Aru ia Iesu​—Apii ma te Aroa

“Kare rava e tangata e tau te tuatua i ta tera ra tangata.”​—IOA. 7:46.

1. Mei teaa ra te tu o te tangata i te ariu atu anga ki te mataara i apii ei a Iesu?

KA AKAMANAKO ua ana e mei teaa ra te mataora kia akarongo ia Iesu e apii ra! I roto i te Pipiria ka tatau tatou no runga i te tu akakeuanga ta Iesu i akatupu ki te aronga tei aravei ana iaia. Ei akatauanga, te akakite ra te tangata tata Evangeria ko Luka, e kua “umere atura” te tangata i roto i to Iesu oire “i te tuatua meitaki no roto mai i tona vaa.” Kua ripoti mai a Mataio e ko te aronga tei akarongo kia Iesu iaia e apii ra i roto i te Tuatua i runga i te Maunga, ‘kua va ua ratou i tana tuatua.’ E kua karanga katoa a Ioane e kua oki ua mai te au tiaki tei tonokia kia opu ia Iesu, kare ra i apai mai ana iaia, i te na ko anga mai e: “Kare rava e tangata e tau te tuatua i ta tera ra tangata.”​—Luka 4:22; Mata. 7:28; Ioa. 7:46.

2. Eaa te au ravenga o te apiianga ta Iesu i taangaanga ai?

² E tika rai ta taua au tiaki ra. Kare rava e ekoko e ko Iesu te Puapii maata rava atu tei ora ana. Takataka meitaki tana apii, ngoie ua, e kare e rauka i tetai tangata kia maro atu i te tu tau o te reira. Kua taangaanga aia i te au akatutuanga e te au uianga ma te tu karape. E akatano ana aia i tana apiianga kia tau ki te aronga e tuatua atura aia, noatu me e aronga taoonga e me e au tangata akaaka ua. Ngoie ua i te marama atu i te au tuatua mou tana i apii e oti akera e ririnui tikai te aiteanga o te reira. Inara, kare e na teia au mea ua i akariro ia Iesu ei Puapii maata.

Te Tu Puapinga Rava Atu​—Ko te Aroa

3. Ei puapii, i akapeea ra a Iesu i tuke ei mei te au arataki akonoanga i tona tuatau?

³ Kare e ekoko e, e au tangata kite tetai i rotopu i te au tata tuatua e te au Pharisea tei rauka te kite e te au tu karape kia apii atu i te reira. Eaa ra te mea i tuke roa ai ta Iesu apiianga mei ta ratou? Ko te au arataki akonoanga o taua tuatau ra, kare o ratou aroa no te tangata noa ua nei. Mari ra, kua akavaavaa ratou i taua aronga ra, i te manako anga ia ratou ei ‘au tangata kua taumaaia.’ (Ioa. 7:49) I tetai tua ra, kua tangi a Iesu ia ratou, i te mea e ‘kua akapueurikiriki keia ratou, mei te mamoe tiaki kore ra.’ (Mata. 9:36) E tu akapumaana tikai tona, e tu tangi e te takinga meitaki. Tetai, kare o te au arataki akonoanga anoano mou tikai i te Atua. (Ioa. 5:42) Kareka ra a Iesu, kua inangaro tikai aia i tona Metua e e mea rekareka nana i te rave i tona anoano. Ko te au arataki akonoanga, e taviriviri ana ratou i te tuatua a te Atua kia tau ki to ratou uaorai anoano, kareka a Iesu, e mea inangaro tikai nana “te tuatua a te Atua”​—kua apii aia i te reira, kua akamarama i te reira, kua paruru i te reira, e kua noo i tona oraanga kia tau ki te reira. (Luka 11:28) Ae kua ki ua a Karaiti uaorai i te aroa, tei akaariia mai i roto i te au mea ravarai tana i apii ei, i tona tu ki te tangata, e te tu e apii ana aia ia ratou.

