Ka Akarekareka Toou Tu Apa Kore i to Iehova Ngakau
Ka Akarekareka Toou Tu Apa Kore i to Iehova Ngakau
“E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.”—MASE. 27:11.
1, 2. (a) Eaa te akaaoanga a Satani ta te puka a Iobu e akataka maira? (e) Eaa te akaari maira e kua akakino ua atu rai a Satani ia Iehova i muri ake i to Iobu tuatau?
KUA akatika a Iehova ia Satani kia timata i te tu apa kore o Iobu, e tavini tiratiratu no te Atua. Tei tupu mai, kua ngere a Iobu i tana au manu, tana au tamariki, e tona oraanga meitaki. Inara, i te tuatau i akaao ei a Satani i te tu apa kore o Iobu, kare tona manako i runga ua i te tangata ko Iobu. “Ei kiri no te kiri, e riro oki ta te tangata katoa ra ei oko i tona ora,” i akaapa ai a Satani. Kua akatupu mai teia akaaoanga i tetai maroanga tei o mai etai ke atu i te pae mai ia Iobu e tei tupu ua atu rai i muri ake i tona matenga.—Iobu 2:4.
2 Mei tetai 600 mataiti i muri ake i to Iobu au timataanga, kua akauruia a Solomona kia tata e: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.” (Mase. 27:11) Te taka ua ra e, i taua tuatau ra te akaao ra rai a Satani ia Iehova. Tetai, i roto i tetai orama tei orongaia ki te apotetoro ko Ioane, kua kiteaia ana a Satani i te akaapa anga i te au tavini o te Atua i muri ake i tona uriia mai anga mei te rangi i tetai tuatau i muri ake i te akanooia anga te Patireia o te Atua i te mataiti 1914. Ae, pera katoa i teia tuatau, i roto tikai i te au ra openga o teia akatereanga kino, te akaao nei rai a Satani i te tu apa kore o te au tavini o te Atua!—Apo. 12:10.
3. Eaa te au apiianga puapinga ta tatou ka kite mei roto mai i te puka a Iobu?
3 Ka akamanako ana i reira, e toru au apiianga puapinga ta tatou ka kite mai mei roto i te puka a Iobu. Te mea mua, te akaari maira te au timataanga o Iobu kia tatou e koai tikai te enemi o te tangata nei e koai te patoi ra i te iti tangata o te Atua. Ko te Tiaporo ko Satani taua enemi ra. Te rua, noatu eaa te au timataanga ta tatou ka aro atu, ka riro te pirianga vaitata ki te Atua ei tauturu ia tatou kia tamou marie i to tatou tu apa kore. Ko te toru, me tupu te au timataanga e me timataia tatou na roto i tetai au tu, ka tauturu mai te Atua ia tatou kia akakoromaki mei tana rai i rave kia Iobu. I teia tuatau, e rave ana a Iehova i teia na roto i tana Tuatua, tana akaaerenga, e na roto i tona vaerua tapu.
E Akamaara ua rai e Koai Tikai te Enemi
4. Noai te apa no te au turanga o teianei ao?
4 E maata ua atu te kare e irinaki ana e te vai nei a Satani. No reira, noatu e penei te manamanata ra ratou no runga i te au turanga o teianei ao, kare ratou i kite e koai te tumu tikai—ko te Tiaporo ko Satani. E tika rai, te maataanga o te turanga taitaia, na te tangata uaorai i akatupu. Kua iki to tatou nga metua mua, ko Adamu raua ko Eva kia akatakake mai ia raua mei Tei Anga mai ia raua. E mei te reira tuatau mai, kua rave te au uki tei aru mai i te au ikianga kamakura. Noatu eaa tei tupu, na te Tiaporo rai i akavare ia Eva kia meameaau atu i te Atua. Nana oki i akatupu i rotopu i te tangata apa ua e mate atura, i tetai akatereanga i te ao nei i raro ake i tana akaaereanga. I te mea e ko Satani “te atua o teianei ao,” te akaari katoa ra te taiate tangata i taua au tu mei tona rai—te nengonengo, te maro, te vareae, te noinoi, te akavare, e te tu meameaau. (2 Kori. 4:4; 1 Timo. 2:14; 3:6; tatau ia Iakobo 3:14, 15.) Kua taki atu taua au tu ki te manamanata poritiki e te akonoanga, te makitakita, te angaanga pikipikikaa, e te marikonga kore, tei akamaata atu i te taitaia o te tangata ravarai.
