Kitea Mai te Au Apinga Puapinga Maata Tei Unaia

E APINGA puapinga maata rai tei kiteaia mai ana e koe i tetai ngai kare rava koe i manako ana? Kua tupu te reira kia Ivo Laud, tetai o te Au Kite o Iehova i Etonia, i roto ia Mati ra 27, mataiti 2005. Te tauturu ra aia ia Alma Vardja, e Kite pakarikari, i te vavai i tetai kapakapa taito. I te akaatea mai anga raua i te paruru i vao, kua kite raua i tetai papa rakau e arai ra i tetai tua ua, o tetai pou. I te akaatea mai anga i te papa, kua kitea mai e raua tetai ngai va ua mei te 10 teni mita te atea, e 1.2 mita te roroa, e e 10 teni mita te oonu, tei tapokiia ki tetai vaanga rakau mei te reira rai te maata. (1) E ngai uuna anga au apinga puapinga maata! Eaa ra taua au apinga puapinga maata ra? Naai ra i uuna i te reira ki reira?

E maata te au kou i taua ngai ra, kua vai meitakiia ki te pepa petetue. (2) E au puka to roto i taua au kou ra na te  Au Kite o Iehova, te maataanga e au atikara apii no te Watchtower, tetai papaki no te mataiti 1947. (3) Kua tata meitakiia te reira i roto i te reo Etonia. Tetai au kou, tei roto tetai au akapapuanga e naai i uuna i taua au puka ra ki reira. E au rekoti te reira no te uiui taeeia anga te tane a Alma, ko Villem Vardja. Tetai katoa i roto i taua au mea i kiteaia mai koia oki e au akakiteanga no runga i te au mataiti iaia i roto i te are auri. Eaa ra te tumu i akamouauriia ai aia?

E au apainga ta Villem Vardja iaia e tavini ra i rotopu i te Au Kite i roto i te Putuputuanga i Tartu, e i muri mai, i roto i te Putuputuanga i Otepää i Etonia, tetai o te Soviet Socialist Republics (Repapuriki Totiariti o Toviete) i mua ana. Kua apiiia aia i te tuatua mou o te Pipiria i tetai taime i mua ake i te Tamaki II o te Ao. I etai au mataiti i muri mai, i te ra 24 o Titema, i te mataiti 1948, kua opuia te Taeake Vardja e te kavamani Komuniti no tana angaanga akonoanga. Kua uiui taeeia aia e kua takinokinoia e te akava muna ia ratou e titau ra i te maro iaia kia akakite atu i te au ingoa o tona au taeake irinaki. I muri ake i te patoiia anga tetai tikaanga nona kia paruru iaia uaorai i roto i te akavaanga, kua akautungaia aia e tai ngauru mataiti i roto i te au aua mouauri i Rutia.

Kua vai akarongo mou rai a Villem Vardja kia Iehova e tae ua atu ki tona matenga i te ra 6 o Mati, mataiti 1990. Kare roa tana vaine i kite ana e te vai ra taua au puka ra. Kare e kore kua inangaro aia i te paruru i tana vaine, e ua ake e, ka uiui taeeia aia. Eaa ra te tumu i uuna ai aia i te au puka? I uuna aia i te reira no te mea e aere poitirere ua mai ana te Soviet State Security Committee (Kumiti Paruru o te Kavamani Toviete), te KGB, i te tureru i te au kainga o te Au Kite o Iehova, i te kimi i te au puka a te akonoanga. Kare katoa rai e kore e, i uuna te Taeake Vardja i te au puka i te akapapu meitaki e, e kai pae vaerua tetai e vai ra na te au taeake irinaki, e ua ake e ka apainaia te au mea katoatoa e te KGB. I muao i te tuatau maana o te mataiti 1990, kua kiteaia mai tetai au ngai ke atu i unaia ai te au puka. E tai, tei kiteaia mai i Tartu, te tua tonga o Etonia. Na Villem Vardja katoa rai te reira i uuna.

Eaa ra tatou ka karanga ai e, e au apinga puapinga maata teia au puka nei? No te mea te akaari mai nei teia au puka tei akono meitakiia te tata anga e tei ngaro meitaki te unaia anga e, e akaperepere maata tikai to te Au Kite i te kai pae vaerua tei rauka ia ratou i taua tuatau ra. (Mata. 24:45) Te akaperepere maata ra ainei koe i te au mea pae vaerua e rauka maira ia koe i te ngai e noo ra koe? Tetai i roto i taua au puka ra koia oki ko Te Punanga Tiaki i roto i te reo Etonia e tetai au reo ke atu, e 170 tuma.