Ka Akapuapinga Atu te Vaerua Taokotai i te Akamorianga

E MEA puapinga te vaerua taokotai ki te aronga e inangaro ra i te utuutu i tetai pamiri maroiroi i te pae vaerua. I to Iehova anga mai anga i nga tokorua mua, kua akataka meitaki aia e ka anoanoia raua kia taokotai. Ka angaanga kapiti a Eva kia Adamu ei “tauturu tau” nona. (Gene. 2:18) I roto i te akaipoipoanga ka inangaroia te tane e te vaine kia turuturu tetai i tetai. (Kohe. 4:​9-12) I te akatupu anga i te tuanga angaanga ta Iehova i akanoo no te au metua e te tamariki, te umuumu katoaia ra te taokotai.

Akamorianga ei Pamiri

E rima a Barry raua ko Heidi tamariki. Kua kite mai raua e na te angaanga kapiti anga i te rave i te apii Pipiria a te pamiri i tauturu ia ratou kia puapingaia. Kua akamarama mai a Barry e: “E oronga ana aia ki te tamariki i tetai au tukuanga angaanga rikiriki i tetai au taime me raveia te apii a te pamiri. Penei ka pati au ia ratou kia akapapa i tetai au pauanga akatumuia ki runga i te au atikara i roto i te makatini E Ara! E rave katoa ana matou i tetai akatutuanga no te angaanga orometua, kia rauka i te tamariki tataki tai i te akapapa e ka akapeea ratou me tuatua.” Kua karanga katoa a Heidi e: “E papaanga pouroa ta matou no te au akakoroanga i te pae vaerua te ka inangaro matou i te rave, e e uriuri ana matou i teia i tetai au taime, me apii matou ei pamiri kia kite e te akapeea ra matou.” Kua kite katoa mai teia nga tokorua e na te akataka anga i tetai au po eiaa e akarakara tivi, te oronga maira te reira i te atianga no te pamiri katoatoa kia rave i tetai tatauanga.

Au Uipaanga Putuputuanga

Kua utuutu a Mike raua ko Denise e a tamariki. Akapeea to raua pamiri i puapinga ai i te angaanga kapiti anga? Kua karanga a Mike e: “I tetai au taime e puapinga kore ana te au paranianga meitaki, inara kua kite mai matou e na te taokotai e tauturu ia matou kia tae vave ki te au uipaanga.” Kua akamarama mai a Denise e: “E au angaanga ta te tamariki tataki tai, ia ratou e tupu maira. Ta maua tamaine ko Kim, e tauturu ana i te tunu kai e te akanoo i te kaingakai no te kaikai.” Kua maara i ta raua tamaiti ko Michael e: “I te au po Ruirua e uipaanga ana te putuputuanga i roto i to matou kainga. No reira e tama ana matou i te pia, purumu i te taua, e te akanoo i te au nooanga.” Kua tuatua katoa tetai tamaiti mai, ko Matthew, e: “E akapapu ana a Papa e kia oki vave mai aia ki te kainga no te angaanga i te au po uipaanga, i te arataki ia matou kia akapapa vave no te uipaanga.” Eaa ra tei tupu mai?

Puapinga Meitakiia te Tautaanga

Kua akakite a Mike e: “I te mataiti 1987, kua akamata maua ko Denise i te tavini ei nga painia. I te reira taime, te noo ra rai e toru a maua tamariki i te kainga. Kua riro katoa mai e rua ia ratou ei nga painia, e tetai atu kua angaanga ki runga i te angaanga patu are o Betela. Ko tetai apinga mataora rava atu no to matou pamiri koia oki, kua rauka ia matou i te tauturu e 40 tangata kia akatapu i to ratou oraanga e kia papetitoia. Kua rauka katoa ia matou te tikaanga manea kia angaanga ei pamiri ki runga i te angaanga patuanga, i tetai au enua ke.”

E tika rava e, kua puapingaia te tautaanga kia taokotai ei pamiri. Ka rauka ainei ia koe i te taokotai ki tetai atu mema i roto i toou pamiri na roto i tetai au mataara ke? Ka papu ia koe e na te vaerua taokotai e tauturu i toou pamiri kia puapinga ua atu rai i te akamorianga.

[Tutu i te kapi 28]

Ka tauturu te akatutuanga i te akapuapinga atu i te angaanga orometua