Au Uianga a te Aronga Tatau

E manakonakoanga ainei to tetai pepe tei mate i roto i te vairanga tamariki o tona mama?

Te aronga kare rava i kite ana i te mamae o te mate o tetai pepe kare i anauia ake, penei ka ngata ia ratou i te kite e mei teaa tikai te manako o te aronga tei na roto ana i teia tu. Tetai pae metua e pakari atu to ratou tumatetenga. Ko tetai metua vaine, e rima ana pepe tei mate, i mua ake ka anau mai ei. I te tuatau tei aereia, kua rauka iaia te akameitakianga o te utuutu anga e rua tamariki tamaroa. Inara, kua maara rai iaia te mate o tana au tamariki. E tae ua atu ki te ra i mate ei aia, kua kite tikai aia e eaa te au mataiti o tana au pepe tei anau mate mai e te au pepe topa naringa ratou i ora mai. E tumu ainei to taua au Kerititiano kia manakonako atu i tetai tuakaouanga no ta ratou au tamariki tei mate?

Te pauanga tika ua ki taua uianga ra koia oki, kare tatou i kite. Kare roa te Pipiria e tuatua tika mai ana no runga i tetai tuakaouanga no te au pepe tei anau mateia mai me kore no te au pepe topa. Inara, e au kaveinga tetai i roto i te Tuatua a te Atua te ka riro ei puapinga ki teia uianga e penei ka rauka i te oronga mai i te pumaana.

Ka akamanako ana tatou e rua nga uianga. Te mea mua, eaa to Iehova manako no runga i te tuatau i akamata ai te oraanga tangata​—i te toanga me i te anauanga? Te rua, eaa to Iehova manako no runga i te pepe kare i anauia ake—​ei tangata takake me ei putunga teera ua e te kiko i roto i te vairanga tamariki o te vaine? Te oronga maira te au kaveinga Pipiria i te au pauanga taka meitaki ki teia nga uianga.

Kua akakite taka meitaki mai te Ture a Mose e e akamata ana te oraanga, kare i te tuatau i anauia ai, mari ra i mua roa atu. Na roto i teea mataara? Kua akaari mai te reira e e mate te utunga me tamateia tetai pepe kare i anauia ake. Ka akara ana i teia ture: ‘Te mate, e mate te utunga.’ * (Exo. 21:22, 23) No reira, te ora ra rai te pepe i roto i te vairanga tamariki e e tangata ora te reira. I te marama anga i te tika e e tangata ora te pepe i roto i te vairanga tamariki, kua riro ei tauturu i te mirioni ua atu au Kerititiano kia kopae i te titiri pepe, te ariki anga i te reira ei ara kino ki te Atua.

I na e, te ora ra te pepe kare i anauia ake, eaa ra i reira te puapinga o taua oraanga ra kia Iehova? Te akakite maira te ture tei taikuia i mua ana e ka tamateia tetai tangata tei akatupu i te mate o tetai pepe kare i anauia ake. Te taka meitaki ra i reira, e e puapinga maata te oraanga o te pepe kare i anauia ake i roto i te mata o te Atua. Pera katoa, e maata ua atu te au irava i roto i te au Tuatua Tapu e akakite ra e kia Iehova, e tangata tikai te pepe kare i anauia ake. Ei akaraanga, kua akauruia te Ariki ko Davida kia tuatua no runga ia Iehova e: “Naau i tapoki iaku i roto i te kopu o toku metua vaine ra. . . . Kua kite oki to mata i toku tu, i toku vai oti kore anga ra; e kua tataia toku au melo katoa, i te au rā katoa i te rave angaia.”​—Sala. 139:13-16; Iobu 31:14, 15.

Te kite katoa ra a Iehova e ko te tamariki kare i anauia ake e au tu tangata tikai to ratou e penei e puapinga maata to ratou no te tuatau ki mua. I te nui anga a Rebeka te vaine a Isaaka i te nga maanga, kua akakite a Iehova i tetai totou no runga i te nga tamariki e putakaiti ra i roto i tona vairanga tamariki, tei akaari mai e kua kite takere aia i te au tu i roto ia raua te ka riro ei akatuke maata i te oraanga o te au tangata e manganui i te tuatau ki mua.​—Gene. 25:22, 23; Roma 9:10-13.

Ko Ioane Papetito katoa tetai. Te karanga ra te papaanga Evangeria e: ‘Tei te akarongo anga atu a Elisabeta i to Maria aroa anga mai, kua rere iora te tamaiti i roto i tona kopu: ki akerā Elisabeta i te vaerua tapu.’ (Luka 1:41) I te akataka anga i tei tupu, kua taangaanga te taote ko Luka i tetai kupu Ereni te tuatua ra no runga i tetai pepe kare i anauia ake me kore i tetai pepe i muri ake i tona anau mai anga. Kua taangaanga aia i taua kupu rai i te tuatua anga no runga i te pepe ko Iesu e vai ua ra i roto i te are puakatoro.​—Luka 2:12, 16; 18:15.