5. Eaa ta tatou e inangaro ra kia rave no runga i te kite puapinga tei rauka ia tatou?
5 E kite puapinga tikai tei rauka ia tatou te au tavini o Iehova! Ae, kua kite tatou e noai te apa no te au turanga kino o teianei ao. Kare ainei tatou i reira, e akakeuia kia piri atu ki roto i te angaanga orometua kia akakite ki te tangata e koai tikai te akatupu nei i te pekapeka? E kare ainei tatou e mataora ana kia piri atu ki te tua o te Atua mou ko Iehova, e kia akamarama atu ki etai ke e ka akapeea aia me akakore atu ia Satani e te au manamanata o te tangata nei?
6, 7. (a) Naai i akatupu i te takinga kino e tupu ra ki te aronga akamori mou? (e) Ka akapeea tatou me aru i te akaraanga o Eliu?
6 Na Satani i akatupu i te au manamanata e manganui i teianei ao e pera katoa no te au patoianga ta te iti tangata o te Atua e kite ra. Te akakoro ra tikai aia i te timata ia tatou. Kua akakite a Iesu Karaiti ki te apotetoro ko Petero e: “E Simona, e Simona, i na, i pati anā Satani ia kotou, e ruru mei te sitona e ruruia ra.” (Luka 22:31) Mei te reira rai, me aru tatou tataki tai i to Iesu takainga vaevae ka kite tatou i te au timataanga na roto i tetai ua atu au tu. Kua akaaiteite a Petero i te Tiaporo ki te “liona ngunguru ra, i te kimi anga i te tangata e pou iaia.” E kua akakite a Paulo e: “Te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.”—1 Pete. 5:8; 2 Timo. 3:12.
7 Akapeea tatou i te akaari anga e te akamaara ua ra tatou e koai tikai te enemi me tupu tetai tumatetenga ki tetai taeake irinaki i roto i te putuputuanga? Kare tatou e akamamao mai ia tatou mei taua taeake i rokoia e te tumatetenga, mari ra ka tuatua tatou kiaia mei ta Eliu rai i rave kia Iobu, ei oa piri mou tikai. Ka turuturu tatou i to tatou taeake i te tamaki atu anga i to tatou enemi, ko Satani. (Mase. 3:27; 1 Tesa. 5:25) To tatou akakoroanga koia oki kia tauturu i to tatou taeake tavini kia tamou marie i tona tu apa kore, noatu eaa te tautaanga ka anoanoia, e kia akarekareka i to Iehova ngakau.
8. No teaa a Satani i kore ei i puapingaia i te tapu ia Iobu mei te akangateitei anga ia Iehova?
8 Ko te apinga mua ta Satani i akatupu i ngere ei a Iobu koia oki ko tana au manu. E puapinga maata tikai to taua au manu ra, i te akara anga penei ko tana kimi anga moni te reira. Inara kua taangaanga katoa a Iobu i te reira i roto i tana akamorianga. Muri ake i to Iobu akatapu anga i tana tamariki, “kua tu akera aia i te popongi metua, e kua apai i te atinga karakaratio na ratou ravarai e pini ua ake: te karanga ra oki a Iobu, Peneiake kua ara taua au tamariki naku nei, e kua akakino i te Atua i to ratou ngakau. I pera oki a Iobu i te au rā katoa ra.” (Iobu 1:4, 5) No reira, e akaatinga putuputu ua ana a Iobu i te au manu kia Iehova. I te akamata anga ra te au timataanga, kare i rauka akaou iaia i te rave i te reira. Kare a Iobu “au apinga” puapinga ei akangateitei ia Iehova. (Mase. 3:9) Inara, ka rauka iaia—e kua pera rai—i te akangateitei ia Iehova ki tona vaa!