4, 5. (a) Eaa ra i puapinga ai kia apii atu ma te aroa? (e) I roto i te apii anga atu, eaa ra i puapinga katoa ai te kite e te karape?

⁴ Peea ra tatou? Ei au pipi na Karaiti, te umuumu nei tatou i te aru iaia i roto i ta tatou angaanga  orometua e i roto i to tatou oraanga. (1 Pete. 2:21) No reira ko to tatou akakoroanga, kare e kia apii anake ua i te kite Pipiria, mari katoa ra kia akaata mai i to Iehova au tu, e i tona aroa tikai. Noatu me e maata to tatou kite e me e meangiti ua, me e maata ua atu to tatou kite karape i te apii e me e iti ua, ka riro te aroa e akaari ra tatou ei tauturu ia tatou kia itae i te ngakau o te aronga e tutu atura tatou. Kia puapinga meitakiia i roto i ta tatou angaanga akariro i te tangata ei pipi, ka anoanoia tatou kia aru ia Iesu na te apii anga ma te aroa.

⁵ E tika rai e kia riro ei au puapii memeitaki, ka inangaroia kia kite tatou i ta tatou tumu manako ka apii atu, e ka anoanoia kia rauka ia tatou te tu karape i te apii atu anga i taua kite ra. Kua tauturu a Iesu i tana au pipi kia rauka ia ratou nga mea e rua, e na roto i tona akaaerenga, te tauturu maira a Iehova ia tatou kia rave i te reira i teia tuatau. (E tatau ia Isaia 54:13; Luka 12:42.) Noatu rai ra, e mea tau kia akakoro tatou i te apii eiaa anake ua ma to tatou manako mari katoa ra, ma to tatou ngakau. Me rauka ia tatou te kite karape e te aroa, ko te puapinga ka tupu mai e mea mareka tikai. Na roto i reira i teea au mataara e rauka ai ia tatou kia akaari i te aroa me apii atu tatou? I akapeea ra a Iesu e tana au pipi i te rave anga i te reira? Ka akara ana tatou.

E Anoano Atu Tatou ia Iehova

6. E akapeea ana tatou me tuatua no runga i tetai tangata ta tatou e inangaro ana?

⁶ E rekareka ana tatou i te tuatua no runga i te au apinga ta tatou e inangaro ana. Me tuatua tatou no runga i tetai apinga akaperepereia i roto i to tatou ngakau, ka oraora tatou e ka akaari mai to tatou tu katoa i te rekareka e te pumaana o to tatou ngakau. E tika rava teia me tuatua tatou no runga i tetai tangata ta tatou e inangaro ra. Ko te mea e tupu ana, kare taua e tavarevare i te akakite aere ki etai ke no runga i taua tangata ra. Ka akapaapaa taua iaia, ka akangateitei e ka paruru iaia. E rave ana tatou i te reira no te mea te inangaro ra tatou i etai ke kia mareka mai i taua tangata ra e tona au tu, mei ia tatou rai.

7. Eaa ra ta te inangaro o Iesu no te Atua i akakeu iaia kia rave?

⁷ I mua ake ka rauka ai ia tatou i te akatupu i te inangaro no Iehova ki roto i etai ke, ka anoanoia tatou uaorai kia kite, e kia inangaro iaia. I na oki e, i akatumuia te akamorianga mou ki runga i te anoano atu anga i te Atua. (Mata. 22:​36-38) Kua akanoo a Iesu i te akaraanga ara kore. Kua inangaro tikai aia ia Iehova ma tona ngakau, tona manako, tona meta, e tona maroiroi katoa. I te mea e pirioni ua atu te au mataiti tei pou iaia i te noo anga i te rangi e tona Metua, kua kite meitaki tikai a Iesu iaia. Eaa tei tupu mai no te reira? Kua akakite a Iesu e “te anoano nei au i te Metua.” (Ioa. 14:31) Kua akaataia mai taua aroa ra i roto i te au mea ravarai ta Iesu i tuatua ai, e tana i rave. Kua riro te reira ei akakeu iaia kia rave ua rai i te au mea e mareka maira te Atua. (Ioa. 8:29) Kua akamaroiroi te reira iaia kia akaapa i te au arataki akonoanga, ko tei pikikaa ua e e au kauono ratou no te Atua. Kua akakeu katoa te reira iaia kia tuatua no runga ia Iehova, e kia tauturu i etai ke kia kite, e kia anoano atu i te Atua.

