Te Akaaere Pikikaa Kore e Tona Pupu Akaaere

“Koai te akaaere pikikaa kore e te pakari, i ta te pu e tuku i rungao i tona katoa au tavini, ei tua i ta ratou tuanga kai i te ora mou ra?”​—LUKA 12:42.

1, 2. Eaa te uianga puapinga ta Iesu i ui, iaia e oronga atura i te akairo katoa no runga i te au ra openga?

IAIA e oronga ra i te akairo o te au ra openga, kua ui a Iesu i teia uianga e: “Koai te tavini akono meitaki e te pakari, i ta tona pu i akaaere i tona ngutuare, ei tua i te kai na ratou i te ora mou ra?” I reira kua tuatua atu a Iesu e ka tutakiia taua tavini ra no tona tu akarongo meitaki na te ikiia anga ki rungao i te au apinga pouroa o te pu.​—Mata. 24:45-47.

² I nga marama i muao ana, kua ui a Iesu i tetai uianga mei teia rai. (E tatau ia Luka 12:42-44.) Kua kapiki aia i te tavini e e “akaaere” e kua tuatua no runga i “te ngutuare” tangata e ko “tona katoa au tavini.” Ko te akaaere e manitia me kore e tangata akatere i rungao i te au tavini. Inara, e tavini katoa oki te akaaere. Koai teia tavini, me kore akaaere, e e akapeea ana aia i te oronga anga i “te kai na ratou i te ora mou”? E mea puapinga tikai no tatou katoatoa  kia kite i te mataara e taangaangaia ra i te tua i te kai i te pae vaerua.

3. (a) Akapeea te au vaa tuatua o Kerititome i te tauta anga i te akataka i ta Iesu au tuatua no runga i te “tavini”? (e) Koai te “akaaere,” me kore te “tavini,” e koai ma tona “au tavini,” me kore tona “ngutuare” tangata?

³ E manako ana te au vaa tuatua o Kerititome e te tuatua ra a Iesu no te aronga taoonga akaaere i rotopu i te aronga e karanga e e Kerititiano ratou. Inara, kare a Iesu, te “pu” i roto i teia akatutuanga e karanga ra e e maata teia au tavini tei totoa aere i roto i te au tuanga tuke tuke o Kerititome. Mari ra, te akataka meitaki maira aia e e okotai ua rai “akaaere,” me kore “tavini,” tana ka iki i rungao i tana au apinga katoatoa. No reira mei ta teia tianara rai e akamarama putuputu ua mai ana, e komono te akaaere no te “anana iti” o te au pipi akatainuia ei pupu okotai. I roto i te tataanga a te Evangelia a Luka, te tuatua ra a Iesu no teia aronga. (Luka 12:32) Te “au tavini,” me kore “ngutuare,” tangata te tuatua ra no teia pupu rai inara te akataka maira i ta ratou angaanga ei aronga tataki tai. Kua akatupuia mai tetai uianga umere, koia oki, E tuanga ainei ta te au mema tataki tai o teia pupu tavini i roto i te oronga anga i te kai pae vaerua i te tuatau tau? Ka kitea mai te pauanga me makitoro marie tatou i ta te au Tuatua Tapu e akakite maira.

To Iehova Tavini i te Au Tuatau i Topa

4. Akapeea a Iehova i te tuatua anga no te ngati Iseraela i taito, e eaa te puapinga ta tatou ka kite mai no runga i tera iti tangata?

⁴ Kua tuatua a Iehova i tona au tangata, e ko te iti tangata o Iseraela i taito ei pupu tavini. “Ko kotou [maata] toku kite, e toku tavini [okotai] i ikiia.” (Isa. 43:10) Te o maira te au mema katoatoa o taua iti tangata ra ki roto i taua pupu tavini okotai ra. Inara, e puapinga tikai i te kite e na te au taunga anake ua kapiti mai i te ngati Levi kare i te taunga, te apainga no te apii i te Ture ki te iti tangata.​—2 Para. 35:3; Mala. 2:7.

