Akono Tamou i to Kotou Aroa i te Atua

“E akono tamou ia kotou uaorai i roto i te aroa o te Atua, ia kotou e tiaki ra i te aroa ua o to tatou Atu ko Iesu Karaiti ma te manako anga i te oraanga mutu kore.”​—IUDA 21, NW. 

1, 2. I akapeea ra a Iehova i te akaari mai anga i tona aroa no tatou, e i akapeea tatou i kite ei e kare aia e tuku ua ia tatou kia noo tamou i roto i tona aroa?

KUA akaari mai ana a Iehova i tona aroa no tatou na roto i te au mataara e manganui. Kare ra e ekoko e, ko te akapapuanga maata roa atu no to Iehova aroa koia oki ko te atinga oko. No tona aroa maata i te tangata nei kua tae rava ki te tono anga mai i tana Tamaiti akaperepere ki te enua nei kia mate no tatou. (Ioa. 3:16) I rave a Iehova i teia no te mea te inangaro ra aia kia ora tatou e mutu kore ua atu, e te inangaro katoa ra aia kia puapingaia tatou mei tona aroa e tuatau ua atu!

² Inara e tika ainei e, ka tuku ua a Iehova ia tatou kia noo tamou rai i roto i tona aroa noatu e eaa ta tatou ka iki i te rave? Kare. No te mea i roto ia Iuda irava 21, ka tatau tatou i teia akoanga: “E akono tamou ia kotou uaorai i roto i te aroa o te Atua, ia kotou e tiaki ra i te aroa ua o to tatou Atu ko Iesu Karaiti ma te manako anga i te oraanga mutu kore.” Ko te takiato tuatua e “e akono tamou ia kotou uaorai i roto i te aroa o te Atua,” te akaari maira e e angaanga tetai ka anoanoia tatou kia rave. Eaa i reira te ka anoanoia tatou kia rave, kia rauka i te noo tamou i roto i te aroa o te Atua?

Akapeea Tatou me Noo Tamou i Roto i te Aroa o te Atua?

3. Eaa ta Iesu i akakite e ka anoanoia nona, kia noo tamou rai i roto i te aroa o tona Metua?

³ Ka kite tatou i te pauanga ki taua uianga ra i roto i ta Iesu uaorai au tuatua, i te po openga o tona oraanga i te enua nei. Kua tuatua aia e: “Me akono kotou i taku au akauenga, ka noo tamou rai kotou i roto i toku aroa, mei iaku i akono i te au akauenga a taku Metua e kua noo tamou rai i  roto i tona aroa.” (Ioa. 15:10, NW) Mei ta teia irava e akaari maira, kua kite a Iesu e ka anoanoia te akono i ta Iehova au akauenga e rauka ai te noo tamou i roto i tetai pirianga meitaki ma tona Metua. I na, me e tika te reira no runga i te Tamaiti ara kore a te Atua, kare ainei e ka tika katoa rai te reira no tatou?

4, 5. (a) Eaa ra te mataara maata roa atu ka rauka ia tatou i te akaari e te aroa ra tatou ia Iehova? (e) Eaa i kore ei o tatou tumuanga tau kia patoi i te manako no te akarongo i te au akauenga a Iehova?

⁴ Tei maata roa atu, ka akaari tatou e te inangaro ra tatou ia Iehova na te akarongo anga kiaia. Kua tuatua te apotetoro ko Ioane i teia i te na ko anga e: “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.” (1 Ioa. 5:3) E maata te tangata i teia tuatau kare e inangaro ana i te akarongo ki tetai ua atu tangata. Ka akara ana ra oki i teia takiato tuatua: “Kare oki tana au akauenga i te mea teiaa.” Kare a Iehova e pati maira ia tatou kia rave i tetai apinga kare e rauka ia tatou i te rave.