8. Eaa ta te inangaro no te Atua i akakeu i te au pipi a Iesu kia rave?

⁸ Mei ia Iesu rai, kua inangaro tikai tana au pipi i te anere mataiti mua ia Iehova, e kua riro teia inangaro ei akakeu ia ratou kia tutu aere i te tuatua meitaki ma te ngakau toa e te toto mapu. Kua ki ua a Ierusalema i ta ratou apiianga, noatu te patoi a te au arataki akonoanga ia ratou. Kare rava e rauka ua i te au pipi kia kore e tuatua no runga i te au mea ta ratou i kite, e i akarongo. (Anga. 4:20; 5:28) Kua kite ratou e tei vaitatao a Iehova ia ratou e ka akameitaki mai ia ratou​—e kua akameitaki mai rai aia ia ratou! Tei tupu, i raro ua ake i te 30 mataiti i muri ake i te mate o Iesu, kua tika i te apotetoro ko Paulo kia tata e kua tutu aereia te tuatua meitaki “ki te tangata ravarai i raro ake i teianei rangi.”​—Kolo. 1:23.

9. Ka akapeea ra tatou me akamatutu i to tatou inangaro no te Atua?

⁹ Me ka inangaro tatou kia riro mai ei au puapii meitaki tikai, ka anoano katoaia tatou kia akapapu e kia akamatutu ua atu rai i to tatou inangaro no te Atua. Ka akapeea tatou me rave i te reira? Na te komunikeiti putuputu anga ki te Atua na roto i te pure. Ka akamatutu katoa taou i to tatou inangaro no te Atua na te apii anga i tana Tuatua, na te tatau anga i te au puka tei akatumuia ki runga i te Pipiria, e na te aere anga ki te au uipaanga Kerititiano. I to tatou kite no te Atua e maata atura, ka ki ua to tatou ngakau i te inangaro iaia. I reira ia tatou e akaari ra i to tatou inangaro no te Atua na roto i ta tatou tuatua e ta tatou angaanga, ka kite mai etai  ke i te reira e penei, ka akavaitata mai ratou kia Iehova.​—E tatau ia Salamo 104:​33, 34.

Kia Akaperepere Tatou i ta Tatou e Apii Atura

10. Eaa ra te tu o te puapii meitaki?

¹⁰ Ko te tu o te puapii meitaki koia oki e akaperepere ana aia i tana e apii atura. Ka anoanoia aia kia irinaki e e tika te reira, e mea puapinga, e e mea akaperepereia. Me te manako ra tetai puapii no runga i tana e apii atura, ka kiteaia atu tona tu rekareka, e ka akatupu te reira i te akakeuanga ririnui ki runga i te aronga e apii atura aia. I tetai tua, me kare tetai puapii e akaperepere ana i tana e apii atura, ka akapeea e rauka ai iaia kia tapapa atu i te aronga tana e apii ra, kia akaperepere i ta ratou e akarongo ra? Auraka rava e akavaavaa i toou uaorai akaraanga ei puapii no te Tuatua a te Atua. Kua akakite a Iesu e: “Te au tangata ravarai tei tereni meitakiia, ka aite rai aia ki tona puapii.”​—Luka 6:40, The New Berkeley Version in Modern English.