5. Kia tau ki ta Iesu i tuatua, eaa te tauianga maata te ka tupu?

⁵ Ko te ngati Iseraela ainei te tavini ta Iesu e tuatua ra? Kare. Kua kite tatou i tera no te au tuatua ta Iesu i tuatua atu ki te ngati Iuda i tona tuatau e: “E apai keia te basileia o te Atua nei ia kotou, e tukuia atu ki te aronga e akaua mai i te ua ra.” (Mata. 21:43) Te taka meitaki ra e ka tupu tetai tauianga. Ka taangaanga a Iehova i tetai iti tangata ou. Inara, no te au ikuikuanga pae vaerua, ko te angaanga a te tavini i roto i te akatutuanga a Iesu te aru ra i tetai akaraanga tei aite rai ki te “tavini” o te Atua i roto ia Iseraela i taito.

Mama Mai te Tavini Akono Meitaki

6. Eaa te iti tangata ou tei akamataia i te Penetekote mataiti 33 T.N., e koai ma tei riro ei tuanga no te reira?

⁶ Ko te iti tangata ou, ko “te Iseraela o te Atua,” e au Iseraela i te pae vaerua. (Gala. 6:16; Roma 2:28, 29; 9:6) Kua akamataia mai te reira i te riringiia mai anga te vaerua o te Atua i te Penetekote mataiti 33 T.N. I muri ake i te reira, kua riro pouroa mai te au Kerititiano akatainuia ei tuanga no te iti tangata te rave ra i te angaanga i teianei ei pupu tavini ikiia e te Pu, ko Iesu Karaiti. Kua orongaia ki te au mema tataki tai o taua iti tangata te akauenga kia tutu aere i te tuatua meitaki e kia akariro i te tangata ei pipi. (Mata. 28:19, 20) Inara ka anoanoia ainei te au mema ravarai o taua pupu ra kia o atu ki roto i te oronga anga i te kai i te pae vaerua i te tuatau tau? Ka akara atu tatou e i akapeea te au Tuatua Tapu i te pau anga i teia uianga.

7. I te akamataanga, eaa te angaanga a te au apotetoro, e eaa atu tetai apainga tei rauka ia ratou?

⁷ I te iki anga a Iesu i tana au apotetoro e 12, ko ta ratou angaanga te kapitiia maira te unga angaia kia tutu aere i te tuatua meitaki ki etai ke. (E tatau ia Mareko 3:13-15.) Te rotai ra teia tukuanga angaanga ki te aiteanga o te tuatua Ereni e apostolos, tei raveia mai mei roto i te verepa, te aiteanga e “ungaia.” Inara, i te tuatau tei aereia, i te putuputuanga Kerititiano e vaitata ra i te akanooia, kua riro mai te angaanga a tetai apotetoro e “taoonga” akaaere.​—Anga. 1:20-26.

8, 9. (a) Eaa te apainga maata a te au apotetoro e 12? (e) Koai ma atu tei orongaia te au apainga ke atu, mei tei akapapuia mai e te pupu akaaere?

 ⁸ Eaa te apainga maata a te au apotetoro e 12? Ka kitea te pauanga i roto i te au tupuanga tei aru mai i te ra o te Penetekote. I te tupu anga tetai manamanata no runga i te tua anga i te kai ki te au vaine takaua i te au ra ravarai, kua akaputuputu maira te au apotetoro e 12 i te au pipi e kua tuatua atu e: “Kare oki te mea tau ia matou kia kopae i te tuatua a te Atua, ka raverave ei i te kaingakai na.” (E tatau ia Angaanga 6:1-6.) I reira kua iki te au apotetoro i tetai au taeake tei tau i te pae vaerua kia akono i “te reira angaanga,” kia akapou te au apotetoro i to ratou uaorai taime i te ‘apii i te tuatua.’ Kua akameitakiia teia akanoonooanga e Iehova e kua “tupu atura te tuatua a te Atua; e maata rava atura oki te au pipi i Ierusalema.” (Anga. 6:7) No reira ko te apainga maata no te angai anga i te pae vaerua, na te au apotetoro te reira.​—Anga. 2:42.

