E Aru i te Tu Tiratiratu o Itai

“E ANGAANGA maata e te taka ke taau, e te Atu ra, e te Atua mana katoatoa; e aerenga tika e te tuatua-mou taau, e te Ariki o te aronga tapu e! Koai oki te ka kore e mataku ia koe, e te Atu, e te akakakā i toou ingoa? ko koe anake oki Tei [“tiratiratu ra,” NW]”? Ko teia imene tei imeneia i runga i te rangi e “te aronga i riro ia ratou te re i taua puaka taae ra, e tona tutu,” te akakite maira i te tu tiratiratu ki te Atua. (Apo. 15:2-4) Te inangaro ra a Iehova i tona aronga akamori kia aru iaia na te akaari anga i teia tu manea.—Ephe. 4:24.

I tetai tua ra, te rave nei te Tiaporo ko Satani i te au mea katoatoa i roto i tona mana kia akatakake atu i te au tavini o te Atua i te enua nei mei te aroa o te Atua ta ratou e akamori ra. E manganui te vai tiratiratu ra ki te Atua, noatu e tei raro ake i te au turanga kino pakari. Mei teaa atura to tatou rekareka e te akangateitei maata ra a Iehova i taua akamorianga ra! E tika rai, kua akapapuia mai kia tatou e: “E mea inangaro na Iehova te tu tika, e kare oki aia e akaruke i tona aronga tiratiratu.” (Sala. 37:28, NW) E tauturu ei ia tatou kia vai tiratiratu ua,  kua kapiti mai aia i roto i tana Tuatua tetai rekoti no te au angaanga a te aronga tiratiratu e manganui. Ko tetai o taua papaanga ra, koia oki ko tetai tangata ko Itai i Gata.

‘E Tangata Ke e Tei Tuaruia’

E manakoia ana a Itai e e tangata no te oire rongonui o Philiseti i Gata, te enua o te tuputupua ko Golia e tetai atu au enemi matakuia e Iseraela. Ko te taime mua teia i kite mai ei tatou i te tangata tumutoa ko Itai tei rekotiia i roto i te Pipiria, i te tuatau meameaau anga a Abasaloma i te Ariki ko Davida. Ko Itai e te au tangata Philiseti e 600 tei aru mai iaia, te noo ra i teianei ei aronga tuitarere tuaruia i tetai ngai vaitata ua kia Ierusalema.

Penei kua akatupu te turanga o Itai e te aronga tei aru mai iaia kia akamaara a Davida i tona uaorai au tuatau ei tangata tuitarere tuaruia, te neke atu anga aia e tona au tumutoa ngati Iseraela e 600 ki tetai ngai o Philiseti e kua tomo atu ki roto i te enua o Akisa, te ariki o Gata. (1 Samu. 27:2, 3) Eaa ta Itai e ta tona au tangata ka rave i te aro atu anga a Davida i te meameaau anga a tana tamaiti ko Abasaloma? Ka piri atu ainei ratou kia Abasaloma, me ka vai neutara ua, me kore ka piri atu ainei kia Davida e tona au tangata?

E akamanako ana ia Davida e oro ke atura mei ia Ierusalema e kua tapu ki tetai ngai mamao ke. Penei ko te ngai opengaia i Ierusalema e aere atura te mataara ki te Maunga i Oliveta i mua ake ka tikoti atu ei ki te O o Kiderona. (2 Samu. 15:17.) I konei, te akara akaou ra a Davida i tona pupu vaeau ia ratou e na reira ra. E akara ra! Kare e ko te aronga tiratiratu ua o Iseraela e aru maira iaia, ko to Kereti, e to Peleti katoa. Tei maata atu, tei reira katoa te ngati Gata—ko Itai e tona au tumutoa e 600.—2 Samu. 15:18.

Ma te ngakau aroa, kua tuatua atura a Davida kia Itai e: “Eaa oki koe i aru mai ei ia matou nei? ka oki ki toou ra ngai, e noo ki o te ariki ra [papu e ko Abasaloma]: e tangata ke oki koe, e te tuaru oki. I nanai ua mai oki koe na, e tika aina oki au kia akauoa aere ua ia koe ki runga e ki raro i rotopu ia matou nei? i na te aere ua nei au i toku aerenga; ka oki koe e akaoki koe i to au taeake: ei ia koe te aroa e te tuatua-mou.”—2 Samu. 15:19, 20.