⁵ Ei akatutuanga: Ka pati ainei koe i tetai oa akaperepere kia amo i tetai apinga taau i kite e e teiaa roa nona kia taki? Kare! E maata roa atu to Iehova tu takinga meitaki i to tatou, e e maata roa atu tona kite no runga i to tatou au tu paruparu. Te akapapu maira te Pipiria kia tatou e ‘te manako maira a Iehova e, e one tatou nei.’ (Sala. 103:14) Kare rava aia e pati mai kia rave tatou i tetai mea kare e rauka ia tatou i te rave. No reira kare e tumuanga tau kia patoi tatou i te manako no te akarongo i te au akauenga a Iehova. Te kite ra tatou e ka riro te akarongo anga kia Iehova ei oronga mai​—i tetai atianga meitaki tikai no tatou kia akaari ki to tatou Metua i te rangi e, e aroa mou tikai to tatou iaia e te inangaro ra kia noo tamou rai i roto i tona aroa.

Apinga Aroa Takake mei ia Iehova

6, 7. (a) Eaa ra teia mea e akava ngakau? (e) Akatutu mai e ka akapeea te akava ngakau i te tauturu anga ia tatou kia noo tamou rai i roto i te aroa o te Atua.

⁶ I roto i teia ao ngata e noo nei tatou, e maata te au ikianga e o maira te akarongo ki te Atua, te ka anoanoia tatou kia rave. Akapeea e papu ei ia tatou e te rotai ra teia au ikianga ki te anoano o te Atua? Kua oronga mai a Iehova i tetai apinga aroa te ka tauturu maata rava ia tatou i roto i teia mea e akarongo kiaia. Ko te akava ngakau taua mea ra. Eaa ra te akava ngakau? E kite takake teia i te makitoro marie i ta tatou au angaanga, to tatou tu, e ta tatou au ikianga. Mei te akava rai te reira i roto ia tatou, kia rauka ia tatou i te akamanako i te au ikianga ta tatou e aro atura i roto i te oraanga, me kore kia akamanako no runga i te au tukuanga tika tei rave takereia e tatou, e kia akapapu e me e mea meitaki te reira e me e mea kino, me e tika e me e tarevake.​—E tatau ia Roma 2:​14, 15.

⁷ Ka akapeea tatou i te taangaanga meitaki anga i te akava ngakau? E akamanako ana i tetai akatutuanga. Te aere ra tetai tangata tutaka aere na roto i tetai ngai motutaa. Kare ua e ara i reira, kare e mataara, e kare e au akairo i te akakite mai e ka naea me aere. E oti akera, kua aere mari atu rai aia ki te ngai tana i akakoro. Akapeea ra? E kaveinga oki tana. Kua tamouia tetai apinga akataka ki roto tei akairaia te au kaveinga tumu e a ki runga, e tetai nira taimana e tou ra ki te tua tokerau. Me kare ana kaveinga, ka puapinga kore ua teia tangata tutaka e ka ngaro takiri aia. Mei te reira rai tetai tangata kare ona akava ngakau, ka puapinga kore rai aia e ka ngaro takiri, iaia e tauta ra i te rave i tetai au ikianga tau, tiratiratu, e te tiama i roto i te oraanga.

8, 9. (a) Eaa te au tu tarevake o to tatou akava ngakau te ka anoanoia tatou kia akamaara? (e) Eaa ta tatou ka rave i te akapapu e kia riro to tatou akava ngakau ei mea puapinga tikai kia tatou?

⁸ Inara mei te kaveinga te tu, e tarevake ana rai te akava ngakau. Me ka tuku te tangata tutaka i tetai taimana ki te pae i tana kaveinga, kare te nira e tou ki te tua tokerau. Ka akapera rai, mei te mea e ka tuku ua atu tatou i te au anoano o to tatou ngakau kia akaaere i ta tatou au tukuanga tika, eaa ra te ka tupu? Kare rai e kore e ka riro to tatou au tu paruparu ei akatarevake i te aratakianga a to tatou akava ngakau. Te akamatakite maira te Pipiria ia tatou e “e pikikaa maata to te ngakau.” (Iere. 17:9; Mase. 4:23) Tetai katoa, me kare te mapu a te tangata tutaka i te mea tano tikai, e kare e tau kia irinakiia, ka puapinga kore rai tana kaveinga kiaia. Mei te reira rai te tu, me kare tatou e irinaki ki runga i te aratakianga papu e te ngaueue kore a te Tuatua a te Atua, te Pipiria,  kare rai e rauka i to tatou akava ngakau i te tauturu mai ia tatou. (Sala. 119:​105) Te mea taitaia ra, e managanui ua atu te tangata i teianei ao e akariro ra i te au anoano o te ngakau ei mea puapinga roa atu, e kare roa e akamanako ana i te au turanga tei akanooia i roto i te Tuatua a te Atua. (E tatau ia Ephesia 4:​17-19.) No reira rai te manganui o te tangata, e rave ei i te au mea kino, noatu e e akava ngakau to ratou mei te anau mai anga.​—1 Timo. 4:2.

