Taea te Ngai Mamao e te au Ua o te Tuatua Mou

KA KITEAIA te Repapuriki ko Tuva i Rutia, i te iti rava o te tua tonga o Tiperia, kapiti atu kia Mongoria i te pae tonga e te pae itinga. E manganui te au tangata o Tuva e noo ana ki roto i te au ngai mamao, e ngata e taeria atu ei e te karere o te Patireia. Inara, i tetai taime akenei, kua teretere atu tetai pupu tangata mei tetai au tuanga i vao mai ia Tuva ki Kyzyl, tona oire maata, kia tae atu ki tetai apiianga. Ko Maria, e painia aia i Kyzyl, kua kite aia i to ratou tae anga mai e kua kite aia e te oronga mai nei teia i tetai atianga takake rava kia tutu aere atu i te tuatua meitaki kia ratou.

Kua akakite mai a Maria e eaa tei tupu: “Kua akanooia tetai apiianga ki ko i te apii e puapii ana au, no runga te reira i te rapakau anga i te kino ta te au apinga akakona e akatupu ana. Mei te 50 au tangata te ka tae mai mei te au ngai mamao rava atu o Tuva. I roto i teia pupu te kapitiia maira te au puapii, te aronga apii manako, te aronga tutaka no te akono i te tamariki, e te vai atura.” No Maria, ko teia apiianga e tikaanga manea tikai e e akaaoanga tikai nona. Kua akamarama mai aia e: “E tu akama ua toku, e e ngata ana iaku te akakitekite aere ua. Inara, kua pure au kia Iehova no te ngakau toa kia taangaanga i teia atianga i te akakitekite aere.” Kua puapingaia ainei aia?

Kua tuatua a Maria e: “Kua kitea mai e au te makatini E Ara! tei uriuri i te tumu tuatua no te tu mataku rikarika i tetai apinga. ‘Penei ka inangaro mai tetai tangata apii manako i te tatau i tera,’ i manako ei au, no reira kua apai au i te makatini ki te apii. I taua ra ra, ko tetai o te au puapii tei tae mai ki taua apii ra kua aere mai ki roto i toku opati, e kua oronga atu au i te makatini kiaia. Kua ariki rekareka mai aia i te reira. Kua akakite mai aia e e tu mataku rikarika rai tona. I tera mai ra, kua apai mai au i te puka Questions Young People Ask​—Answers That Work, Volume 1. Kua ariki rekareka katoa mai aia i tera. No tona manako papu no runga i teia au puka kua manako mai au e penei ka inangaro rai tetai atu au puapii i taua au puka ra. No reira kua apai au e tai pia puka katoa o te Young People Ask e tetai atu au puka ke ki te apii.” Kare i roa ana, kua pou te puka i roto i te pia. Kua akakite mai a Maria i tei tupu e: “Ko tetai au taeake o te puapii taku i oronga atu i te puka Young People Ask kua aere mai ki roto i toku opati e kua ui mai e, ‘Teiea te ngai e tua nei ratou i te puka?’” Kua tano rai te ngai i aere mai ei ratou!

E Maanakai te ra openga o teia apiianga. Kare a Maria e angaanga, no reira kua tuku aia i tetai au puka ki runga i te au kaingakai i roto i tona opati. I runga i te papa tata, kua tata aia e: “E te Au Puapii! E apai kotou i tetai au puka na kotou e to kotou au taeake. Ka tauturu teia au puka ia kotou kia puapingaia i roto i ta kotou au ngai angaanga e ka akaketaketa katoa i to kotou au pamiri.” Eaa tei tupu mai? “Kua aere au ki ko i toku opati i taua ra ra, e kua kite e kua vaitata te maataanga o te puka i te pou. Kua oro atu au i te tiki akaou mai i tetai au puka ou e tetai au makatini.” I te openga o te apiianga, kua rauka ia Maria i te oronga e 380 makatini, e 173 puka, e e 34 poroutia. I te oki anga taua aronga tei aere mai ki te apiianga ki te au ngai mamao e noo ra e e angaanga ra ratou, kua aru katoa atu taua au puka ra ia ratou. Kua karanga a Maria e, “Kua rekareka tikai au e kua taeria te au ngai mamao o Tuva e te au ua o te tuatua mou!”​—Kohe. 11:6.

[Mapu i te kapi 32]

(No runga i teia, akara i te puka)

RUTIA

TUVA REPAPURIKI