11. Eaa ra a Iesu i akaperepere ei i tana e apii atura?

¹¹ E mea inangaro na Iesu te au mea tana e apii atura. Kua kite aia e e apinga akaperepere maata tana ka oronga​—koia oki ko te tuatua mou no runga i tona Metua i te rangi, ‘ko ta te Atua tuatua’ e te “tuatua o te ora mutu kore.” (Ioa. 3:34; 6:68) Mei te marama kaka rai, e akaari pu ua mai ana te au tuatua mou ta Iesu e apii ana i te au mea kino, e e akakite mai ana i te au mea meitaki. E oronga mai ana te reira i te manakonakoanga e te pumaana ki te aronga akaaka tei akavareia e te au arataki akonoanga pikikaa, e tei tinai mateia e te Tiaporo. (Anga. 10:38) Ko te inangaro akaperepere o Iesu no te tuatua mou ka kiteaia te reira i roto i tana apiianga, e i roto katoa i te au mea ravarai tana e rave ana.

12. Mei teaa ra te manako o te apotetoro ko Paulo no runga i te tuatua meitaki?

¹² Mei ia Iesu rai, e maata tikai te inangaro e te akaperepere o tana au pipi i te tuatua mou no runga ia Iehova e ia Karaiti, kare atura i rauka i te aronga patoi i te akaparuparu ia ratou mei te tuatua atu anga i te reira ki etai ke. Kua tata a Paulo ki te au oa Kerititiano i Roma e: “Kua tika roa iaku i te akakite atu i te evangelia . . . Kare ua au i akama i te evangelia a te Mesia ra: no te mea, ko te mana ïa o te Atua, kia ora te tangata ravarai e akarongo ra.” (Roma 1:​15, 16) Kua manako a Paulo e e akangateiteianga tikai kia akakite aere i te tuatua mou. Kua tata aia e: “Ko au nei . . . tei orongaia mai taua aroa ua nei, kia tutu aere au ki rotopu i te etene i te meitaki maata ope kore o te Mesia kia kimi ra.” (Ephe. 3:8) Kare i te mea ngata i te akamanako atu i to Paulo rekareka, iaia e apii ra i etai ke no runga ia Iehova e Tona au akakoroanga.

13. Eaa te au tumuanga tau no te akaperepere i te tuatua meitaki?

¹³ Ko te tuatua meitaki ka kiteaia i roto i te Tuatua a te Atua, ka tauturu te reira ia tatou kia kite i Tei Anga mai, e kia o atu ki roto i tetai pirianga akaperepere e ia. Te oronga maira te tuatua meitaki i te au pauanga tau no te au uianga puapinga i roto i te oraanga e e mana to te reira i te akatuke i to tatou oraanga, kia oronga mai i te manakonakoanga no tatou, e i te akamatutu ia tatou i te tuatau tumatetenga. Tetai katoa, te akaari maira te reira i te mataara ki tetai oraanga puapinga, kare e openga. Kare rava e kite akaperepere maata atu mei teia te tu me kore tei puapinga maata atu i te tuatua meitaki. E apinga aroa oko maata tikai teia i orongaia mai na tatou, ko tei apai mai i te rekarekaanga maata no tatou. E ka maata rava atu te mataora me oronga tatou i taua apinga aroa ra ki etai ke.​—Anga. 20:35.

14. Ka akapeea ra tatou i te akamatutu anga i to tatou inangaro no ta tatou e apii atura?

¹⁴ Eaa te ka rauka ia koe kia rave i te akamatutu roa atu i toou inangaro no te tuatua meitaki? Ia koe e tatau ra i te Tuatua a te Atua, e akaoti poto i tetai au taime i te akamanako no runga i taau e tatau ra. Ei akaraanga, e akamanako ia koe uaorai e aru ra ia Iesu i te tuatau o tana angaanga orometua i te enua nei, me kore e aru ra i te apotetoro ko Paulo. E akamanako ua ana ia koe uaorai i roto i te ao ou, e e akamanako ana e mei teaa ra te tuke o te oraanga. E akamaara no runga i te au akameitakianga tei rauka ia koe no toou akarongo i te tuatua meitaki. Me akamatutu ua rai koe i toou inangaro no te tuatua meitaki, ka kite rai te aronga e apii ra koe i taua inangaro ra. E tumuanga tau i reira no tatou kia akamanako meitaki i ta tatou i apiiia, e kia matakite i ta tatou e apii atura.​—E tatau ia 1 Timoteo 4:​15, 16.

