai tua ra, kua maro aia e kia timata pakari akaouia a Iobu. No reira, kua timata te Tiaporo ia Iobu i tona tuatau e puapingaia ra e i te tuatau e putaua ra. Te taka meitaki ua ra e, kare roa o Satani tangi no te aronga putaua me kore no te aronga tei o ki roto i te manamanata. E rikarika ana aia i te tangata e tu apa kore to ratou. (Iobu 2:3 NW, 4, 5) Noatu rai, kua akaari mai to Iobu tu akarongo mou e e pikikaa a Satani.

15. Eaa te au tu aiteite o te au apoteiti o teia tuatau ki to Satani?

¹⁵ Ko Satani te mea ora mua tei riro mai ei apoteiti. E akaari ana te au apoteiti o teia tuatau i te au tu aiteite ki to te Tiaporo. Penei kua poitiniia to ratou manako e te tu akaapaapa i te aronga tataki tai i roto i te au putuputuanga, te aronga pakari Kerititiano, me kore i te Pupu Akaaere. E patoi ana tetai pae apoteiti i te taangaanga anga i te ingoa o te Atua, ko Iehova. Kare ratou e inangaro ana kia kite ia Iehova me kore kia tavini iaia. Mei to ratou metua rai, ko Satani, e akakoro ana te au apoteiti i te akakino atu i te akarongo o te tangata tu apa kore. (Ioa. 8:44) No reira rai kare rava te au tavini o Iehova e kapiti atu ana kia ratou!​—2 Ioa. 10, 11.

Akangateitei a Iobu i te Ingoa o Iehova

16. Eaa te tu ta Iobu i akaari kia Iehova?

¹⁶ Kua taangaanga e kua akapaapaa a Iobu i te ingoa o Iehova. Noatu tona mamae i te akarongo anga i te nuti e kua mate tana tamariki, kare roa a Iobu i akaapa tau kore ana i te Atua. Noatu e kua manako tarevake a Iobu e na te Atua i akatupu i tona tumatetenga, kua akangateitei ua rai aia i te ingoa o Iehova. I roto i tetai o tana au tuatua puapinga, kua akakite a Iobu e: “I na, ko te mataku i te Atu ra, ko te pakari ïa, e te akaruke i te kino ra, ko te kite ïa.”​—Iobu 28:28.

17. Eaa ra tei tauturu ia Iobu kia tamou marie i tona tu apa kore?

¹⁷ Eaa tei tauturu ia Iobu kia tamou marie i tona tu apa kore? Te taka meitaki ua ra e, i mua ake ka tupu ei te au tumatetenga, kua akatupu takere aia i tetai pirianga vaitata kia Iehova. Noatu e kare a tatou akapapuanga e kua kite aia e  kua akaao a Satani ia Iehova, kua ngaueue kore tikai a Iobu kia vai tiratiratu ua. Kua akakite aia e: “E mate ua atu au, kare rava au e pa i toku nei tu apa kore!” (Iobu 27:5, NW) I akapeea a Iobu i te akatupu anga i teia pirianga vaitata? Kare e ekoko e, e kua akaperepere aia i tana i akarongo no runga i ta te Atua i rave kia Aberahama, kia Isaaka, e kia Iakoba, e kopu tangata nona. E na roto i te akara anga i te au mea tei angaia, kua kite a Iobu i to Iehova au tu e manganui.​—E tatau ia Iobu 12:7-9, 13, 16.

18. (a) Akapeea a Iobu i te akaari anga i tona tu akono ia Iehova? (e) Na roto i teea au mataara e aru ana tatou i ta Iobu akaraanga meitaki?

¹⁸ Ta Iobu i kite kua akakeuia aia kia inangaro i te akamareka ia Iehova. Penei ua ake e kua rave te au mema o tona pamiri i tetai mea tei akamareka kore i te Atua me kore ‘kua akakino ratou i te Atua i to ratou ngakau,’ kua oronga putuputu ua rai aia i te au atinga. (Iobu 1:5) Pera katoa i tona timata pakariia anga, kua tuatua papu ua rai a Iobu no runga ia Iehova. (Iobu 10:12) E akaraanga meitaki tikai! Ka tau katoa rai tatou kia apii putuputu i te kite tika tikai no runga ia Iehova e tona au akakoroanga. E au ravenga meitaki ta tatou kia riro to tatou pirianga kia Iehova ei mea matutu na roto i te apii, te tae anga ki te uipaanga, te pure, e te tutu anga i te tuatua meitaki. Tei maata rava atu, koia oki ka rave maroiroi tatou i te akakite anga i te ingoa o Iehova. E mei te tu apa kore o Iobu i te akamareka anga ia Iehova, ka rauka rai i te tu apa kore o te au tavini o te Atua i teia tuatau kia akarekareka i to Iehova ngakau. Ka akamanakoia teia tumu manako i roto i te atikara e aru maira.

Maara Ainei ia Koe?

• Eaa ra te tumu i riro ei a Iobu ei aiaianga na te Tiaporo ko Satani?

• Eaa te au timataanga ta Iobu i akakoromaki, e i akapeea aia i te ariu atu anga ki te reira?

• Eaa te ka tauturu ia tatou kia tamou marie i te tu apa kore mei ta Iobu i rave?

• Eaa ta tatou i kite no runga ia Satani mei roto mai i te puka a Iobu?

[Au Uianga Apii]

[Tutu i te kapi 4]

Te akamatakite maira te papaanga a Iobu ia tatou i te maroanga maata rava atu o ta te Atua tutaraanga ngateitei i te ao katoa e pini ua ake

[Tutu i te kapi 6]

I raro ake i teea au turanga penei ka timataia toou tu apa kore?