⁹ I te au tuatau i aereia, kua orongaia te au apainga puapinga ki etai ke. I raro ake i te aratakianga a te vaerua tapu kua ungaia a Paulo raua Banaba ei mitinari ki te putuputuanga o Anetioka. Kua kitea katoaia raua e e apotetoro, noatu e kare raua i kapitiia mai ana ki te pupu 12, i te akamataanga. (Anga. 13:1-3; 14:14; Gala. 1:19) Kua akapapuia mai to raua iki angaia e te pupu akaaere i Ierusalema. (Gala. 2:7-10) I muri poto ua ake i tera, e tuanga ta Paulo i roto i te tua anga i te kai i te pae vaerua. Kua tata aia i tana reta mua tei akauruia.

10. I te anere mataiti mua, kua o atu ainei te au Kerititiano akatainuia ki te vaerua, i te akapapa anga i te kai i te pae vaerua? Akamarama mai.

¹⁰ Inara, kua o pouroa ainei te au Kerititiano akatainuia ki te vaerua, ki roto i te akaaere anga i te angaanga tutu aere e i te akapapa anga i te kai i te pae vaerua? Kare. Te akakite maira te apotetoro ko Paulo kia tatou e: “E aposetolo anake aina? e peroveta anake aina? e apii anake aina? e rave i te ravenga taka ke anake aina?” (1 Kori. 12:29) Noatu e te rave pouroa ra te au Kerititiano akatainuia ki te vaerua i te angaanga tutu aere, e numero meangiti rava to ratou​—e varu rai au tane—​tei taangaangaia ei tata e 27 puka o te au Tuatua Tapu Ereni Kerititiano.

Te Tavini Akono Meitaki i Teia Tuatau

11. I ikiia te tavini ki rungao i teea “au apinga”?

¹¹ Te akakite taka meitaki maira te au tuatua a Iesu i roto ia Mataio 24:45 e ka vai ua rai taua pupu o te tavini akono meitaki e te pakari ra, i runga nei i te enua i te tuatau openga. Te taiku ra a Apokalupo 12:17 i taua aronga ra e ko “te toenga” o te uanga a te vaine. Ei pupu, kua ikiia teia aronga toe ki rungao i te au apinga katoatoa a te Karaiti i runga nei i te enua. Ko te “au apinga” ta te akaaere pikikaa kore i ikiia kia akono koia oki ko te au apinga a te Pu i runga nei i te enua, te kapitiia maira te au tangata o taua Patireia ra i te enua nei e te au apinga materia e taangaangaia ra i roto i te tutu aere anga i te tuatua meitaki.

12, 13. Akapeea tetai Kerititiano i te kite anga e koia tetai no te kapikianga ki te rangi?

¹² Akapeea tetai Kerititiano i te kite anga e koia tetai i teia manakonakoanga i runga i te rangi e te o atura ki roto i te toenga o te au Iseraela vaerua? Ka kitea te pauanga i roto i te au tuatua a te apotetoro ko Paulo ki te aronga tei kapiti atu kiaia, i roto i taua manakonakoanga ra i te rangi e: ‘Ko te aronga katoa oki i aratakiia e te vaerua o te Atua ra, e tamariki anake ïa ratou na te Atua. Kare oki te vaerua tuikaa tei rauka ia kotou kia mataku akaou; ko te vaerua akatamariki ra tei rauka ia kotou, i karangaʼi oki tatou e, E Aba, e taku Metua. Ko te vaerua uaorai oki, e to tatou katoa nei oki vaerua, tei akakite ïa e, e tamariki tatou na te Atua: E e tamariki ra, e aronga tuanga ïa; e aronga tuanga i te Atua ra, e aronga tuanga tatou e te Mesia; te mate kapipiti nei oki tatou ma ia katoa, kia akakakā kapipitiia ma ia katoa oki.’​—Roma 8:14-17.