Kia Akaperepere Tatou i te Tangata

15. Eaa te tumu ka tau ei te puapii kia akaperepere i tana aronga e apii ra?

¹⁵ Ko te puapii meitaki, e akapumaana ana aia i tana aronga e apii atura kia inangaro ratou i te apii  e i te piri mai ki roto i te apii, e kia mataora i te akakite mai i to ratou uaorai manako. Ko te puapii akaperepere, ka oronga ua aia i te kite no te mea te inangaro ra aia kia puapingaia te aronga e apii atura aia. Ka akatano aia i tana apii kia tau ki tei anoanoia no ratou e te turanga o to ratou marama. E akamanako ua ana rai aia i te ka rauka ia ratou e te au turanga o tana aronga e apii ra. Me rauka i te au puapii taua tu akaperepere ra, ka nakiro ua te reira i te aronga e apiiia ra, e ka riro te apii anga e te tamou anga i te apii ei mea mataora.

16. Na roto ra i teea au mataara i akaari ei a Iesu i te aroa no te tangata?

¹⁶ Kua akaari ua a Iesu i taua tu akaperepere ra. Ko te akaarianga maata rava atu o te aroa tana i rave koia oki, kia oronga i tona oraanga tangata ara kore kia rauka te ora i etai ke. (Ioa. 15:13) I te tuatau o tana angaanga orometua, e papa ua ana a Iesu i te akono i te tangata i te pae kopapa e i te pae vaerua tikai, ma te roiroi kore. Kare aia e tapapa ana i te tangata kia aere mai kiaia, kua aere ra aia na raro ua no tetai au anere ua atu maire, i te akakite atu i te tuatua meitaki kia ratou. (Mata. 4:​23-25; Luka 8:1) E akakoromaki tikai tona e kua marama ua aia i te turanga o te tangata. I te anoanoia anga kia akatikatika i tana au pipi, kua rave aia i te reira ma te aroa ua. (Mare. 9:​33-37) Kua akamaroiroi aia ia ratou kia rauka te irinakianga papu e ka riro ratou ei aronga meitaki tikai i te tutu aere i te tuatua meitaki. Kare roa e tangata i riro ana ei puapii akaperepere maata atu ia Iesu. Kua riro te aroa tana i akaari ki tana au pipi ei akakeu ia ratou kia aroa atu iaia e kia akono i tana au akauenga.​—E tatau ia Ioane 14:15.

17. I akapeea te au pipi a Iesu i te akaari anga i te aroa no etai ke?

¹⁷ Mei ia Iesu rai, kua akaari tana au pipi i te aroa oonu e te aroa takinga meitaki no te aronga e tutu atura ratou. I te akakoromaki anga i te takinokino e te aro atu anga i te mate, kua matuapuru atu ratou ki etai ke e kua puapingaia i te tutu aere anga i te tuatua meitaki. Kare e aiteia to ratou aroa takinga meitaki no te aronga tei ariki mai i te tuatua meitaki! Kua akaari mai tikai te au tuatua a te apotetoro ko Paulo i te aroa takinga meitaki, i tona tata anga e: “I maru ua ra matou i rotopu ia kotou: mei te metua i matuapuru i tana tamariki; Koia katoa matou, no te maata o to matou aroa ia kotou, kua tika rava ia matou i te oronga atu i te evangelia a te Atua ia kotou na, e auraka oki i te reira anake, ko matou katoa uaorai oki, no te mea kua riro kotou ei akaperepere na matou.”​—1 Tesa. 2:​7, 8.