⁹ Kia ngaueue kore rai tatou auraka rava kia aite mei te reira! Mari ra, kia tuku ua atu rai tatou i te Tuatua a te Atua kia apii e kia tereni i to tatou akava ngakau kia riro mai ei mea puapinga mou tikai kia tatou. Ka anoanoia tatou kia aru i to tatou akava ngakau tei tereniia e te Pipiria, eiaa e tuku ua i to tatou au anoano tika kore kia akaaere i te reira. I taua taime rai, kia tauta tatou i te akangateitei atu i te akava ngakau o to tatou au taeake e te au tuaine Kerititiano. Ka tauta pakari tatou kia kopae i te akaturori atu ia ratou, i te akamanako anga e e tuke rai te akava ngakau o to tatou au taeake mei to tatou.​—1 Kori. 8:12; 2 Kori. 4:2; 1 Pete. 3:16.

10. Eaa te au tuanga e toru o te oraanga ta tatou ka uriuri i teianei?

¹⁰ I teianei ka akamanako ana tatou e toru au tuanga i roto i to tatou oraanga ka rauka ia tatou i te akaari mai i to tatou inangaro no Iehova na te akarongo anga kiaia. E tika oki e i roto i te au mea tatakitai ka o mai te akava ngakau, inara e rauka ai i te reira i te oronga mai i te aratakianga tau no tatou, ko te mea mua e te mea maata roa atu ka anoanoia to tatou akava ngakau kia aratakiia e te au turanga akauruia o te Pipiria no to tatou tu. Te au mataara e toru ka rauka ia tatou kia akarongo kia Iehova ma te akaperepere koia oki: (1) Kia aroa atu tatou i te aronga ta Iehova e aroa ra, (2) e akaari tatou i te akangateitei no te aronga mana akaaere, e (3) e tauta pakari tatou kia vai ma ua i roto i te mata o te Atua.

Aroa Atu i te Aronga ta Iehova e Aroa Ra

11. Eaa ra tatou ka aroa atu ei i te aronga ta Iehova e aroa ra?

¹¹ Te manako mua, kia aroa atu tatou i te aronga ta Iehova e aroa ra. No runga i te au pirianga taeake kua aite rai te tangata ki te vavai. E tamou mai  ana tatou i te au mea ravarai e tupu ra takapini ia tatou. Kua kite meitaki Tei Anga mai ia tatou e mei teaa te tu o te kino​—e mei teaa te maata o te puapinga ka rauka​—i te au tangata apa ua, mei te au pirianga taeake. No reira, kua oronga mai aia i teia akoanga puapinga e: “Ko tei kapiti katoa i tona aerenga ki to te aronga pakari ra, ka pakari katoa ïa: ko tei kapiti ra ki te aronga neneva ra, e mate ïa.” (Mase. 13:20; 1 Kori. 15:33) Kare okotai ia tatou e inangaro ana kia “mate” koia oki kia rokoia e te kino. Ka inangaro tatou tatakitai pouroa ‘kia pakari.’ Ko Iehova anake ua tei pakari rava atu, e kare katoa rava aia e rauka kia tanoanoaia. E oti akera, kua akanoo aia i tetai akaraanga manea roa atu no tatou no runga i te pirianga taeake. E akamanako ua ana e​—koai ma te au tangata apa ua ta Iehova i iki ei au oa nona?

12. Eaa te au tu oa ta Iehova e iki ana?

¹² Kua karanga a Iehova i te pateriareka ko Aberahama e ko “toku oa.” (Isa. 41:8) E akaraanga meitaki tikai teia tangata no te tu akarongo mou, te tuatua tika, e te akarongo​—e tangata tei noo kia tau ki tona akarongo i roto i te Atua. (Iako. 2:​21-23) Ko te tu oa te reira ta Iehova i iki. Ko te reira rai te au tu oa tana i iki i teia tuatau. Me te iki ra a Iehova i taua au tu oa ra, kare ainei i te mea puapinga e kia akapera rai tatou i te iki meitaki anga, e kia aaere tatou ma te aronga pakari e kia riro mai rai ei aronga pakari?