Akatupu i te Pirianga Vaitata kia Iehova
9. Eaa te apinga puapinga roa atu i roto i to tatou oraanga?
9 Noatu e tangata apinga nui tatou me kore e tangata putaua, te mapu ra me kore kua pakari, te meitaki ra te oraanga me kore kua kino, ka rauka ia tatou i te akatupu i te pirianga vaitata kia Iehova. Noatu te au timataanga ta tatou ka aro atu, ka riro te pirianga vaitata ki te Atua ei tauturu ia tatou kia tamou marie i to tatou uaorai tu apa kore e kia akarekareka i to Iehova ngakau. Kua rauka i tetai pae tangata, e iti ua to ratou kite no runga i te tuatua mou, te turanga mataku kore e kua akono i to ratou tu apa kore.
10, 11. (a) I akapeea tetai tuaine o tatou i te ariu atu anga ki te au timataanga no te tu apa kore? (e) Eaa te pauanga ririnui tikai ta teia tuaine i oronga kia Satani?
10 E akamanako ana i te akaraanga o te Tuaine ko Valentina Garnovskaya, tetai o te Au Kite e manganui i Rutia, tei akono i to ratou tu apa kore mei ia Iobu rai noatu te au timataanga pakari. I te mataiti 1945, mei te 20 rai ona mataiti, kua akakite atu tetai taeake kiaia no runga i te tuatua mou. Kua oki akaou te taeake e rua taime i te tuatua no runga i te Pipiria, inara kare rava a Valentina i kite akaou ana iaia. Noatu ra, kua akamata a Valentina i te tutu aere ki tona au tangata tupu. Tei tupu mai, kua opuia aia e kua akautungaia e varu mataiti i roto i tetai ngai tapekaanga. I te mataiti 1953 kua matara mai aia e i taua taime rai kua rave akaou i tana angaanga tutu aere. Akaou, kua opuia aia e kua akamouauriia—teia taime e tai ngauru mataiti. I muri ake i te akapouanga i tetai au mataiti i roto i te ngai tapekaanga, kua akanekeia atu aia ki tetai mea ke mai. I roto i taua ngai tapekaanga ra, e au tuaine tetai i reira, e Pipiria ta ratou. I tetai ra, kua akaari atu tetai tuaine i te Pipiria kia Valentina. E atianga rekareka tikai! E akamanako ua ana, e ko te Pipiria ua ta Valentina i kite ana koia oki ko te mea i roto i te rima o te taeake tei akakitekite mai ana kiaia no runga i te tuatua mou i te mataiti 1945!
11 I te mataiti 1967, kua tukuia mai a Valentina ki vao, i na, ko te rauka anga teia iaia kia akatutu i tona akatapuanga kia Iehova na roto i te papetitoanga ki te vai. Kua taangaanga aia i tona turanga rangatira ma te toto mapu, kia piri ki roto i te angaanga orometua e tae ua atu ki te mataiti 1969. Inara, i taua mataiti ra, kua opu akaouia aia, e i teia taime kua akautungaia aia e toru mataiti i roto i te are auri. Noatu rai, kua tutu ua atu rai a Valentina. I mua ake i tona mate anga i te mataiti 2001, e 44 ana tangata i tauturu ana kia kite i te tuatua mou. E 21 ona mataiti i pou i roto i te au are auri e te au ngai tapekaanga. Kua inangaro puareinga ua aia i te oronga i tana au mea pouroa, kapiti mai tona turanga rangatira, kia rauka i te tamou marie i tona tu apa kore. I te openga o tona oraanga, kua karanga a Valentina e: “Kare takiri oku ngai noku uaorai. Pouroa taku au apinga tei roto i tetai kiri okotai, inara mataora ua au e te mareka ua i te tavini anga ia Iehova.” E pauanga ririnui tikai ta Valentina kia Satani, tei akaapa e kare te tangata e vai tiratiratu ki te Atua me aro atu i te au timataanga! (Iobu 1:9-11) Papu ia tatou e kua akarekareka aia i to Iehova ngakau e te akara mari atura ki te taime e akaora akaou mai ei aia ia Valentina e te aronga pouroa tei mate ma te akarongo mou, na roto i te tuakaouanga.—Iobu 14:15.
