Au Uianga a te Aronga Tatau

Kua tutu aere ana a Iesu na roto i te enua ko Iseraela. No reira, akapeea i rauka ai i te apotetoro ko Petero kia karanga e “no te kite kore i peraʼi ” te iti tangata ngati Iuda e to ratou ui rangatira, i tuku ei iaia kia tamateia?—Anga. 3:17.

I te tuatua atu anga ki tetai pupu o te ngati Iuda no runga i ta ratou tuanga i roto i te mate o te Mesia, kua akakite te apotetoro ko Petero e: “Kua kite au e, no te kite kore i peraʼi kotou, e to kotou ui rangatira katoa oki.” (Anga. 3:14-17) Penei kare rai tetai pae ngati Iuda i marama ana ia Iesu e tana apiianga. No etai, ko te tumu tikai, no to ratou kite kore i te pae vaerua koia oki kare rai ratou e inangaro ana i te akarekareka i te Atua, tetai no te akavaavaa, no te vareae, e no te makitakita.

Ka akamanako ana e akapeea ra to ratou tu inangaro kore i te akarekareka i te Atua, i te akatuke anga i te manako o te manganui no runga i te apiianga a Iesu. E apii putuputu ana a Iesu na roto i te akatutuanga, tana e akamarama ana ki te aronga pouroa e inangaro ra kia maata atu to ratou marama. Inara, kua akaruke tetai papaki ia ratou e kua aere, kare i tauta atu kia marama ratou. I tetai atianga, kua riri katoa tetai au pipi, no tetai tuatua akatutu ta Iesu i tuatua ai. (Ioa. 6:52-66) Kare taua aronga ra i kite ana e, ko ta Iesu au akatutuanga kua riro te reira ei timata i to ratou tu papa ua kia taui i to ratou aerenga manako, e ta ratou au angaanga. (Isa. 6:9, 10; 44:18; Mata. 13:10-15) Kua kopae katoa ratou i te totou no runga i te taangaanga anga te Mesia i te au akatutuanga i roto i tana apiianga.—Sala. 78:2.

No te akavaavaa, no reira tetai aronga i patoi ei i te au apiianga a Iesu. I tona apiianga i roto i te tunako i roto i tona oire, i Nazareta, kua “va ua” iora te tangata. Kare ratou i ariki mai ia Iesu ei Mesia, mari ra kua ui mai ratou i tetai au uianga no runga i tona oraanga e: “Noea te au ravenga a teianei tangata? . . . Kare ainei teia te kamuta, te tamaiti a Maria, te taeake no Iakobo, e no Iose [Iosepha], e no Iuda, e no Simona? e tona ai tuaine oki, kare aina te noo ki o tatou nei?” (Mare. 6:1-3) Ki te au tangata o Nazareta, kua riro te turanga akaaka i utuutuia mai ei a Iesu ei akapuapinga kore i tana apiianga.

Peea i reira no runga i te au arataki akonoanga? Mei te reira rai te maataanga ia ratou, kare ua e manako mai ana iaia. (Ioa. 7:47-52) Kua patoi katoa ratou i tana apiianga no to ratou vareae ia Iesu, i te mea e te akarongo maira te tangata kiaia. (Mare. 15:10) E e manganui katoa te aronga papanunui tei riri, i tona akaapa anga ia ratou no to ratou tu pikikaa e ta ratou ravenga akavare. (Mata. 23:13-36) Kua tika rai a Iesu kia akaapa i to ratou tu kite kore akakoro tikai, i te na ko anga e: “Aue oki kotou, e te au apii ture e! kua apai ke oki kotou i te taviri o te kite, kare kotou uaorai i tomo ki roto [i te Patireia], e te aronga e anoano i te tomo ra, kua tāpu kotou!”—Luka 11:37-52.

E toru e te apa mataiti to Iesu tutu aere anga i te tuatua meitaki i roto i te enua o Iseraela. E manganui katoa te aronga tana i tereni kia piri atu ki roto i taua angaanga ra. (Luka 9:1, 2; 10:1, 16, 17) E meitaki tikai te rave anga a Iesu e tana au pipi i taua angaanga ra, i te mea kua akaapa te au Pharisea e: “I na, kua ope takiri to te ao katoa i te aru iaia.” (Ioa. 12:19) No reira kare mei te mea e kare takiri a te maataanga o te ngati Iuda apinga i kite. E oti akera, kua akakoro rai ratou kia vai “kite kore” ua e ko Iesu te Mesia. Ka rauka ua ia ratou i te akaoonu atu i to ratou kite e to ratou inangaro i te Mesia, inara kare ratou i akapera ana. Kua o atu tetai papaki ia ratou i te tamate anga ia Iesu. No reira kua ako atu te apotetoro ko Petero i te manganui anga ia ratou e: “E teianei, e tataraara kotou, e e ariu mai, kia taparaia ta kotou ara; kia kitea mai te tuatau rekareka no mua mai i te aroaro o te Atua ra; E kia tono mai aia ia Iesu Mesia, ko tei tuatuaia i muatangana no kotou.” (Anga. 3:19, 20) Te mea puapinga ra e tauatini ua atu te ngati Iuda tei akarongo, kapiti mai i te ‘manganui o te kau taunga.’ Kare ratou e noo kite kore akaou ana. Mari ra, kua tataraara ratou e kua rauka te akaperepereanga a Iehova.—Anga. 2:41; 4:4; 5:14; 6:7.