¹³ Te akakiteia maira e, kua ikiia teia aronga e te vaerua tapu o te Atua e kia rauka te “kapikianga” me kore te “patianga” ki runga i te rangi. (Ebe. 3:1) Na te Atua tikai teia patianga.  Kua ariki viviki ratou i teia ma te kore e uianga me kore e tu ekoko me kore e tu mataku i te ariki anga i teia anauanga ei tamariki na te Atua. (E tatau ia 1 Ioane 2:20, 21.) No reira kare te ikianga i teia manakonakoanga e na ratou uaorai, na Iehova ra i tuku i teia akairo, me kore i tuku i tona vaerua tapu ki rungao ia ratou.​—2 Kori. 1:21, 22; 1 Pete. 1:3, 4.

Te Manako Tika

14. Eaa te manako o te aronga akatainuia i to ratou kapikianga?

¹⁴ Eaa te manako o te aronga akatainuia no ratou uaorai ia ratou e tiaki atura i ta ratou tutakianga no te rangi? Kua kite ratou e noatu e e patianga umere tei rauka ia ratou, koia tika rai ia​—e patianga ua. Ka anoanoia ratou kia vai akarongo meitaki ua e mate ua atu, kia rauka taua tutakianga ra. I roto i te tu akaaka te manako ra ratou i te au tuatua a Paulo e: “E aku au taeake e, kare au i manako iaku uaorai nei e kua rauka: okotai aku mea e rave nei; i te akangaro anga i te au mea i muri ra, e te uapou anga atu i tei mua ra, Te aruaru atu nei au na te akairo, kia rauka iaku te tutaki i ta te Atua ra kapiki anga no runga maira i te Mesia nei ia Iesu.” (Phili. 3:13, 14) Ka tauta pakari te toenga o te aronga akatainuia ‘kia tau to ratou aerenga i te kapikianga i kapikiia mai ei ratou na, ma te ngakau akaaka roa,’ i te rave anga i te reira “ma te mataku e te rutetetete.”​—Ephe. 4:1, 2; Phili. 2:12; 1 Tesa. 2:12.

15. Eaa te manako o te au Kerititiano i te aronga e kai ra i te oroa i ko i te Akamaaraanga, e eaa ta te aronga akatainuia akaraanga ia ratou uaorai?

¹⁵ I tetai tua, akapeea te au Kerititiano i te manako anga i tetai tangata tei rauka teia akatainuanga iaia, e kua akamata i te kai i te oroa i ko i te Akamaaraanga? Kare tetai e tau kia akava atu. Tei rotopu te reira mea i teia tangata e Iehova. (Roma 14:12) Inara, ko te au Kerititiano tei rauka teia akatainuanga kare ratou e anoano i tetai akono anga takake. Kare ratou e irinaki ana e no tei akatainuia ratou, te oronga ra te reira i tetai kite takake kia ratou tei maata atu i to tetai au mema o te “aronga maata.” (Apo. 7:9) Kare ratou e irinaki ana e e maata atu to ratou vaerua tapu i to ratou au taeake o te au “mamoe ke atu.” (Ioa. 10:16) Kare ratou e tapapa atu ana kia akonoia i roto i tetai tu takake; e kare katoa ratou e manako e no te mea e kai ana ratou i te oroa, tei rungao ratou i te aronga pakari ikiia i roto i te putuputuanga.

16-18. (a) Te o pouroa atura ainei te aronga akatainuia i te akakite i te au tuatua mou ou i te pae vaerua? Akatutu mai. (e) Eaa te tumu i kore ei te Pupu Akaaere e anoanoia kia tuatua atu ki te aronga katoatoa e karanga ra e e aronga akatainuia ratou?

 ¹⁶ E tuanga ainei te aronga akatainuia i roto i te enua katoa no tetai akaaerenga i te ao katoa te akakite maira i te au tuatua mou ou tei rauka mai i te pae vaerua? Kare. Ei pupu katoa, noatu e na te pupu tavini te apainga no te angai i te ngutuare tangata i te pae vaerua, kare e aiteite ana te au apainga me kore te au tukuanga angaanga a te aronga tataki tai pouroa o taua pupu tavini ra. (E tatau ia 1 Korinetia 12:14-18.) Mei tei kiteia mai i mua ana, i te anere mataiti mua, te o katoatoa atura ratou ki te angaanga puapinga no te tutu aere anga. Inara, e numero meangiti ua tei taangaangaia ei tata i te au puka Pipiria e te akaaere i te putuputuanga Kerititiano.