12. Eaa te tuanga angaanga a te inangaro i roto i to tatou pirianga kia Iehova?
12 To tatou pirianga oa kia Iehova, kua akatumuia ki runga i to tatou inangaro iaia. E reka ua ana tatou i tona au tu e ka rave i te ka rauka ia tatou kia akaau i to tatou oraanga ki tona au akakoroanga. Ei tuke ki te akaapaanga a te Tiaporo, te oronga puareinga ua ra tatou i to tatou inangaro kia Iehova ma te ngakau tae tikai. Na teia inangaro ngakau tae e akamatutu ia tatou kia tamou marie i te tu apa kore i raro ake i te timataanga. I to Iehova tua ra, “te tiaki ra oki aia i te aerenga o tona ra aronga [“tiratiratu,” NW].”—Mase. 2:8; Sala. 97:10.
13. Akapeea a Iehova i te akara anga mai i ta tatou e rave ra nona?
13 Ka akakeu te inangaro ia tatou kia akangateitei i to Iehova ingoa, noatu te manako ra tatou e kare e maata ta tatou ka rauka i te rave. Te kite ra aia i to tatou au akakoroanga meitaki e kare aia e akava mai me kare e rauka ia tatou i te rave pouroa i ta tatou ka inangaro i te rave. Te mea puapinga ra koia oki, kare ko ta tatou ua e rave ra mari katoa ra, ko te tumu i rave ei tatou i te reira. Noatu e kua rokoia a Iobu e te tumatetenga e kua akakoromaki maata, kua tuatua atu aia ki te aronga e akaapa maira iaia no runga i tona inangaro no to Iehova au arataa. (E tatau ia Iobu 10:12; 28:28.) I roto i te pene openga o te puka a Iobu, kua akakite te Atua e kua riri aia ia Eliphaza, ia Biladada, e ia Zophara no te mea kare ratou i tuatua i te mea tika. I taua taime katoa ra, kua akakite a Iehova i tona mareka ia Iobu na te kapiki anga iaia e a taime e ko ‘toku tavini’ e na te akakite anga kiaia kia pure no te aronga akapumaana pikikaa. (Iobu 42:7-9) Kia akapera katoa tatou na roto i taua mataara ra kia mareka mai a Iehova ia tatou.
Turuturu a Iehova i Tona Au Tavini Akarongo Mou
14. I akapeea a Iehova i te tauturu anga ia Iobu kia akatikatika i tona aerenga manako?
14 Kua tamou marie ua atu rai a Iobu i tona tu apa kore noatu tona tu apa ua. I tetai taime, i raro ake i te taomianga pakari, kua tarevake tona aerenga manako. Ei akatauanga, kua akakite aia kia Iehova e: “Te kapiki nei au kia koe, kare ra koe e akarongo mai iaku . . . i te ririnui o te rima kua rave viviki maira koe iaku.” Tetai katoa, kua maata roa to Iobu manako i te akatano iaia uaorai i te karanga anga aia e: “Kare au i te tangata kino” e “kare ra no te tuatua-tika kore i roto i oku nei rima: kare oki taku pure i viivii.” (Iobu 10:7; 16:17; 30:20, 21) Noatu ra, kua tauturu a Iehova ia Iobu ma te takinga meitaki na te ui anga i tetai au uianga tei apai ke atu i te manako mei ia Iobu. Kua tauturu katoa te reira ia Iobu kia kite meitaki e ko te Atua tei teitei rava atu e kare e rauka i te akaaite atu i te tangata kiaia. Kua ariki a Iobu i te aratakianga e kua akatikatika iaia uaorai.—E tatau ia Iobu 40:8; 42:2, 6.
15, 16. Na roto i teea au mataara e oronga mai ana a Iehova i te tauturu ki tona au tavini i teia tuatau?
