Maara Ainei ia Koe?

Kua rekareka ainei koe i te tatau anga i te au itiu ou o Te Punanga Tiaki? Akara ana me ka rauka ia koe i te pau i te au uianga ka aru mai:

• Eaa ra i puapinga ai kia akono tamou i to tatou tu apa kore ei Kerititiano?

Ka riro te akono tamou anga i to tatou tu apa kore ei tauturu ia tatou kia akaari e te kauraro ra tatou ki ta Iehova tutaraanga ngateitei no to tatou inangaro e ei akapapu e e pikikaa a Satani. Te oronga katoa maira to tatou tu apa kore i tetai tumuanga no te Atua kia akava ia tatou e no reira ka anoanoia te reira no to tatou manakonakoanga no te tuatau ki mua.—12/15, kapi 4-6.

• Eaa ua ai tetai au taoonga e akaata maira i ta Iesu angaanga i roto i to te Atua akakoroanga?

Te Tamaiti anau tai. Te Logo. Te Amene. Te Arai o te koreromotu ou. Te Taunga Maata. Te Uanga taputouia.—12/15, kapi 15.

• Akapeea tatou i te aru anga i te akaraanga a Maria i te tavaitai anga i te ‘au tuatua, e akaeatu akera i roto i tona ngakau.’?

Ka anoanoia tatou kia akamanako i te Pipiria ei Tuatua akauruia na te Atua e kia tatau putuputu i te reira. I reira ka anoanoia tatou kia tavaitai i taua au tuatua pae vaerua ki roto i to tatou ngakau e kia akaoonu atu i to tatou marama no te reira. Me manako oonu tatou i ta tatou i tatau i roto i te Pipiria, me akara atu i tetai atu au ravenga te ka rauka ia tatou i te taangaanga pu tikai i te ako a Iehova, te akaketaketa ra i reira tatou i to tatou akarongo kia pakari ua atu rai.—1/1, kapi 12-15.

• Eaa tetai au taviri no te akono anga i te papauanga i roto i te akaipoipo?

E rua o teia koia oki: (1) E akariro i toou akaipoipo e ko te mea muaia. (2) Kopae i te au tu tiratiratu kore. Me te ngaueue kore ra toou akaipoipo me kore te manamanata ra, ka anoanoia toou tokorua kia kite e, ka tiratiratu koe i te akariro i toou akaipoipo kia puapingaia; ka riro taua nga taviri ra ei tauturu.—1/1, kapi 18-21.

• Eaa te manako ta Iesu i akakite i tona oronga anga i tetai akatutuanga e o maira te akatu anga o e rua nga are, kua akatuia tetai ki runga i te one e tetai ki runga i te papa?

Kua akakite a Iesu i te akatutuanga kia apii mai i te angaanga a te nga tangata akatu are. Te aronga tei akarongo ua ki te apiianga Pipiria me kore tei tatau ua i te Pipiria i te kainga, kua aite rai ki te tangata tei akatu i tona kainga ki runga i te one. Inara te aronga te taangaanga ra i te au apiianga a te Karaiti kua aite rai ki te tangata tei “ko atura ki raro roa, tamou iora te pange ki rungao i te papa.” (Luka 6:48) Kua rave ratou i te reira e kua tauta pakari i te taangaanga i te au ra ravarai i ta ratou i kite mei ta ratou apii Pipiria.—1/1, kapi 22-24.

• Akapeea tatou i te akamaata atu anga i te rekareka e kite nei tatou i roto i ta tatou angaanga orometua?

Ka rauka ia tatou kia akapapa i to tatou ngakau, te akara tamou anga ki runga i te maata o ta tatou ka rauka i te tauturu i etai ke. Ka rauka ia tatou kia tutu aere ma te akakoro kia akamata i tetai au apii Pipiria. Me aro atu tatou i te tu mareka kore, ka rauka ia tatou kia akatano i ta tatou tuatua ki te au manako ka inangaro mai te tangata i roto i ta tatou ngai e angaanga ra.—1/15, kapi 8-10.

• Akapeea ra te au apiianga Pipiria i te akakeu anga i to tetai Kerititiano tu e te peu matauia no te au tanumanga?

Noatu e ka eva tetai Kerititiano i tetai tei akaperepereia i mate, kua kite ra aia e kare tei mate e kite mai ana. Noatu e ka akaapa mai te aronga irinaki kore iaia, kia kopae aia i te au peu matauia e piri atura ki te irinakianga e ka rauka i tei mate i te akakeu i te oraanga o te aronga e ora nei. Kia kopae atu i te au manamanata, e tata ana tetai au Kerititiano i ta ratou au ikuikuanga no runga i te akanoonooanga no te tanumanga.—2/15, kapi 29-31.

• Ko “te buka a Iasera” e “te buka tamaki a Iehova,” e nga puka ainei teia o te Pipiria tei ngaro? (Iosu. 10:13; Nume. 21:14)

Kare. I te akaraanga e au tataanga te reira kare i akauruia, e vai ra i te au tuatau o te Pipiria e tei taikuia mai e te aronga tata Pipiria.—3/15, kapi 32.