18, 19. (a) Eaa te tumu e akaatinga puareinga ua nei tatou i te rave i te angaanga tutu aere? (e) Oronga mai i tetai akaraanga i te akaari e te kiteaia maira te aroa ta tatou e akaari ra ki etai ke.

¹⁸ Mei te reira rai i teia au tuatau, te tutu aere nei te Au Kite o Iehova i te ao katoa nei i te kimi i te aronga tei nakunaku kia kite i te Atua e kia tavini iaia. Ko te tika, no te au mataiti e 17 i topa, kua tere atu i te okotai pirioni ora i te mataiti, tei pou ia tatou i roto i te angaanga tutu aere e te akariro anga i te tangata ei pipi​—e ka rave ua atu rai tatou i taua angaanga ra. Te rave puareinga ua nei tatou i  te reira, noatu e te umuumuia maira tatou kia akaatinga i to tatou taime, maroiroi, e te au apinga materia i roto i te angaanga tutu aere. Mei ia Iesu rai, te marama ua ra tatou e te inangaro maira to tatou Metua i te rangi kia rauka i te tangata te kite, te ka arataki atu ki te oraanga mutu kore. (Ioa. 17:3; 1 Timo. 2:​3, 4) Na te aroa e akakeu ana ia tatou kia tauturu i te aronga tei tika te ngakau, kia kite e kia inangaro ia Iehova mei ia tatou rai.

¹⁹ Te kiteaia maira te aroa ta tatou e akaari ra ki etai ke. Ei akatauanga, e tata reta ana tetai tuaine i Marike ei akapumaana i te aronga tei takake atu to ratou aronga akaperepere i roto i te mate. I te pau mai anga, kua tata mai tetai tangata e: “I te akamataanga kua poitirere tikai au e kua tauta pakari tetai tangata i te tata mai i tetai reta ki tetai tangata kare takiri aia i kite, i te tauturu iaia i te akakoromaki i te au tuatau ngata. Tera ua, ka karanga au e e aroa tikai toou no toou tangata tupu e no te Atua e arataki ra i te tangata na runga i te arataa o te ora.”

20. Mei teaa ra te puapinga o te apii ma te aroa?

²⁰ Kua tuatuaia ana e, me angaanga kapiti te aroa e te kite karape ka rauka ia koe kia tapapa atu e ka rauka tetai apinga oko maata. I roto i ta tatou apiianga, e umuumu ana tatou i te tauturu i te aronga e apii ra tatou kia akatupu i te manako tei kite ia Iehova, e te ngakau tei inangaro iaia. Ae, kia riro ei puapii meitaki tikai, ka anoanoia kia rauka ia tatou te aroa e toru enui​—te anoano i te Atua, te akaperepere i te tuatua mou, e te akaperepere i te tangata. Ia tatou e akatupu ra i taua tu aroa ra e te akaari i te reira i roto i ta tatou angaanga orometua, ka kite tatou i te rekareka maata o te oronga atu, pera katoa te tu merengo i te kite anga e te aru ra tatou ia Iesu e te akarekareka ra ia Iehova.

Akapeea Koe me Pau?

• Ia tatou e apii ra i etai ke i te tuatua meitaki, eaa ra i puapinga ai kia . . .

anoano atu i te Atua?

akaperepere i ta tatou e apii atura?

akaperepere i te aronga e apii ra tatou?

[Au Uianga Apii]

[Tutu i te kapi 15]

Eaa ra te mea i tuke ei ta Iesu mataara e apii ana mei ta te au tata tuatua e te au Pharisea?

[Tutu i te kapi 18]

Te apii meitaki ka anoanoia te kite, te karape, e tei runga rava atu koia oki, te aroa