 Me akamanakoia teia au tika, e teia au irava, te oronga maira ainei te Pipiria i tetai tuke maata i rotopu i tetai pepe i roto i te vairanga tamariki e te pepe tei akaea mai no te taime mua? I te akara anga, kare. E te au ra te reira ki te kimikimianga taieni o teia tuatau. Ei akaraanga, kua kitea mai e te aronga kimikimi e ka rauka i te pepe i roto i te vairanga tamariki i te kite e te ariu atu ki te mea e tupu ra i vao ake i te vairanga tamariki. No reira, kare i te mea poitirere e ka tupu tetai pirianga mou tikai no te metua vaine ki te tamaiti e tupu ra i roto iaia.

Me anau mai te pepe, e tuketuke te taime e anau mai ana. Ka akamanako ana i teia akaraanga: Anau pi ua mai tetai metua vaine i te pepe ora, e kua mate i nga mea ra ua i muri mai. Ko tetai metua vaine ke mai, kua tae rai te marama o te pepe, inara kua mate te pepe i mua ua ake ka anau mai ei. Kua akameitakiia ainei te metua vaine mua ki te manakonakoanga e ka akatuakaouia tana tamaiti no te mea ua nei e kua anau pi ia mai tana pepe, kareka ra te rua o te metua vaine kare ona manakonakoanga?

Kia akamanako poto ua i reira, te apii taka meitaki maira te Pipiria e e akamata ana te oraanga i te toanga e te kite ra a Iehova i te pepe kare i anauia ake ei tangata takake e te puapinga. I te marama anga i taua au tuatua mou i roto i te Pipiria, penei ka manako tetai aronga e kare e tau ana kia karanga e kare e manakonakoanga o te tuakaouanga no te pepe kare i anauia ake tei mate. E tika ra, e penei ka manako ratou e ka riro taua maroanga ei akaekoko i to tatou turanga Tuatua Tapu no runga i te titiri pepe, tei akatumuia ki runga i taua au tuatua mou tikai.

I te au tuatau i topa, kua uriuri ana teia tianara i tetai au uianga tau penei tei riro ei akaekoko i te manakonakoanga e e tuakaouanga tetai no te tamariki tei mate i mua ake ka anauia mai ei. Ei akaraanga, ka tuku ainei te Atua i tetai oraanga oti kore ki roto i te vairanga tamariki o tetai vaine i roto i te Parataito? Inara, na roto i te apii ua anga, te akamanako oonu anga, e te pure kua aratakiia te Pupu Akaaere kia taopenga e kare taua au uianga i te mea puapinga ki te manakonakoanga o te tuakaouanga. Kua akakite a Iesu e: “Kare rav[a] e mea e kore ei e tika i te Atua.” (Mare. 10:27) Kua akaari mai te au mea tei tupu kia Iesu uaorai i te tikaanga tikai o taua tuatua ra; kua tukuia mai tona oraanga mei te rangi mai ki roto i te vairanga tamariki o tetai paretenia mapu​—papu roa e i roto i te manako o te tangata, kare te reira e rauka.

Ko te aiteanga ainei o teia au mea pouroa e, te apii ra te Pipiria e ko te tamariki tei mate i mua ake ka anau mai ei, ka akatuakaouia mai? Kia akaketaketa tatou e kare te Pipiria e pau tika atu i taua uianga, no reira kare e tumu no te tangata kia maro e ka akatuakaouia mai ratou. Penei ka akatupu mai teia tumu manako i te au uianga tukeke kare e openga. E ngari ake, eiaa e tamanako ua. Ta tatou i kite: Tei runga i te Atua ko Iehova, tei ki i te takinga meitaki e te aroa ua. (Sala. 86:15) Kare e ekoko e ko tona inangaro ngakau tikai koia oki kia takore i te kino ta te mate i akatupu, na roto i te tuakaouanga. (Iobu 14:14, 15) Papu roa ia tatou e e rave ua ana aia i te mea tika. Ka oronga mai aia i te rapakauanga no te au tu mamae e manganui tei akatupuia kia tatou i roto i te oraanga o teia akatereanga kino o te au mea nei, iaia e akaue aroa ra i tana Tamaiti kia ‘akakore i te au angaanga a te diabolo.’​—1 Ioa. 3:8.

[Tataanga Rikiriki i Raro]

[Tutu i te kapi 13]

Ka oronga mai a Iehova i te rapakauanga no te au tu mamae katoatoa tei tupu