13. No runga i te iki anga i te au oa, eaa te ka tauturu ia tatou kia rave i te au ikianga tau?

¹³ Eaa te ka tauturu ia koe kia rave i tetai au ikianga tau no runga i teia? Ka riro te apii anga i te au akaraanga Pipiria ei akamaroiroianga maata. E akamanako ana i te pirianga oa i rotopu ia Ruta e tona metua vaine ongai ko Naomi, i rotopu ia Davida raua ko Ionatana, me kore i te pirianga oa i rotopu ia Timoteo raua ko Paulo. (Ruta 1:​16, 17; 1 Samu. 23:​16-18; Phili. 2:​19-22) E au oa piri tu manava tikai ratou: I akatumuia te reira ki runga i te aroa mou tikai no Iehova. Ka kitea ainei e koe te au oa aroa mou tikai ia Iehova mei ia koe rai? Kia papu meitaki e e manganui ua atu taua au oa ra ka kitea e koe i roto i te putuputuanga Kerititiano. Kare taua au oa ra e akamaroiroi ia koe kia rave i te au mea te ka akamareka kore ia Iehova. Mari ra, ka tauturu ratou ia koe kia akarongo kia Iehova, kia akavaitata roa atu kiaia, e kia ruru kia tau ki ta te vaerua. (E tatau ia Galatia 6:​7, 8.) Ka tauturu ratou ia koe kia noo tamou rai i roto i te aroa o te Atua.

Akangateitei i te Aronga i Akamanaia e te Atua

14. Eaa te au tumu e akangata putuputu ana ia tatou kia akaari i te akangateiteianga no te mana akaaere?

¹⁴ Te rua o te mataara ka akaari tatou i to tatou inangaro no Iehova, te o maira te mana akaaere. Kia akaari tatou i te akangateiteianga no te mana akaaere. Eaa ra te tumu i ngata ei ia tatou te rave i teia i tetai au taime? E akamanako ana e ko te au tangata i roto i teia au taoonga akaaere, e aronga apa ua ratou. Tetai katoa, e aronga apa ua rai tatou. E mea ngata tikai teia no tatou no te mea i anauia mai tatou ma te tu paruparu kia meameaau.

15, 16. (a) Eaa i puapinga ai no tatou kia kauraro ki te aronga ta Iehova i irinaki i te oronga i te apainga, kia akono i tona iti tangata? (e) Eaa te apiianga puapinga ka mou mai ia tatou mei te tu o to Iehova manako no runga i te tu meameaau o te ngati Iseraela kia Mose?

¹⁵ Penei ka umere paa koe e, ‘Mei te mea e te ngata ra ia tatou i te akangateitei i te mana akaaere, eaa i reira tatou ka rave ei i te reira?’ Ko te pauanga, te o maira te maroanga no te tutaraanga ngateitei a te Atua. Koai ra taau ka iki ei tutara ngateitei noou? Me ka iki tatou ia Iehova ei Tutara Ngateitei no tatou, ka anoanoia tatou kia kauraro ki tona mana akaaere. Me kare tatou e akapera, ka rauka tika ainei ia tatou kia kapiki iaia ei Tutara no tatou? Tetai katoa, e taangaanga ana a Iehova i tona mana akaaere na roto i te au tangata apa ua tana i irinaki i te oronga i te apainga, kia akono i tona iti tangata. Mei te mea e ka meameaau tatou i taua au tangata ra, mei teaa ra i reira to Iehova manako no runga i ta tatou i rave?​—E tatau ia 1 Tesalonia 5:​12, 13.

¹⁶ Ei akaraanga, i te koumuumu anga te ngati Iseraela ia Mose e i te meameaau anga, i roto i te mata o Iehova, koia ta ratou e meameaau ra. (Nume. 14:​26, 27) Kare te Atua i taui. Mei te mea e ka meameaau tatou ki te aronga tana i akamana, te meameaau ra ia tatou kiaia!