Te akakite maira a Itai i tona tu tiratiratu ngaueue kore. Kua pau atura aia e: “Te ora rā Iehova, e te ora ra taku pu te ariki ra, ei taua ngai ra e nooia e taku pu e te ariki ra, ei te mate e ei te ora, ei reira tikai to tavini nei.” (2 Samu. 15:21) Penei te akamaara ra teia kia Davida i te au tuatua aiteite ua ta tona tupuna vaine ko Ruta i tuatua. (Ruta 1:16, 17) Kua tukia tona ngakau no ta Itai tuatua, kua akakite atu a Davida kiaia e: “Ka aere ana na mua” ki te O o Kiderona. I reira rai, “kua aere iorā Itai i Gata na mua, e tona au tangata ravarai, e te au tamariki katoa i kapiti mai kiaia ra.”—2 Samu. 15:22.

“I Tataia Ïa kia Kite Tatou”

“Te au tuatua ravarai oki i tataia i muatangana, i tataia ïa kia kite tatou,” i akakite mai ei a Roma 15:4. No reira e mea meitaki kia ui tatou e, Eaa te au apiianga ta tatou i kite mai mei te akaraanga o Itai? E akamanako ana e na teaa ra i akakeu iaia kia vai tiratiratu kia Davida. Noatu e e tangata ke aia e kua tuaruia mei ia Philisetia, kua kite a Itai ia Iehova e ko te Atua ora e ko Davida e tangata akatainuia no Iehova. Kare a Itai i manako papaki tai ana no te tu makitakita e tupu ra i rotopu i te ngati Iseraela e to Philiseti. Kare aia i akara ua ia Davida ei tangata tei tamate i te tiamupeni o Philiseti ko Golia e te iti tangata e manganui o Itai. (1 Samu. 18:6, 7) Kua akara atura ra a Itai ia Davida ei tangata tei inangaro ia Iehova e kare ekokoanga kua akamanako katoa aia i te au tu umere o Davida. Tei tupu mai, kua akaperepere maata a Davida ia Itai. Kua tuku katoa a Davida e toru tuanga o tona pupu vaeau ki roto i ‘te rima o Itai i Gata’ i te tamakianga maata ki te pupu vaeau o Abasaloma!—2 Samu. 18:2.

Ka tauta katoa tatou i te akakore atu i te tu papaki tai no te peu, te iti tangata, me kore te tu eteniki​—e tetai ua atu tu papaki tai e te tu makitakita—​e kia akara i te au tu meitaki i roto i tetai ke. Te akatutu maira te pirianga tei tupu i rotopu ia Davida raua ko Itai, e i to tatou kite  mai anga e ko te inangaro ia Iehova, ka rauka i te tauturu ia tatou kia autu i taua au araianga.

Ia tatou e akamanako ra i te akaraanga o Itai, ka rauka ia tatou i te ui kia tatou uaorai e: ‘Te akaari ra ainei au i taua pirianga tiratiratu ki te Davida Maata Rava Atu, ko te Karaiti ko Iesu? Te akaari ra ainei au i toku tu tiratiratu na te piri maroiroi anga ki roto i te angaanga tutuanga i te Patireia e te akariro anga i te tangata ei pipi?’ (Mata. 24:14; 28:19, 20) ‘Mei teaa ra te maata o toku akakoromakianga i te akapapu anga i toku tu tiratiratu?’

Ka puapinga katoa te ngutuare tangata na te akamanako oonu anga i te akaraanga o Itai no te tu tiratiratu. No tona pirianga kia Davida e tana ikianga kia aru i te ariki akatainuia a te Atua, kua akakeuia te au tangata o Itai. Pera katoa, te au ikianga ta te pu ngutuare i rave i te turu anga i te akamorianga mou te akakeu katoa ra i tona ngutuare tangata, e penei ka akatupu katoa mai i te au turanga ngata poto ua. Inara, kua akapapuia mai kia tatou e: “Te tangata tiratiratu ra, e tiratiratu katoa [a Iehova].”—Sala. 18:25, NW.

I te aru anga ia Davida i te tamaki atu anga kia Abasaloma, kare te au Tuatua Tapu i akakite mai ana i tetai mea no runga ia Itai. Inara te papaanga poto ua no runga iaia i roto i te Tuatua a te Atua te oronga maira i te akamaramaanga umere no tona tu i taua tuatau ngata ra i roto i te oraanga o Davida. No te mea e kua taikuia mai a Itai i roto i te Pipiria, te akapapu maira e te kite maira e ka tutaki mai a Iehova i taua tu tiratiratu ra.—Ebe. 6:10.