15 Te oronga katoa maira a Iehova i te aratakianga takinga meitaki e te akoanga no tona au tavini i teia tuatau. Tetai, te rekareka katoa nei tatou i te au meitaki puapinga. Ei akatauanga, kua oronga mai a Iesu Karaiti i te atinga oko e kua akanoo i te tango no te akakore anga ara. Akatumuia ki runga i taua atinga ra, ka rauka ia tatou tetai pirianga vaitata ki te Atua noatu to tatou tu apa ua. (Iako. 4:8; 1 Ioa. 2:1) Me aro atu i te au timataanga, e pure katoa tatou no te turuturuanga e te tauturu akamatutu a te vaerua tapu o te Atua. Kapiti katoa mai, tei ia tatou te Pipiria katoa, e me tatau tatou i te reira e te akamanako oonu ki runga i te au mea i roto, te akateatea mamao ra tatou ia tatou uaorai no te au timataanga o te akarongo. Ka tauturu te apii ia tatou kia marama i te au maroanga no te tutaraanga ngateitei i te ao katoa e pini ua ake e no to tatou uaorai tu apa kore.
16 Tetai katoa, ei tuanga no te taokotaianga taeake i te ao katoa nei, te puapinga maataia nei tatou mei te kai pae vaerua ta Iehova e oronga maira na roto i “te tavini akono meitaki e te pakari.” (Mata. 24:45-47) I roto i te au putuputuanga mei te 100,000 o te Au Kite o Iehova, te raveia ra te au uipaanga ei apii ia tatou e ei akamatutu ia tatou kia aro atu i te au timataanga o te akarongo te ka tupu mai. Ka tau teia kia akatutuia ki tei tupu kia Sheila, e Kite mapu ua e noo ra i Tiamani.
17. Akatutu mai i te tu pakari o te tae putuputu ua rai ki te au uipaanga Kerititiano.
17 I tetai ra i te apii, kua noo poto ua te pupu apii o Sheila kare o ratou puapii. Kua inangaro tona pupu apii i te kanga tamatamata ua i te Ouija board. I reira rai kua aere a Sheila ki vao, e i tona akarongo anga i tei tupu i muri mai kua rekareka aia e kare aia i noo atu ana. Ia ratou e kanga ra i te Ouija board kua irieaia ratou e te temoni e kua oro ratou ma te mataku. Eaa ra tei tauturu ia Sheila kia manako i te aere viviki ki vao? “I mua poto ua ake i teia tupuanga, kua uriuri manako ana matou i ko i te Are Uipaanga Patireia no runga i te au kino o te Ouija board. No reira kua kite au e eaa taku ka rave,” i akamarama ai a Sheila. “Kua inangaro au i te akamareka ia Iehova, mei ta te Pipiria e akakite ra i roto ia Maseli 27:11.” E mea meitaki tikai e kua aere a Sheila ki te uipaanga e kua akarongo meitaki ki te porokaramu!
18. Eaa tikai taau uaorai e akakoro ra kia rave?
18 Kia akakoro rai tatou tataki tai kia aru meitaki i te aratakianga e rauka maira ia tatou mei to te Atua akaaerenga. Na te tae putuputu anga ki te uipaanga, te tatau anga i te Pipiria, te apii anga i te au puka tei akatumuia ki runga i te Pipiria, te pure, e te piri anga atu ki te au Kerititiano pakari i te pae vaerua, ka rauka ia tatou te aratakianga e te turuturuanga ta tatou e anoano ra. Te inangaro ra a Iehova ia tatou kia tamou marie i to tatou tu apa kore, e kua papu iaia e ka akapera ua atu rai tatou. E tikaanga manea tikai kia akangateitei i te ingoa o Iehova, kia tamou marie i te tu apa kore, e kia akarekareka i to Iehova ngakau!
Maara Ainei ia Koe?
• Eaa te au turanga e te au timataanga ta Satani i akatupu?
• Eaa te apinga puapinga roa atu i rauka ia tatou?
• Eaa te tumu no to tatou pirianga oa kia Iehova?
• Eaa tetai au mataara e turuturu ana a Iehova ia tatou i teia tuatau?
[Au Uianga Apii]
[Tutu i te kapi 8]
Te akakeuia ra ainei koe kia akakite aere atu i te kite puapinga tikai tei rauka ia koe?
[Tutu i te kapi 9]
Ka rauka ia tatou i te tauturu i te au taeake akamori kia tamou marie i to ratou tu apa kore
[Tutu i te kapi 10]
Inangaro puareinga ua a Valentina i te akaatinga i te au mea pouroa kia tamou marie i tona tu apa kore