17. Eaa te tu tano tikai ta tatou ka tauta kia tatanu, no te aronga e mana akaaere to ratou i roto i te putuputuanga?

¹⁷ Te akaari maira te apotetoro ko Paulo i te tu tano tikai no tatou kia tatanu, no te aronga e apainga ta ratou i roto i te putuputuanga Kerititiano. Kua tata aia e: “E akarongo i to kotou  au arataki, e kauraro atu kotou: te tiaki ra ratou i to kotou au vaerua, e akakiteia oki ta ratou tuatua ia kotou i te Atua ra; kia akakite ra ratou ma te rekareka, eiaa ma te aue; kare oki e puapingaia ta kotou i te reira.” (Ebe. 13:17) E tika rai e, ka anoanoia tatou kia angaanga pakari i te akatupu anga i te tu akarongo e te kauraro. E akamaara ra e te tauta nei tatou kia noo tamou rai i roto i te aroa o te Atua. Kare ainei e paunaia te taime i te tauta anga?

Kia Vai Ma ua i Mua ia Iehova

18. Eaa te tumu i inangaro ei a Iehova ia tatou kia vai ma ua?

¹⁸ Te toru o te mataara ka akaari tatou i to tatou inangaro no Iehova koia oki kia tauta pakari tatou kia vai ma ua i roto i tona mata. E angaanga pakari ana te au metua i te akapapu e te ma ra ta ratou tamariki. No teaa ra? Tetai tumu no te mea, e puapinga maata te tu ma ki te oraanga kopapa meitaki o te tamaiti. Kapiti mai, ka riro te tu ma o te tamaiti ei akaraanga meitaki ki runga i te pamiri, i te akaari mai i te inangaro e te tu akono meitaki o nga metua. No taua au tu rai, a Iehova i inangaro ei ia tatou kia ma. Kua kite aia e e mea puapinga tikai te tu ma ki to tatou oraanga kopapa meitaki. Kua kite katoa aia e te akaata maira to tatou tu ma i tona tu ei Metua no tatou i te rangi. E mea puapinga maata tikai te reira, no te tangata kia inangaro i te tavini i te Atua no te mea te kite maira ratou e e tuke maata tikai tatou mei te tangata i roto i teia ao viivii.

19. Akapeea tatou i kite ei e e mea puapinga tikai te tu ma i te pae kopapa?

¹⁹ Eaa te au mataara ka inangaroia tatou kia vai ma ua? Tikaanga tikai, i roto i te au tuanga pouroa o to tatou oraanga. I roto i te iti tangata o te ngati Iseraela i taito, kua akataka meitaki a Iehova ki tona iti tangata e e mea puapinga tikai te tu ma i te pae kopapa. (Levi. 15:31) Te kapiti maira te Ture a Mose i te au mea mei te akaatea anga i te repo, te tama anga i te au vairanga apinga, e te orei anga i te rima, te vaevae e te pua anga i te kakau. (Exo. 30:​17-21; Levi. 11:32; Nume. 19:​17-20; Deu. 23:​13, 14) Kua akamaaraia ki te ngati Iseraela e e Atua tapu to ratou ko Iehova​—te aiteanga e “ma,” e “viivii kore,” e te “tapu mou.” Ka anoano katoaia te au tavini o te Atua tapu mou kia tapu rai.​—E tatau ia Levitiku 11:​44, 45.

20. Ka anoanoia tatou kia vai ma ua rai i roto i teea au mataara?

²⁰ Ka anoanoia i reira tatou kia ma, ia roto e ia vao. Ka tauta pakari tatou kia vai ma ua to tatou au manako. Ka aru tiratiratu ua rai tatou i to Iehova au turanga viivii kore, noatu te tu viivii o te au peu ainga i te ao e koropiniia nei tatou. Te mea puapinga roa atu, te umuumu nei tatou kia vai ma ua rai ta tatou akamorianga, i te kopae anga i tetai ua atu taviiviianga a te akonoanga pikikaa. Kare roa tatou e akangaropoina i te akamatakiteanga akauruia tei rekotiia i roto ia Isaia 52:11 e: “Ka aere kotou, ka aere kotou, ka aere kotou ki vao; auraka e arapaki ua atu i tetai mea viivii ra.” Teia tuatau, kia vai ma ua rai tatou i te pae vaerua, na te kore takiri anga e piri atu ki tetai ua atu mea viivii i roto i te akamorianga pikikaa. Ei akaraanga, ka akapapu tatou e auraka tatou e piri atu ki te au akamaaraanga a te akonoanga pikikaa e te au orote rongonui i roto i te ao o teia tuatau. E tika, e mea ngata tikai kia vai ma ua. Inara e tauta pakari ana te iti tangata o Iehova i te rave i te reira no te mea ka tauturu teia ia ratou kia noo tamou rai i roto i te aroa o te Atua.