¹⁷ Ei akatutuanga: Te tuatua ra te au Tuatua Tapu i tetai taime e na “te ekalesia” e rave ana i tetai au mea tei tau kia akavaia. (Mata. 18:17) Ko te tikaanga ra, ko te aronga pakari ua te rave ana i teia i roto i to ratou turanga ei mata no te putuputuanga. Kare te aronga pakari e aravei ana i te au mema pouroa o te putuputuanga, i te ui i to ratou manako tukeke i mua ake ka tuku ei i tetai tika. I roto i te tu teokaratiki, te rave ra ratou i ta ratou angaanga tei akanooia; te angaanga ra ratou no te putuputuanga katoa.

¹⁸ Mei te reira rai i teia tuatau, e meangiti ua te numero o te au tangata akatainuia te rave ra i te apainga ei mata no te pupu tavini. Ko ratou te Pupu Akaaere o te Au Kite o Iehova. Te akaaere ra teia aronga tangata akatainuia ki te vaerua i te angaanga Patireia e te porokaramu angai anga i te pae vaerua. Mei te anere mataiti mua rai, kare te Pupu Akaaere e tuatua atu ana ki te au mema tataki tai o te pupu tavini i mua ake ka rave ei i te au tukuanga tika. (E tatau ia Angaanga 16:4, 5.) Inara, pouroa te Au Kite akatainuia, ka piri maroiroi atu ki roto i te angaanga kokotianga puapinga e raveia ra i teianei. Ei pupu, ko “te tavini akono meitaki e te pakari” okotai rai ia akaaerenga, inara ei aronga tataki tai, e tukeke ta ratou tukuanga angaanga.​—1 Kori. 12:19-26.

19, 20. Eaa te manako tau o te aronga maata no “te tavini akono meitaki e te pakari” e tona Pupu Akaaere?

¹⁹ Eaa te puapinga o te au tikaanga i runga akenei, no te aronga maata e maata aere ua atura te numero, ko tei manakonako i te noo ki te enua nei e tuatau ua atu? Ei tuanga no te au apinga a te Ariki te mataora ra ratou i te taokotai pu tikai ki te au akanooanga tei raveia e te Pupu Akaaere, tei komono i “te tavini akono meitaki e te pakari.” Te akameitaki ra te au mema o te aronga maata i te kai i te pae vaerua e orongaia maira i raro ake i te aratakianga a te Pupu Akaaere. Inara i taua taime rai, ia ratou e akangateitei ra i te tavini ei pupu, ko te au mema o te aronga maata te matakite ra ratou auraka kia akaepaepa i tetai ua atu au tangata te karanga ra e e tuanga ratou no te tavini. Kare tetai Kerititiano tei ariki tika tikai i te akatainuanga ki te vaerua o te Atua e inangaro me kore e tapapa atu i taua akaepaepaanga ra.​—Anga. 10:25, 26; 14:14, 15.

²⁰ Noatu e e “ngutuare” tangata tatou, e e tuanga no te toenga o te aronga akatainuia, me kore e mema no te aronga maata, kia tauta pakari tatou i te taokotai pu tikai ki te akaaere pikikaa kore e tona Pupu Akaaere. Ka tau tatou “kia matakite” e kia akapapu i to tatou uaorai tu akarongo pikikaa kore e tae ua atu ki te openga.​—Mata. 24:13, 42.

Maara Ainei ia Koe?

• Koai “te tavini akono meitaki e te pakari,” e koai ma te ngutuare tangata?

• Akapeea tetai tangata e kite ei e koia tetai no te kapikianga ki te rangi?

• Naai te apainga maata i te akapapa i te kai ou i te pae vaerua?

• Eaa te manako o tetai tei akatainuia no runga iaia uaorai?

[Au Uianga Apii]

[Tutu i te kapi 23]

I teia tuatau, te komono nei te Pupu Akaaere i te tavini akono meitaki e te pakari. Mei te reira rai tetai akanooanga aiteite i te anere mataiti mua