21. Akapeea tatou i te akapapu anga e ka vai rai tatou i roto i te aroa o te Atua?

²¹ Te inangaro maira a Iehova ia tatou kia noo tamou ua rai i roto i tona aroa e tuatau ua atu. Inara, ka anoanoia tatou tataki tai pouroa kia akapapu e te tauta pakari ra tatou kia noo tamou rai i roto i te aroa o te Atua. Ka rauka ia tatou i te rave i teia na te aru anga i te akaraanga a Iesu e te akapapu anga i to tatou aroa no Iehova na te akarongo anga ki Tana au akauenga. Me akapera tatou, ka papu ia tatou e kare roa e apinga “e tika kia akataka ke ia tatou i te aroa o te Atua i roto i to tatou Atu ia Iesu Mesia ra.”​—Roma 8:​38, 39.

Maara Ainei ia Koe?

• Akapeea to tatou akava ngakau i te tauturu anga ia tatou kia noo tamou rai i roto i te aroa o te Atua?

• Eaa tatou ka aroa atu ei i te aronga ta Iehova e aroa ra?

• Eaa i puapinga maata ai kia kauraro ki te mana akaaere?

• Eaa ra te puapinga o te tu ma o te iti tangata o te Atua?

[Au Uianga Apii]

[Pia/​Tutu i te kapi 20]

PUKA TE AKAMAROIROI MAIRA I TE TU MEITAKI

I te taime i raveia ai te porokaramu uruoaanga tapere no te mataiti 2008/2009, kua tukuia mai tetai puka e 224 kapi, te upoko tuatua “Keep Yourselves in God’s Love.” Eaa ra te akakoroanga o teia puka ou? I tataia te reira ei tauturu i te au Kerititiano kia kite, e kia inangaro i to Iehova au turanga, i te akamou maata anga i te manako ki runga i te tu Kerititiano. Na te apii mari anga i teia puka “Keep Yourselves in God’s Love,” ka akaketaketa roaia atu to tatou irinakianga e ko te akarotai anga i te oraanga ki to Iehova au turanga, te mataara meitaki rava atu no te oraanga i teianei, e ka arataki atu te reira ki te ora mutu kore a te tuatau ki mua.

Maata atu i te reira, i tataia teia puka ei tauturu ia tatou kia kite e kare te akarongo kia Iehova i te mea teiaa. Mari ra, e mataara te reira i te akaari mai e mei teaa tikai te maata o to tatou inangaro iaia. No reira, ka akakeu teia puka ia tatou kia ui kia tatou uaorai e, ‘Eaa ra te tumu e akarongo ei au kia Iehova?’

Me tarevake ake tetai i te akaruke i te aroa o Iehova, te maataanga o te taime, ko te tu tau kore te o mai ana, e kare ko te apiianga. E mea puapinga tikai i reira e, kia akamatutu tatou i to tatou inangaro e to tatou tu ariki rekareka no te au ture e te au kaveinga a Iehova e arataki nei ia tatou i roto i te oraanga i te au ra ravarai! Te irinaki nei matou e ka riro teia puka ou ei tauturu i te au mamoe ou a Iehova i te ao katoa nei, kia vai ngaueue kore ua no te mea tika, kia akapapu e e pikikaa a Satani, e ei runga ravao, kia noo tamou rai i roto i te aroa o te Atua!​—Iuda 21.

[Tutu i te kapi 18]

“Me akono kotou i taku au akauenga, ka noo tamou rai kotou i roto i toku aroa, mei iaku i akono i te au akauenga a taku Metua e kua noo tamou rai i roto i tona aroa.”